1. Tanbasá ita kontente no orgullu atu sai nuʼudar Testemuña?

ITA kontente no orgullu atu sai nuʼudar Testemuña ba Jeová. Ita mak Jeová nia Testemuña no ita prova ida-neʼe liuhusi haklaken no hanorin ema seluk. Ita sente kontente bainhira ita bele ajuda ema neʼebé “prontu atu simu lia-loos” atu sai fiar-naʼin. (Após 13:48) Jesus “haksolok” bainhira ninia dixípulu sira konta kona-ba susesu neʼebé sira hetan iha serbisu haklaken, no ita mós sente nuneʼe.—Lc 10:1, 17, 21.

2. Oinsá ita hatudu katak serbisu haklaken mak importante?

² Serbisu haklaken mak importante tebes. Apóstolu Paulo anima Timóteo hodi hatete: “Kontinua hanoin didiʼak ó-nia an no ó-nia hanorin.” Nia mós hatete: “Hodi halo nuneʼe mak ó sei salva ó-nia an rasik no mós ema sira neʼebé rona ó.” (1 Tim 4:16) Entaun ita-nia serbisu haklaken salva ema nia moris. Ita kontinua hanoin didiʼak kona-ba ita-nia hahalok tanba ita mak povu husi Maromak nia Ukun. Ita hakarak ita-nia hahalok hotu lori glória ba Jeová no hatudu katak ita fiar lia-loos neʼebé ita haklaken. (Flp 1:27) Ita hatudu katak ita ‘hanoin didiʼak ita-nia hanorin’ liuhusi prepara didiʼak ba haklaken no husu Jeová ajuda ita antes haklaken ba ema seluk.

3. Ema hotu interese ba lia-loos ka lae? Konta toʼok ezemplu ida.

³ Maski ita hakaʼas an atu haklaken ba ema seluk, maibé ema barak iha ita-nia área karik la interese ba lia-loos. Haree toʼok esperiénsia husi irmaun Georg Lindal neʼebé haklaken mesak iha área oioin iha rai-Izlándia husi tinan 1929 toʼo tinan 1947. Nia fahe publikasaun rihun ba rihun, maibé la iha ema ida mak simu lia-loos. Nia hakerek:  “Ema balu kontra lia-loos, maibé ema barak liu la interese.” Misionáriu sira neʼebé gradua husi Eskola Gilead mós bá haklaken iha rai-Izlándia, no durante tinan sia la iha ema ida mak hatudu interese ba lia-loos. Maibé depois neʼe mak foin iha ema Izlandés ida neʼebé dedika an no hetan batizmu. *

4. Karik Ita sente oinsá bainhira ema lakohi rona ba liafuan diʼak?

⁴ Ita sente triste bainhira ema la interese atu estuda Bíblia. Karik ita sente hanesan Paulo neʼebé “laran-triste tebes no fuan moras loos” tanba ema Judeu barak lakohi fiar katak Jesus mak Mesias neʼebé Maromak promete ona. (Rom 9:1-3) Karik agora daudaun Ita estuda Bíblia ho ema ruma. Ita hakaʼas an atu sai mestre neʼebé diʼak no Ita halo orasaun beibeik kona-ba Ita-nia estudante neʼe. Maibé nia la aplika buat neʼebé nia aprende, no Ita presiza para estuda ho nia. Ka karik Ita seidauk ajuda ema ida atu laʼo ba oin no hetan batizmu. Neʼe katak Ita la halaʼo Ita-nia knaar ho didiʼak no Jeová la haraik bensaun ba Ita-nia serbisu haklaken ka lae? Lisaun neʼe sei hatán ba pergunta rua: (1) Saida mak hatudu katak ita-nia serbisu haklaken susesu? (2) Ita presiza iha hanoin oinsá kuandu haklaken ba ema seluk?

5. Tanbasá dala ruma ita-nia serbisu ba Jeová la hetan susesu tuir ita-nia hakarak?

⁵ Bíblia esplika kona-ba ema neʼebé halo Maromak nia hakarak, hodi hatete: “Nia sei hetan susesu iha buat hotu neʼebé nia halo.” (Sal 1:3) Maibé neʼe la dehan katak buat hotu neʼebé ita halo ba Jeová sei susesu tuir ita-nia hakarak. Ema nia moris mak “nakonu ho susar” tanba ita hotu la perfeitu. (Job 14:1) Liután neʼe, karik kontradór sira mós konsege hanetik ita atu haklaken ho livre. (1 Kor 16:9; 1 Tes 2:18) Entaun, oinsá mak Jeová deside katak ita-nia serbisu haklaken susesu? Mai ita hanoin kona-ba Bíblia nia prinsípiu balu.

6. Oinsá mak Jeová deside katak ita-nia serbisu haklaken susesu?

⁶ Jeová tau atensaun ba ita-nia hakaʼas an no haree katak ita la rende an. Tuir Jeová nia haree, ita hetan susesu kuandu ita haklaken ho laran-manas tanba hadomi nia, maski ema lakohi rona. Paulo hakerek: “Maromak nunka hatudu hahalok aat hodi haluha imi-nia serbisu no imi-nia domin neʼebé imi hatudu ona ba ninia naran, tanba imi serbí ona no kontinua serbí ema santu sira.” (Ebr 6:10) Jeová hanoin-hetan ita-nia serbisu no ita-nia domin, maski karik ita-nia estudante Bíblia ida  la hetan batizmu. Tan neʼe, maski karik ita-nia serbisu la fó rezultadu neʼebé ita hakarak, maibé ita bele fiar katak ‘serbisu neʼebé ita halo ba Naʼi sei la sai saugati deʼit’.—1 Kor 15:58.

7. Ita bele aprende saida husi apóstolu Paulo nia liafuan kona-ba ninia haklaken?

⁷ Apóstolu Paulo mak misionáriu neʼebé matenek tebes, nia ajuda forma kongregasaun sira iha sidade barak. Maibé bainhira ema balu kritika Paulo no hatete katak nia laʼós mestre neʼebé diʼak, nia la koʼalia kona-ba ema naʼin-hira mak nia ajuda ona atu sai ema Kristaun. Duké halo nuneʼe, Paulo hakerek: “Haʼu halo ona serbisu barak liu.” (2 Kor 11:23) Hanesan Paulo, ita presiza hanoin-hetan katak buat neʼebé importante ba Jeová mak ita-nia hakaʼas an no la rende an.

8. Saida mak ita presiza hanoin-hetan kona-ba serbisu haklaken?

⁸ Ita-nia serbisu haklaken halo Jeová kontente. Jesus haruka ninia dixípulu naʼin-70 atu haklaken kona-ba Maromak nia Ukun no sira “fila ho haksolok”. Tanbasá? Sira hatete: “Anju aat sira mós hakruʼuk ba ami bainhira ami uza Ita-Boot nia naran.” Maibé Jesus korrije sira hodi hatete: “Keta haksolok tanba anju aat sira hakruʼuk ba imi, maibé haksolok bá tanba imi-nia naran hakerek tiha ona iha lalehan.” (Lc 10:17-20) Jesus hatene katak esperiénsia diʼak hanesan neʼe la akontese beibeik. Ita la hatene ho loloos, ema naʼin-hira mak sai ema Kristaun depois rona liafuan diʼak husi dixípulu sira. Dixípulu sira presiza komprende katak haksolok la mai deʼit husi buat neʼebé sira kumpre, maibé mós husi hatene katak Jeová kontente ho sira-nia hakaʼas an atu haklaken.

9. Tuir Galásia 6:7-9, saida mak sei akontese se ita la rende an atu haklaken?

⁹ Se ita kontinua haklaken, ita sei moris ba nafatin. Bainhira ita hakaʼas an atu haklaken no hanorin liafuan diʼak, ita mós “kari hodi tuir espíritu” tanba ita husik Maromak nia espíritu santu atu ajuda ita-nia moris. Se ita ‘la rende an’ ka la “sai kole”, Jeová promete katak nia sei fó ita moris ba nafatin maski karik ita la ajuda ema ida laʼo ba oin no hetan batizmu.—Lee Galásia 6:7-9.

10. Tanbasá ema balu rona ba lia-loos no balu lae?

¹⁰ Ema nia desizaun atu simu lia-loos depende ba sira-nia laran. Jesus esplika ida-neʼe iha ninia ai-knanoik kona-ba ema neʼebé kari fini iha rai oioin, maibé fini ida deʼit mak moris no fó fuan. (Lc 8:5-8) Jesus hatete katak rai sira-neʼe reprezenta ema nia laran no dalan neʼebé sira simu “Maromak nia Liafuan” mak la hanesan. (Lc 8:11-15) Hanesan ema neʼebé kari fini, ita la iha kbiit atu kontrola rezultadu husi ita-nia serbisu haklaken, tanba neʼe depende ba ema ida-idak nia laran. Ita-nia responsabilidade mak kontinua kari fini lia-loos. Hanesan Paulo hatete ona, ema ida-idak sei simu kolen tuir sira-nia serbisu rasik, laʼós tuir rezultadu husi sira-nia serbisu.—1 Kor 3:8.

11. Tanbasá Jeová haree katak Noé hetan susesu iha serbisu haklaken? (Haree dezeñu iha livru oin.)

¹¹ Ba tinan barak, Jeová nia povu haklaken ba ema neʼebé lakohi rona ba lia-loos. Porezemplu, Noé mak “haklaken-naʼin kona-ba justisa” karik ba tinan 40 ka 50. (2 Ped 2:5) Klaru katak nia espera ema sei rona ba ninia mensajen, maibé Jeová la hatete katak ida-neʼe sei akontese.  Kuandu Jeová haruka Noé atu harii ró, Maromak hatete: “Ó hamutuk ho ó-nia oan-mane sira, ó-nia feen, no ó-nia feto-foun sira tenke tama ba ró laran.” (Gén 6:18) No bainhira Maromak esplika kona-ba ró nia medida, karik Noé komprende katak laʼós ema barak mak sei rona ba avizu neʼebé nia sei hatoʼo, tanba la iha fatin ba sira iha ró laran. (Gén 6:15) Tuir loloos, la iha ema ida mak rona ba Noé. (Gén 7:7) Jeová hanoin katak Noé la haklaken ho didiʼak ka lae? Lae. Jeová haree katak Noé hetan susesu tanba nia halo tuir duni buat neʼebé Jeová husu nia atu halo.—Gén 6:22.

12. Oinsá profeta Jeremias sente kontente ho ninia haklaken maski ema lakohi rona no kontra?

¹² Profeta Jeremias haklaken maizumenus ba tinan 40 liu, maski ema lakohi rona no kontra nia. Nia sai laran-kraik tanba kontradór sira “koʼalia aat no goza” nia toʼo nia hanoin atu rende an deʼit. (Jer 20:8, 9) Maibé Jeremias la rende an. Saida mak ajuda nia atu kontinua haklaken ho kontente? Nia tau fokus ba faktu rua neʼebé importante. Primeiru, Maromak nia mensajen neʼebé Jeremias fó sai ba povu sei fó “futuru kapás no esperansa” ba sira. (Jer 29:11) Segundu, Jeová hili ona Jeremias atu reprezenta nia. (Jer 15:16) Ita mós lori mensajen neʼebé fó esperansa ba ema iha mundu neʼe, no ita reprezenta Jeová nuʼudar ninia Testemuña. Bainhira ita tau fokus ba faktu rua neʼe, ita bele sente kontente maski ema lakohi rona ba ita.

13. Ita aprende saida husi Jesus nia ai-knanoik iha Marcos 4:26-29?

¹³ Presiza tempu atu ema ida iha fiar metin. Jesus hanorin ida-neʼe iha ninia ai-knanoik kona-ba mane ida neʼebé kari fini no toba. (Lee Marcos 4:26-29.) Depois mane neʼe kari tiha fini sira, presiza tempu atu fini sira-neʼe moris. No mane neʼe la iha kbiit atu halo fini sira-neʼe moris lalais. Karik ita mós presiza hein tempu kleur antes ita haree ita-nia estudante Bíblia aplika buat neʼebé nia aprende. Toʼos-naʼin labele obriga fini neʼebé nia kuda atu moris lalais tuir ninia hakarak, ita mós labele obriga ita-nia estudante atu laʼo ba oin tuir ita-nia hakarak. Tan neʼe, keta sai laran-kraik ka rende an se presiza tempu kleur atu ita-nia estudante laʼo ba oin. Hanesan toʼos-naʼin, ita presiza hatudu pasiénsia toʼo ita-nia estudante deside atu serbí Jeová.—Tgo 5:7, 8.

14. Ezemplu saida mak hatudu katak presiza tempu atu hetan rezultadu diʼak?

¹⁴ Iha área balu, presiza tinan barak antes estudante Bíblia ida deside atu hetan batizmu. Porezemplu, irmán Gladys no Ruby Allen mak biin-alin no iha tinan 1959 sira hetan knaar nuʼudar pioneiru regulár iha sidade ida iha provínsia Kebeke, Kanadá. * Tanba ema taʼuk ba viziñu no padre sira, sira lakohi koʼalia ka rona ba Testemuña ba Jeová. Irmán Gladys konta: “Ami haklaken husi uma ba uma oras ualu loroloron durante tinan rua, maibé la iha ema ida mak loke sira-nia odamatan ba ami. Sira hakbesik ba sira-nia odamatan, hafuhu sai no ikusmai bá tiha. Maibé ami la rende an.” Neineik-neineik, ema nia hahalok troka no sira balu komesa rona ba lia-loos. Agora iha kongregasaun tolu iha sidade neʼe.—Isa 60:22.

15. 1 Korinto 3:6, 7 fó sai saida kona-ba hanorin ema sai dixípulu?

 ¹⁵ Presiza serbisu hamutuk atu ajuda ema sai dixípulu. Ema hotu iha kongregasaun bele hola parte atu ajuda ema ida hetan batizmu. (Lee 1 Korinto 3:6, 7.) Porezemplu, irmaun ida fó panfletu ida ka revista ida ba ema neʼebé interese. Maibé irmaun neʼe la iha tempu atu vizita fali ema neʼe. Tan neʼe, nia husu irmaun seluk atu vizita. Ikusmai, irmaun neʼe komesa estuda Bíblia ho ema neʼe. Nia mós konvida irmaun ka irmán balu atu akompaña ninia estuda no sira ida-idak anima estudante neʼe iha dalan oioin. Irmaun-irmán sira neʼebé estudante neʼe hasoru sei ajuda nia atu aprende liután kona-ba Jeová. Entaun hanesan Jesus hatete, sira hotu neʼebé serbisu makaʼas atu ajuda ema ida, bele sente kontente bainhira ema neʼe hetan batizmu.—João 4:35-38.

16. Tanbasá Ita bele nafatin sente kontente iha serbisu haklaken maski karik Ita iha problema saúde ka la iha kbiit?

¹⁶ Karik agora Ita ladún bele haklaken no hanorin tanba problema saúde ka Ita-nia kbiit sai menus. Maibé Ita bele nafatin sente kontente ho buat neʼebé Ita halo. Hanoin toʼok Liurai David nia esperiénsia bainhira nia no ninia soldadu sira salva sira-nia família no rikusoin husi ema Amalec. Soldadu naʼin-200 kole loos atu halo funu, tan neʼe sira proteje sasán sira. David no ninia soldadu sira manán funu, no tuirmai David hatete katak ema hotu tenke simu parte neʼebé hanesan maski sira bá funu ka lae. (1 Sam 30:21-25) Istória neʼe hanorin ita buat ida kona-ba serbisu atu hanorin ema sai dixípulu. Ema hotu neʼebé hakaʼas an atu haklaken tuir sira-nia kbiit, bele sente kontente bainhira ema ida aprende kona-ba Jeová no hetan batizmu.

17. Ita agradese ba Jeová kona-ba saida?

¹⁷ Ita agradese ba Jeová tanba nia hafolin ita-nia serbisu ba nia. Nia hatene katak ita labele obriga ema atu rona ba ita ka atu adora nia. Maibé nia haree ita-nia hakaʼas an no ita-nia domin, no nia sei haraik bensaun duni ba ita. Nia mós hanorin ita oinsá atu sente haksolok bainhira ita hakaʼas an ona tuir ita-nia kbiit atu haklaken. (João 14:12) Ita bele fiar katak Maromak sei kontente ho ita se ita la rende an.