1. Habwaki kitusemeza kandi tukyesiimisa kuba Abakaiso ba Yahwe?

KATWINE omugisa gw’amaani ogw’okuba Abakaiso ba Yahwe! Tuli bantu ba Yahwe kandi twoleka ngu tuli bakaiso be kurabira omu kwejumbira omu mulimo gw’okutebeza hamu n’okufoora abantu abegeswa. Kitusemeza muno obututebeza omuntu ‘ow’aine entekereza enungi ey’esobora kumuletera kutunga obwomeezi obutahwaho’ kufooka omuheereza wa Yahwe. (Eng. 13:48, NW) Naitwe twehurra nka Yesu “akasemererwa omu mwoyo ogurukwera,” abegeswa be obubamugambiire ha byokurorraho ebirungi ebibaali batungire omu kutebeza.​—Luk. 10:1, 17, 21.

2. Twoleka tuta ngu nitutwara obuheereza bwaitu kuba kintu kikuru?

² Omulimo gw’okutebeza mukuru muno haliitwe. Omukwenda Paulo akatererra Timoseo ati: “Werindege wenka nokwegesa kwawe.” Kandi akongereho ati: “Obwokora binu olyejuna wenka, kandi olijuna nabo abakuhurra.” (1 Tim. 4:16) Nahabweki, obwomeezi bw’abantu buli omu kabi. Tusemeriire kwikara nitwerinda habwokuba tuli bataka b’Obukama bwa Ruhanga. Nitugonza kwikara nitwetwaza omu mulingo ogurahaisa Yahwe ekitiinisa kandi ogurukwoleka ngu nitwikiririza omu makuru amarungi agaturukutebeza. (Baf. 1:27) Twoleka ngu nitwerinda itwenka omu kwegesa kwaitu kurabira omu kwetekaniza kurungi tutakagenzere omu buheereza kandi n’okusaba Yahwe kutukonyera obuturukuba tutakatandikire kutebeza.

3. Abantu nibasobora kwetwaza bata, obutubatebeza amakuru amarungi ag’Obukama? Bazaaho ekyokurorraho.

³ N’obutwekamba kutebeza, baingi nibasobora kwanga kuhuliiririza amakuru amarungi ag’Obukama. Tekerezaaho ekyokurorraho ekya Ow’oruganda Georg Lindal, ayatebiize wenka omu Iceland kuruga omu 1929 kuhika 1947. Akagaba enkumi n’enkumi z’ebitabu; baitu, busaho n’omu ayaikiriize amananu. Akahandiika ati: “Abamu nibazooka nk’abarukuhakaniza amananu, baitu abarukukira obwingi, tibarukweferayo.” Abamisaani abatendekerwe kuruga omu Gilead, n’obubaizire kukonyera  omu mulimo, hakarabaho emyaka mwenda, kurora abantu abamu ab’omu Iceland bayehayo hali Yahwe kandi babatizibwa. *

4. Nitusobora kwehurra tuta abantu obubanga kuhuliiririza amakuru amarungi?

⁴ Twehurra kubi abantu obubanga kuhuliiriza amakuru amarungi. Nitusobora kwehurra nka Paulo ‘ayasaasire muno kandi yayetuntura okutaikya’ habwokuba Abayudaaya baingi bakanga kwikiriza ngu Yesu nuwe akaba ali Masiya ow’araganiziibwe. (Bar. 9:1-3) Osemeriire kwetwaza ota kakuba oyekamba kwegesa omwegi kandi okamusabira, baitu kalemwa kukurakurana kandi kiketaagisa n’okuleka kwega na uwe? Rundi kakuba oba otakakonyerahoga omuntu wena kuhika ha idaara ly’okubatizibwa, osemeriire kwecwera omusango, rundi kutekereza ngu Yahwe takuhaire omugisa omu buheereza bwawe? Omu kicweka kinu, nitwija kugarukamu ebikaguzo bibiri: (1) Kiki ekyoleka obusinguzi omu buheereza bwaitu? (2) Kiki ekitusemeriire kuba nitunihira obuturukuba nitutebeza abandi?

5. Habwaki obwire obumu, okutebeza kwaitu kutarugamu ebirungi ebitubaire nitunihira?

⁵ Omuntu ow’akora Ruhanga eby’agonza, Baibuli emubazaaho eti: “Nekyarakoraga kyona arakiherwaga omugisa,” rundi arabaga musinguzi. (Zab. 1:3) Baitu eki tikirukumanyisa ngu buli kimu kyona ekiturakorra Yahwe nikiija kuba nk’okuturukugonza. Habwokuba obwomeezi ‘bwijwire obujune’ habw’obutahikirra bwaitu hamu n’obw’abantu abandi. (Yob. 14:1) Ekindi, abarukutuhakaniza nibasobora kututanga kutebeza omu rwijwire. (1 Kol. 16:9; 1 Bas. 2:18) Hati, Yahwe asigikirra hali ki kucwamu obuturaaba tuli basinguzi omu kutebeza kwaitu? Wetegereze emu ha misingi ya Baibuli ey’eratukonyera kugarukamu ekikaguzo kinu.

6. Yahwe asigikirra hali ki kucwamu obuturaaba tuli basinguzi omu buheereza bwaitu?

⁶ Yahwe ataho omutima obwekambi hamu n’okugumiisiriza kwaitu. Kisemeza Yahwe obututebeza n’obwekambi hamu n’okugonza, n’obukiraaba ngu abantu abamu tibatuhuliiriza. Paulo akahandiika ati: “Ruhanga tali atahikiriire okwebwa emirimo yanyu, nokugonza okumwayolekere hali ibaralye, obumwaheriize abarukwera, kandi nimukyahereza.” (Baheb. 6:10) Yahwe aijuka amaani agatwatairemu, hamu n’okugonza okutwayolekere, n’obukiraaba ngu busaho mwegi waitu wa Baibuli n’omu ay’abatiziibwe. Nahabweki ebigambo Paulo yagambiire Abakolinso, naiwe nibikukwataho, akagamba ati: “Omulimo gwanyu tiguli gwa busa omu Mukama waitu,” kagube gurugiremu ebirungi eby’obaire n’onihira, rundi nangwa.​—1 Kol. 15:58.

7. Kiki ekitusobora kwegera ha mulingo omukwenda Paulo yabalizeeho obuheereza bwe?

⁷ Omukwenda Paulo, y’ali mumisaani omurungi muno ayakonyiire kutandikaho ebitebe bingi omu bibuga bingi ebirukwahukana. Baitu  obubamujeregere ngu akaba atasemeriire kuba muheereza wa Kristo, akerwanaho atarukwebembeza omuhendo ogw’abantu abakaba akonyiire kufooka Abakristaayo. Omu kiikaro ky’okuhakaniza abaali nibagonza kwenyumiza kumukira, Paulo akahandiika ati: “Omulimo ngukozere kubakira.” (2 Kol. 11:23, NW) Kusisanaho na Paulo, okiijuke ngu amaani tutairemu hamu n’okugumiisiriza, nibyo by’omuhendo muno omu maiso ga Yahwe.

8. Kiki ekitusemeriire kwijuka ha buheereza bwaitu?

⁸ Obuheereza bwaitu busemeza Yahwe. Yesu akatuma abegeswa 70 kugenda kutebeza obutumwa bw’Obukama, kandi ha kumalirra, “bakagaruka nokusemererwa.” Kiki eky’abaletiire kusemererwa? Bakagamba bati: “Nemizimu nayo netuhurra omu ibara lyawe.” Baitu, Yesu akaterekereza entekereza yabo, obuyabagambiire ati: “Baitu eki mutalisemere’rwa emizimu okubahurra; baitu nikyo musemere’rwege, amabara ganyu okuhandikwa omu iguru.” (Luk. 10:17-20) Yesu akaba akimanyire ngu tibakwikaire nibatunga ebirungi byonka omu buheereza bwabo. Amananu gali, titumanyire bantu baingaha abahuliriize abegeswa ba Yesu kandi bafooka Abakristaayo. Abegeswa banu, baali nibetaaga kukimanya ngu obwekambi bwabo bwali nibusemeza Yahwe hatali ebi bakaba bakozere.

9. Kusigikirra ha Abagaratiya 6:7-9, kiki ekirarugamu obuturagumiisiriza omu kutebeza kwaitu?

⁹ Obuturagumiisiriza omu buheereza bwaitu, nitwija kutunga obwomeezi obutahwaho. Obutukora kyona ekiturukusobora kutebeza amakuru amarungi, tuba ‘nitusigira omwoyo’ obu nitugwikiriza kukorra omu bwomeezi bwaitu. Yahwe n’atugumiza kimu ngu kakuba ‘tutajwaha’ rundi ‘kugwa ensazi,’ aturaganiize kutuha obwomeezi obutahwaho, katube tukonyiire omuntu kuhayo obwomeezi bwe hali Ruhanga rundi nangwa.​—Soma Abagaratiya 6:7-9.

10. Kiki ekiretera abantu abamu kutuhuliiriza obutubatebeza kandi abandi bakanga?

¹⁰ Omulingo abantu betwaza obutubatebeza, kisigikirra ha mitima yabo. Yesu akasoborra ensonga enu omu kyokurorraho kye eky’omusigi ayasigire embibo ha itaka erirukwahukana, baitu ensigo ey’ekaba eri omu itaka erirungi, niyo yonka yayanire ebyana. (Luk. 8:5-8) Yesu akagamba ngu, itaka erirukwahukana nirimanyisa omulingo abantu abarukwahukana betwazaamu obubahurra ‘ekigambo kya Ruhanga.’ (Luk. 8:11-15) Kusisanaho n’omusigi, titusobora kuhambiriza embibo ey’amananu kukura omu mitima y’abantu abututebiize, habwokuba omulingo abantu betwazaamu hanyuma y’okutuhuliiriza kisigikirra ha mitima yabo. Obujunaanizibwa bwaitu nubwo obw’okwikara nitusiga embibo enungi ey’Obukama. Omukwenda Paulo akagamba ngu, “wena alihabwa emperaye wenka nkomulimogwe wenka okuguli,” hatali habw’ebirugire omu mulimo.​—1 Kol. 3:8.

11. Habwaki Yahwe yasemereriirwe Nuha habw’omulimo ogw’okutebeza oguyakozere n’obukiraaba ngu abantu batamuhuliirize? (Rora ekisisani ekiri ha kyesweko.)

¹¹ Kuruga kara, abaheereza ba Yahwe baikaire nibatebeza abantu abatarukugonza kuhuliiriza. Ekyokurorraho, Nuha akaba ali “[omutebezi] wokuhikirra,” kumara emyaka nka 40 rundi 50. (2 Pet. 2:5) Busaho kugurukyagurukya, akaba n’anihira ngu abamu bakaba nibagenda kumuhuliriza, baitu Yahwe akaba atamugambiire ngu eki kikaba nikigenda kubaho. Baitu Ruhanga obwakaba n’aragira Nuha kwobeka eryato, akamugambira ati: “Olitaha omu bwato, iwe, nabana bawe, na mukazi wawe, nabakazi babana bawe hamu naiwe.” (Kub. 6:18) Kandi kusigikirra ha bipimo hamu n’obukooto bw’eryato Ruhanga eriyamuragiire kwombeka, Nuha yakukyetegeriize ngu baingi tibakumuhuliriize.  (Kub. 6:15) Kandi nk’oku tumanyire, busaho muntu n’omu ayamuhuliriize. (Kub. 7:7) Yahwe akarora Nuha nk’omuntu ow’alemerwe kuhikiiriza omulimo gwe ogw’okutebeza? Nangwa! Yahwe akasemerererwa Nuha habwokuba akaba akozere n’obwesigwa ekyakaba amuragiire kukora.​—Kub. 6:22.

12. Nabbi Yeremiya akatunga ata okusemererwa omu buheereza bwe, n’obukiraaba ngu abantu tibamuhulirizaaga kandi abandi bamuhakanizaaga?

¹² Nabbi Yeremiya na uwe akatebeza kumara emyaka 40 n’obukiraaba ngu abantu tibamuhulirizaaga kandi bamuhakanizaaga. Akahwamu muno amaani ‘habw’okujumwa, kandi n’okusekerezebwa’ abakaba nibamuhakaniza, yahika n’okutekerezaaho kuleka omulimo gwe. (Yer. 20:8, 9) Baitu Yeremiya ataleke! Kiki ekyamukonyiire kugumizaamu n’atebeza kandi n’okutunga okusemererwa omu buheereza bwe? Yeremiya akateeka omutima ha bintu bibiri ebikuru. Eky’okubanza, obutumwa Ruhanga yamugambiire kugambira abantu, bukaba nibugenda kubakonyera kutunga ebiro eby’omu maiso ebirungi hamu n’okunihira. (Yer. 29:11) Ekyakabiri, Yahwe akaba akomere Yeremiya kugambira abantu obutumwa bwe. (Yer. 15:16) Naitwe tuletera abantu okunihira omu nsi enu enyakwijwire omwirima, kandi twetwa ibara lya Yahwe habwokuba tuli Abakaiso be. Obututeeka omutima ha nsonga zinu enkuru ibiri, nitusobora kutunga okusemererwa abantu kababe batuhuliriize rundi nangwa.

13. Kiki ekiturukwega kuruga omu kyokurorraho kya Yesu ekiri omu Marako 4:26-29?

¹³ Okukurakurana omu by’omwoyo kutwara obwire. Yesu akakozesa ekyokurorraho eky’omusigi ayagwijagiire kwoleka amananu ag’ensonga enu. (Soma Marako 4:26-29.) Omusigi hanyuma y’okusiga embibo, ekakura mpora mpora, kandi akaba atasobora kugihambiriza kukura bwangu bwangu. Naiwe nikisobora kukwetaagisa kulinda akasumi kaingi otakarozere omwegi wawe owa Baibuli n’ateeka omu nkora ebyarukwega. Nk’oku omulimi aba atarukusobora kuhambiriza ebimera kukurra ha sipiidi eyarukugonza, naitwe titusobora kuhambiriza abeegi ba Baibuli kukurakuranira ha sipiidi ei twakugondeze. Nahabweki, otahwamu amaani rundi otajwaha kakuba abeegi baawe batakurakurana bwangu nk’oku obaire n’onihira. Kusisanaho n’okulima, kufoora abantu abegeswa nikyetaagisa kugumiisiriza.​—Yak. 5:7, 8.

14. Kyokurorraho ki ekirukwoleka ngu nikisobora kutwarra abantu akasumi batakatandikire kutuhuliiriza?

¹⁴ Omu biikaro bingi, kitwara akasumi kaingi kurora omuntu yabatizibwa. Tekerezaaho ekyokurorraho ky’abanyaanya itwe abarukuzaarwa hamu Gladys na Ruby Allen, abasindikirwe nka bapayoniya abakasumi koona omu tawuni ya Canada omu kicweka kya Quebec omu 1959. * Habwokuba abantu omu kiikaro eki batiinaga bataahi babo hamu n’abapadiri eki barabakora rundi ekibarabaza kakuba babarora nibabaza n’Abakaiso ba Yahwe, bayangaga kuhuliiriza. Gladys akagamba ati: “Twatebezaaga nju ha nju buli kiro habw’esaaha munaana kumara emyaka ebiri baitu busaho n’omu ayabazaaga naitwe! Abantu obu baijaga ha miryango yabo kandi bakarora ngu niitwe, barugahoga bagenda. Baitu tutajwahe.” Hanyuma y’akasumi, entekereza y’abantu ekahinduka, kandi abamu batandika kutuhuliiriza. Kasumi kanu haliyo ebitebe bisatu omu tawuni egi.​—Is. 60:22.

15. Kiki ekiturukwega kuruga omu 1 Abakolinso 3:6, 7 ha mulimo gw’okufoora abantu abegeswa?

¹⁵ Abantu baingi nibetaagisibwa kusobora kukonyera omuntu kufooka omwegeswa. Itwena omu kitebe twine ekitusobora kukora  kukonyera omuntu kuhika ha kubatizibwa. (Soma 1 Abakolinso 3:6, 7.) Ekyokurorraho, ow’oruganda asigira turakiti rundi magaziini omuntu ow’ayolekere okusiima. Hanyuma ow’oruganda ogu akyetegereza ngu tarukwija kusobora kugarukira omuntu ogu, nahabweki asaba ow’oruganda ondi kumukonyera kugarukayo. Ow’oruganda ogu atandika kumwegesa Baibuli. Hanyuma na uwe atandika kuraaliza ab’oruganda abandi kugenda na uwe obwaba nagenda kumwegesa, kandi buli omu halibo agarramu omwegi amaani omu mulingo ogurukwahukana. Buli w’oruganda rundi munyaanya itwe omwegi ow’atangatangana amukonyera kukura omu by’omwoyo. Omu mulingo ogu, ayasigire hamu n’ow’agesa basemererwa hamu nk’oku Yesu yagambire.​—Yoh. 4:35-38.

16. Habwaki nosobora kutunga okusemererwa omu buheereza n’obukiraaba ngu notalibanizibwa oburwaire rundi tokyaine amaani?

¹⁶ N’osobora kuba otarukusobora kutebeza rundi kwegesa nk’oku wakoraga kara, habwokuba oli murwaire rundi amaani gawe gakakeeha. Naiwe nokyasobora kwegondeza omu mulimo gw’okugesa. Tekerezaaho ekyokurorraho ky’Omukama Daudi, uwe hamu n’abasaija be obubacungwire amaka gaabo hamu n’ebintu byabo kuruga h’Abameleki abaali babatahiriire. Abasaija ebikumi bibiri bakaba batarukusobora kurwana habwokuba bakaba bajwahire muno, nahabweki bakasigara enyuma balinzire ebintu. Obubamazire kusingura obulemu, Daudi akaragira ngu boona otwaliremu naabo abakaba batarwaine babagane ebintu ebi baali batungire. (1 Sam. 30:21-25) Kinu nukwo kiri n’omu mulimo ogw’okufoora abantu abegeswa. Buli omu wena owakora ekirukusoboka kwejumbira omu mulimo gunu, atunga okusemererwa buli murundi omuntu omuhyaka ayega ebirukukwata hali Yahwe, kandi akakonyerwa kurubatira omu muhanda ogurukuhikya omu bwomeezi obutahwaho.

17. Biki ebitusemeriire kusiimira Yahwe?

¹⁷ Nitusiima Yahwe habw’omulingo ogw’okugonza ogw’aroramu obuheereza bwaitu. Akimanyire ngu titusobora kuhambiriza abantu kumuhuliiriza rundi kutandika kumuheereza. Baitu arora amaani agatutekamu, okugonza okutumwiniire, kandi atuha empeera. Atwegesa omulingo tusobora kutunga okusemererwa omuli ebyo ebitusobora kukora omu mulimo gw’okutebeza. (Yoh. 14:12) Nitukigumiza kimu ngu tusemeza Yahwe obu tutajwaha!