1. Yini lesenta sijabule futsi sitigcabe ngekuba BoFakazi BaJehova?

SIJABULA kakhulu ngekuba BoFakazi BaJehova futsi siyatigcabha ngaloko! Sibantfu baJehova, futsi siyakhombisa kutsi sibofakazi bakhe ngekutsi sishumayele futsi sifundzise labanye ngaye. Siyajabula nasisita lotsite ‘lotimisele kutfola kuphila lokuphakadze’ kutsi abhajatiswe. (Imis. 13:48) Sitiva njengaJesu ‘lowajabula kakhulu futsi wagcwala umoya longcwele’ ngesikhatsi bafundzi bakhe bamtjela ngalokuhle lebekwentekile nabashumayela.—Luk. 10:1, 17, 21.

2. Singakhombisa njani kutsi siwutsatsa njengalobalulekile umsebenti wekushumayela?

² Siwutsatsa njengalobalulekile umsebenti wetfu wekushumayela. Umphostoli Pawula wakhutsata Thimothi watsi: “Hlale utinaka wena, unake naloko lokufundzisako.” Wachubeka watsi: “Nawenta njalo utawutisindzisa wena kanye nalabo labakulalelako.” (1 Thim. 4:16) Ngako kushumayela kwetfu kusindzisa kuphila kwebantfu. Sihlale sitinaka tsine ngobe sitakhamiti teMbuso waNkulunkulu. Sifuna kuhlale sitiphatsa ngendlela letawudvumisa Jehova futsi letawukhombisa kutsi siyatikholelwa letindzaba letimnandzi lesitishumayelako. (Fil. 1:27) Sikhombisa kutsi ‘siyayinaka indlela lesifundzisa ngayo’ ngekutsi silungiselele kahle ngaphambi kwekutsi siyoshumayela nangekutsi sicele Jehova asisite.

3. Labanye bangawemukela njani umlayeto weMbuso? Niketa sibonelo.

³ Ngisho nobe singenta konkhe lokusemandleni etfu, kungenteka ungemukelwa kahle umlayeto weMbuso endzaweni lesishumayela kuyo. Cabanga ngesibonelo seMzalwane Georg Lindal, lobekashumayela yedvwa etindzaweni letehlukene tase-Iceland kusukela nga-1929 kuya ku-1947. Wahambisa  tinkhulungwane tetincwadzi; kodvwa kute ngisho namunye lowemukela liciniso. Wabhala watsi: “Labanye bamelene neliciniso, kantsi linyenti alinendzaba nalo.” Nangemuva kwekutsi kufike titfunywa telivangeni lebeticeceshwe eGileyadi kuze tichubeke nalomsebenti, kwaphela leminye iminyaka lengu-9 solo kute bantfu base-Iceland labatinikela kuJehova futsi babhajatiswa. *

4. Singativa njani nangabe bantfu bangatemukeli tindzaba letimnandzi?

⁴ Siyadvumala nangabe bantfu bangatsandzi kudadisha natsi liBhayibheli. Kungeka sitive njengaPawula lowaba ‘lusizi kakhulu futsi inhlitiyo yakhe yeva buhlungu lobungapheli’ ngenca yekutsi emaJuda lamanyenti bekangafuni kukholelwa kutsi Jesu unguMesiya. (Rom. 9:1-3) Kutsiwani nangabe wenta konkhe longakwenta futsi umthantazela umuntfu lodadisha naye liBhayibheli kodvwa angatfutfuki, futsi kudzingeke kutsi uyekele kudadisha naye? Nobe kutsiwani nangabe ungazange sewudadishe liBhayibheli nemuntfu aze abhajatiswe? Kufanele ucabange kutsi lelo liphutsa lakho yini, nobe ucabange kutsi Jehova akawubusisi umsebenti wakho? Kulesihloko, sitawuphendvula nayi imibuto lemibili: (1) Yini lekhombisa kutsi umsebenti wetfu uyaphumelela? (2) Yini lokufanele siyilindzele nasishumayela?

5. Kungani ngaletinye tikhatsi umsebenti lesiwentela Jehova ungabi nemiphumela lesiyilindzele?

⁵ LiBhayibheli nalikhuluma ngemuntfu lowenta intsandvo yaNkulunkulu, litsi: “Konkhe lakwentako kutawuphumelela.” (Hla. 1:3) Kodvwa loko akusho kutsi konkhe lesikwentela Jehova kutawenteka njengobe sifisile. Kuphila ‘kugcwele tinkinga’ ngenca yemaphutsa lesiwentako kanye nalawo lentiwa ngulabanye. (Jobe 14:1) Ngetulu kwaloko, labo labasiphikisako bangahle basivimbele kutsi sishumayele. (1 Khor. 16:9; 1 Thes. 2:18) Ngako Jehova uncuma njani kutsi umsebenti wetfu uyaphumelela? Ase sicoce ngaletinye timiso teliBhayibheli letitasisita siphendvule lombuto.

6. Jehova uncuma njani kutsi umsebenti wetfu wekushumayela uyaphumelela?

⁶ Jehova ubuka imetamo yetfu nekucinisela kwetfu. Jehova uyajabula nasishumayela ngekutimisela ngobe simtsandza ngisho nobe bantfu bangasilaleli. Pawula wabhala watsi: “Nkulunkulu ulungile, ngako ngeke awukhohlwe umsebenti wenu nelutsandvo lenibe nalo ngelibito lakhe, ngekutsi benibasita labangcwele futsi niyachubeka nibasita.” (Heb. 6:10) Jehova ukhumbula umsebenti wetfu nelutsandvo lesilukhombisile ngisho nobe kute umuntfu lesidadishe naye liBhayibheli waze wabhajatiswa. Ngako kungakusita loko Pawula lakutjela baseKhorinte nakatsi:  “Kutikhandla kwenu akusilo lite eNkhosini,” ngisho nobe bantfu bakulalela nobe bangakulaleli.—1 Khor. 15:58.

7. Yini lesingayifundza kuloko umphostoli Pawula lakusho ngemsebenti wakhe wekushumayela?

⁷ Umphostoli Pawula bekasitfunywa selivangeli lesiphumelelako, asungula emabandla emadolobheni lamanyenti. Kodvwa ngesikhatsi labanye bamsola, batsi akasuye umfundzisi lokahle, akazange akhulume ngekutsi usite bantfu labanyenti kangakanani kutsi babe ngemaKhristu. Kunaloko, Pawula wabhala watsi: “Ngente umsebenti lomnyenti.” (2 Khor. 11:23) NjengaPawula, khumbula kutsi lokubaluleke kakhulu kuJehova kusebenta kamatima nekucinisela.

8. Yini lokufanele siyikhumbule ngemsebenti wetfu wekushumayela?

⁸ Umsebenti wetfu wekushumayela uyamjabulisa Jehova. Jesu watfuma bafundzi bakhe labangu-70 kutsi bayoshumayela ngemlayeto weMbuso, futsi “babuya bajabulile.” Yini lebeyibajabulisile? Batsi: “Ngisho nemadimoni ayasilalela nasiwekhuta sisebentisa libito lakho.” Kodvwa Jesu wayilungisa indlela lebebacabanga ngayo ngekutsi atsi: “Ningajatjuliswa kutsi emadimoni ayanilalela, kunaloko jabulani ngenca yekutsi emabito enu abhaliwe emazulwini.” (Luk. 10:17-20) Jesu bekati kutsi bebangeke bahlale batfola imiphumela lemihle nabashumayela. Ecinisweni, asati kutsi bangakhi labeva tindzaba letimnadzi kulabafundzi labagcine bangemaKhristu. Labafundzi bekudzingeka bacondze kutsi injabulo yabo beyingayi nje kuphela ngekutsi bantfu bayabalalela, kodvwa injabulo lenkhulu bebatayitfola ngekwati kutsi Jehova uyajabula ngemsebenti wabo lomatima.

9. Ngekusho kwembhalo waKubaseGalathiya 6:7-9, kutawentekani nangabe sichubeka sishumayela?

⁹ Nasichubeka sishumayela, sitawutfola kuphila lokuphakadze. Nasenta konkhe lokusemandleni etfu kuze sishumayele futsi sifundzise ngetindzaba letimnandzi, sisuke ‘sihlanyela sinembono wemoya’ ngekutsi sivumele umoya longcwele waNkulunkulu usebente kitsi. Nangabe ‘singapheli emandla’ nobe ‘singadzinwa,’ Jehova uyasetsembisa kutsi utasinika kuphila lokuphakadze ngisho nobe kute umuntfu lesimsitile kutsi abhajatiswe.—Fundza KubaseGalathiya 6:7-9.

10. Yini lencuma kutsi bantfu batasilalela yini nasishumayela?

¹⁰ Kuya ngebantfu kutsi bayafuna yini kulemukela liciniso. Jesu wachaza leliciniso asebentisa umfanekiso lomayelana nemhlanyeli lowahlanyela inhlanyelo emhlabatsini longafani, kodvwa yinye leyatsela titselo. (Luk. 8:5-8) Jesu watsi lomhlabatsi longafani umelela bantfu labalemukela ngetindlela letingafani “livi laNkulunkulu.” (Luk. 8:11-15) Njengalomhlanyeli, natsi angeke sikhone kulawula indlela bantfu labawemukela ngayo umlayeto wetfu, ngobe loko kuya ngesimo senhlitiyo yabo. Umsebenti wetfu kuchubeka sihlanyela inhlanyelo yemlayeto weMbuso. Umphostoli Pawula watsi “nguloyo naloyo utawutfola umvuzo kuye ngemsebenti lawentile,” hhayi ngemiphumela yemsebenti wakhe.—1 Khor. 3:8.

11. Kungani Nowa aphumelela kuba ‘ngumshumayeli wekulunga’? (Buka sitfombe lesisekhasini lekucala.)

¹¹ Kusukela kadzeni, tikhonti taJehova betisolo tishumayela bantfu labangalaleli. Nasi sibonelo, kwaphela iminyaka leminyenti Nowa ‘angumshumayeli wekulunga.’ (2 Phet. 2:5) Siyaciniseka kutsi beketsemba kutsi labanye batamlalela, kodvwa Jehova akazange atsi loko bekutawenteka. Kunaloko, ngesikhatsi Nkulunkulu atjela Nowa kutsi akhe umkhumbi,  watsi: “Kufanele ungene kulomkhumbi, wena nemadvodzana akho, kanye nemfati wakho nabomalukatane bakho.” (Gen. 6:18) Ngesikhatsi Nkulunkulu amtjela kutsi akhe umkhumbi longakanani, kungenteka Nowa wabona kutsi bancane bantfu bebatawulalela ngobe bekutawuba bete sikhala sebantfu labanyenti. (Gen. 6:15) Njengobe sati, kute ngisho namunye lowalalela Nowa. (Gen. 7:7) Jehova wamtsatsa njengesehluleki yini? Cha! KuNkulunkulu, Nowa bekaphumelele emsebentini wakhe wekushumayela ngobe bekawente ngekwetsembeka umsebenti Jehova lebekamnikete wona.—Gen. 6:22.

12. Yini leyasita umphrofethi Jeremiya kutsi ajabule nakashumayela ngisho nobe bantfu bebangamlaleli futsi bamphikisa?

¹² Ngendlela lefanako, umphrofethi Jeremiya washumayela iminyaka leminyenti ngisho nobe bantfu bebangamlaleli futsi bamphikisa. Wadvumateka kakhulu ngenca yekutsi labo bebamphikisa ‘bebametfuka futsi bahlekisa ngaye’ kangangekutsi besekafuna kuwuyekela lomsebenti. (Jer. 20:8, 9) Kodvwa akazange aphele emandla! Yini leyamsita kutsi ancobe kudvumateka futsi ajabule emsebentini wakhe wekushumayela? Wanaka nati tintfo letimbili. Kwekucala, umlayeto waNkulunkulu lebekawutjela labantfu bewutawubanika ‘likusasa lelihle kanye nelitsemba.’ (Jer. 29:11) Kwesibili, Jehova bekakhetse Jeremiya kutsi endlulisele umlayeto wakhe kulabantfu. (Jer. 15:16) Natsi sishumayela ngemlayeto loletsa litsemba kulelive lelibi, futsi sibitwa ngelibito laNkulunkulu. Nangabe sinaka letintfo letimbili, singajabula ngisho bantfu bangalaleli.

13. Yini lesiyifundza emfanekisweni waJesu lokuMakho 4:26-29?

¹³ Kutsatsa sikhatsi kutsi umuntfu abe nekukholwa. Jesu wasebentisa umfanekiso wemhlanyeli lowalala kuze achaze lendzaba. (Fundza Makho 4:26-29.) Ngemuva kwekutsi lomhlanyeli sekahlanyele, lenhlanyelo yakhula kancane kancane, futsi kute lebekangakwenta kuze isheshe ikhule. Kungenteka nawe kudzingeke kutsi ulindze sikhatsi ngaphambi kwekutsi ubone kutsi umuntfu lodadisha naye liBhayibheli uyakusebentisa loko lakufundzako. Njengobe nemlimi angeke akhone kwenta loko lakuhlanyele kutsi kusheshe kukhule, natsi angeke sikhone kwenta labo lesidadisha nabo liBhayibheli kutsi basheshe batfutfuke ngendlela lesifisa ngayo. Ngako ungadvumateki nobe uphele emandla nangabe kutsatsa sikhatsi lesidze kunaleso bewusilindzele kutsi batfutfuke. Njengekulima, kwenta bafundzi kudzinga sineke.—Jak. 5:7, 8.

14. Ngusiphi sibonelo lesikhombisa kutsi kungahle kutsatse sikhatsi lesidze kutsi bantfu bacale kusilalela?

¹⁴ Kuletinye tindzawo, kungatsatsa sikhatsi lesidze ngaphambi kwekutsi kube khona lobhajatiswako. Cabanga ngalokwenteka kuGladys naRuby Allen, lababosisi, labacelwa kutsi babe ngemahlahlandlela lavamile nga-1959, edolobheni leliseCanada lokutsiwa yiQuebec. * Ngesizatfu sekutsi bantfu bebesaba kutsi bomakhelwane babo nebafundisi batawutsini nabababona bakhuluma naboFakazi, bebangabalaleli. Gladys utsi: “Kwaphela iminyaka lemibili singena emtini ngemuti ema-awa langu-8 onkhe malanga, kodvwa kute ngisho namunye lobekasilalela! Bebavela emnyango, babone kutsi ngitsi bavele bajike. Kodvwa asizange siphele emandla.” Ngemuva kwesikhatsi, labantfu bacala kuba nebungani futsi bacala kulalela. Nyalo sekunemabandla lamatsatfu kulelidolobha.—Isa. 60:22.

15. Umbhalo wa-1 KubaseKhorinte 3:6, 7 usifundzisani ngemsebenti wekwenta bafundzi?

 ¹⁵ Banyenti bantfu labadzingekako kuze basite umuntfu abe ngumfundzi. Wonkhe muntfu ebandleni angasita kutsi lotsite agcine abhajatisiwe. (Fundza 1 KubaseKhorinte 3:6, 7.) Asesitsi umzalwane uniketa umuntfu lotsite lofuna kufundza lipheshana nobe magazini. Kodvwa lomzalwane akakhoni kubuyela kulomuntfu, ngako ucela lomunye umzalwane kutsi abuyele kuye. Lomzalwane ucalisa sifundvo seliBhayibheli nalomuntfu. Ngemuva kwaloko, umema labanye bazalwane nabodzadze kutsi babe khona kulesifundvo, futsi bonkhe bakhutsata lomfundzi ngetindlela letehlukene. Bonkhe bazalwane nabodzadze batomkhutsata kutsi acinise kukholwa kwakhe. Ngaleyondlela, bonkhe lababe nesandla ekusiteni lomfundzi batawujabula nabambona abhajatiswa.—Joh. 4:35-38.

16. Yini lengakwenta ujabule emsebentini wekushumayela ngisho nobe kukuncane lokhona kukwenta ngenca yemphilo lebutsakatsaka?

¹⁶ Kutsiwani nangabe imphilo lebutsakatsaka yenta ungasakhoni kushumayela nekufundzisa tindzaba letimnandzi ngendlela lebewukwenta ngayo ngaphambili? Ungajabula ngaloko losakhona kukwenta. Cabanga ngalokwentiwa yiNkhosi Davide ngesikhatsi yona kanye nemadvodza lebeyihamba nawo bakhulula imindeni yabo futsi batsatsa netintfo tabo kuma-Amaleki. Emadvodza langu-200 bekadzinwe kakhulu kutsi angaya kuyokulwa, ngako asala agadza imitfwalo. Ngemuva kwekutsi bancobe kulemphi, Davide watsi abehlukaniselane bonkhe ngalokulinganako tintfo tema-Amaleki. (1 Sam. 30:21-25) Loku kuyafana nemsebenti wekwenta bafundzi lowentiwa emhlabeni wonkhe. Nangabe sonkhe senta lokusemandleni etfu emsebentini wekushumayela, siyajabula nakukhona lofundze ngaJehova futsi wabhajatiswa.

17. Kungani simbonga Jehova?

¹⁷ Siyambonga Jehova ngekuwubuka ngendlela lenelutsandvo umsebenti lesimentela wona. Uyati kutsi angeke sikhone kuphocelela bantfu kutsi basilalele nobe bacale kumkhonta. Nobe kunjalo, uyakubona kutimisela kwetfu nekutsi simtsandza kangakanani futsi uyasibusisa. Uphindze asifundzise indlela yekutfola injabulo ngaloko lesikhona kukwenta emsebentini wekushumayela. (Joh. 14:12) Singaciniseka kutsi Nkulunkulu utasibusisa nangabe singapheli emandla!