1. Малы ми шумпотӥськомы но данъяськиськомы, Иеговалэн Адӟись-Ивортӥсьёсыз луиськомы шуыса?

 ИЕГОВАЛЭН Адӟись-Ивортӥсьёсыз луыны — со зэмос шуд но бадӟым дан! Ми Инмарлэсь нимзэ нуллӥськомы но та нимъя улӥськомы, куке тодытон уже пыриськиськомы но дышетскисьёсты дасяськомы. Ми туж шумпотӥськомы, куке юрттыны быгатӥськомы адямилы, кудӥз «быронтэм улон шоры шонер амалэн учке», Инмарлэн ужась-тыршисез луыны (Ап. уж. 13:48, ВД). Ми шӧдӥськомы сое ик, мае шӧдӥз Иисус: со шумпотонэн пачылмиз, куке дышетскисьёсыз веразы солы тунсыко учыръёсты, кудъёсыз луизы соосын ужан-тыршонзы дыръя (Лука 10:1, 17, 21).

2. Кытысь адӟиське, ми ужан-тыршонмес кулэен лыдъяськомы шуыса?

² Ужан-тыршонмес ми туж кулэен лыдъяськомы. Апостол Павел Тимофейлэсь мылкыдзэ ӝутӥз: «Астэ ачид чакласа ул, адямиосты дышетонэз но. [...] Уго тазьы лэсьтыса, астэ ачид утёд, тонэ кылзӥськисьёсты но» (1 Тим. 4:16). Вераны луоз, Эксэйлык сярысь иворез тодытон адямиослэсь улонзэс уте. Соин ик милемлы ялан асьмеды асьмеос чакласа улоно, малы ке шуоно ми Эксэйлыклэн кивалтэмез улсын улӥськомы. Котькыӵе ужъёсынымы милям потэ Инмарез данъяммы но возьматэммы: ми улӥськомы со иворъя, кудӥз сярысь тодытӥськомы (Флп. 1:27). Нош адямиосты дышетонэз чакласа улон понна, ми умой дасяськиськомы ужан-тыршонлы но Иеговалэсь юрттэтсэ куриськомы.

3. Кызьы адямиос учкыны быгато Эксэйлык сярысь ивор шоры? Вералэ пример.

³ Куддыръя, тыршеммы шоры учкытэк, Эксэйлык сярысь иворез куд-огъёсыз гинэ кылзо яке нокин но уг кылзы. Тӥ тодӥськоды на, дыр, Георг Линдал агайлэсь учырзэ. 1929-тӥ арысен 1947-тӥ арозь Исландиын со сяна мукет тодытӥсьёс ӧй вал.  Георг трос сюрс книгаосты вӧлмытӥз, нош нокинлэн но зэмлыкез кылзэмез ӧз поты. Со гожтӥз: «Шӧдске, куд-огъёсыз ужпум кутӥзы зэмлыклы пумит мыныны, нош тросэзлы со тунсыко уг поты». Берлогес Исландие Галаад школаез йылпумъям тодытӥсьёс вуизы. Нош укмыс ар ортчыса гинэ, Исландиын улӥсьёс пӧлысь куд-огъёсыз асьсэлэсь улонзэс Иеговалы сӥзизы но пылатӥськизы b.

4. Кызьы ми учкиськомы, куке адямиос милемыз уг кылзо яке Инмар пала вамышъёс уг лэсьто?

⁴ Зэм но, ми туж ӝоже усиськомы, куке адямиос пумит луо милесьтым ивормес кылзыны яке соос, кинъёсын Библиез дышетӥськомы, Инмар пала вамышъёс уг лэсьто. Апостол Павел но туж «бадӟым кӧтӝожен» улӥз. Солэн сюлмаз «чик дугдылӥсьтэм куректон» вал, малы ке шуоно тросэз еврейёс ӧз оске, Иисус Мессия вал шуыса, кудӥз сярысь азьло ик верамын вал (Рим. 9:1—3). Шуом, тӥ кинэн ке но Библиез дышетӥськоды, дышетонъёстылы умой дасяськиськоды но дышетскисьты понна вӧсяськиськоды. Нош дышетскисьты улоназ уг куты сое, мае тодэ, соин ик тӥледлы сое кельтоно луэ. Яке, шуом, нокин но уг пылатӥськы соос пӧлысь, кинэн тӥ Библиез дышетӥськоды. Со понна тӥ янгыш-а? Возьматэ-а со: Иеговалы уг кельшы, кызьы тӥ тодытӥськоды? Та статьяын ми эскеромы кык юанъёсты: 1) мар возьматэ, ужан-тыршонын азинлыко луиськомы шуыса? 2) Мар юрттоз милемлы ужан-тыршонмы шоры шонер учкыны?

5. Малы милям ужан-тыршонмы котьку ик уз мыны озьы, кызьы ми малпамы вал?

⁵ Библиын гожтэмын, адямилэн, кудӥз Инмарлэсь эриксэ быдэсъя, «котькыӵе ужын, мар гинэ со уг лэсьты, азинлыкез вань» шуыса (Пс. 1:3). Но со уг возьматы, Иеговалы ужан-тыршонмы котьку ик мыноз озьы, кызьы ми малпамы вал. Асьмелэн но мукетъёсызлэн тырбыдэстэм луэммы сэрен, улон «куректон-кайгуосын тырмемын» (Иов 14:1). Со сяна, куд-огъёсыз милемлы люкетыны быгато ӟеч иворез вераны (1 Кор. 16:9; 1 Фес. 2:18). Соку, Иеговалэн малпамезъя, ку милям ужан-тыршонмы азинлыко луэ? Та юанлы валэктон шедьтон понна, ойдолэ эскеромы Библиысь куд-ог возетъёсты.

6. Иеговалэн малпамезъя, ку милям ужан-тыршонмы азинлыко улэ?

⁶ Иегова саклыксэ висъя тыршеммылы но юн луэммылы. Солэн малпамезъя, милям ужан-тыршонмы азинлыко, куке ми, сое яратыса, азьланяз но тыршыса тодытӥськомы, адямиослэн кылзэмзы шоры учкытэк. Павел гожтӥз: «Инмар шонер лэсьтӥсьтэм ӧвӧл уго, Со уг вунэты тӥлесьтыд уждэс, яратондэс, кудзэ тӥ Солэн нимыз понна ужаса-тыршыса возьматӥды, али но вӧсяськись калыклы ӟеч лэсьтыса сое возьматӥськоды» (Евр. 6:10). Иегова тодаз возе ужмес но яратонмес соку но, куке адямиос, кудъёсызлы ми  тодытӥмы, уг пылатӥсько. Со сяна, Павел Коринф карын улӥсьёсты оскытӥз: «Кузё-Инмар азьын тӥляд ужамды юнме ӧвӧл» (1 Кор. 15:58). Та кылъёс милемлы но верамын, соос зэм луо соку но, куке ужаммы емышъёс уг вайы сомында, кӧня ми малпамы вал.

7. Малы дышетэ милемыз со, кызьы Павел учкиз аслаз ужан-тыршонэз шоры?

⁷ Апостол Павел адӟем карымон миссионер вал. Солы луыса трос каръёсын кенешъёс кылдылӥзы. Озьы ке но куд-огъёсыз сое пыкылӥзы но веразы, со урод дышетӥсь шуыса. Тунсыко, кызьы Павел ответ сётӥз со адямиослы, кудъёсыз со азьын вылтӥяськизы. Со гожтӥз: «Мон соослэсь тросгес ужай-тырши» (2 Кор. 11:23). Павел туж трос адямиослы юрттӥз христианъёс луыны! Ассэ утён понна, со быгатысал ӵапак та сярысь вераны. Нош со озьы ӧз лэсьты. Ойдолэ, Павел сямен ик, тодамы возёмы: Иегова тужгес но дунъя милесьтым тыршеммес но юн луэммес.

8. Мар сярысь милемлы тодамы возёно ужан-тыршонмы пумысен?

⁸ Ужан-тыршонмы Иеговаез шумпоттэ. Одӥг пол Иисус 70 дышетскисьёссэ Эксэйлык сярысь иворез тодытыны ыстӥз. Ужам-тыршемзы бере соос «шумпотыса берытскизы». Малы? Соос Иисуслы веразы: «Тынад нимыныд периос но милесьтым кылзӥсько». Но Иисус саклыксэс висъяз солы, мар тужгес но кулэгес вал: «Нош тӥ, периос тӥлесьтыд кылзӥсько шуыса, шум эн потэ,— шумпотэлэ, тӥляд нимъёсты Инмын гожтӥськемын шуыса» (Лука 10:17—20). Иисус валаз, ужан-тыршонын котьку ик уз луэ сыӵе яркыт но сюлме пырись учыръёс. Шонерзэ вераса, ми ум но тодӥське, тросэз-а соос пӧлысь, кинъёслы дышетскисьёсыз соку тодытӥзы, берлогес христианъёс луизы. Иисуслэн аслаз пытьы кузяз мынӥсьёссэ дышетэмез потэ вал кулэ луись зэмлыклы: ужан-тыршонын шумпотон уг вайы адямиослэн милемыз кылзэмзы гинэ, нош тужгес но шумпотон вае, куке ми валаськомы, макем кельше Иеговалы адӟыны милесьтым тыршеммес.

9. Кыӵе кузьым ми басьтомы, номыр шоры учкытэк, тодытэмысь ӧм дугдэ ке? (Галатъёслы 6:7—9).

⁹ Лыдӟе Галатъёслы 6:7—9. Номыр шоры учкытэк, ми азьланяз но тодытӥмы ке, соку пырак уломы. Зэмлыклэсь кидысъёссэ тыршыса мерттӥськомы ке но соос вылэ ву киськаськомы ке, ми, Павеллэн кылъёсызъя, «Духлы ярамонзэ» кизиськомы. Мукет кылъёсын вераса, ми мынӥськомы отчы, кытчы святой дух милемыз нуэ. Нош Иегова кылзэ сётэ: со, кин киоссэ уз лэзьы но уз сётскы, «Дух бордысь бырисьтэм улон аралоз». Но та кузьым герӟаськемын ӧвӧл соин, юрттӥмы-а ми кинлы ке пылатӥськыны яке ӧм-а.

10. Малы куд-огъёсыз кылзо, куке ми соослы тодытӥськомы, нош мукетъёсыз уг?

¹⁰ Адямиос зэмлыкез кылзозы-а, уз-а, герӟаськемын соин, кыӵе соослэн сюлэмзы. Та малпанэз Иисус возьматӥз кизись сярысь мадёназ. Кидысъёс, кудъёссэ со кизиз, пӧртэм пумо музъеме шедизы, нош ӟеч музъеме шедемъёсыз гинэ умой емышъёс вайизы (Лука 8:5—8). Иисус валэктӥз: пӧртэм пумо музъем — со адямиос, кудъёсыз «Инмарлэн кылыз» шоры пӧртэм сямен учко (Лука 8:11—15). Кизись сямен ик, ми ум тодӥське, кыӵе емышъёс ваёз милям ужаммы. Со герӟаськемын соин, кыӵе кылзӥсьёсмылэн сюлэмзы. Нош милям ужмы — азьланяз но кизьыны Эксэйлык сярысь шумпотон иворлэсь кидысъёссэ. Кызьы вераз апостол Павел, «котькудзы ужамзыя уждун басьтозы», нош емышъёссыя уз (1 Кор. 3:8).

11. Малы Иегова лыдъяз, Ной азинлыко тодытӥсь вал шуыса? (Учке вылбамысь суредэз.)

¹¹ Адямиослэн вань улонзы ӵоже Иеговалэн ужась-тыршисьёсыз ӟеч иворез веразы адямиослы, кудъёсыз соосты ӧз кылзэ. Кылсярысь,  Ной, «шонерлыкез тодытӥсь», Иеговалэсь иворзэ 40—50 аръёс ӵоже вераз (2 Пётр 2:5). Со малпаз, дыр, вань адямиос сое кылзозы шуыса. Нош Иегова ӧз вера, озьы луоз шуыса. Со сяна, Ноез ковчег пуктыны косыкуз, Иегова вераз: «Тон пыже пырод, тонэн огазе пырозы кышноед, пиосыд, кенъёсыд» (Ул.-выл. 6:18). Ковчеглэсь быдӟалазэ лыдэ басьтыса, Ной малпаны быгатэ вал, сое тросэз уз кылзэ шуыса (Ул.-выл. 6:15). Кызьы ми тодӥськомы, сое нокин но ӧз кылзы (Ул.-выл. 7:7). Малпаз-а Иегова, Ной урод тодытӥсь вал шуыса? Ӧз, со озьы ӧз малпа! Иеговалэн син азяз Ной азинлыко вал, малы ке шуоно быдэстӥз ваньзэ, мае карыны сое косӥз Иегова (Ул.-выл. 6:22).

12. Мар юрттӥз Иеремиялы ужан-тыршонын шумпотонзэ ыштытэк улыны, адямиослэн кылзымтэзы но пумитъяськемзы шоры учкытэк?

¹² Иеремия пророк но трос дасо аръёс ӵоже тодытӥз адямиослы, кудъёсыз солэсь иворзэ ӧз кылзэ яке солы пумитъяськизы. Кыӵе ке но дыре тушмонъёсызлэн ултӥямзы но серекъямзы сэрен солэн сокем мылкыдыз куашказ, со ужпум но кутӥз ваньзэ куштыса кошкыны. Нош тодытытэк улыны со ӧз быгаты! (Иер. 20:8, 9). Мар юрттӥз Иеремиялы сётскытэк но шумпотонзэ ыштытэк улыны? Со саклыксэ висъяз кык кулэ луись зэмлыкъёслы. Нырысетӥез, ивор, кудзэ Инмар сое вераны косӥз, адямиослы «азьпал улон но оскиськон» сётӥз (Иер. 29:11). Кыкетӥез, Иеремиялы оскемын вал Иеговалэн нимыныз вераськыны (Иер. 15:16). Озьы ик ми но та дуннеын улӥсь адямиослы вераськомы ивор, кудӥз соослы оскон сётэ. Со сяна, ми вераськомы Иеговалэн нимыныз, солэн Адӟись-Ивортӥсьёсыз луыса. Та кык кулэ луись зэмлыкъёсты тодамы возимы ке, ми шумпотонмес ум ыштэ, адямиос милемыз ӧз кылзэ ке но.

13. Малы дышетэ милемыз Иисуслэн мадёнэз, кудӥз гожтэмын Марклэсь 4:26—29?

¹³ Адямилы трос дыр кулэ луоз, осконзэ юнматон понна. Та малпан сярысь Иисус вераз аслаз мадёназ, кудӥз гожтэмын Марклэсь 4:26—29 (лыдӟе). Кизись изьыку, кидысъёс, кудъёссэ со музъем вылэ куштӥз, каллен гинэ будо. Но со номыр карыны уг быгаты, кидыс ӝоггес мед будоз шуыса. Озьы ик милемлы но, адями будыны кутскытозь, кема возьмано луоз: будон каллен-каллен мынэ, соку ик уг адӟиськы. Со сяна, кизись аслэсьтыз будосъёссэ ӝоггес будэтыны уг быгаты. Озьы ик ми но номыр карыны ум быгатӥське, дышетскисьмы ӝоггес мед будоз шуыса. Соин ик мылкыдды медаз куашка но киостэс эн лэзе, воштӥськон понна адямилы малпамдылэсь но тросгес дыр кулэ луиз ке. Музъемен ужасьлы сямен ик, дышетскисьёсты дасяку, чидан кулэ луоз (Иак. 5:7, 8).

14. Кыӵе учыр возьматэ, ужан-тыршонлэсь емышъёссэ адӟон понна, куддыръя трос аръёс ортчо шуыса?

¹⁴ Куд-ог интыосын трос аръёс ӵоже тодытоно луэ, кин ке но мед пылатӥськоз шуыса. Тае возьматэ Глэдис Аллен но Руби сузэрезлэн учырзы c. 1959-тӥ арын соосты ыстӥзы Канадаысь Квебек провинцие пионеръёс луыса ужаны-тыршыны. Отысь адямиос кышказы, мар вералозы бускельёссы но священникъёс, куке соос Адӟись-Ивортӥсьёсын вераськыны кутскозы. Соин ик соос та сузэръёсын ӧз вераське. Глэдис тодаз вае: «Ми коркась корка ветлӥмы нуналаз тямыс час ӵоже, нош нокин но ӧссэ гинэ но милемлы ӧз усьты! Озьы кыстӥськиз кык ар ӵоже. Адямиос ӧссы доры лыкто но, милемыз адӟыса, берен кошко вал. Нош ми ӧм сётске». Дыр ортчыса, отын улӥсьёс Адӟись-Ивортӥсьёс шоры умойгес учкыны кутскизы. Куд-огъёсыз Библиез но дышетыны кутскизы. Нош али та карын куинь кенешъёс (Ис. 60:22).

15. Мае ми тодӥськомы дышетскисьёсты дасян сярысь, 1 Коринфъёслы 3:6, 7 лыдэ басьтыса?

 ¹⁵ Дышетскисез дасяны трос адямиос юртто. Кенешысь котькудӥз юрттыны быгатэ дышетскисьлы пылатӥськонлы дасяськыны. (Лыдӟе 1 Коринфъёслы 3:6, 7.) Шуом, агай адямилы буклет яке журнал кельтӥз но вераськиз со доры выльысь лыктыны. Нош берлогес со вала, та адями доры лыктыны уз быгаты шуыса. Соин ик со мукет агаез со доры лыктыны куре. Кыкетӥез агай та адямиен Библиез дышетыны кутске. Дышетоназ со пӧртэм вын-агайёсты но сузэр-апайёсты ӧтьылэ. Котькудӥз соос пӧлысь дышетскисьлы Иеговаез умойгес тодыны юрттэ. Озьы соос ваньзы зэмлыклэн кидысэз вылэ ву киськало. Нош куке та адями пылатӥське, шумпотэ «кизись но, арась но» (Иоанн 4:35—38).

16. Мар юрттоз милемлы ужан-тыршонысь шумпотон шедьтыны, кужыммы но тазалыкмы азьло кадь ик ӧвӧл ни ке но?

¹⁶ Кин ке но тазалыкез яке арлыдыз сэрен тодытон но дышетскисьёсты дасян ужын трос лэсьтыны уг быгаты ини. Озьы ке но ми азьло сямен ик шумпотыны быгатӥськомы, одӥг уже пыриськиськомы шуыса. Тодамы ваёмы Давидлэн улонысьтыз учырез. Со но солэн 600 ожгарчиосыз тодӥзы, амалик пиос семьяоссэс но ваньбурзэс талазы шуыса. Соин ик соос амалик пиос сьӧры уйиськизы. Нош 200 ожгарчиослэн кужымзы быриз, соин ик тушмонъёссы сьӧры соос уйиськыны ӧз быгатэ ни. Озьы ке но ожмаськонын вормемзы бере Давид вань адямиосызлы талам ваньбурзэс люкиз (1 Экс. 30:21—25). Та учыр милемыз тросэзлы дышетэ. Котьку, куке кин ке пырак улонэ нуись сюрес вылэ султэ, со быдэс кенешлэн вормонэз. Ми лэсьтӥськомы ке ваньзэ, мае быгатӥськомы, ми сомында ик шумпотон басьтӥськомы, кӧня мукетъёсыз басьто.

17. Мар понна ми Иеговалы тау кариськомы?

¹⁷ Ми Иеговалы тау кариськомы со понна, кызьы со учке ужан-тыршонын азинсконъёсмы шоры. Со вала: ми ум быгатӥське адямиосты косыны ӟеч иворез кылзыны но соя улыны. Иегова понна тужгес но кулэгес луэ, макем ми тыршиськомы но малы ми солы ужаськомы. Ӵапак со понна ик со милемыз бакель каре. Со сяна, Иегова валэктэ милемлы, кызьы ужан-тыршонысь шумпотон шедьтоно, кыӵе гинэ ужъёсты медам быдэсъялэ (Иоанн 14:12). Юн оске: тӥ ӧд сётске но киостэс ӧд лэзе ке, Иегова шумпотоз, тӥ шоры учкыса!