1. Иегованың Херечизи болганывыска чүге өөрүп, чоргаарланып чоруур бис?

 ИЕГОВАНЫҢ Херечизи болуру — биске аас-кежик болгаш улуг алдар-хүндү-дүр. Бис ол атка дүүштүр чурттап чоруур бис. Ол ышкаш суртаалдап тургаш база өөреникчилер белеткеп тургаш, Иегованың дугайында чугаалап турар бис. Мөңге амыдыралга шын хамаарылгалыг улус Бурганның бараалгакчылары апаарга, Иисус ышкаш, өөрүп турар бис (Аж.-ч. 13:48). Өөреникчилери суртаалга болган солун болуушкуннарын чугаалап бээрге, Иисус амырап турган (Лк. 10:1, 17, 21).

2. Суртаалга шыңгыы хамаарылгавысты канчаар көргүзүп турар бис?

² Суртаалга шыңгыы хамаарылгалыг бис. Павел элчин Тимофейни: «Бодуңну болгаш өөредип турар чүүлүңнү кичээнгейлиг хайгаара. ...Ынчаар кылып чоруур болзуңза, бодуңну-даа, дыңнакчыларыңны-даа айыылдан кадагалап алыр сен» — деп кыйгырган (1 Тим. 4:16). Өскээр чугаалаарга, Бурганның Чагыргазының дугайында медээ улустуң чуртталгазын камгалап турар. Ынчангаш бодувусту кичээнгейлиг хайгаараар болзувусса эки, чүге дизе ол Чагырганың хамаатылары болгай бис. Шын алдынып тургаш, Иегованы алдаржыдып база суртаалдап турар медээвиске дүүштүр амыдыраарын кызып чоруур бис (Флп. 1:27). Өөредип турар чүүлүвүстү кичээнгейлиг хайгаараар дээш, аңаа эки белеткенип, Иеговадан дузаны дилеп турар бис.

3. Буянныг медээни кижи бүрүзү хүлээп албас боор деп чүүлдү көргүскен чижекти чугаалаңар.

³ Кызарывыска-даа, буянныг медээни чамдыкта каш санныг кижи хүлээр азы кым-даа хүлээвес боор. 1929 чылдан 1947 чылга чедир Исландияга чааскаан бараалгап турган Георг Линдал деп акывыстың чижээн сактып кээлиңер. Ол он-он  муң номнарны тараткан-даа болза, алыс шынны кым-даа хүлээп албаан. Георг мынча дээн: «Ол черге чамдык улус алыс шынга удур турган, а хөй кезии ону шуут херекке албаан». Удатпаанда Исландияже Галаад Школазының доозукчулары келген. Ынчалза-даа чүгле 9 чыл эрткенде, ооң чурттакчылары Бурганга чуртталгазын бараалгадып, сугга суктуруп эгелээн *.

4. Улус буянныг медээни дыңнаваска азы Бурганче чоокшулаар дээш базымнарны кылбаска, чүнү миннип турар бис?

⁴ Буянныг медээни улус дыңнаваска азы Библия өөредип турар киживис Бурганче чоокшулаар дээш, базымнар кылбаска, муңгараар бис. Еврейлер Иисусту Мессия кылдыр хүлээвеске, Павел элчин база шак ындыг минниишкиннерлиг турган. Ол мынча дээн: «Муңгаралым муңчок улуг, чүрээмде аарышкыны үзүп төтпес» (Рим. 9:1—3). Силер библейжи кичээлдериңерге эки белеткенип, өөренип турар кижи дээш мөргүп турар дижик силер. А ол билип алган чүүлүн амыдыралынга ажыглавас боорга, ол библейжи кичээлди каар ужурга таварышкан силер. Азы Библия өөредип турар улузуңарның чаңгызы-даа сугга суктуруп албаан. Ол силерниң бурууңар бе? Иегова силерниң суртаалыңарга чүүлзүнмейн турар бе? Ам бо 2 айтырыгны көрүптээлиңер: 1) Суртаалга чедиишкинивис чүүден хамааржыр? 2) Суртаалче шын көрүштүг болурунга биске чүү дузалаар?

5. Суртаалга күжениишкиннерни үндүреривиске-даа, түңнелинде чүге күзээнивис ышкаш болбазыл?

⁵ Библиядан алырга, Бурганның күзел-соруун күүседип турар кижи «чүнү-даа кылганда, чедиишкинни чедип алыр» дээн (Ыд. ыр. 1:3). Ынчалза-даа чүнү-даа кылыр болзувусса, Иеговага бараалгалывыс үргүлчү чедиишкинниг болур дивээни ол. Кижилер тергиин эвес болгаш, чуртталга «качыгдал-биле пөккен» болгай (Иов 14:1). Оон аңгыда, удурланыкчыларывыс бистиң оруувусту «дуй туруп» турар боорга, чамдыкта хостуг суртаалдап шыдавас бис (1 Кор. 16:9; 1 Фес. 2:18). Ынчаарга, Иегованың бодалы-биле алырга, бистиң суртаалга чедиишкинивис чүүден хамааржыр? Бо айтырыгның харыызын билип алыр дээш, каш библейжи дүрүмнү сайгарыптаалыңар.

6. Иегова суртаалывысты чүге дөмей-ле чедиишкинниг деп санап турар?

⁶ Иегова күжениишкиннеривисти болгаш быжыг туруштуувусту эскерип турар. Буянныг медээни улус дыңнаар-дыңнавас-даа болза, улаштыр суртаалдап турарывысты Иегова чедиишкинниг деп санаар. Павел элчин: «Чүге дээрге Бурган чөптүг. Эрткен болгаш амгы үеде Ооң улузунга бараан бооп тура, кылган ажыл-херээңерни база Аңаа көргүскен ынакшылыңарны Ол уттур хире эвес» (Евр. 6:10). Бистиң өөредип турар улус сугга суктурбаан-даа болза, кылган ажыл-херээвисти болгаш ынакшылывысты Иегова утпас.  Оон аңгыда, Павел коринфичилерни: «Дээрги-Чаяакчы дээш кылган ажыл-херээңер хилис барбазын билир-ле болгай силер» — деп бүзүреткен (1 Кор. 15:58). Бистиң суртаалывыс күзээнивис ышкаш, түңнелдиг болбас-даа болза, бо сөстер биске база хамааржыр.

7. Павел элчинниң суртаалга хамаарылгазындан чүнү өөренип ап болур бис?

⁷ Павел элчин билдингир миссионер чораан. Ол хөй хоорайларга чыыштарны тургускан. Ындыг-даа болза, чамдык улус Павелди багай башкы сен деп шүгүмчүлеп турган. Павел оларга «мен хөй улуска Бурганның бараалгакчылары апаарынга дузалаан мен» деп бодун камгалап, харыылап болур турган. Ынчалза-даа ол: «Христоска олардан артык бараан бооп чор мен!» — деп бижээн (2 Кор. 11:23). Бис база, Павел ышкаш, үндүрген күжениишкиннеривисти болгаш быжыг туруштуувусту Иегова үнелеп чоруур деп утпаалыңар!

8. Суртаалга хамаарыштыр кандыг чугула алыс шынны сактыр ужурлуг бис?

⁸ Бистиң суртаалывыс Иегованы өөртүп турар. Иисус 70 өөреникчизин Чагырга дугайында буянныг медээни суртаалдазын дээш чорудупкан. Олар Иисуска өөрүшкүлүг дедир ээп келгеш: «Дээрги! Силерниң өмүнээңерден дужаарывыска, буктар безин биске чагыртып тур» — дээннер. Ынчалза-даа Иисус оларның кичээнгейин кол чүүлче угландырган: «Буктарның силерге чагыртып турары дээш эвес, а силерниң аттарыңарның дээрде бижиттингени дээш амыраңар» (Лк. 10:17—20). Өөреникчилериниң суртаалынга ындыг кайгамчык болуушкуннар кезээде турбас деп, Иисус билип турган. Шынын чугаалаарга, ооң өөреникчилериниң суртаалдап турган улузунуң чежези христиан апарганын билбес бис. Ындыг-даа бол, Иисус эдерикчилеринге чугула чүүлдү өөредиксээн: өөрүшкүвүс улустуң бисти дыңнап турарындан эвес, а кызымаккай бараалгалывысты Иеговага көөрү өөрүнчүг деп чүүлдү минниринден хамааржыр.

9. Суртаалывысты кагбас болзувусса, кандыг шаңналды алыр бис? (Галатчыларга 6:7—9).

⁹ Номчуптуңар: Галатчыларга 6:7—9. Суртаалды кагбас болзувусса, мөңге амыдыралды алыр бис. Павел элчинниң сөстеринден алырга, холдарывыска дыш бербейн, алыс шынның үрезинин тарып, суггарар болзувусса, ыдыктыг сүлдениң «хөрзүнүнге тарып турар» бис. Өскээр чугаалаарга, ыдыктыг сүлдеге башкартып турар бис. Дүжүп бербес болзувусса, Иегова «Сүлдеден мөңге амыдыралды ажаап алыр» силер деп аазаан. Ол шаңналды алыры өөредип турар улузувустуң сугга суктуруп алганындан хамаарышпас.

10. Улустуң буянныг медээни дыңнаар-дыңнавазы чүүден хамааржыр?

¹⁰ Буянныг медээни дыңнаар-дыңнавазы улустуң чүрээнден хамааржыр. Ол бодалды Иисус тараа чажыкчызының дугайында угаадыглыг чугаазынга көргүскен. Ооң чашкан үрезиннери аңгы-аңгы черлерге кээп дүшкен. Чүгле эки хөрзүнге дүшкен үрезин дүжүт берген (Лк. 8:5—8). Чер дээрге кижилерниң чүрээ-дир. Олар Бурганның медээзинге аңгы-аңгы хамаарылгалыг боор деп, Иисус тайылбырлаан (Лк. 8:11—15). Ажылывыстың түңнели бистен эвес, а суртаалдап турар улузувустуң чүрээнден хамааржыр. А бистиң хүлээлгевис дээрге Чагырга дугайында буянныг медээниң үрезинин улаштыр тарыыры-дыр. Павел элчинниң чугаалааны ышкаш, кижи «кылган ажыл-херээнге дүүштүр шаңнал алыр», а түңнели дээш эвес (1 Кор. 3:8).

11. Чүге Иегова Нойну чедиишкинниг суртаалчы деп санап турган? (Журналдың даштында чурукту көрүңер.)

¹¹ Шаандан тура Иегованың бараалгакчыларын улус шоолуг дыңнавас турган. Ону 40—50 чыл дургузунда «чөптүг-шынныг чорукту  суртаалдаан» Ной көрген (2 Пет. 2:5). Улус ооң чугаалаан медээзин хүлээп алыр боор деп, ол идегеп турган. Ынчалза-даа Иегова ындыг боор деп чугаалаваан. Ной бажың-хеме тудуп турда, Ол: «Сен бажың-хемеге оолдарың, кадайың база кенээттериң-биле кады олуруптар сен» — дээн (Э. д. 6:18). Бурган Нойга бажың-хемениң хемчээлин айтып берип турда, ынаар хөй кижи кирип шыдавас деп, Ной билип турган (Э. д. 6:15). Нойнуң суртаалын мырыңай кым-даа херекке албаан! (Э. д. 7:7). Ынчаарга Иегова Нойну багай суртаалчы деп санаан бе? Чок! Ол Бурганның айыткан чүүлүн шак ынчаар күүседип турган боорга, Ол ону аажок үнелеп турган (Э. д. 6:22).

12. Иеремияны улус дыңнавайн, аңаа удурланып турза-даа, ол суртаалга өөрүшкүзүн чүге чидирбээн?

¹² Иеремия база он-он чылдар дургузунда суртаалдап чораан. Улус ооң медээзин дыңнавайн, аңаа удурланып турган. Иеремия улуска кочуладып, куду көрдүргеш, чөгели төнүп, суртаалдавас деп шиитпирлээн. Ынчалза-даа ол ыыттавайн барып шыдавас турган! (Иер. 20:8, 9). Аңаа дүжүп бербезинге база улаштыр өөрүшкүлүг суртаалдаарынга чүү дузалаан? Ол ийи чугула чүүлдү кичээнгейге алган. Бирээде, ол кижилерге келир үени болгаш идегелди берип турар медээни суртаалдап турган (Иер. 29:11). Ийиде, ол Иегованың адындан чугаалаар алдар-хүндүлүг болган (Иер. 15:16). Бис база, Иеремия ышкаш, бо каржы делегейде улуска идегел дугайында медээни чугаалап чоруур бис. Оон аңгыда, Иегованың адындан херечилеп турар бис. Бо ийи чүүлдү сактып чоруур болзувусса, кижилер буянныг медээни дыңнавас-даа болза, өөрүшкүлүг артып болур бис.

13. Иисустуң угаадыглыг чугаазындан чүнү өөренип ап болур бис? (Марк 4:26—29).

¹³ Кижиниң Бурган-биле харылзаазы чоорту быжыгар. Номчуптуңар: Марк 4:26—29. Ону Иисус угаадыглыг чугаазында демдеглээн. Кажан тараа чажыкчызы үрезинин тарып каарга, ол оожум өзер, ынчангаш кижи аңаа кандыг-даа салдар чедирип шыдавас. Шак ынчаар Библия өөренип турар кижиниң Бурган-биле харылзаазы чоорту быжыгар база билдинмес боор. Бистиң күзеп турарывыс ышкаш, Библия өөренип турар кижи дүрген Бурган-биле харылзаазын быжыктырбас болза, муңгараан ажыы чок. Оларга үе херек боор, ынчангаш шыдамык бооп, холдарыңар сула салбаңар. Тараа чажыкчызынга дег, өөреникчилер белеткээр ажылга база шыдамык чорук херек (Иак. 5:7, 8).

14. Суртаалга шыдамык чорукту көргүскен чижекти чугаалаңар.

¹⁴ Чамдык черлерде суртаалывыстың түңнели дыка хөй чылдар дургузунда билдинмес боор. Глэдис биле Руби Аллен угбашкыларның чижээн көрүптээлиңер. Оларны 1959 чылда Канадада Квебек деп хоорайже доктаамал эгелекчилер кылдыр томуйлап каан *. Ында улус кожаларындан корткаш база католик церковьтуң аайындан эртпес дээш, буянныг медээни дыңнавас турган. Глэдис угбавыс үлешкен: «Бис 2 чыл дургузунда хүннүң-не 8 шак суртаалдап турган бис. Бажыңнарны соктаарывыска, улус бис ийини көрүп кааш, эжиин ажытпас турган. Ынчалза-даа дүжүп бербээн бис». Чоорту ол черниң чурттакчыларының чүректери чымчап, буянныг медээни шору дыңнап турар апарган. Ам ол хоорайда 3 чыыш бар (Иса. 60:22).

15. 1 Коринфичилерге 3:6, 7-ден өөреникчилер белеткээриниң дугайында чүнү билип ап турар бис?

¹⁵ Өөреникчилер белеткээри — чаңгыс кижиниң ажылы эвес-тир. Херек кырында кижиге сугга суктурарынга бүдүн чыыш дузалаар.  (Номчуптуңар: 1 Коринфичилерге 3:6, 7.) Чижээ, акывыс бир кижиге буклетти азы журналды арттырып кааш, катап кээп шыдаваан дижик. Ынчангаш ол өске акыйны аңаа барыптарын дилээн. Ийи дугаар акывыс демги кижи-биле Библияны өөренип эгелээн. Ол библейжи кичээлче янзы-бүрү акы-угбаларны чалап турар. Олар өөреникчиниң Иегова-биле хамаарылгазын быжыктырарынга бодунуу-биле дузалажып турар. Шак ынчаар олар эмеглежип тургаш, өөренип турар кижиниң чүрээнде алыс шынның үрезинин суггарып турар. А кажан ол сугга суктуруп алырга, шупту катай, «тараа чажыкчызы-даа, дүжүт ажаакчызы-даа», өөрүүрлер (Ин. 4:35—38).

16. Күжүвүс болгаш кадыывыс шоолуг эвес-даа болза, суртаалга өөрүшкүлүг артарынга биске чүү дузалаар?

¹⁶ Кадыывыс баксырааны-биле азы назы-харывыс улгаткан боорга, мооң мурнунда ышкаш, суртаал ажылынга хөй киржип шыдавас болзувусса канчаар? Дөмей-ле үлүүвүс киирип, өөрүшкүлүг артып болур бис. Давид хаанның чижээн көрүптээлиңер. Амалик дээрбечилер Давидтиң болгаш 600 дайынчыларының өг-бүлелерин болгаш эт-хөреңгизин хунаап апарган. Ынчангаш Давид дайынчылары-биле оларның соондан үнүпкен. Ынчалза-даа 200 дайынчы шылап калгаш, чыдып калган. Солун чүүл, Давид тиилеп алгаш, дайынче чораан улуска-даа, шылаан 200 дайынчызынга-даа олча-тывыжын деңге үлеп берген (1 Хаан. 30:21—25). Моон чүнү өөренип ап болур бис? Чыышка бир кижи сугга суктуруп алырга, ол дээрге бүгү чыыштың ачы-хавыяазы-дыр. Ынчангаш шыдаар-ла чүүлдү кылыр болзувусса, өөрүшкүнү деңге үлежир бис.

17. Иеговага чүү дээш өөрүп четтирер бис?

¹⁷ Улусту буянныг медээни хүлээп дыңнаарынче албадап шыдавас бис деп, Иегова дыка эки билир. Ынчангаш Ол бистиң суртаалга үндүрүп турар күжениишкиннеривисти болгаш эки хөөнүвүстү үнелеп, ол дээш бисти шаңнап турар. Суртаал ажылынче киирип турар үлүүвүс кандыг-даа бол, Бурган биске өөрүшкүлүг артарынга дузалап турар (Ин. 14:12). Бо бүгү дээш дээрде Адавыска өөрүп четтирер-дир бис. Холувус сула салбайн, дүжүп бербес болзувусса, Иегованың чүрээн өөртүр бис!