1. Cossa che ne assa tanto contenti e orgoliosi?

NOANTRI restemo tanto contenti e orgoliosi de esser Testimònie de Geovà. Mostremo che semo le so testimònie parché parlemo del nome de Dio, predichemo e insegnemo la Bìblia ai altri. Restemo tanto contenti de giutar una persona che la vol servir a Dio a deventar una Testimònia de Geovà. (Ati 13:48) Noantri restemo contenti compagno a Gesù. Quando i dissìpoli i ga contà el bel laoro de predicassion che i gavea fato, Gesù l’è restà tanto contento. — Luc. 10:1, 17, 21.

2. Come podemo mostrar che la predicassion la ze importante par noantri?

² El laoro de predicassion l’è tanto importante parché el pol salvar la vita dele persone. Par quela che el apòstolo Paolo el ga dito a Timòteo: ‘Seita a far el to meio par esser un bon esémpio e par insegnar ben ai altri. Seita a far tute queste robe, cossita te salvarè a ti e a quei che i te scolta.’ (1 Tim. 4:16) Noantri semo governadi par el Regno de Dio, alora se sforsemo par esser un bon esémpio. Come podemo far questo? Ghemo de sempre far quel che dà onor a Geovà e mostrar che credemo pròpio in quel che predichemo. (Fil. 1:27) E come mostremo che volemo insegnar ben ai altri? Ghemo de pareciarse ben par predicar e domandar el aiuto de Geovà par far un bel laoro.

3. Cossa che arquante persone le fà quando le scolta le bone notìssie? Parla de un esémpio.

³ Pol esser che noantri se sforsemo tanto par predicar, ma le persone no le vol mia scoltarne. Varda el esémpio de Georg Lindal. Lu el ga predicà lu sol in tanti posti dela Islàndia de  1929 a 1947. Lu el ga dato miliari de publicassion ale persone, ma gnanca una la ze deventada una Testimònia de Geovà. Lu el ga scrito in quela època: “Arquante no le vol gnanca pi scoltar e quele altre ancora no le vol imparar sora la Bìblia.” Dopo de un tempo, arquanti missionari che i gavea fato la Scola de Gileade i ze stati mandadi par la Islàndia. Ma le persone ancora no le ga volesto scoltar. Sol dopo de nove ani, arquanti islandesi i ze deventadi Testimònie de Geovà. *

4. Come se sentimo quando le persone no le vol scoltar le bone notìssie?

⁴ Noantri restemo disgustadi quando le persone no le vol scoltar le bone notìssie. Fursi se sentimo come Paolo. Lu l’era tanto disgustà e el seitea a sofrir tanto parché quasi tuti i giudei no i ga credesto che Gesù l’era el Messia. (Rom. 9:1-3) Fursi te sì drio pregar e te sì drio sforsarte tanto parché te vol che un studiante el fae quel che l’è drio imparar dela Bìblia. Ma come lu no l’è drio cambiar, fursi te tocarà fermarte de far el so stùdio. O fursi no te ghè mai giutà una persona a batesarse. Sarà che questo vol dir che no te sì drio far un bon laoro o che Geovà no l’è drio benedirte? In questo stùdio, ndaremo risponder a queste due domande: ‘Cossa vol dir far un bel laoro nela predicassion? Cossa podemo spetar che suceda in questo laoro?’

5. Parché che dele volte no sucede quel che volarìssino nela predicassion?

⁵ La Bìblia la dise sora quel che el obedisse a Geovà: “Tuto quel che lu el fà ndarà ben.” (Sal. 1:3) Ma sarà che ndarà suceder tuto come volemo nel laoro de predicassion? Nò, parché semo tuti imperfeti e podemo infrontar problemi che i ne intrighe e parché arquanti i proa fermarne de predicar. (Giò 14:1; 1 Cor. 16:9; 1 Tes. 2:18) Alora, cossa vol dir far un bel laoro de predicassion? Adesso ndaremo veder arquanti prinsipi dela Bìblia che i ne giutarà a saver la risposta.

6. Cossa Geovà el vede nel nostro laoro de predicassion?

⁶ Geovà el vede el sforso che femo par predicar e par seitar a farlo. El apòstolo Paolo el ga dito: “Dio no l’è mia ingiusto par desmentegarse del vostro laoro e del amor che gavé dimostrà par el so nome, par servir i santi e par continuar a servirli.” (Ebr. 6:10) Lu el ga anca dito: “Tuto el vostro laoro par el Signor no l’è par gnente.” (1 Cor. 15:58) Alora femo un bel laoro quando se sforsemo par predicar e quando lo femo con amor, anca quando le persone no le vol scoltarne. E Geovà el vede el nostro sforso anca quando un studiante dela Bìblia no’l se batesa.

7. Cossa che imparemo de quel che el apòstolo Paolo el ga parlà sora la predicassion?

⁷ El apòstolo Paolo l’è stà un bel esémpio  de un predicador. In arquante cità, lu el ga giutà tante persone a deventar dissìpoli de Gesù. Ma arquanti i ga dito che lu no l’era un bravo predicador. Cossa che el ga fato? Invesse de parlar de tute le persone che el gavea giutà, el ga parlà che el gavea laorà de pi. (2 Cor. 11:23) Cossa che imparemo de questo? Par Geovà, la roba pi importante la ze sforsarse e mai fermarse de predicar.

8. Cossa che ghemo de ricordarse sora el nostro laoro de predicassion?

⁸ Quando predichemo, assemo Geovà contento. Quando Gesù el ga mandà i 70 dissìpoli predicar sora el Regno, lori i ze tornadi tanto contenti. Cossa che li ga assà contenti? Lori i ga dito: “Signor, fin i demoni i ne obedisse quando doperemo el to nome.” Ma Gesù el ga mostrà che lori no i era drio pensar dela maniera giusta. Lu el ghe ga dito che i gavea de restar contenti parché i so nomi i ze stati scriti nei cieli, e nò parché i demoni i era drio obedirghe. (Luc. 10:17-20) Gesù el savea che gnanca sempre ndaria suceder bele robe nela predicassion. La Bìblia gnanca no la parla se quei che li gavea scoltà i ze deventadi dissìpoli de Gesù. I dissìpoli i gavea de restar contenti de saver che Geovà l’era contento col laoro che i era drio far.

9. De acordo con Gàlati 6:7-9, cossa ndarà suceder se no se fermemo de predicar?

⁹ Se seitemo a predicar, ndaremo viver par sempre. Quei che i predica e i insegna le bone notìssie de tuto el cuor i ze drio ‘semenar de acordo col spìrito’. Cossa che questo vol dir? Vol dir che assemo Geovà doperar el so spìrito santo par far quel che lu el vol nela nostra vita. Se no se fermemo de predicar e gnanca desanimemo, Geovà el promete darne vita eterna, anca se no ghemo giutà nissuni a batesarse. — Ledi Gàlati 6:7-9. *

10. Cossa che farà una persona scoltar le bone notìssie, o nò?

¹⁰ Le persone sol le ndarà scoltar se le vol far questo. Gesù el ga parlà dela ilustrassion del omo che el semena in difarenti tipi de tera. (Luc. 8:5-8) Gesù el ga dito che questi difarenti tipi de tera i ze le persone che le ne scolta nela predicassion. (Luc. 8:11-15) Come el omo che el semena, no semo boni de far la semensa dela verità cresser nel cuor dele persone, o sia, no podemo farle voler imparar sora Geovà e sora la Bìblia. La persona che la ga de dessider se la vol imparar de pi sora Geovà o nò. Alora, cossa che ghemo de far? Ghemo de seitar a semenar, o sia, seitar a parlar sora Geovà e sora el so Regno. Par quela, ghemo de ricordarse de quel che el apòstolo Paolo el ga dito: “Cada un el ndarà ricever la so pròpia ricompensa de acordo col so pròpio laoro”, e nò de acordo con quel che se tor su. — 1 Cor. 3:8.

11. Parché Noè l’è stà un bravo predicador? (Varda la ilustrassion dela prima pàgina dela revista.)

¹¹ Tanti servi de Geovà del passà i ga predicà a persone che no le ga volesto scoltarli. Par esémpio, Noè l’è stà “un predicador dela giustìssia” par 40 o 50 ani. (2 Pie. 2:5) Sicuro che el volea che le persone lo scoltesse, ma Geovà no’l gavea parlà che questo ndaria suceder. Invesse, Geovà el ga  dito che Noè el fesse su la arca e che el ndesse rento ‘coi so fioi, la so dona e le done dei so fioi’. (Gén. 6:18) Quando Geovà el ga dito a Noè le mesure dela arca, fursi Noè el ga capio che le persone no le ndaria scoltarlo parché no ghe staria tanta gente rento la arca. (Gén. 6:15) E come belche savemo, gnanca una persona la ga scoltà a Noè. (Gén. 7:7) Ma anca cossita, Geovà l’è restà contento col laoro de Noè. Parché? Parché Noè el gavea fato tuto quel che Geovà el ghe gavea domandà. (Gén. 6:22) Sicuro che Geovà el vedea a Noè come un bravo predicador.

12. Come el profeta Geremia el ga predicà contento anca che le persone no le volea scoltarlo?

¹² Anca el profeta Geremia el ga predicà de pi de 40 ani e le persone no le ga volesto scoltarlo. Lore le ghe disea su e ghe ridea drio. Par causa de questo, lu l’è restà tanto desanimà e el ga fin pensà de fermarse de predicar. (Ger. 20:8, 9) Ma lu no’l ga fato questo. Cossa che lo ga giutà a dàrghene fora col desànimo e a restar contento nel so laoro? Prima, lu el savea che quel che el parlea dea ale persone un “futuro e una speransa”. (Ger. 29:11) Seconda, lu el savea che Dio lo gavea scoliesto par parlar ale persone quel che Geovà el volea. (Ger. 15:16) Anca noantri femo queste due robe. Noantri parlemo sora una speransa e sora el nome de Dio ale persone. Quando seitemo ricordarse de queste due robe, restemo contenti anca che le persone no le ne scolte.

13. Cossa che imparemo dela ilustrassion de Marco 4:26-29?

¹³ Un studiante el farà quel che ghe vol pin pian. Gesù el ga insegnà questo nela ilustrassion che el ga fato sora un omo che el ga piantà le semense e l’è ndato dormir. (Ledi Marco 4:26-29. *) Le semense de quel omo le ze vegneste su pin pian e lu no l’era bon de farle vegner su nela ora che el volea. La medèsima roba la sucede nela predicassion. Fursi ghemo de spetar tanto tempo par saver se una persona la meterà in pràtica quel che la impara, o nò. Compagno al omo che el semena, ghemo de ricordarse che el studiante no’l ndarà far i cambiamenti nela ora che noantri volemo. Alora, se l’è drio méterghe massa tempo par un studiante gaver fede e far i cambiamenti che ghe ocore, no stà mia restar desanimà, gnanca desister. Cossita come te ghè de portar passiensa fin che le semense le vegna su, te ghè de portar passiensa fin che el studiante el se batese. — Tiago 5:7, 8.

14. Che esémpio el mostra che pol meterghe tanto par arquanti scoltar le bone notìssie?

¹⁴ In arquanti posti le persone le pol meterghe tanto tempo par deventar una Testimònia de Geovà. Varda el esémpio dela Gladys Allen e dela so sorela Ruby. Nel ano 1959, lore le ze state convidade par laorar come pionere regolar nte una pìcola cità in Quebec, nel Canadà. * Le persone de quela cità no le volea scoltar le bone notìssie par causa dei visini e dei preti dela cità. Gladys la ga contà: “Ghemo predicà par due ani, oto ore al giorno e nissun ne ga scoltà. Le persone le vegnea nele porte, le ne vedea e le sarea tuto. Anca cossita, ghemo seità a predicar.” Pin pianeto le persone le ga cambià e le ga  scominsià a scoltar le bone notìssie. Ancoi ghen’è tre congregassion in quela cità. — Isa. 60:22.

15. Cossa che imparemo in 1 Corinti 3:6, 7 sora el laoro de far dissìpoli?

¹⁵ Tanti fradei i pol giutar un studiante a deventar un dissìpolo. Tuti quanti nela congregassion i pol giutar una persona a batesarse. (Ledi 1 Corinti 3:6, 7. *) Par esémpio, un fradel el ghe dà a una persona un foieto o una revista. Ma come lu no’l sarà bon de tornar a visitarla, el domanda che nantro fradel lo fae. Alora, questo fradel el scomìnsia a studiar la Bìblia con questa persona, e el convida arquanti fradei par ndar insieme far el stùdio. Questi fradei e sorele i giuta el studiante de maniere difarente. Alora, quando questo studiante el se batesa, tuti i fradei i resta tanto contenti. — Gioani 4:35-38.

16. Parché che te pol restar contento anca se no te fè tanto nela predicassion?

¹⁶ Fursi no te pol laorar tanto nela predicassion par causa dela to salute o parché no te ghè pi la forsa che te gavei vanti. Ma anca cossita, te pol restar contento con quel che te sì bon de far. Varda el esémpio de quel che ga sucedesto col rè Davi e i so òmini. I amalechiti i gavea portà via le so fameie e tante altre robe. Alora, Davi e i so òmini i gavea de lotar par portarle indrio. Ma, 200 òmini i era tanto strachi e i ze restadi par tender dele robe che i gavea. Davi e i so òmini i ga vinsesto i amalechiti e i ze stati boni de portar indrio tante robe dei so nemighi. Davi el ga dito ai so òmini che i gavea de spartir quele robe con quei che i gavea lotà e con quei che no i era ndati. (1 Sam. 30:21-25) La medèsima roba la sucede nel laoro de far dissìpoli. Tuti i fà el meio che i pol e tuti i resta contenti insieme.

17. Parché che restemo tanto contenti?

¹⁷ Restemo tanto contenti de saver che Geovà el ghe piase del laoro che femo a lu. Lu el sa che no semo boni de far le persone scoltarne o deventar Testimònie de Geovà. Anca cossita, lu el vede el nostro sforso, el amor che ghemo par lu e el ne benedisse. Lu anca el ne insegna a restar contenti de far quel che semo boni nela predicassion. (Gioani 14:12) Alora, podemo esser sicuri che Geovà el restarà contento con noantri se no se fermemo de predicar!