1. Khu ginani hi tsakago khu gu khala Dzifakazi dza Jehovha?

HI NGU tsaka gundzu ni gu lithomo gwathu gu khala Dzifakazi dza Jehovha! Ethu hi vathu va Nungungulu, nigu ha gu yeyedza gu khethu hi Dzifakazi dzaye khu gu patega avba nya thumo nya gu hevbudzi ni gu gira vapizane. Hi ngu tsaka ngudzu tepo hi si kodzago gu phasa muthu a dzi emisedego “gu hakha guvbanya nya gupindruge” gu khala mukhozeyi wa Nungungulu. (Mith. 13:48) Ethu ha gu dzipwa nga edzi Jesu a dzipwedego khidzo. Uye a di tala khu “litsako” tepo vapizane vaye va nga mu bhuleya khu matshango nya yadi va nga ma mana thumoni nyo tshumayele. — Luka 10:1, 17, 21.

2. Hi nga yeyedza kharini gu khethu thumo nyo tshumayele khwa lisima gwathu?

² Thumo nyo tshumayele khwa lisima ngudzu gwathu. Mupostoli Pawulo gengedzide Thimoti khuye: “Dzi wonele uwe wurumba wago, ni esi u hevbudzago.” A di bwe a engedzeya gambe khuye: “Khu kharato, u na mana guvbanyiswa uwe ni vale va gu yingisago” (1 Thim. 4:16) Khu kharato, thumo nyo tshumayele wu ngu vbulugisa womi nya vathu nya vangi. Kha nga olu hi vbwetago gu fumedwa khu Mufumo wa Nungungulu, ethu tepo yatshavbo ha gu dzi woneya avba nya esi hi girago. Ha gu gira isoso khu gu tepo yatshavbo hi gira esi si zundzago Jehovha si bwe si pwana ni mahungu nya yadi hi hevbudzago. (Filp. 1:27) Ha gu yeyedza gu khethu hi gu vega gupima avbo nya ‘esi hi hevbudzago’ khu gu dzi dongiseya gwadi na hi si gu hongoli thumoni nyo tshumayele hi bwe hi lomba gu khethu Jehovha a hi kategisa na hi si pheyi gu tshumayela vambe.

3. Ina vatshavbo vathu va na dzumeyago mahungo nya Mufumo? Ninga giyeyedzo.

³ Ambari ha gu gira satshavbo hi si kodzago gasi gu tshumayela vambe, adzina vambe gipandreni gwathu kha va na nga ma tsakeya mahungu nya Mufumo. Wona giyeyedzo gya ndriyathu Georg Lindal a tshumayedego ga sipandre nyo hambanehambane Islândia gu khugeya 1929 kala 1947. Uye ningede dzimiliyoni nya mabhuku,  ganiolu mwalo ni moyo a nga dzumeya gu khala Fakazi. Uye lovide gu khuye: “Vathu nyo khaguri va di gu wugeya lisine, ganiolu gutala nya avo va di si li tsakeyi basi.” Vamisiyonariyu nyo khaguri va nga gradhuwari avba nya xikola ya Gileadhi va di rumedwa gu ya thumeya ga litigo lile. Ambari ulolo, vathu va ni gu simama gu mba yeyedza gutsakeya lisine. Ganiolu, hwane nya 9 myaga, vathu nyo khaguri va Islândia khavbo va nga si kodza gu hendzeledza womi waye ga Jehovha va bwe va bhabhatiswa. *

4. Ha gu dzipwa kharini tepo vathu va gu mba tsakeya mahungu nya yadi?

⁴ Kha hi tsaki tepo vathu va gu mba tsakeya gu hevbula Bhibhiliya. Adzina hi nga dzipwa nga Pawulo, uye a tadego “khu gu garadzega nya gukhongolo ni wuvi” tepo Vajudha nya vangi va nga bomba gu khodwa gu Jesu khuye Mesiya. (Rom. 9:1-3) Adzina wa gu hevbula Bhibhiliya ni muthu nyo khaguri, khu kharato wa gu dzi garadza gasi gu khala muhevbudzi nya wadi nigu u ngu gombeleya ngudzu gihevbuli gyago. Ganiolu, igyo kha gi thumisi esi gi hevbulago nigu olu wa gu vbweta gu ema gu hevbula nagyo Bhibhiliya. Mwendro adzina u si si kodzi gu hevbula ni muthu Bhibhiliya kala aya bhabhatiswa. Ina u yede gu dzipwa nandru, u pimisa gu khuwe Jehovha kha kategisi thumo wago nyo tshumayele? Avbo nya ndrima yeyi hi na hlamula siwudziso sivili: 1)  Ginani gi yeyedzago gu khigyo thumo wathu nyo tshumayela wu ngu dugeleya? 2) Ginani hi yedego gu gi vireya tepo hi tshumayelago vambe?

5. Khu ginani thumo wathu nyo tshumayele wu gu mba ninga mihandro hi yi vbwetago tepo yatshavbo?

⁵ Bhibhiliya yari khiyo uye a girago gugola ga Nungungulu “sigiro saye satshavbo sa gu duga gwadi.” (Ndzi. 1:3) Ganiolu, isoso kha si thuli gu khiso satshavbo hi gireyago Jehovha si na ninga mihandro hi yi vbwetago. Womi nya vathu wu “tade khu sigaradzo” khu kotani nya gu mba vbeleya gwathu ni ga vambe. (Joba 14:1) Gu diga isoso, valala vathu va nga hi emisa gu tshumayela na hi tshulegide. (1 Kor. 16:9; 1 Tes. 2:18) Khu kharato, ginani gi yeyedzago gu thumo wathu nyo tshumayele wu ngu dugeleya? Wona matshina nya milayo nyo khaguri nya Bhibhiliya ma hi phasago gu hlamula giwudziso gegi.

6. Ga Jehovha thumo wathu wa gu dugeleya khu ndziya muni?

⁶ Jehovha a ngu vega gupima avba nya gu dzi garadze gwathu ni gu timiseya gwathu. Ga Jehovha, thumo wathu nyo tshumayele wa gu dugeleya tepo hi thumago khu sighingi kholu hi mu haladzago, ambari vathu va gu mba tsakeya. Pawulo lovide khuye: “Nungungulu khwadi kha divaledwi khu thumo mu wu giridego enu, ni lihaladzo mu li yeyedzidego, ni giphaso mu giridego ni olu mu nga gu girago ga vandriyanu nya vakristo.” (Hebh. 6:10) Jehovha a ngu dundruga gu dzi garadza gwathu ni lihaladzo lathu, ambari na hi gu mwalo gihevbulo nya Bhibhiliya gi bhabhatisidwego. Khu kharato, esi Pawulo a embedego Vakorinto si ngu thuma gwathu nethu muhuno, ambari thumo wathu wa gu mba ninga mihandro hi nga ba hi yi vireya. Uye lovide khuye: “Mahoni  ga Pfhumu, thumo wanu khandri wa mahala.”— 1 Kor. 15:58.

7. Ginani hi gi hevbulago ga esi mupostoli Pawulo a si ganedego maningano ni thumo waye nyo tshumayele?

⁷ Mupostoli Pawulo a diri misiyonariyu nya wadi. Uye phaside avba nya gu wumbe mabandla ga madhoropa nyo hambanehambane. Ganiolu, tepo vathu va nga mu wugeya va bwe va ganeya gu khavo a di siri muhevbudzi nya wadi, uye kha ganeya khu vathu nya vangivangi a va phasidego gu khala Makristo. Wulangani nya isoso, uye a di lova khuye: “Nyi va vbindride mbeli ga mithumo yatshavbo.” (2 Kor. 11:23) Gu fana ni Pawulo, hi yede gu dundruga gu khethu egi gi gu na ni lisima ga Jehovha, gu dzigaradza gwathu ni gu timiseya.

8. Ginani hi yedego gu gi dundruga khu thumo wathu nyo tshumayele?

⁸ Thumo wathu nyo tshumayele wu ngu tsakisa Jehovha. Jesu rumede 70 vapizane gasi gu ya tshumayela mahungu nya Mufumo, nigu tepo va nga wuya va di wuya “na va tade khu gu nengeya.” Khu ginani va nga tsaka? Avo va di khavo: “Ambari maphuvbo nya guvivbe ma di hi yingisa khu lina Iago.” Ganiolu, Jesu a di lulamisa mapimiselo yawe, a di khuye: “Mu nga tsakini basi khu gu yingiswa khu maphuvbo. Aholu tsakani kholu malina yanu ma lovidwe Ndzadzini.” (Luka 10:17-20) Jesu a di gu dziti gu khuye kha ndri tepo yatshavbo vapizane va na manago mihandro nya yadi thumoni nyo tshumayele. Khu lisine, kha hi dziti gu khethu vangani avba nya ava va pwidego mahungu ma nga ba ma tshumayedwa khu vapizane va Jesu va khadego Makristo. Vapizane va di yede gu tsaka na siri kholu basi vathu va nga ba va va engiseya, ganiolu nya lisima ga satshavbo khu gu dziti gu Jehovha a ngu tsaka khu gu dzi garadza gwawe.

9. Guya khu Vagalatiya 6:7-9, khu wevbini handro hi na wu manago ha gu mba tsukula gu tshumayela?

⁹ Ha gu timiseya thumoni gwathu nyo tshumayele, hi na mana womi nya gupindruge. Ha gu gira satshavbo hi si kodzago gasi gu tshumayela ni gu hevbudza mahungu nya yadi hi na yala “mithumo ya Liphuvbo la Nungungulu.” Isoso so thula gu dzumeya gu gimbidziswa khu liphuvbo nya guage la Nungungulu. Ha gu mba diga ‘gutimiseya mwendro gutsukuwa,’ Jehovha a gu tumbisa gu khuye a na hi ninga womi nya pindrugedwa ambari ha gu mba si kodza gu phasa muthu gu hevbula Bhibhiliya kala aya bhabhatiswa. — Leri Vagalatiya 6:7-9.

10. Khu ginani vathu nyo khaguri va engiseyago mahungu hi tshumayelago na ri gu vambe ne?

¹⁰ Edzi vathu va hakhago khidzo mahungu hi tshumayelago sa gu gimbeyalana ni esi si gu romo monyoni gwawe. Jesu tshamusede isoso avbo nya gipimaniso gya muyali moyo a yalago dzimbewu nyo hambanehambane. Ganiolu, ga wulimi watsavbo wu khumbugwago avbo nya gipimaniso, mowo basi wu nga ba wu ri wadi nigu khuwo wu nga velega mihandro. (Luka 8:5-8) Jesu ganede gu khuye wulimi wowo nyo hambanehambane wa gu emeya vathu nyo hambanehambane va gu na ni myonyo nya gu hambane, va hakhago “magana ya Nungungulu” khu ndziya nya gu hambane. (Luka 8:11-15) Gu fana ni muyali wule, ethu hi mwalo makodzelo nya gu bugise mbewu nya lisine monyoni nya muthu. Kholu isoso, sa guya khedzi monyo nya muthu wu gu idzo. Thumo wathu ethu gu simama gu yala mbewu nya mahungu nya Mufumo. Pawulo lovide khuye: “Muthu ni muthu a na hakhiswa mayelano khu thumo waye,” na siri khu mihandro nya thumo waye. — 1 Kor. 3:8.

11. Khu ginani Jehovha a nga tsaka khu thumo wa Nowa ambari olu vathu va nga mba mu engisa? (Wona foto yi gomogo avba nya kapa.)

¹¹ Gupheyani Dzifakazi dza Jehovha dzi di gu tshumayela vathu va nga ba va si dzini gu engiseya mahungu yawe. Khu giyeyedzo Nowa huwelede “guvbanya nya gululame gwa Nungungulu,” adzina saye khu 40 mwendro 50 myaga. (2 Ped. 2:5) Nya mba kanakana Nowa a di gu vbweta gu khuye vathu va mu engisa, ganiolu Jehovha kha ganeya gu khuye isoso si di hadzi gu girega. Wulangani  nya isoso, tepo Nungungulu a nga ninga sileletelo Nowa nya gu vbahe litaro uye a di khuye: “U na bela litaroni uwe ni sanana sago, mwangadzi wago ni vagadzi va sanana sago.” (Gen. 6:18) Nigu, tepo Nungungulu a nga tshamuseya Nowa dzimedhidha nya ngalava, adzina Nowa tugude gu khuye khandri vatshavbo va nga hadzi gu mu engisa kholu va di hadzi gu mba eneya mule. (Gen. 6:15) Kha nga hi dzitigo, mwalo ni moyo a nga engisago Nowa. (Gen. 7:7) Ina Jehovha pimiside gu khuye Nowa kha gira gwadi thumo nyo tshumayele? Khu lisine ne. Jehovha tsakide ngudzu khu Nowa kholu a giride satshavbo a nga mu ruma. — Gen. 6:22.

12. Muprofeti Jeremiya a si kodzide kharini gu tsaka thumoni nyo tshumayele ambari olu vathu va nga ba va si mu engisi.

¹² Muprofeti Jeremiya tshanganide ni silo sasimweso. Teponi yaye vathu va di si vbweti gu mu engisa nigu va di mu wugeya. Ambari ulolo, Jeremiya tshumayede khu 40 myaga ni gu vbindra. Khu kotani nya olu a nga ba a ‘khade gihegiso ni gu tshaniswa,’ uye a di vbeya tshivba a bwe a pimisa ni gu tsukula thumo a nga ba a ningidwe. (Jer. 20:8, 9) Ganiolu, Jeremiya kha tsukula. Ginani gi mu phasidego gu simama a bwe a mana gu tsaka thumoni gwaye? Uye a di vega gupima nya silo sivili nya lisima. Nyo pheye, mahungu aya Jeremiya a nga ba a embeya vathu, ma di hadzi gu va ninga “gitumbo ga matshigu ma nga gutago.” (Jer. 29:11) Nya wuvili, Jehovha hathide Jeremiya gasi gu ganeya ga vathu mahungu ya Jehovha. (Jer. 15:16) Anethu hi ngu bhuleya vambe mahungu ma ningago gutumba. Nigu, ha gu ranwa khu lina la Jehovha kha nga Dzifakazi dzaye. Ethu ha gu vega gupima ga silo sesi sa sivili, gani vathu va ngu ma hakha gwadi mahungu hi tshumayelago mwendro ne.

13. Ginani hi gi hevbulago khu gipimaniso gya Jesu gi gomogo ga Marko 4:26-29?

¹³ Si ngu dzega tepo nyo laphe gasi muthu a manega ni gukhodwa. Jesu hevbudzide isoso avbo nya gipimaniso maningano khu mwama moyo a yalago dzimbewu aya lala. (Leri Marko 4:26-29.) Dzimbewu a yadego mwama yoyu dzi di dandra vbadugwanavbadugwana nigu gimwalo a nga hadzi gu gira gasi dzi vbiredza gu dandra. Anuwe, adzina si nga lomba u vireya tepo nyo laphe gasi u wona gihevbuli gyago nya Bhibhiliya na gi gu thumisa esi gi hevbulago. Mulimi kha si kodzi gu gira dzimbewu dzaye dzi dandra khu gu vbiredza nga edzi a nga ba a dzi vbweta khidzo. Khu ndziya nyo fane, hi mwalo makodzelo nyo gurumedze sihevbuli sathu nya Bhibhiliya gu vbiredzeya gu dandra khu liphuvboni nga edzi hi nga ba hi si vbweta khidzo. Wa gu pimisa gu khuwe gihevbuli gyago gya gu hweya gu dandra khu liphuvboni, u nga vbeyi tshivba ambari gu tsukula. Gu fana ni mulimi, hi yede gu laphisa monyo, hi vireya gu khethu gihevbuli gyathu gi hunga gu thumeya Jehovha. — Jak. 5:7, 8.

14. Siyeyedzo muni si yeyedzago gu khiso si nga dzega tepo nyo laphe gasi vathu va engisa mahungu hi tshumayelago?

¹⁴ Ga mambe malanga si ngu dzega tepo nyo laphe gasi muthu a bhabhatiswa. Wona giyeyedzo gya vandriyathu vavili nya vanyamayi nyo pwani khu Gladys ni Ruby Allen va velegidwego khu mamayi ni papayi moyo. Khu 1959, avo va di rumedwa guya thumeya ga lidhoropa la Quebec, Canadá kha nga vapiyonero nya tepo yatshavbo. * Vathu dhoropani mule, va di si dzini gu ingiseya mahungu nya Mufumu kholu va di gu thava vavhizinyu ni vathangeyi nya dzi tshetshe. Gladys wari khuye: “Khu myaga mivili, hi tshumayede khu ndranga ni ndranga 8 dziora khu litshigu, ganiolu mwalo a nga ba a hi hakha. Vathu va dita va ta tula lidimba, ganiolu tepo va nga ba va wona gu khavo khethu va di gu li sega va hongola, ganiolu ethu kha ha tsukula.” Vbadugwanavbadugwana vathu va di vbindrugedza mavbanyelo yawe. Avo va di khala vathu nya vadi va bwe va engiseya mahungu hi nga ba va embeya. Ga lidhoropa lile muhunu gu na ni 3 mabandla. — Isa. 60:22.

15. Ginani 1 Vakorinto 3:6, 7, a hi hevbudzago maningano ni thumo nyo gire vapizane?

 ¹⁵ Gu gira vapizane i thumo wu vbwetago vathu nya vangi. Vatshavbo libandlani va nga patega avbo nya gu phase muthu kala aya bhabhatiswa. (Leri 1 Vakorinto 3:6, 7.) Khu giyeyedzo, ndriyathu nyo khaguri a gu ningeya ginagaliyana mwendro revhista ga muthu a tsakeyago. Khu kota nya thumo waye, uye a gu wona gu khuye kha na nga si kodza gu bweleleya muthu wule khu tepo a nga yi vegisa, khu kharato a gu lomba mumbe ndriyathu a ya gira liendro nyo bweleleye. Muhuweleyi yoyu a pheya gu gimbidzisa gihevbulo nya Bhibhiliya. Khu gimbiya nya tepo uye a gu konvhidhari vandriyathu nyo hambanehambane gasi va ya gimbidzisa naye gihevbulo nigu moyo ni moyo nya vandriyathu vava va gu phasa gihevbuli khu dzindziya nyo hambane. Vatshavbo vandriyathu va na phasa gihevbuli gu hevbula nya singi khu Jehovha. Khu ndziya yoyo, tepo gihevbuli gi bhabhatiswago, vatshavbo va nga patega avbo nya gu gi phase va na tsaka. — Joh. 4:35-38.

16. Ambari wa gu mba si kodza gu gira nya singi thumoni nyo tshumayele, khu ginani u nga dzipwago na wu tsakide?

¹⁶ Adzina kha wu si kodzi gu tshumayela mahungu nya yadi ni gu hevbudza nga gale khu kotani nya madwali mwendro kholu u gu mwalo tshivba. Ambari ulolo, u nga tsaka khu esi u si kodzago gu gira. Wona giyeyedzo gya Pfhumu Dhavhidhe. Uye ni vama vaye va di yede gu dwana ni Vaamaleki, ava va dzegidego dzindranga ni dzithomba dzawe. Ganiolu, 200 vama va di garade ngudzu khu gu dwana, khu kharato va di tshala ni mirwalo. Dhavhidhe ni vama vaye va pade nyimbituno va bwe va dzega silo nya lisima si nga ba si lumba valala vawe. Khu kharato, Dhavhidhe a di ruma gu khuye dzithomba dzile dzi kabaniswa khu pimo moyo ga vale va nga ba va hongode nyimbituno ni vale va nga ba va tshade ni mirwalo. (1 Sam. 30:21-25) Khiso sasimweso si giregago avba nya thumo nyo gire vapizane. Gutsaka hi gupwago khu gu gira thumo nyo tshumayele gu yedwe gu pwidwa khu vatshavbo va dzi garadzeyago gu gira thumo wowu.

17. Hi nga bonga Jehovha ga ginani?

¹⁷ Hi ngu bonga khu ndziya nya lihaladzo eyi Jehovha a wonago khiyo thumo wathu. Uye a ngu dziti gu khuye kha hi yeli gu gurumedza vathu gu hi engiseya mwendro gu khala vakhozeyi vaye. Ambari ulolo, uye a ngu wona gu dzi garadza gwathu ni lihaladzo hi gu nalo khuye ni gu uye a ngu hi tshatshazeya khu isoso. Ni gu gambe a ngu hi hevbudza gu tsaka khu esi hi si kodzago gu gira thumoni nyo tshumayele. (Joh. 14:12) Hi nga tiyisega gu khethu Nungungulu a na tsaka khu thumo wathu ha gu mba niga gu timiseya!