1. ¿Tuku kinkamakgapaxuwayan chu tlan kinkamamakgkatsiniyan xtatayananin Jehová?

¡KINKAMAKGAPAXUWAYAN chu tlan kinkamamakgkatsiniyan xlakata akinin xtatayananin Jehová! Litalakgapasaw xtukuwani Dios chu limasiyayaw pi akinin xtatayananin akxni kalitachuwinanaw chu kamasiyaniyaw latamanin xlakata Dios. Kinkamakgapaxuwayan akxni makgtayayaw tiku “kxnaku makgamakglhtinamputun xaxlikana tuku masta latamat nema ni kgalhi xlisputni” xlakata xlakskujni Dios nalitaxtu (Hech. 13:48). Makgkatsiyaw chuna la makgkatsilh Jesús, akxni xtamakgalhtawakgen litachuwinankgolh la tlan xkakitaxtuninit akxni kilichuwinankgolh Dios, xla lu paxuwalh (Luc. 10:1, 17, 21).

2. ¿La limasiyayaw pi chuna la lichuwinanaw Dios lu xlakaskinka litaxtu kimpalakatakan?

² Kimpalakatakan, chuna la lichuwinanaw Dios pulaktum tuku lu xlakaskinka. Apóstol Pablo maxkilh uma tastakyaw Timoteo: «Kuentajkatlawa chuna la lipina milatamat chu tuku masiyaya». Chu wanipa: «Komo chuna natlawaya nalakgtaxtuya wix chu nachuna tiku nakgaxmatnikgoyan» (1 Tim. 4:16). Umakgolh tachuwin kinkamasiyaniyan pi kalipekua wilakgolh xlatamatkan latamanin. Kuenta tlawayaw kintayatkan xlakata tapakgsiniyaw xTamapakgsin Dios. Ankgalhin latamaputunaw chuna la namalanki Jehová chu limasiyaputunaw pi kanajlayaw xalaktlan tamakatsinin nema lichuwinanaw (Filip. 1:27). Chu kuenta tlawayaw tuku masiyayaw akxni liwana lakkaxwiliyaw tuku nalichuwinanaw chu skiniyaw Jehová pi kakinkamakgtayan akxni kalitachuwinanaw amakgapitsin xpalakata.

3. ¿Putum latamanin tlan namakgamakglhtinankgo tamakatsin xla Tamapakgsin? Kalichuwinanti akgtum liʼakxilhtit.

³ Pero, maski lu liskujaw chuna la lichuwinanaw Dios, max latamanin nipara tsinu kgaxmatputunkgo tamakatsin xla Tamapakgsin. Kalilakpuwaw tala Georg Lindal, tiku xʼakstu lichuwinalh Dios xlilakgatum Islandia lata kkata 1929 asta 1947. Lhuwa mil latamanin  kamakgxtakgnilh likgalhtawakga, pero nipara chatum xtatayana Jehová litaxtulh. Xla tsokgli: «Makgapitsi lakatitayakgonit xaxlikana, pero lhuwa nipara tsinu limasiyakgo komo lakgatikgo o ni». Alistalh chankgolh misioneros xla Galaad xlakata xmakgtayanankgolh tlakg xlichuwinanka Dios, pero latamanin ni makgamakglhtinamparakgolh tamakatsinin. Chu, akgnajatsa kata alistalh, makgapitsi latamanin xalak uma país tamakamastanikgolh Jehová chu tamunukgolh. *

4. ¿La max namakgkatsiyaw akxni latamanin ni makgamakglhtinamputunkgo tamakatsin nema kalitachuwinanaw?

⁴ Akxni latamanin ni makgamakglhtinankgo tamakatsin nema lichuwinanaw, lilipuwanaw. Max kinkaʼakgspulayan chuna la Pablo, tiku wa pi xkgalhi «lhuwa takatsanajwat chu lhuwa talipuwan» xlakata lhuwa judíos ni makgamakglhtinankgolh Jesús chuna la Mesías tiku xwankanit pi namin (Rom. 9:1-3). ¿Chu komo wi tiku limakgalhtawakgeyaw Biblia, pero ni staka xtakanajla maski lu liskujaw chu tlawayaw oración, chu xaʼawatiya max talakaskin namakgxtakgaw? Chu ¿komo nipara chatum makgtayanitaw xlakata natamunu? ¿Nalakpuwanaw pi akinin linaw kuenta chu pi Jehová ni sikulunatlawama kintaskujutkan? Kʼuma artículo, nakgalhtiyaw umakgolh akgtiy takgalhskinin: ¿la katsiyaw pi taskujut nema tlawamaw tlan kitaxtuma? chu ¿tuku xlilat nakgalhkgalhiyaw akxni nakalitachuwinanaw Dios amakgapitsin?

5. ¿Tuku xlakata tuku tlawayaw xpalakata Jehová ni putum kilhtamaku kitaxtu chuna la akinin lakaskinaw?

⁵ Akxni Biblia lichuwinan lataman tiku tlawa xtalakaskin Dios, wan: «Putum tuku natlawa tlan nakitaxtuni» (Sal. 1:3). Pero uma ni wamputun pi putum tuku tlawayaw xpalakata Jehová nakitaxtu chuna la akinin lakaskinaw. Xlakata makglakgalhinanin akinin chu nachuna amakgapitsin uma tlawa pi kilatamatkan nalitatsama «lhuwa taʼakglhuwit» (Job 14:1). Nachuna, max kintalamakgasitsinkan namachokgokgo kaj tsinu kilhtamaku chuna la lismaninitaw lichuwinanaw Dios (1 Cor. 16:9; 1 Tes. 2:18). Wa xlakata, ¿tuku akxilha Jehová xlakata nawan pi tlan kinkakitaxtuniman chuna la lichuwinanaw xTachuwin? Kaʼakxilhwi makgapitsi tastakyaw xalak Biblia nema nakinkamakgtayayan nakgalhtiyaw uma takgalhskinin.

6. ¿Tuku akxilha Jehová xlakata nawan pi tlan kinkakitaxtuniman chuna la lichuwinanaw xTachuwin?

⁶ Jehová akxilha la tayaniyaw chu la liskujaw. Jehová akxilha pi tlan kinkakitaxtuniyan kintaskujutkan komo lu liskujaw chu limasiyayaw tapaxkit akxni chuna tlawayaw, maski latamanin nakgaxmatkgo o ni. Pablo tsokgli: «Dios xaʼakgstitum chu xla nikxni katipatsankgalh mintaskujutkan chu tapaxkit nema limasiyanitit xtukuwani; uma chuna limasiyapatit xlakata kamakgtayapatit xasantos natalan asta la uku» (Heb. 6:10). Jehová ni patsankga tapaxkit nema limasiyayaw chu la palha skujaw, asta maski kintaskujutkan nitlan kitaxtuma. Wa xlakata,  na tlan nakinkawanikanan tuku Pablo kawanilh natalan xalak Corinto: «Mintaskujutkan xpalakata Malana ni paxkat lama» (1 Cor. 15:58). Chu uma chuna la, maski uma taskujut nichuna kitaxtu chuna la akinin xlakaskinaw.

7. ¿Tuku katsiniyaw xlakata tuku wa apóstol Pablo xlakata chuna la xlichuwinan Dios?

⁷ Apóstol Pablo lu tlan misionero xlitaxtu chu makilhtsukilh congregaciones klhuwa kachikinin. Maski chuna, akxni makgapitsi kstalaninanin Cristo tiku xlakpuwankgo pi tlakg xlakaskinka xlitaxtukgo nitlan lichuwinankgolh chu wankgolh pi nitlan makgalhtawakgena xwanit, xla ni lichuwinalh la xlilhuwa latamanin xkamakgtayanit xlakata natamunukgo. Wata litakgalhmakgtayalh akxni wa: «Tlakg lhuwa kskujnit» (2 Cor. 11:23). Kastalaniw xliʼakxilhtit Pablo chu kalakapastakwi pi tuku tlakg xlakaskinka akxilha Jehová wa la palha skujaw chu tayaniyaw.

8. ¿Tuku kililakapastakatkan chuna la lichuwinanaw Dios?

⁸ Akxni lichuwinanaw xatlan tamakatsinin makgapaxuwa Jehová. Akgtum kilhtamaku, Jesús kamalakgachalh 70 kstalaninanin xlakata nalichuwinankgo tamakatsin xla Tamapakgsin. Akxni kimasputukgolh xtaskujutkan, Biblia wan pi «xatapaxuwan taspitkgolh». ¿Tuku xlakata lu xpaxuwamakgolh? Wankgolh: «Asta demonios kinkakgalhakgaxmatnikgoyan akxni kmaklakaskinaw mintukuwani». Pero Jesús kalistakyawalh umakgolh tachuwin: «Ni kalipaxuwatit pi xalaklixkajni espíritus kakgalhakgaxmatnikgoyan, wata kalipaxuwatit pi Dios katsokgwilinita mintukuwanikan kʼakgapun» (Luc. 10:17-20). Jesús xkatsi pi ni ankgalhin xʼamakgo titaxtukgo tuku kaks malakawaninan akxni xlichuwinankgolh Dios. Nachuna, ni katsiyaw la xlilhuwa umakgolh latamanin tiku kalitachuwinanka Dios kstalaninanin Cristo litaxtukgolh. Kstalaninanin Cristo xlipaxuwatkan xwanit ni kajwatiya xlakata latamanin xkakgaxmatnikgolh, wata lakata xkatsikgo pi Jehová xmakgapaxuwa xtaskujutkan.

9. Chuna la wan Gálatas 6:7-9, ¿tuku nakitaxtu komo chuntiya nalichuwinanaw Dios?

⁹ Komo chuntiya nalichuwinanaw Dios, namakglhtinanaw latamat nema ni kgalhi xlisputni. Akxni liskujaw xlakata nalichuwinanaw chu namasiyayaw xalaktlan tamakatsinin, na “lilakpuwanaw tuku tlawaputun espíritu”, xlakata mastayaw talakaskin pi espíritu santo kakinkapulalin kkilatamatkan. «Komo ni natlakgwanaw», Jehová kinkamalaknuniyan pi nakinkamaxkiyan latamat nema ni kgalhi xlisputni, maski niti namakgtayayaw natamunu (kalikgalhtawakga Gálatas 6:7-9).

10. ¿Tuku tlawa pi latamanin nakgaxmatkgo o ni, tamakatsinin nema lichuwinanaw?

¹⁰ Xlakata tuku wi kxnakujkan latamanin namakgamakglhtinankgo tamakatsinin o ni. Jesús masiyalh uma kliʼakxilhtit xla chatum chanana. Kʼuma liʼakxilhtit chatum chixku chalh talhtsi ktipalhuwa tiyat, pero kajwatiya mastakgolh tawakat nema tamakgocha kxatlan tiyat (Luc. 8:5-8). Jesús wa pi tanu tanu tiyat kilhchanima xnakujkan latamanin, tiku tanu tanu la makgamakglhtinankgo «xtachuwin Dios» (Luc. 8:11-15). Chuna la akgspula chanana, akinin nila tlawayaw pi wi tuku nastaka kxnakujkan latamanin tiku kalitachuwinanaw xalaktlan tamakatsinin. Kintaskujutkan wa pi chuntiya nachanaw talhtsi xla Tamapakgsin. Chuna la wa apóstol Pablo, «chatunu chatunu namakglhtinan xtatlaja chuna la skujli», chu nichuna la kitaxtunilh xtaskujut (1 Cor. 3:8).

11. ¿Tuku xlakata tlan nawanaw pi Noé tlan kitaxtunilh akxni lichuwinalh «tuku xaʼakgstitum»? (Kaʼakxilhti xmakni revista).

¹¹ Chuna la titaxtunit kilhtamaku, lhuwa xlakskujnin Jehová kalitachuwinankgonit Dios latamanin tiku ni kakgaxmatnikgonit. Akgtum liʼakxilhtit, Noé lilakgapaska «tiku xlichuwinan  tuku xaʼakgstitum», max chuna tlawalh akglhuwa kata (2 Ped. 2:5). Chu, xla xkgalhkgalhi pi latamanin xkgaxmatnikgolh, pero Jehová ni wanilh pi chuna xʼama la. Wata akxni wanilh la xlitlawat xwanit arca, limapakgsilh: «Militanut kʼarca, wix chu minkamanan chu mimpuskat chu xlakpuskatin minkamanan» (Gén. 6:18). Chu, akxni wanilh la xlilanka xʼama wan arca, Noé max katsilh pi kaj ni lhuwa xʼamakgo kgaxmatnikgo (Gén. 6:15). Chu chuna kitaxtulh. Nipara chatum lataman xala amacha kilhtamaku kgaxmatnilh xtamakatsinin (Gén. 7:7). ¿Lakpuwa Jehová pi nitlan taskujut xtlawama Noé? Nichuna. Jehová akxilhli pi taskujut nema xtlawama Noé tlan kitaxtunilh xlakata liwana tlawalh tuku xlimapakgsinit natlawa (Gén. 6:22).

12. ¿Tuku tlawalh Jeremías xlakata xatapaxuwan xlichuwinalh Dios maski latamanin ni kgaxmatputunkgolh chu lakatakikgolh?

¹² Palakachuwina Jeremías na lichuwinalh Dios akglhuwa kata maski latamanin ni kgaxmatniputunkgolh chu asta lakatakikgolh. Xlakata chuna la likgalhkgamananka chu wanika laklixkajnit tachuwin uma maxlajwanilh pi asta nialh xmakgantaxtiputun taskujut nema xlakgayawakanit (Jer. 20:8, 9). Pero ni taxlajwanilh. ¿Tuku makgtayalh xlakata ni xmakgatlajalh nitlan tapuwan chu chuntiya xatapaxuwan xlichuwinalh Dios? Lilakpuwa pulaktiy tuku lu xlakaskinka. Pulana, lilakpuwa pi tamakatsin nema xkalini latamanin tlan xkamaxkilh akgtum tlan latamat kkilhtamaku nema aku xmima chu akgtum «takgalhkgalhin» (Jer. 29:11). Chu, xlipulaktiy, pi Jehová xlaksaknit xlakata xlichuwinalh xtukuwani (Jer. 15:16). Akinin na lichuwinanaw akgtum tamakatsin nema kamaxki takgalhkgalhin latamanin tiku xakapukswa wilakgolh chu lichuwinanaw xtukuwani Jehová xlakata akinin xtatayananin. Akxni kalilakpuwanaw umakgolh pulaktiy tuku lu xlakaskinka, lipaxuwayaw chuna la lichuwinanaw Dios maski latamanin kgaxmatkgo o ni.

13. ¿Tuku kinkamasiyaniyan liʼakxilhtit nema lichuwinalh Jesús chu tatekgsa kMarcos 4:26-29?

¹³ Chuna la staka xtakanajla chatum lataman lin kilhtamaku. Jesús masiyalh uma akxni lichuwinalh chatum chanana tiku lhtata (kalikgalhtawakga Marcos 4:26-29). Chanana tsinu tsinu akxilhli pi lu tlan xkitaxtuma xtaskujut chu nila tuku tlawalh xlakata talhtsi lakapala kstakkgolh. Xtachuna la uma, max nalin kilhtamaku xlakata chatum tamakgalhtawakgen nalilatama tuku katsinima, xlakata tsinu tsinu staka xtakanajla chatum lataman. Xtachuna la chatum chanana nila tlawa pi xtachanan lakapala kastakli chuna la xla lakaskin, akinin nila kamafuerzajliniyaw kintamakgalhtawakgenkan nastaka xtakanajlakan chuna la akinin lakaskinaw. Wa xlakata ni kataxlajwaniw komo xtakanajlakan kintamakgalhtawakgenkan tlakg tamakgapalima nastaka nichuna la xkgalhkgalhiyaw. Chuna la akxni makgalanankan talakaskin nakgalhkgalhinankan na talakaskin nakgalhkgalhinanaw akxni nalichuwinanaw Dios chu namasiyayaw (Sant. 5:7, 8).

14. ¿Tuku liʼakxilhtit masiya pi nalin kilhtamaku asta akxni latamanin natsukukgo kinkakgaxmatnikgoyan?

¹⁴ Makgapitsi niku lichuwinanaw Dios, titaxtu lhuwa kata niti makgamakglhtinan tamakatsin nema lichuwinanaw. Kaʼakxilhwi tuku titaxtukgolh Gladys chu Ruby Allen, chatiy linatalan lakpuskatin xalak Canadá. Kkata 1959, kamalakgachaka la precursoras regulares kʼakgtum kachikin xalak Quebec. * Latamanin xkapekuanikgo sacerdotes xalak pusikulan chu tuku xwankgolh latamanin, wa xlakata ni xkakgaxmatnikgo natalan. Gladys lakapastaka: «Akgtiy kata chali chali akgtsayan hora xaklichuwinanaw Dios kʼakgatunu chiki, pero niti kinkakgaxmatnin. Latamanin kaj xkinkaʼakxilhkgoyan kxventanajkan nema xkgalhikgo xmalakchakan chu xmalakchuwakgo xcortinaskan. Pero  ni ktaxlajwaniw». Titaxtulh kilhtamaku, xtayatkan latamanin talakgpalilh chu tlakg lhuwa tiku tsukukgolh kgaxmatkgo. La uku, anan akgtutu congregaciones kʼuma kachikin (Is. 60:22).

15. ¿Tuku kinkamasiyaniyan 1 Corintios 3:6, 7 xlakata kamakgalhtawakgekan latamanin?

¹⁵ Kamakgalhtawakgekan latamanin akgtum taskujut nema limakxtum tlawakan. Wankanit pi tamaklakaskin xtamakgtay akgtum congregación xlakata chatum lataman tlan natamunu (kalikgalhtawakga 1 Corintios 3:6, 7). Akgtum liʼakxilhtit, max chatum tala namakgxtakgni maktum tratado o maktum revista chatum lataman tiku tasiya pi tlakg katsiputun. Pero uma tala akxilha pi ni maxki kilhtamaku xlakata tlan nalakgtaspitpara. Wa xlakata skini tamakgtay achatum tala. Uma tala tsuku limakgalhtawakge Biblia uma lataman chu tanu tanu natalan kawani xlakata tlan nataʼankgo tamakgalhtawakgenankgo, chu chatunu chatunu makgpuwantinikgo tamakgalhtawakgen. Chatunu natalan tiku kalakgapasa tamakgalhtawakgen makgtayanankgo xlakata tlan nastaka xtakanajla. Chuna, putum tiku makgtayanankgo xlakata wi tiku namakgalhtawakgekgo tlan napaxuwakgo akxni natamunu (Juan 4:35-38).

16. Maski wix max nialh kgalhiya litliwakga o tatatlaya, ¿tuku xlakata tlan napaxuwaya akxni nalichuwinana Dios?

¹⁶ ¿Chu komo wix nialhla lichuwinana Dios chu nialhla masiyaya chuna la xapulana xlakata nialh kgalhiya litliwakga o xlakata tatatlaya? Maski chuna, tlan nalipaxuwaya tuku tlan tlawaya xlakata namakgtayanana ktaskujut nema tlawayaw kxlikalanka katiyatni. Kaʼakxilhwi tuku lalh akxni mapakgsina David chu ksoldados kamakgatlajakgolh lhuwa kgalhananin amalequitas chu kakilakgmaxtukgolh xfamiliaskan chu putum tuku xkamakgkgalhankanit. Xlakata doscientos soldados xtlakgwankgonit ni ankgolh makgtalatlawanankgo, wa xlakata tamakgxtakgkgolh xlakata nakuentajtlawakgo tuku xkgalhikgo. Akxni xkitalatlawanankgonit, David wa pi putum tuku xkamakglhtikgonit amalequitas lakxtum xtamakgpitsilh (1 Sam. 30:21-25). La uku, nachuna kitaxtu akxni kamakgalhtawakgeyaw latamanin kxlikalanka katiyatni. Kimputumkan tiku maxkiyaw Jehová tuku tlakg tlan kgalhiyaw, tlan napaxuwayaw makgatunu akxni lakgmaxtuyaw chatum lataman chu makgtayayaw naʼan ktiji nema linan klatamat.

17. ¿Tuku xlakata tlan napaxtikatsiniyaw Jehová?

¹⁷ Lu paxtikatsiniyaw Jehová xlakata xtapalh akxilha taskujut nema tlawayaw xpalakata. Xla katsi pi nila kamafuerzajliniyaw latamanin xlakata nakinkakgaxmatnikgoyan chu nakakninanikgo, pero xla akxilha la xlilhuwa skujaw, pi lu paxkiyaw chu kinkasikulunatlawayan xpalakata uma. Na kinkamasiyaniyan tuku tlan natlawayaw xlakata nalipaxuwayaw taskujut nema tlawayaw kxlikalanka katiyatni (Juan 14:12). Liwana kakatsiw uma: namakgapaxuwayaw Dios komo ni nataxlajwaniyaw.