1. Saan se iyol shi ka se kwagh u icivirigh kpishi u lun Mbashiada mba Yehova sha ci u nyi?

SAAN se iyol shi ka se kwagh u icivirigh kpishi er se lu Mbashiada mba Yehova yô! Mba yilan se sha iti i Aôndo shi se mba tesen ser se mba mbashiada nav sha u tesen shi pasen mbagenev kwagh na. Ka sea fatyô sea wase or u nan “lu a ishima i mimi i zuan a uma u tsôron” nana hingir u civir Yehova yô, i saan se iyol kpen kpen. (Aer. 13:48) Ka i lu se er lu Yesu nahan. Yange “saan un iyol tsung” zum u mbahenen nav hide va ôr un akaa a doon a yange er ve shighe u ve due kwaghpasen yô.—Luka 10:1, 17, 21.

2. Se tese ser tom u wase u pasen kwagh la ngu se kwagh u vesen kpishi nena?

² Tom wase u pasen kwagh la ngu se kwagh u vesen kpishi. Apostoli Paulu yange kaa a Timoteu ér: “Veren ishima sha iyol you man sha ityesen you hanma shighe cii.” Paulu shi kaa a na ér: “Aluer u ngu eren nahan yô, u yima iyol you kua mba ve keghen ato a we la.” (1 Tim. 4:16) Nahan kwaghpasen wase la yiman ior. Ka se ver ishima sha iyol yase hanma shighe cii sha ci u se mba ior i Tartor u Aôndo. Nahan ka se soo ser se eren kwagh hanma shighe sha gbenda u Yehova una zua a icivir shi a tese ér se na loho u dedoo u se pasen la jighjigh yô. (Fil. 1:27) Ka se tese ser se ‘ver ishima sha ityesen yase’ nena? Hanma shighe yô, ka se vande wan iyol tsembelee shi se er msen ser Yehova a wase se cii se mase pasen ior kwagh ye.

3. Ka hanma or cii nana lu a isharen i ungwan loho u Tartor yee? Tese ikyav.

³ Aluer se pase ior kwagh er se fetyô la cii je kpa, alaghga ior kpishi hen haregh wase la vea lu a isharen i ungwan loho u dedoo u Tartor ga. Nenge kwagh u ngise er anmgbian ugen yô, iti na ér Georg Lindal. Yange pase kwagh ajiir wue wue ken tar u Iceland un tswen, hii ken inyom i 1929 zan zan inyom i 1947 la. Yange na ior ityakeda yase ukôpi udubu imôngo. Kpa ôr môm hingir Orshiada ga. Yange nger kwagh kaa ér: “Ka inja er mbagenev mba hendan a loho u Bibilo nahan. Kpa mbagenev kpishi yô, kwagh  gba ve sha mi ga.” Shin er mbamishen mba been makeranta u Gileadi za u za wasen tom ken tar u Iceland nahan cii kpa, yange anyom kar ataankaranyiiin cii ve ior mbagenenev ken tar la tsegha ayol a ve sha ci u Yehova shi i er ve batisema ye. *

4. Shighe u ior ve soo ér se hen Bibilo a ve ga yô, alaghga a lu se nena?

⁴ Ior ka vea soo ér se hen Bibilo a ve ga yô, ka i vihi se kpen kpen. Alaghga a lu se er yange lu Paulu nahan. Yange ‘zungwe tsung shi ishima zer vihin’ un sha ci u Mbayuda jimin cii lu vendan u nan jighjigh ér Yesu ka Mesiya u i tôndo zwa ér ngu van la. (Rom. 9:1-3) Aluer u wase or u u henen Bibilo a nan la sha gbashima shi u er msen sha ci u nan kpoghuloo, kpa nan soo u eren sha kwagh u nan lu henen la ga, nahan gba u u de u henen kwagh a nan di ye? Shin aluer i gbe je kpa u ngu a hen Bibilo a or zan zan nan kuma u a er nan batisema ga ye? A tese ér u ngu eren tom wou tsembelee ga, shi Yehova lumun a kwaghpasen wou gaa? Ken ngeren ne, se lu nan mlumun sha mbampin uhar: (1) Ka nyi ka i tese ér se er tom wase u pasen kwagh la tsembelee? (2) Shighe u se lu pasen or kwagh yô, ka nyi i gbe u se ver ashe a mini?

5. Ka hanma shighe kwagh una due ken tom u se lu eren sha ci u Yehova la er i sar se la ga sha ci u nyi?

⁵ Bibilo kaa ér or u nan eren ishima i Aôndo yô, “hanma kwagh u nan eren kpaa, nana kure un vough.” (Ps. 1:3) Kpa u ngu wer hanma kwagh u se lu eren sha ci u Yehova yô, una za er i sar se la ga. Ayange a orumace “iv a ican” sha ci u or yina. Se ayol a ase se yina, mbagenev kpa yina. (Yobu 14:1) Heela tseegh ga, ashighe agen yô, adooga mba ve lu hendan a vese la vea kaa ér se de pasen kwagh ken igbar ga. (1 Kor. 16:9; 1 Tes. 2:18) Nahan ka sha nyi Yehova ka a fa ér se er tom wase tsembelee shin se er u tsembelee ga?

6. Yehova ka a nenge tom u se eren un la nena ve a nenge ér se mba eren u tsembelee?

⁶ Yehova ka a nenge er se eren tom sha gbashima shi se gbe uwer ga la. Yehova ka una nenge sea eren un tom sha gbashima sha ci u un doo se ishima yô, ior vea soo u keghen ato a vese ga je kpa, a nenge ér se mba eren u tsembelee. Paulu yange nger ér: “Aôndo ban a perapera ga, nahan una hungur a tom wen man dooshima u ne tese sha ci u iti na la ga; ne mba eren kwagh ne sha tom u ne er uicighanmbaiorov, shi ne lu eren u her la.” (Heb. 6:10) Yehova ka a umbur tom wase man dooshima u se tese la, ka sea hen Bibilo a or nana er batisema ga je kpaa. Sha nahan yô, aluer u nenge a kwagh u yange u hen wer una due ken tom u u lu eren kpoghuloo la ga kpa, fa wer Paulu yange ôr kwagh ne a Mbakorinte kua we kpaa, ér: “Ken Ter yô, ka gbilintom ne eren ga.”—1 Kor. 15:58.

7. Ka nyi se fatyô u henen ken kwagh u apostoli Paulu ôr sha kwagh u tom na laa?

⁷ Apostoli Paulu yange lu ormishen u fa tom tsema tsema yô. Yange bugh atôônanongo a he  sha ugeri kpishi. Kpa ior mbagenev puu un shi kaa ér a fa u tesen ior ga. Nahan kpa, Paulu yem u ôron ve ingyegh ki ior mba un wase ve ve hingir Mbakristu ga. Kpa gema kaa ér: “M hemba eren tom.” (2 Kor. 11:23) Nahan gba u se umbur ser, Yehova hemba soon ér se eren un tom sha gbashima shi se de gbe uwer ga.

8. Ka nyi i gbe u se umbur sha kwagh u tom wase u pasen kwagh laa?

⁸ Tom wase u pasen kwagh la ka u na i doo Yehova a vese. Yesu yange tindi mbahenen 70 ér ve za pase loho u Tartor. Ve za pase kwagh kpoghuloo mba been yô, ve “hide saan saan.” Ka nyi yange i na ve saan ve iyolo? Ve kaa ér: “Azôv je kpa nga ungwan se ken iti you.” Nahan kpa, Yesu kôôm mhen ve la, kaa a ve ér: “De ember nen sha ci u ujijingi mba ungwan ne ga, kpa ember nen sha ci u i nger ati a en sha.” (Luka 10:17-20) Yesu yange fa dedoo je ér ka hanma shighe cii akaa a doon la aa eren ve ken tom ve u pasen kwagh la ga. Jighilii yô, se fa ingyegh ki ior mba yange ve kegh ato a mbahenen mba Yesu, ve ken masejime ve va hingir mbananjighjigh la ga. Nahan yange gba u a saan mbahenen mba Yesu tindi la iyol sha ci u ior kegh ato a ve yum tsô ga. Kpa kwagh u vesen yô, yange gba u vea fa ér doo Yehova a ve sha er ve er un tom sha gbashima yô. Vea fa nahan yô, a hemba saan ve iyol.

9. Mbagalatia 6:7-9 kaa ér, aluer se gba uwer u eren tom wase u pasen kwagh la ga yô, nyi ia ere?

⁹ Aluer se gba uwer u eren tom wase u pasen kwagh la ga yô, se zua a uma u tsôron. Aluer se mba pasen kwagh shi tesen ior er se fetyô la cii yô, se mba “lôôn a awashima u ken jijingi” kpaa, sha u nan jijingi u Aôndo ian gbanger gbanger ser a hemen se ken uma wase. Aluer se ‘gba uwer’ ga shin se yina ishima ga yô, Yehova tôndo zwa ér una na se uma u tsôron, aluer se mba a or u se wase nan nana er batisema ga je kpaa.—Ôr Mbagalatia 6:7-9.

10. Er nan ka sea pasen ior kwagh ve, mbagen ve kegh ato a vese, kpa mbagenev ve kegh ato ga?

¹⁰ Jighilii yô, ka kwagh u a lu ior ken ishima la una na vea ngohol mimi shin vea ngohol ga ye. Yesu yange pase mimi u kwagh ne ken ikyav i tese sha kwagh u orsule u ta ivor ve, isham haa sha inya kposo kposo, kpa lu i i haa sha inya i dedoo la tseegh ume atam la. (Luka 8:5-8) Yese kaa ér inya i i lu kposo kposo la tile sha ityough ki ior mba “loho u Aôndo” ka u bende a asema a ve sha igbenda kposo kposo yô. (Luka 8:11-15) Se fatyô u nan mvese u kwagh ken asema a ior mba se pase ve kwagh la ga, er orsule u ta ivor la nahan. Se tom wase yô, ka u tan ivor i dedoo i loho u Tartor la a uwer gban shio. Paulu kaa ér, “hanma or nana ngohol injar sha tom u nan er la,” ér ka sha kwagh una due ken tom u nan la ga.—1 Kor. 3:8.

11. Yange ior kegh ato a Noa shighe lu pasen ve kwagh la ga kpa doo Yehova a na sha ci u nyi? (Nenge foto u sha igbende)

¹¹ Tsuaa la kpa, mbashiada mba Yehova kpishi pase ior kwagh kpa ior kpishi kegh ato a ve ga. U tesen ikyav yô, Noa yange ‘yôô kwagh u perapera’ je kuma anyom 40 shin 50 nahan. (2 Pet. 2:5) Ka keng yange una hen ér ior vea kegh ato a kwaghpasen na la, kpa Yehova ôr kwagh u tesen ér lu nahan ga. Shighe u Aôndo lu tesen Noa er una gba tso la, a kaa a Noa ér: “Ú nyôr ken tso la, we a ônov ou, man kwase wou man kasev mba ônov ou a we imôngo.” (Gen. 6:18) Shi zum u Yehova tese Noa ilihen man igbanger kua ityaven i tso shon la, alaghga Noa kav er lu u ior kpishi vea kegh ato a na ga yô, sha ci u tso la una lu a ian i ior a fatyô u nyôron kpishi ga. (Gen. 6:15) Er se fe nahan, or môm sha ayange a ipila shin tswam samber sha tar wuee la nan kegh ato a Noa ga. (Gen. 7:7) Yehova yange nenge ér Noa er tom na u pasen kwagh la tsembelee gaa?  Mayange ga cii! Yange doo Yehova a Noa kpishi, sha ci u Noa er hanma kwagh u Yehova kaa ér a er cii vough.—Gen. 6:22.

12. Yeremia yange er nan ve saan un iyol shighe u lu pasen kwagh kpa ior kegh ato ga shi i lu hendan a na laa?

¹² Profeti Yeremia kpa yange pase kwagh je hemba anyom 40, kpa ior kegh ato a na ga. Mbagenev lu hendan a na, nan un ‘ihyeen shi nahan un tar.’ Kwagh ne na yô, iyol kpe un je kaa ér una kera pase kwagh ga. (Yer. 20:8, 9) Kpa Yeremia gba uwer ga! Ka nyi yange i wase un ve za hemen shi saan un iyol ken tom na u pasen kwagh laa? Yange hemba veren ishima sha akaa a vesen ahar. Hii yô, loho u u Aôndo u Yeremia lu ôron ior la lu u nan ve “ishimaverenkeghen i dedoo ken masetyô.” (Yer. 29:11) Sha uhar yô, Yehova tsua Yeremia ér i yilan un sha iti Na. (Yer. 15:16) Se kpa se mba pasen ior loho u nan ve ishimaverenkeghen ken tar u u vihi yum ne, shi mba yilan se sha iti i Yehova ér Mbashiada nav. Aluer se hemba veren ishima sha akaa a vesen a ahar ne yô, ior vea kegh ato a vese shin vea kegh ga kpa, a saan se iyol.

13. Ka nyi se hen ken ikyav i Yesu tese ken Marku 4:26-29 laa?

¹³ Shighe ka a kar cii ve orhenen Bibilo nan hii u dondon ityesen i Bibilo ye. Yesu yange pase mimi u kwagh ne ken ikyav i tese sha kwagh u orsule ka nan ta ivor hen inya, nan yav tugh la. (Ôr Marku 4:26-29.) Orsule ka nana taan ivor kera yô, ivor la i vesen kure kure. Ka nan lu a kwagh môm u nana er ve ivor shon ia vese fele fele ga. Kape we kpa a gba u u kegh shighe gôgônan cii ve, or u u lu henen Bibilo a nan la nana hii u eren kwagh u nan lu henen la je la. Er orsule nan lu a tahav mbu nana er iyiav mbi nan mbia vese fele fele er nan soo la ga nahan, kape se kpa se fatyô u torough a mba se henen Bibilo a ve la ser ve vese ken jijingi fele fele er se soo la ga je la. Sha nahan yô, iyol i de kpen we ga, shin de gbe uwer ga, aluer tôô ve shighe u vesen hemba er u hen la je kpaa. Er orsule ka nan wa ishima nahan, se kpa gba u se wa ishima a or u se henen Bibilo a nan la zan zan nana va kar tsuan a ishima i nan u eren batisema.—Yak. 5:7, 8.

14. Ka nyi i tese ér aluer se mba pasen kwagh kpa, alaghga a tsa gbem cii ve ior vea va hii u keghen ato a vese?

¹⁴ Ken ityar igen yô, ka i hen Bibilo a or anyom imôngo cii ve nan va mase eren batisema ye. Nenge ase kwagh u yange er kasev mbagenev uhar yô. Ve yô, lu Gladys Allen vea anmgbian na Ruby. Ken inyom i 1959 la, i tindi ve ér ve za er pania u keke hen geri ugen hen tiôntar u Quebec, ken tar u Kanada. * Kpa ior mba hen ijiir ne lu cian kwagh u aluer ve lam a Mbashiada ve, mbawan ndor a ve kua ufada vea er shin vea ôr yô. Nahan ve kegh ato u ungwan loho u Tartor ga. Gladys kaa ér: “Hanma iyange yô, yange se pase kwagh sha u uya uya ahwa anigheni. Se er nahan zan zan kuma anyom ahar. Kpa or môm ngohol se hen ya u nan ga! Or yange nan due ken iyou, nana nengen a vese maa nan yem kwagh u nan. Kpa se gba uwer ga.” Tegh tegh tsô ior mba hen ijiir la va hii u biishi a Mbashiada, maa mbagenev hii u keghen ato. Hegen ne, atôônanongo nga hen geri la atar.—Yes. 60:22.

15. Ka nyi 1 Mbakorinte 3:6, 7 a tese se sha kwagh u tom u geman ior hingir mbahenen laa?

¹⁵ Ka i gba u ior kpishi vea wase u geman or hingir orhenen. Hanma or ken tiônnongo nana fatyô u eren kwagh u una wase or nana er batisema yô. (Ôr 1 Mbakorinte 3:6, 7.) De se tese ikyav: Anmgbian zua a or u nan tese isharen yô, maa a na nan trak gayô magazin. Kpa a nenge ér una fatyô u hiden zan shighe u or shon a kaa ér una lu a ian la ga. Nahan a kaa a orpasenkwagh ugen ér a za sôr or shon.  Orpasenkwagh u sha uhar ne za maa za hii u henen Bibilo a or la. Maa ka a lôhô anmgbian u nomso gayô u kwase nan za vea na ve za hen kwagh a or shon. Shi hanma or u nan ze vea na yô, ka nan taver orhenen Bibilo la ishima sha gbenda u nan. Nahan hanma orpasenkwagh u orhenen Bibilo la a zua a nan yô, nana wase un u seer henen kwagh u Yehova. Aluer kwagh er nahan yô, mba ve nôngo kwagh kpoghuloo sha u wasen or shon la vea ember shighe u nan er batisema yô, er Yesu kaa nahan.—Yoh. 4:35-38.

16. Aluer u gba angev shin u kera ngu a agee a eren tom wou u pasen kwagh la kpishi ga kpa, a saan we iyol sha ci u nyi?

¹⁶ Alaghga u gba angev shin u kera ngu a agee a pasen kwagh shi tesen kpoghuloo ér yange u eren la ga. Kpa a saan we iyol sha ci u kwagh u u fetyô u eren la. Nenge ase kwagh u yange er shighe u Tor Davidi vea ior nav ve za ta ityav sha Mbaamaleki ve yima icombor ve shi ve ngohol akaa a ve la. Iorov deri uhar yange ve vôr je ve fatyô u zan ityav mbira ga. Nahan ve lu her ve lu nengen sha uikya. Mba za hembe ityav yô, Davidi na zwa ér i kar ishar i ve za ya la, i na mba ve fatyô u zan ityav ga la vough er mba ve za la nahan. (1 Sam. 30:21-25) Kwagh ne tese se nyi sha kwagh tom u wase u geman ior hingir mbahenen u i lu eren sha tar cii laa? Hanma or u nan lu eren tom ne sha afatyô u nan cii yô, nana fatyô u ember a mbagenev cii sha kwagh u hanma or u he u i yima nan shi i wase nan nan hii u zan sha gbenda u uma la yô.

17. Se wuese Yehova sha ci u nyi?

¹⁷ Se wuese Yehova er a nengen tom u se eren un la sha gbenda u tesen ér se doo un ishima yô. Se fatyô u torough a ior ser ve hii u keghen ato a vese shin ve civir un ga. Kpa ka a nenge er se lu eren un tom sha gbashima la, kua er un doo se ishima kpishi la kpaa, nahan a na se injar. Shi ka a tese se er se er ve a saan se iyol sha hanma kwagh u se fetyô u eren ken tom u sunda u i hembe eren hegen cii ne yô. (Yoh. 14:12) Se fatyô u lun a jighjigh u nan ser a doo Aôndo a vese, aluer se gba uwer ga yô!