1. ¿Bin yuʼun tseʼel koʼtantik te testigootik yuʼun te Jehová?

¡TSEʼEL KOʼTANTIK te bitʼil testigootik yuʼun te Jehová! Kʼalal ya jcholtik skʼop Dios sok ya jnojptestik te ants winiketik, jich ya kakʼtik ta ilel te kichʼojbeytik te sbiil sok te Testigootik yuʼun. Tseʼel koʼtantik te ya jkoltaytik «te machʼa jich yoʼtanik te ya xkuxinik ta sbajtelkʼinal» te ya x-ochik ta j-abat yuʼun te Jehová (Hech. 13:48, TNM). Jich ya kaʼiy jbatik bitʼil la yaʼiy sba te Jesús, te «bayel yutsil yoʼtan [...] ta scuenta te Espíritu», melel te kʼalal sujtik talel te jnopojeletik ta scholel skʼop Dios la yalbeyik te bin kʼax ta stojolik (Luc. 10:1, 17, 21).

2. ¿Bin-utʼil ya kakʼtik ta ilel te mukʼ skʼoplal ta koʼtantik te scholel skʼop Dios?

² Mukʼ skʼoplal ta koʼtantik te scholel skʼop Dios. Te jpuk-kʼop Pablo jich la yalbey te Timoteo: «Tsahtaya aba soc tsahtaya te bin yac awacʼ ta nopele; [...] teme hich yac apase, hich ya xcolat a soc te machʼatic ya yaʼiybat te acʼope» (1 Tim. 4:16). Te bin la yal te Pablo la yakʼ ta ilel te ayto machʼatik ya sta skolelik. Jtsajtaytik te bin yilel jtaleltik, melel kakʼoj jbatik ta stojol te Wentainel yuʼun te Dios. Spisil-ora ya jkʼantik te yakuk kakʼtik ta ilel lekil talelil te ya yalbey yutsil skʼoplal te Jehová sok te kʼoemuk ta koʼtantik te lek yachʼil kʼop te ya jpuktik ta alel (Filip. 1:27). Jaʼnix jich jtsajtaytik te bitʼil ya xnojpteswanotik kʼalal ya jchajpan jbatik ta scholel skʼop Dios sok jkʼanbeytik koltayel te Jehová kʼalal ya kalbeytik skʼoplal.

3. ¿Bin yilel stalel ya yakʼik ta ilel te ants winiketik kʼalal ya jcholbeytik skʼop Dios sok bin ejemplo ay kuʼuntik?

³ Manchukme ya jpastik tulan ta scholel skʼop Dios, ayniwan ants winiketik ta jterritoriotik te maʼyuk skʼoplal ta yoʼtanik te Wentainel yuʼun te Dios. Jnop kaʼiytik ta stojol te hermano Georg Lindal, te stukel la schol skʼop Dios ta spamal Islandia ta 1929 kʼalal ta 1947. Bayal ta mil publicacionetik la yijkitay, pero maʼyuk machʼa och ta Testigo. Jich la yal: «Ay machʼatik la skontrainik te skʼop Dios, pero jteb ma spisiluk ma skʼan ya yaʼiyikix stojol». Kʼotik misioneroetik yuʼun Galaad yuʼun ya xkoltaywanik ta scholel skʼop Dios, pero te  ants winiketik jaʼnix jich ma la skʼan yaʼiyik stojol. Pero baluneb jaʼbil ta patil, ay machʼatik la yakʼ sbaik ta stojol Jehová sok la yichʼik jaʼ. *

4. ¿Bin yaʼiyel ya kaʼiy jbatik kʼalal te ants winiketik ma smulanik yaʼiyel te skʼop Dios?

⁴ Ya jmel koʼtantik kʼalal te ants winiketik ma smulanik yaʼiyel te skʼop Dios. Jichniwan ya kaʼiy jbatik bitʼil te Pablo, te jich la yal: «Bayel ya jmel coʼtan soc spisil ora ay bin cʼux ya caʼiy ta coʼtan». Melel te judioetik ma la schʼuun yoʼtanik te jaʼ Mesías te Jesús te albil skʼoplale (Rom. 9:1-3). ¿Bin ya jpastik teme ay machʼa ya kakʼbeytik nojptesel ta Biblia te ma xchʼi te schʼuunel yoʼtan manchukme ya jpastik tulan, ya jkʼopontik Dios ta stojol sok ta patil ma kakʼbeytikix nojptesel?, ¿bin ya jpastik teme maʼyuk machʼa jkoltayojtik yuʼun ya yichʼ jaʼ? Sok ¿jaʼbal jmul ya kaʼiytik te ya jnop ta koʼtantik te maba yak ta yakʼbelotik bendición te Jehová? Ta artículo ini, ya kakʼbeytik sujtib cheb jojkʼoyeletik: ¿Lekbal yak ta bael te kaʼteltik ta stojol te Jehová? Sok ¿bin ya jkʼantik te yakuk spas te ants winiketik?

5. ¿Bin yuʼun ma jichuk ya xkʼot ta pasel te bin jnopojtik ta stojol te Jehová?

⁵ Te Biblia jich ya yal ta stojol te machʼa ya spasbey skʼanojel yoʼtan te Dios: «Lec ya xcʼoht spisil bintic ya spas» (Sal. 1:3). Pero ma jaʼuk ya skʼan ya yal te spisil te bin ya jpastik ta stojol te Jehová jich ya xlokʼ te bitʼil ya jkʼantik. Te bitʼil jpisiltik jmulawilotik, jaʼ yuʼun te jkuxlejaltik «nojel ta wocol» (Job 14:1). Jaʼnix jich te jkontrataktik yaniwan xjuʼ ya skom te kaʼteltik ta scholel skʼop Dios (1 Cor. 16:9; 1 Tes. 2:18). Jich yuʼun-abi, ¿bin yilel ya yil Jehová te aʼtelil ya jpastik ta stojol? Yuʼun ya kakʼbeytik sujtib te jojkʼoyel kiltik te bin ya yal te Biblia.

6. ¿Bin yilel ya yil Jehová te aʼtelil ya jpastik ta stojol?

⁶ Te Jehová ya yil te ya jpastik tulan sok te kujchem kuʼuntik. Lek ya yil te kaʼteltik teme ya jpastik sok spisil koʼtantik sok skʼuxul koʼtantik, chikan teme lek o ma lek ya yaʼiyik te ants winiketik. Te Pablo jich la yal: «Ma yuʼunuc te ma tojuc yoʼtan te Dios, te ya schʼay ta yoʼtan te awaʼtelic soc te scʼuxul awoʼtanic te la awaqʼuic ta ilel ta scuenta sbihil, te bin utʼil la awacʼ abahic ta aʼbatinel ta stojol te machʼatic chʼuhltesbilic, soc te hich nix yaquex ta spasel cʼalal ora» (Heb. 6:10). Maba ya schʼay ta yoʼtan Jehová te ya jpastik tulan sok te skʼuxul koʼtantik, manchukme jich yilel te maʼyuk bin lek ya xlokʼ kuʼuntik-a. Te bin la yal te Pablo ta stojol te jchʼuunjeletik ta Corinto, jichuk ya xkʼot ta jtojoltik-euk: «Ma tojoluc ya xcʼoht te awaʼtelic yuʼun te Cajwaltique» (1 Cor. 15:58). Yuʼun-nix jich-a, manchukme te kaʼteltik ma jichuk ya xkʼot ta pasel te bin-utʼil jnopojtik.

7. ¿Bin ya yakʼ jnoptik te bin la yal te jpuk-kʼop Pablo ta swenta te scholel skʼop Dios?

 ⁷ Te jpuk-kʼop Pablo jaʼ lekil misionero kʼot sok la xjajch congregacionetik ta bayal lugaretik. Manchukme ay jchʼuunjeletik te mukʼ skʼoplal la skuy sbaik te la slabanik te Pablo sok la yalik te ma snaʼ nojpteswanej, pero te Pablo maʼyuk bin-ora la yal te jayeb machʼatik la skoltaylan yuʼun ya yichʼik jaʼ. Manchukme jich-abi, jich la skoltay sba ta kʼop: «Cʼax hich aʼtejemon a»(2 Cor. 11:23). Jtʼuntik te ejemplo yuʼun te Pablo sok ayuk ta koʼtantik te bin mukʼxan skʼoplal ta yoʼtan te Jehová, jaʼ te ya jpastik tulan sok te ya xkujch kuʼuntik.

8. ¿Bin ya skʼan ayuk ta koʼtantik ta swenta te scholel skʼop Dios?

⁸ Te Jehová ya smulan te ya jcholtik skʼop Dios. Ta jun buelta, te Jesús la stikun 70 ta tul jnopojeletik yuʼun ya scholik skʼop Dios. Kʼalal laj yoʼtanik, te Biblia ya yal te «bayel yutsil yoʼtanic a suhtic tal». ¿Bin yuʼun te bayal yutsil yoʼtanik? Jich la yalik: «Ha nix hich te pucujetic acʼotic ta jcuentacotic ta scuenta abihil». Pero jich albotik yuʼun te Jesús: «Ma me haʼuc tseʼel awoʼtanic yuʼun te acʼot ta acuentahic espírituhetic, haʼuc me tseʼel awoʼtanic yuʼun te tsʼihbabil ta chʼulchan te abihilique» (Luc. 10:17-20). Te Jesús snaʼoj te ma spisiluk-ora ya smulanik yaʼiyel te ants winiketik. Ma jnaʼtik te jaytul ochik ta jnopojel te la yichʼik cholbeyel skʼop Dios. Te jnopojeletik ma jaʼuknax ya skʼan tseʼel yoʼtanik yuʼun te lek la schʼam yaʼiyik te ants winiketik, jaʼ ta swenta te lek la yil Jehová te bitʼil la spasik tulan.

9. Jich bitʼil ya yal te Gálatas 6:7-9, ¿bin ya xlokʼ kuʼuntik-a teme ma jkom jbatik ta scholel skʼop Dios?

⁹ Ya jtatik kuxlejal ta sbajtelkʼinal, teme ma jkom jbatik ta scholel skʼop Dios. Kʼalal ya jpastik tulan ta stsʼunel kʼoem te smelelil kʼop, jaʼnix jich ya jtsʼuntik «ta scuenta te Espíritu», melel ya kakʼtik te ya x-aʼtej ta jkuxlejaltik te chʼul espiritu. Te Jehová jamal ya yal te ya yakʼbotik kuxlejal ta sbajtelkʼinal «teme ma ba ya xpehcʼaj coʼtantique», manchukme maʼyuk machʼa ya jkoltaytik yuʼun ya yichʼ jaʼ (kʼopona Gálatas 6:7-9).

10. ¿Bin ya yakʼ ta ilel te ants winiketik teme ya smulanik yaʼiyel te skʼop Dios o maʼuk?

¹⁰ Te bin yilel stalel te ants winiketik jaʼ chikan te bin ay ta yoʼtanik. Te Jesús la scholbey skʼoplal ta lokʼomba kʼop yuʼun te tsʼunbajel winik. Te winik la stsʼun te sit awaltsʼunubil ta yanyantik lum, pero te kʼalal kʼot ta lekil lum la yakʼ sit (Luc. 8:5-8). Te Jesús la yal te yanyantik lum, jaʼ skʼoplal te yoʼtan te ants winiketik, jich yuʼun-abi yanyantik te bin-utʼil ya xkʼot ta yoʼtanik «te scʼop Diose» (Luc. 8:11-15). Jich bitʼil ya xkʼax ta stojol te jtsʼunbajel, te joʼotik maʼyuk ta jwentatik snaʼel teme ya sitin te kaʼteltik, melel jaʼ chikan te bin yilel yoʼtan te ants winiketik. Mame jkom jbatik ta scholel te lek yachʼil kʼop yuʼun te Wentainel yuʼun te Dios. Jich bitʼil la yal te jpuk-kʼop Pablo, «jujutuhl ya xʼaʼbot yichʼ stojol, ha chican bin yilel yaʼtelic», ma jaʼuk te bin ya xlokʼ yuʼunik-a (1 Cor. 3:8).

11. ¿Bin yuʼun ya kaltik te jun yoʼtan la yalbey «scʼoblal te bin toj ta pasel» te Noé? (Ilawil te dibujo ta yelaw te revista).

¹¹ Te jayebix jaʼbil tale, bayal j-abatetik yuʼun Jehová scholojbeyik skʼop Dios te ants winiketik manchukme ma smulanik yaʼiyel stojol. Jich bitʼil te Noé bayalniwan jaʼbil la scholbey «scʼoblal te bin toj ta pasel» (2 Ped. 2:5). Jaʼniwan la skʼan te lajuk schʼam yaʼiy te ants winiketik, pero te Jehová maba la yakʼbey snaʼ te jich ya xkʼot ta pasel.  Kʼalal albot te bin-utʼil ya yichʼ pasel te arca, jich la yichʼ albeyel: «Ya me xʼochat ta barco soc anichʼnab, awihnam, soc yihnam anichʼnab» (Gén. 6:18). Kʼalal albot te bin smukʼul ya spas te arca, te Noé kʼotniwan ta yoʼtan te ma spisiluk te ants winiketik ya schʼam yaʼiyik bin ya yalbey skʼoplal (Gén. 6:15). Yuʼun-nix jich kʼot ta pasel-a, ni jtuluk ants winik la yichʼ ta wenta te bin la yalbey skʼoplal te Noé (Gén. 7:7). ¿Labal yal te Jehová te maʼyuk bin la spas? Maʼuk, melel jun yoʼtan la spas te bin albot ta mantal yuʼun te Jehová (Gén. 6:22).

12. ¿Bin la yakʼ ta yoʼtan te Jeremías yuʼun ya smulan te scholel skʼop Dios manchukme te ants winiketik ma smulanik sok kontrainot yuʼun?

¹² Jaʼnix jich te j-alwanej Jeremías bayal jaʼbil la schol skʼop Dios, manchukme ma la smulan yaʼiyel te ants winiketik sok kontrainot yuʼun. Chebaj yoʼtan ta swenta te bolkʼoptayel sok te labanel, la snop te ya yijkitay te aʼtelil akʼbil yuʼun te Jehová (Jer. 20:8, 9). Pero ma lujb ta spasel. ¿Bin koltayot yuʼun ya snop ta yoʼtan te bintik lek sok ya smulan te scholel skʼop Dios? Ay cheb te bin mukʼ skʼoplal ta yoʼtan. Sbabial, te bin la yalbey skʼoplal talem ta stojol Dios, melel ya yakʼ te ay bin lek ya staik ta pajel chaʼbej sok yuʼun ya sta smukʼul yoʼtanik (Jer. 29:11). Schebal, te jaʼ tsaot yuʼun te Jehová yuʼun ya yalbey skʼoplal (Jer. 15:16). Jaʼnix jich te joʼotik ya kakʼbeytik smukʼul yoʼtan te ants winiketik sok kichʼojbeytik sbiil te Jehová te bitʼil Testigootik yuʼun. Kʼalal jaʼ ya xbajt ta koʼtantik te bin mukʼik skʼoplal, ya jmulantik te scholel skʼop Dios manchukme te ants winiketik ma smulanik yaʼiyel stojol.

13. ¿Bin ya yakʼ jnoptik te lokʼombakʼop la yal te Jesús ta Marcos 4:26-29?

¹³ Ma orauk ya xchʼi te chʼuunel oʼtanil. Jich la yakʼ ta nopel te Jesús ta lokʼombakʼop yuʼun te jtsʼunbajel winik te ya x-och swayel (kʼopona Marcos 4:26-29). Te jtsʼunbajel kʼunkʼun la yil te ya sitin te yaʼtel sok maʼyuk bin la spas yuʼun oranax ya xchʼi te awaltsʼunubil. Jaʼ pajal sok teme ya spas ta skuxlejal te bin ya snop te machʼa ya kakʼbeytik nojptesel ta Biblia, kʼunkʼun ya xchʼi te schʼuunel yoʼtan. Jich bitʼil te jtsʼunbajel maʼyuk bin ya xjuʼ ya spas yuʼun oranax ya xchʼi te awaltsʼunubil, jaʼnix jich te joʼotik ma xjuʼ ya sujtik te estudianteetik yuʼun oranax ya xchʼi te schʼuunel yoʼtanik. Jaʼ yuʼun mame xchebaj koʼtantik teme yak ta yichʼel tiempo yuʼun ya xchʼi te schʼuunel yoʼtan. Ya skʼan ya jmaliytik te ya sta ta nopel te estudiante te ya x-abatin ta stojol Jehová (Sant. 5:7, 8).

14. ¿Bin ejemplo ya yakʼ ta ilel te ya xkʼax bayal tiempo te ya xjajch smulanik yaʼiyel te skʼop Dios te ants winiketik?

¹⁴ Ay territorioetik manchukme bayal jaʼbil ya yichʼ cholel skʼop Dios maʼyuk machʼa ya skʼan ya x-och ta j-abat yuʼun Dios. Kiltik te bin kʼax ta stojolik te Gladys sok te Ruby Allen, te jun-nax smeʼ statik te talemik ta Canadá. Ta 1959, la yichʼik tikunel bael ta Quebec jich bitʼil precursora regular. * Ay machʼatik maba la yaʼiybeyik skʼop te hermanaetik, melel la xiʼik te bin ya yalik te sacerdoteetik yuʼun te Iglesia católica sok te ants winiketik. Te Gladys jich la yal: «Ya jcholtik skʼop Dios waxakeb ora ta jujun kʼajkʼal ta nanatik, cheb jaʼbil jich la jpastik, pero maʼyuk machʼa la yaʼiy stojol. Te ants winiketik ya yilotik lokʼel ta sventana sok oranax ya smakik, pero maba chebaj koʼtantik». Te kʼalal kʼax bael te tiempo, te ants winiketik jelon te stalelik sok jajch smulanik yaʼiyel te skʼop Dios. Ta ora ini, ayix oxeb congregación (Is. 60:22).

15. ¿Bin ya yakʼ jnoptik te 1 Corintios 3:6, 7 ta swenta te yotsesel jnopojeletik?

 ¹⁵ Jpisiltik ay ta jwentatik yotsesel jnopojeletik. Ay yichʼoj alel te spisil ya xkoltaywan te congregación yuʼun ay machʼa ya yichʼ jaʼ (kʼopona 1 Corintios 3:6, 7). Jun ejemplo, ayniwan jtul publicador la yijkitaybey jilel jun tratado o jun revista jtul ants winik te la smulan yaʼiyel stojol. Ta patil te hermano ya sta ta ilel te ma jochol yuʼun ya xbajt yulaʼtay te ants winik, jaʼ yuʼun ya skʼanbey koltayel yan publicador. Te publicador-abi ya xjajch yakʼbey nojptesel ta Biblia sok ya yikʼ bael yanyantik hermanoetik soknix ya yakʼbeyik smukʼul yoʼtan te estudiante. Te jujuntul publicador te ya snaʼbey sba te estudiante jich kʼoem te ya yakʼbey yalel te sit awaltsʼunubil. Jich bitʼil la yal te Jesús, te jtsʼunbajel winik sok te machʼa ya stsobey sit tseʼel yoʼtanik te jun-nax ya x-aʼtejik (Juan 4:35-38).

16. Manchukme maʼyukix awip o ayat ta chamel, ¿bin yuʼun tseʼel awoʼtan te bin ya apas ta stojol te Jehová?

¹⁶ ¿Bin ya xjuʼ ya apas teme maʼyukix lek awip o ayat ta chamel yuʼun ya achol skʼop Dios sok ya xnojpteswanat jich bitʼil la apas ta nailal? Manchukme jich-abi, ya xjuʼ te tseʼel awoʼtan te banti kʼalal ya xjuʼ awuʼun. Kiltik te bin kʼot ta pasel kʼalal te ajwalil David sok te swiniktak la stsalik te j-elekʼetik te jaʼik amaleketik, jaʼnix jich juʼ yuʼunik spojel sujtel te sfamiliaik sok te sbilukik. 200 ta tul winiketik maba bajtik ta guerra ta skaj te lujben la yaʼiy sbaik, jil skanantayik te biluketik. Kʼalal laj yoʼtanik ta guerra, te David la yal te pajal ya yichʼ pukel te biluketik (1 Sam. 30:21-25). Ta ora ini, jaʼnix jich ya yichʼ pasel ta swolol Balumilal te yotsesel jnopojeletik. Jpisiltik ya jpastik tulan te banti kʼalal ya xjuʼ kuʼuntik, ya yakʼ stseʼelil koʼtantik kʼalal ay machʼa ya snaʼbey sba te Jehová sok ya yichʼ jaʼ.

17. ¿Bin yuʼun ya kalbeytik wokol te Jehová?

¹⁷ Ya kalbeytik bayal wokol te Jehová te bayal skʼoplal ta yoʼtan te kaʼteltik ya jpastik ta stojol. Te Jehová snaʼoj te ma xjuʼ ya sujtik te ants winiketik yuʼun ya yichʼik ta mukʼ, pero bayal skʼoplal ta yoʼtan te kaʼteltik, te skʼuxul koʼtantik ta stojol sok ya smajtantesotik ta swenta-abi. Jaʼnix jich ya snojptesotik te tseʼeluk koʼtantik te banti kʼalal ya xjuʼ kuʼuntik yotsesel jnopojeletik (Juan 14:12). Ayuk ta koʼtantik: te Dios lek ya yilotik teme ma xlujbotik.