1. Немә үчүн Йәһва гувачиси болғинимиздин хошал болимиз вә буниңдин пәхирлинимиз?

 БИЗ Йәһва Худаниң хәлқи! Биз башқиларға вәз қилиш вә уларға һәқиқәтни үгитиш арқилиқ өзүмизниң Йәһва гувачиси екәнлигимизни испатлаймиз. Биз Йәһва гувачиси болғинимиздин бәк хошал вә буниңдин пәхирлинимиз. Мәңгүлүк һаятлиққа йетәкләйдиған һәқиқәтни қобул қилишқа майил болғанларниң Әйсаниң әгәшкүчиси болушиға ярдәм берәлигинимиздә, шат-хорамлиққа чөмүмиз (Әлч. 13:48). Бизму худди Әйсаға охшаш хурсән болимиз. Шагиртлири вәз хизмитидин яхши утуқлар билән қайтип кәлгәндә, Әйса муқәддәс роһниң тәсири билән хурсәнликкә чөмгән (Луқа 10:1, 17, 21).

2. Вәз хизмити биз үчүн бәк муһим екәнлигини қандақ көрситәләймиз?

² Вәз хизмити биз үчүн интайин муһим. Паул Тимотийни илһамландуруп, мону сөзләрни қилған: «Өзәңгә бақ һәм қандақ тәлим бериватқиниңға диққәтлик бол. Мошуниңда болғин, чүнки шундақ қилғиниңда, өзәңниму вә сени тиңшаватқанларниму қутқузисән» (Тим. 1-х. 4:16). Демәк, бизниң вәз хизмитимиз кишиләрниң һаятини қутқузалайду. Биз өз иш-һәрикәтлиримизгә диққәт қилишимиз керәк, чүнки биз Худа Падишалиғиниң пухралири. Һәрдайим иш-һәрикитимиздә Худаға шан-шәрәп елип келишни вә йәткүзүватқан хуш хәвәргә ишинидиғанлиғимизни көрситишни халаймиз (Флп. 1:27). Яхши тәйярлиқ қилиш вә башқиларға гувалиқ бериштин бурун, дуалиримизда Йәһваниң бәрикәтлишини сораш арқилиқ өзүмизниң тәлимлиригә диққәт қилғанлиғимизни көрситимиз.

3. Бәзиләр Падишалиқ хуш хәвиригә қандақ инкас қайтуруши мүмкин? Мисал кәлтүрүң.

³ Һәтта биз пүтүн күчимиз билән тиришчанлиқ көрсәтсәкму, яшаватқан районимиздики кишиләр Падишалиқ хуш хәвиригә қулақ салмаслиғи мүмкин. Георг Линдал исимлиқ бурадәрниң  мисалини көрүп бақайли. У 1929-жилдин 1947-жилғичә Исландиядә ялғуз вәз хизмитини қилған. У он миңларчә китап вә журнални тарқатқан. Амма бирму киши һәқиқәтни қобул қилмиған. У шундақ язған: «Бәзиләр һәқиқәткә қарши чиқти, бирақ көпинчилири һәтта қулақ селишқиму қизиқмиған». Гәрчә Гилиад мәктивини тамамлиған вәз ейтқучилар ярдәмгә кәлгән болсиму, шуниңдин 9 жил өтүп, бәзи исландияликләр Йәһваға өзини беғишлап, чөмдүрүлүштин өткән.

4. Кишиләр ейтиватқан хуш хәвиримизгә қулақ салмиса, қандақ һис-туйғуда болушимиз мүмкин?

⁴ Башқилар ейтиватқан хуш хәвиримизгә қизиқмиғанда, үмүтсизлинип кетимиз. Шундақ вәзийәттә өзүмизни Паулға охшаш һис қилишимиз мүмкин. Көпинчә йәһудийлар Әйсани Мәсиһ сүпитидә қобул қилишни рәт қилғанда, Паул шундақ сөзләрни қилған: «Қәлбимдә зор қайғу һәм түгимәс дәрдим бар» (Рим. 9:1—3). Бәлким, сиз бири билән Муқәддәс китап тәтқиқ үгинишини өткүзүватисиз. Шу үгиниватқан киши үчүн дуа қилдиңиз вә униңға яхширақ тәлим бериш үчүн көп тиришчанлиқ көрсәттиңиз. Бирақ у үгәнгәнлирини әмәлий турмушида қолланмай, униң билән өткүзиватқан үгинишни тохтитишиңизға тоғра кәлгәнду яки һечбир кишиниң чөмдүрүлүштин өтүшигә шәхсән ярдәм қилип бақмиғансиз. Бу Йәһваниң вәз хизмитиңиздин хурсән әмәслигини көрситәмду? Яқ. Вәз хизмитимизниң утуқлуқ болғанлиғини немә көрситиду? Башқиларға вәз ейтқанда, чоқум немигә тәйяр болушимиз керәк? Бу мақалидә мошу икки соалға җавап тапимиз.

5. Немә үчүн Йәһваниң ирадисини орунлаш үчүн қилған ишлиримиз һемишәм биз үмүт қилғандәк болмаслиғи мүмкин?

⁵ Муқәддәс китап Худаниң ирадисини орунлиғанлар «һәммә нәрсидә утуққа еришиду» дәйду (Зәб. 1:3). Бирақ бу һәргизму Йәһваниң ирадисини орунлаш үчүн қилған һәрбир ишимиз биз үмүт қилғандәк оңушлуқ болидиғанлиғини билдүрмәйду. Биз өзүмиз вә әтрапимиздики кишиләр намукәммәл болғанлиғи сәвәплик, һаятимиз түрлүк мүшкүллүккә толған (Аюп 14:1). Буниңдин башқа, бәлким, бизгә қарши чиққучилар бәзидә вәз хизмитимизни тохтитип қоюши мүмкин (Кор. 1-х. 16:9; Сал. 1-х. 2:18). Ундақта Йәһва мувәппәқийәт қазанғанлиғимизни қандақ баһалайду? Мошу соалға җавап беришимизгә ярдәм беридиған Муқәддәс китаптики бәзи принципларни көрүп бақайли.

6. Қилған хизмитимизниң мувәппәқийәтлик болған-болмиғанлиғини Йәһва қандақ баһалайду?

⁶ Йәһва күчимизниң йетишичә Униңға хизмәт қиливатқанлиғимизни вә бәл қоювәтмәй давамлиқ тиришиватқанлиғимизни көрүп туриду. Ейтқан хәвиримизгә башқиларниң қандақ инкас қайтурушидин қәтъийнәзәр, қизғинлиқ билән вәз қилимиз. Чүнки биз Йәһвани чин қәлбимиздин сөйүмиз. Шундақ қилсақ, биз Йәһваниң нәзәридә мувәппәқийәт қазанған болумиз. Паул шундақ язған: «Чүнки Худа адаләтсиз әмәс, У муқәддәс кишилиригә хизмәт қилғиниңларни вә давамлиқ қиливатқанлиғиңларни, Униң исмиға көрсәткән сөйгү-муһәббитиңлар вә әҗир-меһнитиңларни унтумайду» (Ибр. 6:10,  ЙД). Һәтта биз көп тиришчанлиқ көрсәткән болсақму, бир киши Муқәддәс китапни үгинип чөмдүрүлүштин өтмигән болсиму, Яратқучимиз сиңдүргән әҗримизни вә көрсәткән сөйгү-муһәббитимизни есидә сақлайду. Сиңдүргән әҗир-меһнитимизниң күткәндәк нәтиҗиси болмиса, Паулниң мону сөзи бизгә тәсәлли бериду: «Әмгигиңлар Йәһваниң алдида бекар әмәс» (Кор. 1-х. 15:58).

7. Әлчи Паулниң өз вәз хизмити һәққидә ейтқанлиридин немини үгинәләймиз?

⁷ Әлчи Паул маһир бир вәз ейтқучи болған. У нурғунлиған шәһәрләрдә йеңи җамаәтләрни қурған. Бирақ бәзиләр уни яхши тәлим бәргүчи әмәс дәп әйиплигән. Буниңға қаримастин, у қанчилик адәмгә Әйсаниң шагирти болушиға ярдәм бәргәнлигини ейтмиған. Әксинчә, Паул шундақ сөзләрни язған: Мән техиму җапалиқ ишлидим (Кор. 2-х. 11:23, ҺЗ). Худди Паулдәк бизму чоқум шуни әстә сақлишимиз керәкки, Йәһва үчүн әң муһими, биз бәл қоювәтмәй давамлиқ тиришип, Униңға хизмәт қилишимиз керәк.

8. Вәз хизмитимиздә чоқум немини әстә сақлишимиз керәк?

⁸ Йәһва вәз хизмитимиздин сөйүниду. Әйса 70 шагиртини Падишалиқ хуш хәвирини йәткүзүшкә әвәткәндә, улар хошал-хорам қайтип кәлгән еди. Уларниң шундақ хошал болушиға немә сәвәп болған? Улар шундақ дегән: «Сизниң намиңиздин буйруқ қилған едуқ, һәтта җинларму бизгә бойсунуп чиқип кетишти!» Бирақ Әйса уларниң ой-пикрини түзитип, шундақ дегән: «Роһларниң силәргә бойсунғанлиғиға хошал болмаңлар, бәлки исимлириңлар асманда йезилишиға хошал болуңлар» (Луқа 10:17—20). Әйса шагиртлириниң вәз хизмитидә һәрдайим шундақ хошаллиқ тапалмайдиғанлиғини билгән. Әмәлийәттә, дәсләптә Әйсаниң шагиртлири йәткүзгән хуш хәвәргә қулақ салғанлардин қанчиси һәқиқәтни қобул қилғанлиғини билмәймиз. Шагиртлар шуни чүшинип йетиши керәк болған, йәни улар йәткүзгән хәвәргә кишиләрниң қулақ селиши хошаллиқ тепишниң ялғузла йоли әмәс. Бәлки, Йәһваниң ирадисини орунлаш үчүн көрсәткән тиришчанлиғидин Униң интайин мәмнун екәнлигини билиш уларға зор хошаллиқ елип келәтти.

9. Галатилиқларға 6:7—9 айәтләргә асасланғанда, әгәр вәз хизмитини бәл қоювәтмисәк, нәтиҗидә немигә еришимиз?

⁹ Әгәр вәз хизмитидә бәл қоювәтмисәк, мәңгүлүк һаятқа еришимиз. Чин қәлбимиздин қизғинлиқ билән Падишалиқ һәқиқәт уруғини терип, пәрвиш қилғинимизда, Йәһваниң роһиниң һаятимизға тәсир қилишиға йол қоюп, роһқа териған болимиз. Бир кишиниң чөмдүрүлүштин өтүп, йеңи шагирт болушиға ярдәм бәргән болайли-болмайли, давамлиқ бәл қоювәтмәй вәз хизмитини давамлаштурсақ, Йәһва Худа вәдә қилған мәңгүлүк һаятлиқ һосулини жиғимиз (Галатилиқларға 6:7—9ни оқуң).

10. Адәмләрниң хуш хәвәрни қобул қилиш-қилмаслиғи немигә бағлиқ?

¹⁰ Адәмләрниң хуш хәвәрни қобул қилиш-қилмаслиғи уларниң жүригиниң қандақ екәнлигигә бағлиқ. Әйса бу һәқиқәтни чүшәндүрүш үчүн уруқ чачқучи һәққидики тәмсилни ейтип бәргән. Уруқ чачқучи охшимайдиған һәрхил йәргә уруқ чачқан. Бирақ пәқәт бирла йәр мол һосул бәргән (Луқа 8:5—8). Тәмсилдики һәрхил йәр Худаниң Сөзигә охшимайдиған инкасларни қайтурған кишиләрниң жүригини билдүриду (Луқа 8:11—15). Худди әшу уруқ чачқучидәк, өз хизмитимизниң қандақ нәтиҗә беришини биз қарар қилалмаймиз. Сәвәви бу кишиләрниң жүригиниң қандақ болушиға бағлиқ. Әлчи Паул ейтқандәк, һәрбир киши өз әмгигиниң нәтиҗисигә әмәс, бәлки қилған әмгигигә қарап мукапатқа еришиду (Кор. 1-х. 3:8).

11. Адәмләр Нуһниң сөзигә қулақ салмиған болсиму, Йәһва немә үчүн Нуһтин хурсән болған? (Муқавидики рәсимгә қараң.)

¹¹ Қедимдин бу ян Йәһваниң нурғун хизмәтчилири  қулақ салмиған кишиләргә вәз қилип кәлгән. Мәсилән, Нуһ пәйғәмбәр тәхминән 40 яки 50 жилчә кишиләрни һәқиқәткә дәвәт қилған (Пет. 2-х. 2:5). Шәк-шүбһисизки, у өзи йәткүзгән хәвәргә башқиларниң қулақ селишини бәк арзу қилған. Бирақ Йәһва кишиләрни қулақ салиду дәп ейтмиған еди. Әксинчә, У Нуһқа кемә ясашни буйруп, шундақ дегән: «Сән кемигә кирисән һәм сениң билән биллә оғуллириң, аялиң вә келинлириң кириду» (Ярит. 6:18). Йәһва Нуһқа кеминиң чоң-кичиклиги һәққидә ейтқанда, Нуһ, бәлким, униң сөзигә қулақ салидиғанларниң көп болмайдиғанлиғини чүшинип йәткән. Чүнки кемидә артуқ орун йоқ еди (Ярит. 6:15). Биз билгәндәк, униң сөзигә аилисидикиләрдин башқа һечким қулақ салмиған (Ярит. 7:7). Нуһниң вәз хизмитини Йәһва нәтиҗисиз болған дәп қариғанму? Әлвәттә, яқ! Худаниң нәзәридә Нуһ муваппәқийәтлик вәз ейтқучи болған. Сәвәви Йәһваниң ейтқанлирини Нуһ садиқлиқ билән орунлиған еди (Ярит. 6:22).

12. Йәрәмия йәткүзгән хәвәргә кишиләр қулақ салмай, һәтта қарши чиққан болсиму, у хошаллиқ тепиш үчүн немә қилған?

¹² Тәхминән 40 жилдин көпирәк вақит адәмләр Йәрәмия пәйғәмбәрниң хәвиригә қулақ салмиған, һәтта униңға қарши чиққан. Шу қарши чиққучиларниң мәсхирә қилип, камситиши сәвәплик, у интайин үмүтсизлинип, һәтта өз вәзиписидин ваз кечишни ойлиған еди (Йәр. 20:8, 9). Бирақ Йәрәмия һәргиз бәл қоювәтмигән! Униң сәлбий ой-пикирләргә қарши туруп, вәз хизмитидә хошаллиқ тепишиға немә ярдәм бәргән? Йәрәмия икки муһим нәрсини есидә чиң тутқан. Биринчиси, у кишиләргә үмүткә толған кәлгүси һәққидики Худаниң хәвирини йәткүзгән (Йәр. 29:11). Иккинчиси, Йәһва Худаниң Өзи бу хәвәрни хәлиқкә йәткүзүш үчүн уни таллиған еди (Йәр. 15:16). Бизму бу дуния кишилиригә үмүт беридиған хәвәрни йәткүзүватимиз вә Униң гувачилири сүпитидә Йәһваниң исмини кишиләргә билдүриватимиз. Биз пүтүн диққитимизни мошу икки муһим нәрсигә қаратсақ, йәткүзүватқан хәвиримизгә башқилар қандақ инкас қайтурушидин қәтъийнәзәр, хошаллиқ тапалаймиз.

13. Марк 4:26—29-айәтләрдики Әйсаниң тәмсилидин немини үгинимиз?

¹³ Роһий җәһәттин өсүш аста-аста болиду. Әйса бу һәқиқәтни чүшәндүрүш үчүн ухлаватқан уруқ чачқучи һәққидә тәмсилни ейтип бәргән (Марк 4:26—29ни оқуң). Уруқ чачқучи уруқлирини чачқандин кейин, әшу уруқлар аста-аста өсиду. Уруқ чачқучи уни тезирақ өстүрүш үчүн һечнәрсә қилалмайду. Худди уруқ чачқучиға охшаш, сизму Муқәддәс китап үгиниватқан кишиләрниң роһий җәһәттин өсүшини көрүштин илгири, бир мәзгил күтүшиңизгә тоғра келиду. Худди дехан өсүмлүкләрни өзи үмүт қилғандәк тез өстүрәлмигинигә охшаш, Муқәддәс китапни үгиниватқанларму биз үмүт қиливатқандәк роһий җәһәттин тез өсмәслиги мүмкин. Шуңа уларниң роһий җәһәттин өсүшигә сиз үмүт қилғандинму көпирәк вақит кәтсә, һәргиз үмүтсизләнмәң. Худди деханчилиқ ишлириға охшаш, шагиртларни тәйярлаш ишиму сәвир-тақәтни тәләп қилиду (Яқуп 5:7, 8).

14. Кишиләр хуш хәвәргә қулақ селиштин бурун бир мәзгил күтүшкә тоғра келидиғанлиғини қайси мисал көрситиду?

¹⁴ Бәзи районларда бириниң чөмдүрүлүштин өтүшини бирқанчә жиллар күтүшкә тоғра келиду. 1959-жили Канадиниң Квебек өлкисидики кичик бир шәһәргә пионер болуп тәйинләнгән Гладис вә Руби исимлиқ қериндашларниң мисалини көрүп бақайли. Мәһәллидикиләрниң бесими вә католик чиркосиниң тәсиридә, адәмләр Падишалиқ хуш хәвиригә қулақ селишни халимиған еди. Гладис әсләп, шундақ дәйду: «Биз икки жилчә һәр күни 8 саат ишик қеқип, хуш хәвәрни ейтқан болсақму, һечбир киши ишигини ашмиған. Кишиләр ишик алдиға келип, бизни көргәндә, ишикни ачмай, арқисиға қайтип кетәтти. Бирақ биз ваз кәчмидуқ!» Вақит өтүп, адәмләрниң көзқариши өзгирип, шу кичик шәһәрдики адәмләр хуш хәвәргә қулақ селишқа башлиған. Һазир шу йәрдә үч җамаәт бар (Йәшая 60:22).

15. Коринтлиқларға 1-хәт 3:6, 7-айәтләрдин шагирт тәйярлаш иши һәққидә немини үгинәләймиз?

 ¹⁵ Шагирт тәйярлаш иши — җамаәтниң ишидур. Бир кишиниң чөмдүрүлүштин өтүшигә ярдәм бериш үчүн җамаәттики һәрбир киши өз һәссисини қошалайду (Коринтлиқларға 1-хәт 3:6, 7ни оқуң). Мәсилән, бир вәз ейтқучи қизиқиш көрсәткән кишигә бир варақчә яки журнални қалдурди дәйли. Кейин өзиниң вақти чиқмай, башқа қериндаштин қизиққучини қайта йоқлашқа берип келишни сориған. Шу барған қериндаш қизиққучи билән Муқәддәс китап үгинишини башлиған. Кейин у җамаәттики хелә көп қериндашларни үгинишигә қатнишишқа тәклип қилған. Үгинишкә қатнашқан һәрбири түрлүк йоллар билән шу үгәнгүчигә илһам бәргән. Әшу үгинишкә қатнашқан һәрбир қериндаш һәқиқәт уруғиниң суғурлушиға ярдәм бәргән. Шундақ усулда бир киши чөмдүрүлүштин өткәндә, уруқ чачқучи вә җиққучиларму өзлири сиңдүргән әҗир-меһнити үчүн хошал болушиду (Йоһан 4:35—38).

16. Немә үчүн тән-саламәтлигиңиз яхши болмисиму яки күч-мағдирсиз болсиңизму, вәз хизмитидә хошаллиқ тапалайсиз?

¹⁶ Әгәр саламәтлигиңиз яхши болмай яки дайим күч-мағдирсиз болуп, вәз қилиш вә тәлим бериш хизмитини илгирикидәк қилалмисиңизчу? Роһий мол һосул жиғиш ишида сиз йәнила өз һәссиңизни қошалайсиз. Давут падишаниң мисалини көрәйли. У вә униң адәмлири амаләкләрниң қолидин өз аилисидикиләрни қутқузуп, булап кетилгән мал-мүлүкләрни қайтуруп кәлгән. 200 киши һерип, һалидин кәткәч, җәңгә бармай, көпчиликниң қалған нәрсилирини сақлап турған. Җәңдә ғәлибә қилип қайтип кәлгәндин кейин, Давут җәң олҗисини һәммиси билән тәң бөлүшүшни буйриған (Сам. 1-яз. 30:21—25). Бу мисал бизгә дуния йүзлүк шагирт тәйярлаш иши һәққидә бәзи нәрсиләрни үгитиду. Биз вәз ейтиш вә тәлим бериш хизмитидә қолумиздин келишичә өз һәссимизни қошсақ, һәр қетим йеңи бир киши Йәһвани тонуп, чөмдүрүлүштин өткәндә, һәммимиз әшу хошаллиқтин ортақ бәһриман болимиз.

17. Немә үчүн Йәһваға миннәтдар болушимиз керәк?

¹⁷ Йәһва Худа бизниң Өзигә қиливатқан хизмитимиздин сөйүниду. Буниң үчүн Йәһва Худаға миннәтдармиз. Йәһва шуни билидуки, биз башқиларни йәткүзүватқан хәвиримизгә қулақ селишқа вә Йәһваға ибадәт қилишқа мәҗбурлалмаймиз. Бирақ У Өз хизмитимизни қилиш үчүн қанчилик тиришчанлиқ көрситиватқанлиғимизни вә Уни бәк яхши көридиғанлиғимизни У көрүп туриду һәм бизни мукапатлайду. У йәнә бизгә қандақ қилип кәң көләмлик шагирт тәйярлаш ишида хошаллиқ тапалайдиғанлиғимизни үгитиду (Йоһ. 14:12). Әгәр биз бәл қоювәтмисәк, Худаниң биздин хурсән болидиғанлиғиға ишинәләймиз.