1. Ohakalala xeeni ni eparakha xeeni nirina ahu?

NINNIHAKALALA vanceene ni eparakha yuulupale okhala Anamoona a Yehova. Hiyo ninnikhala moovarihana ni nsina nahu vaavo ninlaleerya ahu ni owiixuttiha atthu akina voohimya sa Yehova. Nave ninnihakalala waakhaliherya atthu otheene ‘arina murima wooloka wira yaakhele okumi woohimala’ ni yaamini. (Mit. 13:48) Hiyo nrina moonelo mmosaru aarina awe Yesu. Owo “aahitteeliwa murima vanceene” vaavo awiixutti awe yaamuleelale aya itthu soohakalaliha yaapanke aya okathi yaalaleerya aya.—Luka 10:1, 17, 21.

2. Nnooniherya sai wira ninnivaha efaita muteko ahu woolaleerya?

² Hiyo ninnivaha efaita yinceene muteko ahu woolaleerya. Murummwa Paulo aahimutumererya Timootheyo wira: “Mukasoopeke mukhalelo anyu ni moota muniixuttiha anyu”. Nuumala-vo, Paulo aahincererya oriki: “Nto mwiiraka siiso, munimoopola okumi anyu ni okumi wa atthu anoowiriyanani”. (1 Tim. 4:16) Muteko ahu woolaleerya onnoopola ikumi sa atthu. Nave hiyo nihaana okasoopa mukhalelo ahu mwaha woowi na atthu a Omwene wa Muluku. Nto nimphavela wira mweettelo ahu onvuwiheke Yehova ni wooniheryeke wira ninnikupali ihapari sooreera ninlaleya ahu. (aFil. 1:27) Ninnooniherya wira ninnikasoopa moota nniixuttiha ahu niilokiheryaka oratteene wira nalaleerye ni onvekela Yehova wira onireelihe vaavo nnaalaleerya ahu atthu akina.

3. Niireke atthu otheene animweemererya muhupi wa Omwene? Nvahe ntakiheryo.

³ Hata niimananihaka vanceene waalaleerya atthu anceene, atthu akina a muttetthe ahu pooti oheemererya ihapari sooreera sa Omwene nnaalaleerya ahu. Nwehe yowiiraneya ya munna Georg Lindal yoowo aalaleerya mekhawe wIslândia okhuma mwaakha wa 1929 mpakha 1947. Owo aahaavaha atthu iliivuru imilyau sinceene, masi hata vari siiso, khuuvo mutthu a wIslândia eemerenrye ekeekhai. Georg, ohimmye so: “Atthu akina yaakhala ntoko wira yaaninyokha muhupi wa mBiibiliyani. Masi atthu anceene khiyaaphavela”. Hata nuumala ophiya mamisionaario yiixuttihiwe exikola ya oGileadi, saahivira iyaakha 9 ahinatthi atthu akina  a wIslândia weemererya ekeekhai, wiivahererya wa Yehova ni opatisiwa. *

4. Nnoonela sai vaavo atthu akina ahineemererya aya ihapari sooreera nnaalaleerya ahu?

⁴ Hiyo ninniriipiwa murima ni onyoonyiheya vaavo atthu ahineemererya aya muhupi nnaalaleerya ahu. Woonasa wene, hiyo ninnikhalana moonelo mmosaru aarina awe Paulo. ‘Murima awe waanimuriipa vanceene ni aanitepa onwereya’ mwaha woowi ayuda yaahikhootta weemererya wira Yesu aari Mesiya yoowo aaleiheriwe. (aRom. 9:1-3) Masi ankhi akhala wira munniimananiha vanceene ni muninvekelela masi hata vari siiso, naxikola anyu a Biibiliya onahiya okela vahoolo ni onahiya omusoma Biibiliya? Ankhi akhala wira khamutonko omusomiha mutthu mpakha opatisiwa? Niireke muhaana wiivaha nthowa woonasa wene muupuwelaka wira Yehova khonireeliha muteko anyu woolaleerya? Mwaha ola, ninrowa waakhula makoho manli. Makoho ene taala: (1) Etthu xeeni enooniherya wira muteko ahu woolaleerya onnikhumela saana? (2) Nilipeleleke exeeni vaavo nnaalaleerya ahu atthu akina?

5. Xeeni okathi mukina, muteko nninvarela ahu Yehova ohinkhumela awe ntoko naaphavela ahu?

⁵ Biibiliya onihimya wira atthu anipaka ele Muluku oniphavela awe “miteko sothene sinvaraya, sinnirera”. (Esal. 1:3) Masi eyo khentaphulela wira khula etthu ninvara ahu wira nipake ele Yehova oniphavela awe, enrowa wiiraneyaka ntoko hiyo nimphavela ahu. Maana okumi wa apinaatamu woosareya mixankiho ni ohaawa mwaha wa ohimalela wahu ni ohimalela wa atthu akina. (Yobi 14:1) Nave okathi mukina, ale annilupattha pooti onihiiha olaleerya ntoko naalimalenle ahu. (1 aKor. 16:9; 1 aTes. 2:18) Masi etthu xeeni enimwiiriha Yehova ohimya wira muteko woolaleerya wookhumela saana? Nrowe nithokorerye malakiheryo a mBiibiliyani vakhaani anrowa onikhaliherya waakhula nikoho nno.

6. Etthu xeeni enimwiiriha Yehova ohimya wira muteko ahu onnikhumela saana?

⁶ Yehova onniweha wiimananiha wahu ni ovilela wahu. Owo onnihakalala vanceene vaavo onniweha awe niluttuweliwaka olaleerya mwaha womphenta hata atthu aniwiriyanaka wala ahiniwiriyanaka. Paulo aahimmye so: “Tthiri, Muluku naxariya, owo khonrowa oliyala muteko anyu ni ophenta wanyu nsina nawe, mwaarumeelaka ni muhihiyaka waarumeela ale oororomeleya”. (aHeeb. 6:10) Nikupaliki ni murima wotheene wira Yehova khonliyala wiimananiha wahu ni ophenta wahu hata nihitonko omusomiha mutthu Biibiliya mpakha opatisiwa. Moolumo Paulo aaleelale awe aKorinto pooti wookhaliheryani vanceene. Owo aahimmye so: “Muteko munaavarela anyu Apwiya ni nthiti, khahiyo wa mahala” nnaamwi wiimananiha wanyu ohikumiheryaka mireerelo mwaalipelela anyu.—1 aKor. 15:58.

7. Etthu murummwa Paulo aahimmye awe voohimya sa muteko awe woolaleerya, enniixuttiha exeeni?

⁷ Murummwa Paulo aari misionaario ooloka. Owo aahikhaliherya opakiwa miloko isya  ipooma soovirikana. Masi okathi atthu akina yanvaanyiha aya Paulo, ahimyaka wira owo khaasuwela wiixuttiha, owo khaahimmye nummuru na atthu aakhalihenrye awe okhala makristau. Owaakhulaka atthu ale yanvaanyiha ni yiixoona okhalana efaita onvikana owo, Paulo aalempe so: “Koovara muteko munceene”. (2 aKor. 11:23) Nimutakihaka Paulo, nihikhala-khale niliyalaka wira Yehova onnivaha efaita yinceene muteko ninvara ahu ni ovilela wahu.

8. Etthu xeeni ninreerela ahu wuupuwela vaavo ninlaleerya ahu?

⁸ Muteko ahu woolaleerya onnimusiveliha Yehova. Okathi Yesu aarumme awe awiixutti awe 70 orowa olaleya muhupi wa Omwene, wanikisa wa muteko aya woolaleerya awo khiyaareere otteeliwa murima. Masi etthu xeeni yaatteelinhe murima? Awo yaahimmye so: “Hata malaikha ootakhala anniniiwelela, nrumeelaka nsina nanyu”. Masi Yesu aahilokiherya muupuwelo wa awiixutti awe aaleelaka wira: “Muhitteeliweke murima mwaha wa wiiweleliwa ni malaikha ootakhala, masi mutteeliweke murima mwaha wa masina anyu olempwa wiirimu”. (Luka 10:17-20) Yesu aanisuwela wira khahiyo okathi wotheene yaarowa okhalana sookumanana soohakalaliha okathi woolaleerya. Tthiri, hiyo khaninsuwela akhala wira atthu anceene yaalaleeriwe ni awiixutti yaahikhala makristau. Nto awiixutti ale yahaana ohakalala ohiya mwaha wa itthu yaawerya aya opaka masi mwaha woosuwela wira Yehova aanihakalala mwaha wa wiimananiha waya ni muteko yaavara aya.

9. Moovarihana ni aGalasia 6:7-9, etthu xeeni enrowa okhumelela akhala wira nnoovilela vaavo ninlaleerya ahu?

⁹ Akhala wira nnoovilela naalaleeryaka nnoophwanya okumi woohimala. Vaavo nnaala ahu ni olimela inuku sa Omwene nnaala ahu, hiyo ‘ninnaala neettihiwaka ni munepa wa Muluku’. Maana ninneemererya okhaliheriwa ni munepa woowaarya wa Muluku. Nave vaavo ‘nihinkhulumuwa’ ahu Yehova onninlipiherya wira nnoohepha okumi woohimala hata nihiwenrye omwiixuttiha mutthu Biibiliya mpakha opatisiwa.—Mmusome aGalasia 6:7-9.

10. Xeeni atthu akina nnaalaleerya ahu anniwiriyana aya akina ahinaniwiriyana?

¹⁰ Wira atthu yeemererye muhupi ninlaleya ahu onlipa ni mukhalelo wa murima aya. Yesu aahitthokiherya ekeekhai eyo ni nlikanyiho aapanke awe na mulipa aala epyo itthaya soovirikana. Epyo emosa paahi ti yaakumihenrye muhokorokho. (Luka 8:5-8) Yesu aahimmye wira itthaya iye soovirikana sinthoonyerya atthu yaawo aneemererya “nuulumo na Muluku” mwa inamuna soovirikana. (Luka 8:11-15) Ntoko mulipa-oowaala, hiyo khaninwerya waakhanyererya atthu wunnuwa vamurimani vaya ikeekhai naalalenrye ahu. Maana eyo enlipa ni mukhalelo wa murima aya. Muteko ahu ori waala epyo yooreera, eyo piiyo, muhupi wa Omwene. Murummwa Paulo, ohimmye wira “khula mutthu onimwaakhela etthuvo awe enivarihana ni muteko awe”, ohiya sookhumelela sa muteko awe.—1 aKor. 3:8.

11. Xeeni Nowe aamuhakalalinhe awe Yehova nnaamwi atthu anceene yahanwiriyana? (Nwehe elatarato ya ekaapa.)

¹¹ Okhuma khalai, arumeyi anceene a Yehova annaalaleerya atthu ahiniphavela owiriyana. Mwa ntakiheryo, Nowe aahiviriha iyaakha 40 wala 50 ‘olaleyaka exariya’. (2 Ped. 2:5) Moohaanyiherya, Nowe uupuwela wira atthu akina yanwiriyanaka muhupi aalaleya awe. Masi Yehova aahimmye wira eyo khiyaarowa wiiraneya. Ohiya-vo, vaavo Yehova aamurumme awe Nowe oteka ekalawa, owo aahimmye so: “Munrowa okela mukalawani nyuwo vamosá n’an’inyu n’amwar’inyu n’axar’aya an’inyu”. (Maph. 6:18) Nave, okathi Yehova aamuleelale awe Nowe munnuwelo wa ekalawa ele, woonasa wene Nowe aahoona wira atthu anceene khiyaarowa onwiriyana maana khiyaarowa ophiyerya mukalawani mme. (Maph. 6:15) Ntoko ninsuwela ahu,  khuuvo mutthu eemerenrye muhupi Nowe aalaleya awe. (Maph. 7:7) Niireke Yehova uupuwela wira Nowe khaavanre muteko aamurumme awe? Nnaari! Nowe aahimuhakalaliha vanceene Yehova, maana aahivara muteko aarummwale awe ni Yehova.—Maph. 6:22.

12. Etthu xeeni yaamukhalihenrye Yeremiya ohakalala vaavo aalaleerya awe hata aalupatthiwa ni atthu akina yahanwiriyana?

¹² Profeta Yeremiya, aahiviriha iyaakha 40 olaleeryaka nnaamwi atthu anceene yahanwiriyana ni yaamulupattha. Owo aahikhulumuwa vanceene mwaha woowi awanani awe ‘yanimuruwana ni yaninveha’. Owo aanuupuwela ohiya muteko ole aarummwale awe. (Yer. 20:8, 9) Masi niireke Yeremiya aahikhulumuwa? Exeeni yaamukhalihenrye oxintta muupuwelo awe woohiloka ni ohakalala vaavo aalaleerya awe? Owo aaniwehexexa itthu piili sa efaita yinceene. Etthu yoopacerya, muhupi wa Muluku Yeremiya aalaleerya awe atthu waanaavaha nlipelelo ni ‘oholo wororomeleya’. (Yer. 29:11) Ya nenli, Yehova aahimuthanla Yeremiya ni aahimuruma olaleya muhupi awe. (Yer. 15:16) Hiyo nave ninnilaleya muhupi onaavaha atthu nlipelelo olumwenku ola wootakhala. Nave ninnikuxa nsina na Yehova ntoko Anamoona awe. Vaavo hiyo ninwehexexa ahu itthu iyo piili, ninnihakalala hata atthu akina aniwiriyanaka wala ahiniwiriyanaka.

13. Nlikanyiho na Yesu niri Marko 4:26-29, ninniixuttiha exeeni?

¹³ Okela vahoolo mwa omunepani oniiraneya vakhaani-vakhaani. Yesu aahiixuttiha ekeekhai eyo ni nlikanyiho aapanke awe na mulipa-oowaala onirupa. (Mmusome Marko 4:26-29.) Nuumala mulipa-oowaala waala epyo, eyo ennimela ni enninnuwa vakhaani-vakhaani. Nave mulipa-oowaala owo khokhanle oopaka etthu enrowa wiiriha epyo awe wunnuwa mowaakuveya. Ntoko mulipa-oowaala, woonasa wene ale munaasomiha anyu Biibiliya, pooti oviriha okathi munceene wira yeetteleke ele aniixutta aya, maana okela vahoolo mwa omunepani oniiraneya vakhaani-vakhaani. Ntoko siisaale mulimi ohinwerya awe okhanyererya itthu aalale awe wunnuwa moowaakuveya ntoko oniphavela awe, hiyo khanikhanle oowaakhanyererya anaxikola ahu a Biibiliya olipiha waamini waya moowaakuveya ntoko hiyo nimphavela ahu. Nto muhikhulumuwe ni muhihiye waakhaliherya anaxikola a Biibiliya hata moonaka wira annipisa okela vahoolo mwa omunepani. Nimutakihaka mulimi, nihaana opixa murima nilipelelaka wira anaxikola ahu a Biibiliya anoopaka yoothanla ya omurumeela Yehova.—Yak. 5:7, 8.

14. Yowiiraneya xeeni enooniherya wira pooti ovira okathi wira atthu apacerye oniwiriyana?

¹⁴ Ilapo sikina, pooti ovira iyaakha sinceene atthu akina ahinatthi weemererya ekeekhai mpakha opatisiwa. Nwehe yowiiraneya ya arokora anli a weerutthuni Gladys ni Ruby Allen yaawo mwaakha wa 1959 yaathanliwe wira akhale mapioneera ookilaatheya epooma ya oCanadá eprovinsia ya oQuebec. * Okhala wira yaanoova ele anamwaattamanani aya ni ahooleli a ekerexa Katoolika yaarowa aya opaka wala ohimya akhala wira yanwoona avaanelaka ni Anamoona a Yehova, awo khiyaaphavela owiriyana muhupi wa Omwene. Gladys onihimya so: “Mwa iyaakha piili, hiyo naanirowa olaleerya empa ni empa iwoora 8 masi khuuvo mutthu aaniwiriyana! Atthu ale yaanirwa mpakha vamukhora, masi nuumala oniweha yaanitthika. Hiyo khinaakhulumunwe”. Nuuvira okathi, vakhaani-vakhaani atthu akina yaahipacerya okhala oopatthaneya ni yaahipacerya oniwiriyana. Olelo-va sookhala miloko 3 epooma ya oQuebec.—Yes. 60:22.

15. 1 aKorinto 3:6, 7, onniixuttiha exeeni voohimya sa muteko wowaapaka awiixutti?

¹⁵ Muteko wowaapaka awiixutti ninvara ntoko ekrupu. Vanihimmwa wira khula mutthu mmulokoni onoowerya omukhaliherya mutthu okela vahoolo mpakha opatisiwa. (Mmusome 1 aKorinto 3:6, 7.) Mwa ntakiheryo, munna  pooti onvaha efolyeeto wala erevista mutthu oniphavela ihapari sooreera. Masi okhala wira munna owo khorina okathi wira amuxukurye mutthu ole oniphavela ihapari sooreera, onninvekela namalaleerya mukina wira amuxukurye. Namalaleerya owo onnipaceriha yoosoma ya Biibiliya. Nuumala-vo, onnaalattula anna ni arokora akina wira yamukhaliherye wiiriha yoosoma eyo ya Biibiliya. Khula munna wala murokora onnimulipiha naxikola owo mwa inamuna soovirikana. Nave khula munna wala murokora, onoomukhaliherya naxikola owo wiixutta itthu sikina voohimya sa Yehova. Ntoko Yesu aahimmye awe, mulipa-oowaala ni oohepha, otheene aya anoohakalala hoothe mwaha woomukhaliherya mutthu owo mpakha opatisiwa.—Yoh. 4:35-38.

16. Xeeni ninhakalala ahu hata nihiweryaka oviriha okathi munceene nilaleeryaka mwaha a owereyasiwa wala ohikhalana ikuru?

¹⁶ Ankhi akhala wira khamuniwerya olaleerya ni owiixuttiha atthu ntoko khalai mwaha wa owereyasiwa wala mwaha woowi khamurina ikuru? Nyuwo muhaana ohakalala mwaha woowi munnikhaliherya muteko woohepha onivariwa olumwenku wotheene. Nkahaya nwehe yowiiraneya ya mwene Davidi, vaavo owo ni anakhotto awe yaaronwe aya owana wira awoopole atthu a emusi aya ni mireerelo saya saakuxiwe ni anakhotto a wÀmaleki. Anakhotto 200 yaahikhulumuwa mpakha ohiwerya orowa owana ekhotto. Nto yaahihala alipelelaka miritti. Vano Davidi ni anakhotto akina yaahixintta ekhotto ele ni yaahikuxa mireerelo sinceene sa faita sa awanani aya. Nuumala-vo, Davidi aahiruma wira atthu otheene yaahaana okaweliwa mireerelo iye voolikana, ale yaaronwe okhottoni ni ale yaahanle alipelelaka miritti. (1 Sam. 30:21-25) Yowiiraneya ele, enniniixuttiha etthu voohimya sa muteko ahu woolaleerya ni waapaka awiixutti. Hata muhiweryaka olaleerya ni wiixuttiha ntoko mwaaphavela anyu, mukupaliki wira akhala wira nyuwo munoopaka ele muniwerya anyu munoohakalalaka vanceene vaavo atthu akina animusuwela aya Yehova ni opatisiwa wira yeetteke ephiro eniphwanyiha okumi woohimala.

17. Etthu xeeni enniiriha omuxukhurela Yehova?

¹⁷ Ninnimuxukhurela vanceene Yehova mwaha woowi onnoona muteko nninvarela ahu. Owo onnisuwela wira khaninwerya waakhanyererya atthu weemererya muhupi nnaalaleerya ahu wira apacerye omurumeela. Hata vari siiso, owo onniweha wira ninniimananiha ni ninnimphenta vanceene, nto onoonitthuvela. Nave onniniixuttiha moota woohakalala vaavo ninkhaliherya ahu muteko woolaleerya. (Yoh. 14:12) Nikupaliki ni murima wotheene wira Yehova onnihakalala vaavo nihinkhulumuwa ahu ovara muteko awe!