1. Nuuni Yihoowa Markkata gidiyo gishshawu keehi ufayttiyoynne ceeqettiyoy aybissee?

NUUNI Yihoowa Markkata gidiyo gishshawu keehi ufayttoosinne ceeqettoos! Nuuni Yihoowa asa; qassi haratuyyo abaa yootiyoogaaninne eta tamaarissiyoogan A markkata gidiyoogaa bessoos. ‘Merinaa deˈuwaa demissiya tumaa siyanawu suure wozanaa koshshay deˈiyo uri’ Yihoowa Markka gidanaadan nuuni maaddiyo wode keehi ufayttoos. (Oos. 13:48, NW) Nuunikka Yesuusaagaadan ufayttana danddayoos. A kaalliyaageeti sabbakiyo wode demmido loˈˈo ayfiyaa awu yootido wode I ‘keehi ufayttiis.’—Luq. 10:1, 17, 21.

2. Sabbakiyo oosuwaa nuuni keehi xoqqu ootti xeelliyoogaa waati bessana danddayiyoo?

² Sabbakiyo oosoy nuuni keehi xoqqu oottidi xeelliyooba. Kiitettida PHawuloosi Ximootiyoosawu hagaadan giis: “Ne huuphiyaanne ne timirttiyaa naaga.” PHawuloosi gujjidikka hagaadan giis: “Neeni hegaa oottikko nenanne neeni giyoogaa siyiyaageeta ashshiyo gishshau, aggennan ootta.” (1 Xim. 4:16) Yaatiyo gishshawu, sabbakiyo oosoy deˈuwaa ashshees. Nuuni Xoossaa Kawotettaa asa gidiyo gishshawu, nu huuphiyaa naagana koshshees. Nuuni Yihooway sabettanaadan oottiya ogiyaaninne nu yootiyo mishiraachchuwaa ammaniyoogaa bessiya ogiyan deˈanawu koyoos. (Pili. 1:27) Nuuni haggaazuwawu loytti giigettiyoogaaninne haratuyyo markkattanaappe kase Yihooway maaddana mala woossiyoogan ‘nu tamaarissiyoobaa naagiyoogaa’ bessoos.

3. Xoossaa Kawotettaa mishiraachchuwaa siyanawu ubba asay koyii? Leemisuwaa yoota.

³ Nuuni haratuyyo markkattanawu nuussi danddayettida ubbabaa oottikkonne, nu heeran deˈiya daro asay Xoossaa Kawotettaa mishiraachchuwaa siyanawu koyennan aggana danddayees. Aysilandden 1929ppe 1947 gakkanawu barkka dumma dumma heeran markkattida Ishaa Jorjji Lindaala hanotaa qoppa.  I shaˈan qoodettiya xuufeta asawu immidaba gidikkonne, issi urinne Yihoowa Markka gidibeenna. I hagaadan giis: “Amaridaageeti Geeshsha Maxaafaa tumaa eqettiyaaba milatikkonne, daroti tumaa siyanawu koyokkona.” Giiliyaade timirtte keettaappe anjjettida misoonaaweti oosuwaa maaddanawu yaa biidosona; shin etikka siyanawu koyiya darota demmibeennaba gidikkonne, daro layttawu markkattidosona. Wurssettan, uddufun layttappe simmin, Aysilandden deˈiya amaridaageeti banttana Yihoowawu sheedhdhidi xammaqettidosona.

4. Asay Geeshsha Maxaafaa xannaˈanawu koyenna wode nuuyyo aybi siyettana dandday?

⁴ Asay Geeshsha Maxaafaa xannaˈanawu koyenna wode nuuni hidootaa qanxxoos. Yesuusi Mase gidiyoogaa Ayhudatuppe daroti ammanibeenna gishshawu, ‘keehi azzanidanne aggennan wozanan seelettida’ PHawuloosaagaadan nuuyyo siyettana danddayees. (Roo. 9:1-3, NW) Neeni Geeshsha Maxaafaa issi uraa xannaˈissaydda deˈennan waayi aggana. Neeni gooba asttamaare gidanawu baaxetaasanne ne xinaatiyawu darotoo woossaasa. SHin tamaariyoobaa I oosuwan peeshshenna gishshawu neeni A xannaˈissiyoogaa aggana koshshees. Woy qassi neeni xannaˈissin xammaqettida uri deˈennan aggana danddayees. Hegaa giyoogee neeni mooridobay deˈees giyoogee, qassi Yihooway ne haggaazuwaa anjjibeenna giyoogee? Kaallidi deˈiya naaˈˈu oyshata ha huuphe yohuwan beˈana: (1) Nu haggaazoy muruta gidiyoogaa bessiyaabay aybee? (2) Haratuyyo markkattiyo wode nuuni ay qoppana koshshii?

5. Nuuni Yihoowawu oottiyoobay nu qoppidoogaadan ubbatoo hanennan aggana danddayiyoy aybissee?

⁵ Xoossaa sheniyaa oottiya urawu ‘I oottiyo ubbabay awu haniyoogaa’ Geeshsha Maxaafay yootees. (Maz. 1:3) SHin hegaa giyoogee nuuni Yihoowawu oottiyo ubbabay nu koyidoogaadan hanees giyoogaa gidenna. Nuunikka haratikka nagaranchcha gidiyo gishshawu asaa deˈoy “metuwan kumi uttiis.” (Iyy. 14:1) Qassi, nuna ixxiyaageeti nuuni qoncce gidida ogiyan sabbakennaadan issi issitoo diggana danddayoosona. (1 Qor. 16:9; 1 Tas. 2:18) Yaatin Yihooway nu haggaazoy muruta gidiyoogaa woy gidennaagaa aybin erii? Ha oyshaa zaaruwaa eranaadan maaddiya Geeshsha Maxaafay yootiyo amarida maarata beˈa.

6. Nu haggaazoy muruta gidiyoogaa aggiyoogaa Yihooway aybin erii?

⁶ Yihooway nu baaxetiyo baaxiyaanne nuuni hidootaa qanxxennaagaa akeekees. Asay siyanawu koyennaba gidikkonne, nuuni Yihoowa siiqiyo gishshawu minnidi sabbakiyo wode I nunan ufayttees. PHawuloosi hagaadan giis: ‘Intte oottido oosuwaanne qassi ammaniyaageeta maaddidoogaanne Xoossaa siiqido siiquwaa Xoossay doganawu worddanchcha gidenna.’ (Ibr. 6:10) Nuuni xannaˈissin xammaqettida uri baynnaba gidikkonne, Yihooway nu oottiyoobaanne nu siiquwaa hassayees. Yaatiyo gishshawu PHawuloosi Qoronttoosan deˈiya Kiristtaanetuyyo yootidobaa oosuwan peeshsha: Ne minna oottidobay ne qoppidoogaa keena ayfiyaa demissana  xayikkonne, ‘ne daafuray Godaa baggaara mela gidennaagaa era.’—1 Qor. 15:58.

7. Kiitettida PHawuloosi ba haggaazuwaabaa yootidobaappe ay tamaarana danddayiyoo?

⁷ Kiitettida PHawuloosi daro katamatun ooratta gubaaˈeta essiyoogan keehi gooba missoonaawe. SHin amarida asati PHawuloosa borido wodenne I gooba asttamaare gidenna giido wode Kiristtaane gidanaadan I aappun asaa maaddidaakko yootibeenna. Banttana PHawuloosappe xoqqu xoqqu oottiya asatu mootoy worddo gidiyoogaa qonccissanawu PHawuloosi hagaadan giis: ‘Taani daruwaa oottaas.’ (2 Qor. 11:23) PHawuloosaagaadan, nuunikka Yihoowayyo minni oottiyoogaanne hidootaa qanxxennan aggiyoogaa I keehi xoqqu oottidi xeelliyoogaa hassayana bessees.

8. Nu haggaazuwaa xeelliyaagan nuuni ay hassayana koshshii?

⁸ Yihooway nu haggaazuwan ufayttees. Xoossaa Kawotettaabaa sabbakanaadan Yesuusi bana kaalliya 70 kiittiis; yaatin eti sabbaki wurssidi ‘ufayttiiddi simmidosona.’ Eti keehi ufayttidoy aybissee? Eti hagaadan giidosona: “Godau, harai atto xalahetikka ne sunttan nuussi azazettidosona.” Gidoppe attin, Yesuusi hagaadan yootidi eta qofaa suurissiis: “Tuna ayyaanai inttessi azazettiyo gishshau ufaittoppite; shin intte sunttai saluwan xaafettido gishshau ufayttite.” (Luq. 10:17-20) Haggaazuwan eti hegaa mala loˈˈo ayfiyaa ubbatoo demmennaagaa Yesuusi erees. Yesuusa kaalliyaageeti yootidobaa siyidi aappun asay ammanidaakko nuuni erokko. Yesuusa kaalliyaageeti ufayttana koshshiyoy eti oottidoba xallan gidennan, Yihooway eti oottido baaxiyan ufayttiyoogaa eriyoogaana gidiyoogaa akeekana koshshiis.

9. Galaatiyaa 6:7-9 maaran, nuuni sabbakiyoogan hidootaa qanxxana xayikko ay demmanee?

⁹ Nuuni aggennan haggaazikko, merinaa deˈuwaa demmana. Nuuni mishiraachchuwaa yootanawunne tamaarissanawu nuussi danddayettida ubbabaa oottiyo wode, Xoossaa geeshsha ayyaanay nu giddon loytti oottanaadan eeno giyoogan ‘ayyaanan zeroos.’ Nuuni ‘hidootaa qanxxana woy daafurana’ xayikko, issi urinne xammaqettanaadan maaddibeennaba gidikkonne, Yihooway nuussi merinaa deˈuwaa immanawu qaalaa geliis.—Galaatiyaa 6:7-9 nabbaba. *

10. Nuuni mishiraachchuwaa yootiyo wode amaridaageeti siyiyoynne harati siyennay aybissee?

¹⁰ Asay tumaa siyiyoogee woy siyennan aggiyoogee eta wozanaa hanotaara gayttidaba. Yesuusi zerettay dumma dumma biittan zerettikkonne aradda biittan zerettidaagaa xallay ayfidoogaa leemisuwan yootiyoogan hegee tuma gidiyoogaa qonccissiis. (Luq. 8:5-8) Dumma dumma qommo biittay bessiyoy “Xoossaa qaalaa” siyidi issi mala hanotan zaaribeenna asaa gidiyoogaa Yesuusi yootiis. (Luq. 8:11-15) Zerettaa zeriya bitaniyaadan, nuuni sabbakiyoobay asaa wozanan diccanaadan oottana danddayokko. Nu oottana danddayiyoobay Kawotettaabaa loˈˈo zerettaa aggennan zeriyoogaa. Kiitettida PHawuloosi ‘asay huuphiyan huuphiyan woytuwaa ekkiyoy ba daafuraa woy oosuwaa keenaappe attin,’ oosoy demissiyo ayfiyaa keenaa gidennaagaa yootiis.—1 Qor. 3:8.

11. Nohee yootidobaa daro asay siyana xayikkonne, Yihooway an ufayttidoy aybissee? (Koyro sinttan deˈiya misiliyaa xeella.)

¹¹ Asi deˈido wode ubban, Yihoowa ashkkaratuppe daroti siyanawu koyenna asawu sabbakidosona. Leemisuwawu, Nohee 40 woy 50 gidiya layttawu ‘xillotettaabaa yootiis.’ (2 PHe. 2:5) Nohee I yootiyoobaa asay siyana giidi qoppidoogee  qoncce, shin eti siyanaagaa Yihooway yootibeenna. Nohee markkabiyaa keexxanaadan Xoossay azazido wode, hagaadan giis: “Neeni ne keettaayyiyo, ne attuma naatanne ne attuma naatu maccaasata nenaara ekkada markkabiyaa giddo gelana.” (Doo. 6:18) Qassi Yihooway Nohee ay keena markkabiyaa keexxanaakko yootido wode, Nohee daro asay I yootiyoobaa siyennaagaa akeekennan waayi aggana; ayssi giikko, he markkabee asa ubbawu gidenna. (Doo. 6:15) Nu eriyoogaadan, Nohee yootiyoobaa issi urinne siyibeenna. (Doo. 7:7) Nohee loytti sabbakibeennabadan Yihooway qoppidee? Hegaadan mulekka qoppibeenna! Nohee ubbabaakka Yihooway azazidoogaadan oottido gishshawu, Yihooway an keehi ufayttiis.—Doo. 6:22.

12. Hananabaa yootiya Ermmaasi asay shenehoo giyaabanne eqettiyaaba gidikkonne, ba haggaazuwan ufayttidoy aybissee?

¹² Hananabaa yootiya Ermmaasi yootiyoobaa asay siyennabanne A eqettiyaaba gidikkonne, 40ppe dariya layttawu sabbakiis. Eqettiyaageeti A cayidonne ‘qilliiccido’ gishshawu I azzanidi baayyo imettida oosuwaa agganawu qoppiis. (Erm. 20:8, 9) SHin Ermmaasi hidootaa qanxxibeenna! I hidootaa qanxxennaadaaninne ba haggaazuwan ufayttanaadan A aybi maaddidee? I keehi koshshiya naaˈˈubata loytti qoppiis. Koyruwan, Ermmaasi asawu yootiyo Xoossaa kiitay etawu ‘sinttanaa wodee ufayssiyaagaa’ gidanaadan oottees. (Erm. 29:11) Naaˈˈanttuwan, Yihooway ba gishshaa Ermmaasi asawu kiitaa yootanaadan dooriis. (Erm. 15:16) Nuunikka ufayssiya mishiraachchuwaa asawu yootoosinne Yihoowa Markkata gidiyo gishshawu A sunttan xeegettoos. Nuuni keehi koshshiya ha naaˈˈubata loytti qoppiyaaba gidikko, asay nu yootiyoobaa siyin siyana xayin ufayttana danddayoos.

13. Yesuusi yootido Marqqoosa 4:26-29n deˈiya leemisuwaappe nuuni ay tamaariyoo?

¹³ Issi uri ayyaanaaban loddan loddan diccees. Yesuusi zerettaa zeridi xiskkida bitaniyaabaa yootido leemisuwan hegee tuma gidiyoogaa tamaarissiis. (Marqqoosa 4:26-29 nabbaba.) Zeriyaagee zeri simmin zerettay loddan loddan diccees; I he zerettay eesuwan diccanaadan aybanne oottana danddayenna. Geeshsha Maxaafaa ne xannaˈissiyo uri tamaariyoobaa oosuwan peeshshin beˈana gakkanawu neenikka adussa wodiyaa naagiyoogee koshshana danddayees. Issi goshshanchchay zeridobay I koyidoogaadan eesuwan diccana mala oottana danddayennaagaadan, nuuni Geeshsha Maxaafaa xannaˈissiyoogeetu ammanoy nu koyiyoogaadan eesuwan mino gidanaadan oottana danddayokko. Yaatiyo gishshawu eti dicciyo hanotay nuuni qoppidoogaappe daro wodiyaa ekkikko, azzanana woy hidootaa qanxxana bessenna. He goshshanchchaagaadan, nuuni erissiyo ashkkara oottanawu danddayanchcha gidana koshshees.—Yaaq. 5:7, 8.

14. Asay nuuni yootiyoobaa siyiyoogaa doommanaappe kase adussa wodiyaa ekkana danddayiyoogaa bessiya hanotay aybee?

¹⁴ Issi issi heeratun, issi uri xammaqettana gakkanaashin keehi adussa wodiyaa ekkees. Kanaadan Kuwebeeke giyoosan, issi kataman ubba wode aqinye gididi oottanaadan 1959n maddabettida Glades Allenonne Rubi Alleno giyo michchonttu hanotaa qoppa. * Asay Yihoowa Markkatuura haasayikko, bantta shoorotinne qeeseti oottanabaa woy haasayanabaa yayyido gishshawu, nuuni yootiyoobaa eti siyanawu koyibookkona. Gladesa kasebaa hassayada hagaadan gaasu: “Nuuni naaˈˈu layttawu galla galla hosppun saatiyawu sooppe soo biida, shin nuussi oonikka penggiyaa dooyibeenna! Asay ba penggiyaakko yiidi nuna beˈidi aggidi guyye simmees. SHin nuuni hidootaa qanxxibookko.” Loddan loddan asaa xeelay laamettiis, qassi amaridaageeti nuuni yootiyoobaa siyiyoogaa doommidosona. He kataman ha wodiyan heezzu gubaaˈee deˈees.—Isi. 60:22.

15. Koyro Qoronttoosa 3:6, 7y erissiyo ashkkara oottiyo oosuwaabaa nuna ay tamaarissii?

 ¹⁵ Issi uri erissiyo ashkkara gidanawu daro asaa maadoy koshshees. Issi uri xammaqettanaadan gubaaˈiyan deˈiya ubba asay maaddana danddayees. (1 Qoronttoosa 3:6, 7 nabbaba.) Leemisuwawu, issi ishay siyanawu koyiya urawu issi trakttiyaa woy maxeetiyaa immees. SHin I he bitaniyawu injjetiya wodiyan zaarettidi baanawu danddayibeenna gishshawu, hara ishay baanaadan oychchees. He ishay Geeshsha Maxaafaa xannaˈissiyoogaa doomissees. Qassi I daro ishanttinne michchontti banaara issippe xannaˈissanaadan shoobbees; eti ubbaykka xinaattiya dumma dumma ogiyan minttettoosona. Xinaatiyaara gayttiya ubba ishantti woy michchontti I Yihoowabaa loytti eranaadan maaddana. Yaatiyoogan, issi uraa maaddanawu minni oottida ubbay I xammaqettiyo wode ufayttees.—Yoh. 4:35-38.

16. Neessi payyatettay woy wolqqay kaseegaa mala gidana xayikkonne, neeni haggaazuwan waana ufayttana danddayay?

¹⁶ Sahuwaa woy wolqqay kaseegaa mala gidennaagaa gaasuwan, neeni kaseegaadan sabbakanawunne tamaarissanawu waaya danddayana. Kumetta saˈan oosettiya oosuwaa neeni maaddana danddayido gishshawu ufayttana danddayaasa. Kawuwaa Daawitinne A asati bantta soo asaanne eta aquwaa Amaaleeqatuppe ashshido wode hanidobaa qoppa. Naaˈˈu xeetu asati keehi daafuridoogaa gaasuwan olawu bibeenna gishshawu, etabaa naagiiddi takkidosona. Olan xooni simmin, omooddidi ehiidobaa eti ubbay issi lagge shaakkanaadan Daawiti azaziis. (1 Sam. 30:21-25) Kumetta saˈan erissiyo ashkkara oottiyo oosoykka hegaa mala. Sabbakiyoonne tamaarissiyo oosuwaa neeni koyiyoogaa keena oottennan aggana danddayaasa. SHin neessi danddayettidaagaa keena neeni oottikko, issi uri Yihoowa eridi xammaqettiyo wode ubban ufayttana danddayaasa.

17. Nuuni Yihoowa ayba gishshawu galatana koshshii?

¹⁷ Yihooway nuuni ayyo haggaaziyo haggaazuwaa xoqqu ootti xeelliyo gishshawu A galatoos. Asay nuuni yootiyoobaa siyanaadan woy awu goynnanaadan nuuni wolqqanttana danddayennaagaa I erees. SHin nuuni keehi minni oottiyoogaanne A keehi siiqiyoogaa beˈees; qassi nuna woytees. Sabbakiyo oosuwan nuuni oottiyo ubbaban waani ufayttanaakkokka I nuna tamaarissees. (Yoh. 14:12) Nuuni hidootaa qanxxana xayikko, Xoossay nunan ufayttanaagaa ammanettana danddayoos!