1. Se a te mea fakafiafia mo te tauliaga e maua ne tatou?

KO OKO eiloa i te fakafiafia kae se tauliaga ke fai tatou pelā me ne Molimau a Ieova! E tauave ne tatou te igoa o te Atua kae ola e ‵tusa mo te igoa tenā mai te kau atu ki te galuega talai mo te faiga o soko. E fia‵fia tatou māfai ne fesoasoani tatou ki “tino loto ‵lei katoa kolā e ‵tau o maua ne latou a te ola se-gata-mai” ke fai mo fai ne tino tali‵tonu. (Galu. 13:48) E ‵pau eiloa ‵tou lagonaga mo Iesu, telā “ne ‵fonu a ia i te fiafia ona ko te agaga tapu” i te taimi ne ‵foki mai ei a soko mo olotou tala fakafia‵fia i te galuega talai.—Luka 10:1, 17, 21.

2. E fakaasi atu pefea me e fakatāua ‵ki eiloa ne tatou te ‵tou galuega talai?

² E fakatāua ‵ki eiloa ne tatou a te ‵tou galuega talai. Ne fakamalosi atu a te apositolo ko Paulo ki a Timoteo: “Saga faka‵lei faeloa ki a koe mo au akoakoga.” Ne toe fai atu a Paulo: “Me kafai e fai ne koe a mea konei ka fakasao ne koe a koe eiloa mo latou kolā e faka‵logo ki a koe.” (1 Timo. 4:16) Ko ‵tu a ola o tino i se tulaga fakamataku. E ‵saga ifo faka‵lei faeloa tatou ki a tatou eiloa me i a tatou e ‵nofo mai lalo i te Malo o te Atua. E ma‵nako faeloa tatou ke fai a mea kolā e avatu ei a vikiga ki a Ieova kae e fetaui mo te tala ‵lei telā e talai atu ne tatou. (Fili. 1:27) E fakaasi atu ne tatou a te ‵tou ‘‵saga faka‵lei atu ki ‵tou akoakoga’ mai te fakatoka faka‵lei ki te galuega talai mo te akai atu ki te fakamanuiaga a Ieova a koi tuai o talai atu tatou ki nisi tino.

3. Ne ‵saga atu pefea a tino ki te fekau o te Malo? Taku mai se tala.

³ Faitalia me e fakaoti ‵tou mafi, e mafai fua o mu‵tana io me e seai se tino e fia saga mai ki te fekau o te Malo i ‵tou koga talai. Mafaufau ki te tala o Georg Lindal, telā ne talai tokotasi i Iceland kātoa mai te 1929 ki te 1947. Ne tufa atu ne ia te fia sefulu afe o tusi kae e seai eiloa se tino ne talia ne ia te munatonu. Ne tusi mai a ia: “E foliga mai me i nisi tino e ‵teke tonu atu ki  te munatonu, kae ko nisi tino e se fia ‵saga mai fua.” Ke oko foki loa ki te taimi ne oko mai ei a misionale mai Kiliata kae fakalauefa atu ne latou te galuega, e iva tausaga mai tua kae ne fatoa tuku atu a nisi tino Iceland ki a Ieova kae papatiso. *

4. Ne a ‵tou lagonaga māfai e se fia ‵saga mai a tino ki te tala ‵lei?

⁴ E fanoa‵noa tatou māfai e se fia ‵saga mai a tino. E mafai o ‵pau tatou mo Paulo telā ne “mafatia malosi [tena] loto kae e se gata te ‵mae” ona ko te ita fitifiti o tino Iutaia ke talia ne latou a Iesu e pelā me ko te Mesia telā ne folafola mai. (Loma 9:1-3) Kae e a māfai e se gasolo ki mua se akoga faka-te-Tusi Tapu faitalia au taumafaiga mo au ‵talo e uke ne fai mō ia kae ko ‵tau o fakagata te akoga? Io me e a māfai e seki ai loa se tino ne fesoasoani koe ki ei ke papatiso? E mata, e ‵tau o ma‵sei ou lagonaga kae mafaufau me ne seki fakamanuia ne Ieova tau galuega talai? I te mataupu tenei, ka tali aka ei a fesili e lua: (1) E fakamaoni aka pefea ne tatou a te iku manuia o te ‵tou galuega talai? (2) Ne a kilokiloga ‵lei e ‵tau o maua ne tatou?

5. Kaia e se iku atu faeloa ‵tou galuega mō Ieova ki mea kolā ne fakamoe‵moe tatou ki ei?

⁵ E fai mai penei te Tusi Tapu e uiga ki te tino telā e fai ne ia te loto o te Atua: “Kae ko mea katoa e fai ne ia ka manuia eiloa.” (Sala. 1:3) Kae e se fakauiga i ei me i so se mea e fai ne tatou mō Ieova ka iku atu faeloa ki mea e ma‵nako tatou ki ei. Ko “‵fonu i fakalavelave” a olaga o tino ona ko te tulaga sē ‵lei katoatoa—o tatou mo nisi tino. (Iopu 14:1) E se gata i ei, e mafai eiloa o manuia a tino ‵teke i olotou taumafaiga ke taofi aka te faiga o te ‵tou galuega talai i te auala masani. (1 Koli. 16:9; 1 Tesa. 2:18) Tela la, e fakaiku aka pefea ne Ieova a te iku manuia o te ‵tou galuega talai? Mafaufau ki nisi akoakoga fakavae i te Tusi Tapu kolā ka fesoasoani mai ke tali aka te fesili tenei.

6. E fakaiku aka pefea ne Ieova a te iku manuia o ‵tou galuega e fai mō ia?

⁶ E kilo mai a Ieova ki ‵tou taumafaiga mo te ‵tou tumau i ei. I te kilokiloga a Ieova, e iku manuia te ‵tou galuega māfai e ga‵lue malosi tatou mo te alofa, faitalia te auala e ‵saga mai ei a tino. Ne tusi mai a Paulo: “Me i te Atua e sē se tino sē amiotonu ke puli i a ia otou galuega mo te alofa ne fakaasi ne koutou mō tena igoa i te taviniga mo te tumau i te taviniga ki tino tapu.” (Epe. 6:10) E masaua ne Ieova ‵tou taumafaiga mo ‵tou a‵lofa faitalia me e seai ne ikuga ‵lei e maua mai i ei. Tela la, e mafai eiloa o fakasino atu ki a koe a pati ne fai ne Paulo ki te kau Kolinito: “E se mafai o māumāu otou galuega e fai mō te Aliki,” faitalia me ko galuega konā e maua mai i ei a ikuga ne fakamoemoe koe ki ei io me ikai.—1 Koli. 15:58.

7. Ne a mea e mafai o tauloto ne tatou mai i pati a te apositolo ko Paulo e uiga ki tena galuega talai?

 ⁷ A te apositolo ko Paulo se misionale tu ‵kese, telā ne faka‵tu ne ia a fakapotopotoga ‵fou i fa‵kai e uke. Kae i te taimi ne manakogina ei ke ‵pulu ne ia tena fetaui ‵lei ke fai mo tavini a Keliso, ne seki fai atu ne ia a te aofaki o tino ne fesoasoani a ia ki ei ke fai mo Kelisiano. I lō te fai penā, ne ‵teke atu a ia ki pati a tino kolā ne taumafai o fakamaluga ne latou a latou eiloa i a ia, telā ne tusi atu a Paulo: “E uke atu aku galuega ne fai.” (2 Koli. 11:23) E pelā mo Paulo, masaua me i ‵tou taumafaiga mo te ‵tou tumau i ei ko mea kolā e fakatāua malosi ne Ieova.

8. Se a te mea e ‵tau o masaua ne tatou e uiga ki te ‵tou galuega talai?

⁸ E fakafiafia atu ki a Ieova a te ‵tou galuega talai. Ne uga atu ne Iesu a soko e toko 70 ke talai atu te fekau o te Malo, kae i te fakaotiga o te lotou galuega talai ‘ne ‵foki atu latou mo te fia‵fia.’ Se a te pogai o te lotou fia‵fia? Ne fai mai latou: “Ne faka‵logo mai foki a temoni ki a matou mai te fakaaogaga o tou igoa.” Kae ne faka‵tonu aka ne Iesu olotou mafaufauga mai te fai atu ki a latou: “Sa fia‵fia me i agaga ma‵sei ko faka‵logo ki a koutou, kae ke na fia‵fia me ko oti ne tusi otou igoa i te lagi.” (Luka 10:17-20) Ne iloa ne Iesu me ka se maua faeloa ne latou a tala ‵gali penei i te lotou galuega talai. A te ‵tonuga loa, e se iloa ne tatou me e tokofia a tino kolā ne fakalogo‵logo ki te kau soko ne fai mo fai ne tino tali‵tonu. Ne ‵tau o malamalama a te kau soko me i te lotou fia‵fia e se maua fua mai i mea ne fai ne latou, kae e sili atu i ei, mai te iloaga me e fiafia a Ieova ki olotou taumafaiga ne fai.

9. E ‵tusa mo te Kalatia 6:7-9, se a te ikuga māfai e tumau tatou i te galuega talai?

⁹ Kafai e tumau tatou i te ‵tou galuega talai, ka maua ne tatou te ola se-gata-mai. Kafai e ‵toki kae tausi faka‵lei ne tatou mo te loto fia‵fia a fuaga o te munatonu o te Malo, ko ‘‵toki foki ne tatou a mea mō te agaga’ mai te talia ne tatou a te agaga tapu o te Atua ke galue ‵lei i ‵tou olaga. Kafai fua “e se ‵fiu” tatou, e tauto mai a Ieova me ka maua ne tatou te ola se-gata-mai, faitalia me ne seki mafai o fesoasoani atu tatou ki se soko fou ke fai tena tukuatuga ki te Atua.—Faitau te Kalatia 6:7-9.

10. Se a te mea e faka‵na ki ei a te kilokiloga a tino ki te ‵tou galuega talai?

¹⁰ A te ‵saga mai mo te sē ‵saga mai o tino e faka‵na eiloa ki te tulaga o olotou loto. Ne fakamatala mai ne Iesu a te munatonu tenei i tena tala fakatusa e uiga ki te tino ‵toki lakau telā ne ‵toki ana fuaga i luga i laukele kese‵kese, kae e tasi fua te fuaga ne ola aka mai i te laukele ola ‵lei. (Luka 8:5-8) Ne fai mai a Iesu me i laukele kese‵kese e fakasino ki loto o tino mo olotou kilokiloga kese‵kese ki “te muna a te Atua.” (Luka 8:11-15) E pelā mo te tino ‵toki lakau, e se mafai o pule atu tatou ki fuataga o ‵tou galuega, me e faka‵na loa ki tulaga o loto o ‵tou tino fakalogo‵logo. A te ‵tou tiute ko te tumau i te ‵toki o fuaga ‵lei o te Malo. E pelā mo pati a Paulo, “ka maua eiloa ne tino taki tokotasi a tena taui e ‵tusa mo ana galuega ne fai,” kae e se ‵tusa mo ikuga o ana galuega.—1 Koli. 3:8.

11. Kaia ne manuia ei a Noa e pelā me se “tino talai o te amiotonu”? (Onoono ki te ata i te ‵kava.)

¹¹ Ne fetaui a molimau a Ieova i aso mua mo tino kolā e se fia ‵saga atu ki te lotou fekau. E pelā mo Noa, ne fai a ia mo “tino talai o te amiotonu,” mō se fia sefulu tausaga. (2 Pe. 2:5) E mautinoa me ne fakamoemoe a ia ke ‵saga mai a tino ki tena galuega talai, kae e seai ne pati a Ieova me ka tupu te mea tenā. I lō te fai penā, i te taimi ne fakatonu atu ki a Noa ke faite te vaka, ne fai atu te Atua: “E ‵tau mo koe o ulu ki loto i te vaka, ko koe, ko au tama tāgata, tau avaga, mo avaga a au tama tāgata.”  (Kene. 6:18) Kae mai te mafaufau ki te lasi o te vaka telā ne fai atu ne te Atua ke faite, kāti ne iloa ne Noa me ka se tokouke a tino ka ‵saga atu ki tena galuega talai. (Kene. 6:15) E pelā mo te mea ne tupu, e iloa ne tatou me e seai eiloa se tino mai te lalolagi fakasaua tenā ne saga atu ki te talaiga a Noa. (Kene. 7:7) E mata, ne kilo atu a Ieova ki a Noa me se aoga tena galuega talai? Ikai! I te kilokiloga a Ieova, ne manuia te galuega talai a Noa me ne fakamaoni a ia o fai a mea katoa ne fai atu a Ieova ke fai ne ia.—Kene. 6:22.

12. Ne maua pefea ne te pelofeta ko Ielemia a te fiafia i tena galuega talai faitalia te sē ‵saga mai o tino mo ‵tekemaiga?

¹² Ne talai atu foki a te pelofeta ko Ielemia mō se fia sefulu tausaga faitalia te sē fia ‵saga atu o tino mo ‵tekemaiga. Ne loto vāivāi malosi a ia ona ko “fakamaseiga mo fakatauemuga” mai tino ‵teke telā ne mafaufau ei ke tiaki tena galuega. (Iele. 20:8, 9) Kae ne seki ‵fiu a Ielemia! Se a te mea ne fesoasoani atu ke manumalo a ia i ana kilokiloga sē ‵lei kae ke maua te fiafia i tena galuega talai? Ne saga tonu atu a ia ki manatu ‵tonu tāua e lua. Muamua la, a te fekau a te Atua telā ne fakaoko atu ne Ielemia ki tino e aofia i ei a “aso mai mua mo se fakamoemoega.” (Iele. 29:11) A te lua, ko oti ne filifili ne Ieova a Ielemia ke fakaoko atu tena fekau ki tino. (Iele. 15:16) E avatu foki ne tatou se fekau o te fakamoemoega i se lalolagi masei tenei kae tauave ne tatou te igoa o Ieova e pelā me ko ana Molimau. Kafai e ‵saga tonu atu tatou ki manatu ‵tonu tāua e lua konei, ka mafai eiloa o fia‵fia tatou faitalia me se a te kilokiloga a tino ki te ‵tou fekau.

13. Se a te mea e tauloto ne tatou mai te tala fakatusa a Iesu i te Maleko 4:26-29?

¹³ E gasolo malielie ki mua se tino i te feitu faka-te-agaga. Ne akoako mai ne Iesu a te mea tenei i tena tala fakatusa e uiga ki se tino ‵toki lakau telā ne moe. (Faitau te Maleko 4:26-29.) Ne ‵tupu malielie aka a fuaga kolā ne ‵toki ne te tino ‵toki lakau kae ne seki mafai o fai ne ia se mea ke ‵tupu vave aka. Kāti ka se lavea foki ne koe a ikuga o tau galuega ko te faiga o soko mō se taimi leva, me e ‵tau o ola malielie aka a te munatonu i se tino. E pelā loa mo te tino ‵toki lakau, e se mafai o faimālō ana lakau ke ola aka i te makini e manako a ia ki ei, e se mafai foki o faimālō ne tatou a ‵tou akoga faka-te-Tusi Tapu, ke gasolo vave ki mua i te feitu faka-te-agaga e ‵tusa mo te mea e ma‵nako tatou ki ei. Tela la, ke mo a ma loto vāi‵vai io me ‵fiu vave māfai tō tuai tena gasolo ki mua i te feitu faka-te-agaga. E pelā mo te ‵tokiga o lakau, e manakogina a te kufaki i te faiga o soko.—Iako. 5:7, 8.

14. Se a te tala e fakaasi mai i ei me e gasolo malielie aka a ikuga o te ‵tou galuega talai?

¹⁴ I nisi koga talai, e faigata ke lavea atu a ikuga o ‵tou galuega talai mō se fia tausaga. Mafaufau ki te tala o Gladys mo Ruby Allen, se tautaina kolā ne ‵tofi aka ke ga‵lue e pelā me ne paenia tumau i te 1959, i se fa‵kai o Kanata ko Quebec. * Ona ko fakamalosiga mai tino o te fa‵kai mo te lotu Katolika, ne seki fia‵fia a tino o fakalogo‵logo ki te fekau o te Malo. Ne fai mai a Gladys: “Ne olo māua mai fale ki fale i aso katoa mō se lua tausaga e aunoa mo se tino ke fai‵pati māua ki ei! E o‵mai a tino ki te mataloa kae kafai ko lavea ne latou me ko māua, ‵fuli mai fua olotou tua o olo. Kae ne seki ‵fiu eiloa māua.” Fakamuli ifo, ne gasolo o ‵lei a te kilokiloga a tino, kae ne momea aka te magoi o te ‵lei o te galuega talai i konā. Ko tolu nei a fakapotopotoga i te fa‵kai tenā.—Isa. 60:22.

15. Se a te mea e akoako mai i te 1 Kolinito 3:6, 7 e uiga ki te galuega ko te faiga o soko?

¹⁵ A te galuega ko te faiga o soko e manakogina a te fesoasoani o tino e tokouke. Ne fai mai  sāle me e manakogina te fesoasoani o te fakapotopotoga ke mafai ne se tino o gasolo atu ki mua i te papatisoga. (Faitau te 1 Kolinito 3:6, 7.) E tuku atu ne se tino talai se tamā pepa io me se mekesini ki se tino fiafia. E iloa aka ne te taina me e se mafai o foki atu a ia o fai tena toe asiga, tenā fakamolemole ei ki te suā tino talai ke toe asi atu ki ei. Ko kamata ei ne te tino talai tenā se akoga faka-te-Tusi Tapu. E ‵kami ne ia a taina mo tuagane kese‵kese ke ‵kau ki te akoga kae fakamalosi atu ne ia a te tino akoga i auala kese‵kese. So se taina io me se tuagane telā e fetaui mo te tino akoga, ka fesoasoani eiloa ke fakasiusiu ne ia a te fuaga o te munatonu. I te auala tenā, ne fai mai a Iesu me i te tino ‵toki lakau mo te tino tau ka fia‵fia fakatasi māfai ko tau a fuataga i te feitu faka-te-agaga.—Ioa. 4:35-38.

16. Kaia e mafai ei o maua ne koe te fiafia i tau galuega talai faitalia me e masaki io me e se malosi ‵lei koe?

¹⁶ Kae e a māfai e se uke au mea e mafai o fai i te galuega talai mo te akoakoatuga o te tala ‵lei ona ko koe e masaki io me se malosi ‵lei? Koi mafai eiloa o fiafia koe ki ou tusaga e mafai o fai. Mafaufau ki te tala o te tupu ko Tavita i te taimi ne olo atu ei a ia mo ana tāgata o faka‵sao olotou kāiga mai te kau Amaleka. E toko luaselau a tāgata ko tō fi‵ta telā ne ‵nofo ei o tausi olotou kope. I te taimi ne manumalo latou i te taua, ne fai te fakatonuga a Tavita ke vaevae a mea katoa ne maua mai te taua i a latou katoa. (1 Samu. 30:21-25) E tai ‵pau eiloa mo te ‵tou galuega ko te faiga o soko i te lalolagi kātoa. A tino katoa kolā e fai te ‵toe mea e mafai o fai, e mafai o fia‵fia fakatasi māfai ko oti ne fakasao aka se tino fou kae fesoasoani atu ki a ia ke sasale i te auala ki te ola.

17. Kaia e ‵tau ei o fakafetai tatou ki a Ieova?

¹⁷ E fakafetai tatou ki a Ieova mo tena kilokiloga alofa ki te ‵tou taviniga e fai ki a ia. E iloa ne ia me e se mafai o pule atu tatou ki ikuga o ‵tou taumafaiga totino. Kae e lavea eiloa ne ia a te ‵tou ga‵lue malosi mo ‵tou manakoga tonu kae e taui mai eiloa ne ia. E akoako foki ne ia tatou ke maua te fiafia i ‵tou tusaga e fai i te ‵tauga o fuataga. (Ioa. 14:12) E mafai eiloa o mautinoa i a tatou a te taliaga a te Atua māfai e se ‵fiu tatou!