1. Kay ano nga nalilipay kita ngan inaabat naton nga pribilehiyo an pagin Saksi ni Jehova?

NALILIPAY gud kita ngan inaabat naton nga pribilehiyo an pagin Saksi ni Jehova! Gindadara naton an ngaran han Dios ngan nagkikinabuhi kita uyon hito nga ngaran pinaagi ha pagsangyaw ngan panhimo hin disipulo. Nalilipay kita kon nabubuligan naton nga magin tumuroo adton “may husto nga disposisyon basi magkaada kinabuhi nga waray kataposan.” (Buh. 13:48) Inaabat naton an inabat ni Jesus nga “nalipay gud . . . tungod han baraan nga espiritu” han ginsumatan hiya han iya mga disipulo hin mag-opay nga eksperyensya han ira pagsangyaw.—Luc. 10:1, 17, 21.

2. Paonan-o naton maipapakita nga ginsiseryoso naton an aton ministeryo?

² Ginsiseryoso naton an aton ministeryo. Gin-aghat ni apostol Pablo hi Timoteo: “Pirme tagi hin atensyon an imo kalugaringon ngan an imo pagtutdo.” Nagpadayon hi Pablo: “Kay ha pagbuhat hini, matatalwas mo an imo kalugaringon ngan an mga namamati ha imo.” (1 Tim. 4:16) Salit an pagsangyaw nagtatalwas hin kinabuhi. Pirme naton gintatagan hin atensyon an aton kalugaringon tungod kay mga sakop kita han Ginhadian han Dios. Pirme naton karuyag nga gumawi ha paagi nga naghahatag hin kadayawan kan Jehova ngan uyon ha maopay nga sumat nga aton iginsasangyaw. (Fil. 1:27) Iginpapakita naton nga aton ‘gintatagan hin atensyon an aton pagtutdo’ pinaagi ha pag-andam hin maopay para ha ministeryo ngan pinaagi ha pangaro han bendisyon ni Jehova antes kita magsangyaw.

3. Magigin interesado ba an ngatanan ha mensahe han Ginhadian? Paghatag hin ehemplo.

³ Pero bisan kon ginhimo na naton an pinakamaopay, bangin gutiay la o waray nakarawat han mensahe han Ginhadian ha aton teritoryo. Tagda an eksperyensya ni Brother Georg Lindal, nga nagsinangyaw nga nag-uusahan la ha bug-os nga Iceland tikang han 1929 tubtob han 1947. Nakapanaltag hiya hin yinukot nga mga publikasyon; pero waray bisan usa nga kinarawat han kamatuoran. Hiya nagsurat: “May pipira nga baga hin nakontra han mensahe han Biblia,  pero an kadam-an ha ira diri interesado.” Bisan han nagkaada mga misyonero nga ginbansay ha Gilead ngan binulig ha pagsangyaw didto, siyam ka tuig anay an naglabay antes nagkaada pipira nga mga taga-Iceland nga nagdedikar han ira kalugaringon kan Jehova ngan nagpabawtismo. *

4. Ano an bangin abaton naton kon an mga tawo diri makinarawaton han maopay nga sumat?

⁴ Nasusubo kita kon diri makinarawaton an mga tawo. Bangin abaton naton an gin-abat ni Pablo nga ‘duro nga nasubo ngan pirme may kasakit’ tungod kay waray karawata han mga Judio ha kabug-osan nga hi Jesus an iginsaad nga Mesias. (Roma 9:1-3) Ano man kon bisan pa han imo mga pangalimbasog ngan mga pag-ampo para ha usa mo nga Bible study, diri hiya nag-uuswag salit kinahanglan mo iundang an pagdumara ha iya hin pag-aram? O ano man kon waray ka pa direkta nga nabuligan nga magpabawtismo? Angay ka ba makonsensya, bangin maghunahuna pa ngani nga diri ginbibendisyonan ni Jehova an imo ministeryo? Hini nga artikulo, babatunon naton an duha nga pakiana: (1) Paonan-o masisiring nga malampuson an aton ministeryo? (2) Ano an angay naton laoman ha aton pagsangyaw?

5. Kay ano nga an aton mga ginbubuhat para kan Jehova bangin diri pirme magresulta uyon ha aton ginlalaoman?

⁵ An Biblia nasiring mahitungod han tawo nga nagbubuhat han kaburut-on han Dios: “An ngatanan nga iya ginbubuhat maglalampos.” (Sal. 1:3) Pero diri ito nagpapasabot nga an tanan nga aton ginbubuhat para kan Jehova magriresulta uyon ha aton karuyag. An kinabuhi han tawo “damu an problema” tungod han aton pagin diri perpekto pati han iba. (Job 14:1) Dugang pa, bangin temporaryo nga maglampos an mga parakontra nga paundangon an aton pagsangyaw ha publiko. (1 Cor. 16:9; 1 Tes. 2:18) Kon sugad, paonan-o ginsusukol ni Jehova an aton kalamposan? Tagda an pipira nga mga prinsipyo ha Biblia nga mabulig ha aton nga mabaton ito nga pakiana.

6. Paonan-o ginsusukol ni Jehova an kalamposan han aton ginbubuhat para ha iya?

⁶ Ginkikita ni Jehova an aton mga pangalimbasog ngan pagpailob. Para kan Jehova, malampuson an aton mga ginbubuhat para ha iya kon ginhihimo naton ito nga may pagkamaduruto ngan gugma, anoman an magin reaksyon hito han iba. Hi Pablo nagsurat: “An Dios diri kay diri matadong nga kalimtan niya an iyo mga buhat ngan an gugma nga iyo iginpakita para ha iya ngaran pinaagi ha pagserbi ngan padayon nga pagserbi ha mga baraan.” (Heb. 6:10) Diri nahingangalimtan ni Jehova an aton mga pangalimbasog ngan an aton gugma, bisan kon ito nga mga pangalimbasog waray magkaada mag-opay nga resulta. Salit mahimo iaplikar mo ha imo kalugaringon an ginsiring ni Pablo ha mga taga-Corinto: “An iyo pagbudlay may kalabotan ha Ginoo diri nakakarag,” bisan kon ito nga mga pagbudlay waray magresulta uyon ha imo ginlalaoman.—1 Cor. 15:58.

7. Ano an aton mahibabaroan tikang ha ginsiring ni apostol Pablo mahitungod ha iya ministeryo?

⁷ Hi apostol Pablo maopay gud nga misyonero,  nag-establisar hiya hin bag-o nga mga kongregasyon ha damu nga syudad. Pero han kinahanglan niya depensahan an iya mga kwalipikasyon sugad nga ministro han Kristo, waray niya pabug-ati an kadamu han iya nabuligan nga magin mga tumuroo. Lugod, ginbaton niya adton mga nagkukwestyon ha iya pinaagi ha pagsiring: “Mas damu an akon ginbuhat.” (2 Cor. 11:23) Pariho kan Pablo, hinumdoman naton nga an aton mga pangalimbasog ngan pagpailob amo an pinakaimportante kan Jehova.

8. Ano an angay naton hinumdoman mahitungod ha aton ministeryo?

⁸ An aton ministeryo nakakapalipay kan Jehova. Ginsugo ni Jesus an 70 nga disipulo nga magsangyaw han mensahe han Ginhadian, ngan katapos nira magsangyaw, “binalik [hira] nga malipayon.” Kay ano nga nagin malipayon hira? Nagsiring hira: “Bisan an mga demonyo nagpapasakop ha amon pinaagi ha paggamit namon han imo ngaran.” Pero gintadong ni Jesus an ira panhunahuna han ginsidngan niya hira: “Ayaw kamo pagkalipay tungod kay an mga espiritu nagpapasakop ha iyo, lugod magkalipay kamo tungod kay an iyo mga ngaran nahisurat na ha langit.” (Luc. 10:17-20) Maaram hi Jesus nga diri pirme magkakaada sugad hito nga maopay nga mga eksperyensya an ira ministeryo. Ngani, diri kita maaram kon pira hadton namati ha mga disipulo an nagin mga tumuroo. Kinahanglan nga an mga disipulo malipay diri la ha mag-opay nga resulta han ira mga ginhimo, kondi kinahanglan mas malipay hira ha paghibaro nga nalipay hi Jehova han ira maduruto nga mga pangalimbasog.

9. Sumala ha Galacia 6:7-9, ano an aton makakarawat kon magpapailob kita ha aton ministeryo?

⁹ Kon magpapailob kita ha aton ministeryo, magkakaada kita kinabuhi nga waray kataposan. Kon ginhihimo naton an ngatanan basi maisabwag ngan makultibar an mga binhi han kamatuoran han Ginhadian, “nagsasabwag [liwat kita] uyon ha espiritu” pinaagi ha pagtugot han baraan nga espiritu han Dios nga gumios ha aton kinabuhi. Kon diri kita ‘maundang’ o ‘manluluya,’ nagsasaad hi Jehova nga tatagan kita hin kinabuhi nga waray kataposan bisan kon waray kita nabuligan nga magdedikar han iya kinabuhi ngadto ha Dios.—Basaha an Galacia 6:7-9.

10. Kay ano nga an iba namamati ha aton pagsangyaw pero an iba naman diri?

¹⁰ Nadepende gud ha kondisyon han kasingkasing han aton mga mamarati kon kakarawaton nira an kamatuoran o diri. Iginsaysay ito ni Jesus ha iya ilustrasyon mahitungod ha parasabwag nga nagsabwag hin binhi ha iba-iba nga klase hin tuna. Pero an binhi la nga iginsabwag ha maopay nga tuna an namunga. (Luc. 8:5-8) Hi Jesus nagsiring nga an iba-iba nga tuna nagrirepresentar ha kasingkasing han mga tawo nga iba-iba an reaksyon ha “pulong han Dios.” (Luc. 8:11-15) Pariho han parasabwag, diri naton kontrolado an resulta han aton pagsangyaw, tungod kay nakadepende ito ha kondisyon han kasingkasing han aton mga mamarati. An aton responsabilidad amo an padayon nga pagsabwag han maopay nga binhi han mensahe han Ginhadian. Sugad han ginsiring ni apostol Pablo, “an tagsa nga tawo makarawat han iya balos uyon ha iya ginbubuhat,” diri uyon ha mga resulta han iya ginbubuhat.—1 Cor. 3:8.

11. Kay ano nga hi Noe malampuson nga “parasangyaw han katadongan”? (Kitaa an retrato ha kobre.)

¹¹ Tikang pa hadto, damu nga surugoon ni Jehova an nagsangyaw ha mga tawo nga diri makinarawaton. Pananglitan, hi Noe nagin “parasangyaw han katadongan,” posible ha sulod hin mga 40 o 50 ka tuig. (2 Ped. 2:5) Sigurado nga naglaom hiya nga may mamamati han iya pagsangyaw, pero waray magsiring hi Jehova nga ito an mahitatabo. Lugod, han ginsugo hi Noe nga maghimo han arka, an Dios nagsiring: “Kinahanglan sumulod ka ha arka, ikaw, an imo mga anak nga lalaki, an imo asawa, ngan an mga asawa han imo mga anak nga lalaki nga kaupod mo.” (Gen. 6:18)  Ngan may kalabotan ha kadaku han arka nga iginpahimo han Dios ha iya, bangin nahunahuna ni Noe nga diri damu an mamamati ha iya pagsangyaw. (Gen. 6:15) Sugad han aton nahibaroan, waray bisan usa tikang hiton maraot nga kalibotan an namati han pagsangyaw ni Noe. (Gen. 7:7) Ginhunahuna ba ni Jehova nga pakyas hi Noe? Waray! Para ha Dios, malampuson nga parasangyaw hi Noe tungod kay matinumanon nga ginbuhat niya an iginsugo ha iya ni Jehova.—Gen. 6:22.

12. Paonan-o nagin malipayon hi propeta Jeremias ha iya ministeryo bisan pa han kawaray-interes ngan pagkontra han mga tawo?

¹² Hi propeta Jeremias nagsangyaw liwat ha sulod hin sobra 40 ka tuig bisan pa han kawaray-interes ngan pagkontra han mga tawo. Nanluya gud hiya tungod han “pag-insulto ngan pagyaangyaang” han mga parakontra, salit naghunahuna hiya nga diri na magpadayon ha iya toka. (Jer. 20:8, 9) Pero waray umundang hi Jeremias! Ano an nakabulig ha iya nga malamposan an iya negatibo nga panhunahuna ngan magin malipayon ha iya ministeryo? Nagpokus hiya ha duha nga importante nga kamatuoran. Siyahan, an mensahe han Dios nga iginsumat ni Jeremias ha mga tawo naghahatag “hin kabubuwason ngan hin paglaom.” (Jer. 29:11) Ikaduha, ginpili ni Jehova hi Jeremias sugad nga representante basi magsumat han Iya mensahe ha mga tawo. (Jer. 15:16) Kita liwat nagpapasamwak hin mensahe han paglaom hinin masirom nga kalibotan, ngan gindadara naton an ngaran ni Jehova sugad nga iya mga Saksi. Kon magpupokus kita hinin duha nga importante nga kamatuoran, magigin malipayon kita, mamati man o diri an mga tawo ha aton mensahe.

13. Ano an aton mahibabaroan ha ilustrasyon ni Jesus ha Marcos 4:26-29?

¹³ Hinay-hinay nga nahitatabo an espirituwal nga pag-uswag. Igintutdo ni Jesus ito nga kamatuoran ha iya ilustrasyon mahitungod han parasabwag nga nakaturog. (Basaha an Marcos 4:26-29.) Hinay-hinay an pagtubo han mga binhi nga iginsabwag han parasabwag, ngan diri gud niya kontrolado ito. Sugad man, bangin diri mo liwat dayon makita an pag-uswag han imo Bible study tungod kay hinay-hinay ito nga nahitatabo. Sugad la nga diri mapipirit han usa nga parauma nga tumubo an iya mga tanom uyon ha kalaksi nga iya karuyag, diri liwat naton mapipirit an aton mga Bible study nga mag-uswag ha espirituwal uyon ha kalaksi nga aton karuyag. Salit ayaw panluya o ayaw pag-undang kon mas mahinay an ira pag-uswag kay han imo ginlalaoman. Pariho ha pag-uma, an panhimo hin mga disipulo nagkikinahanglan hin pagpailob.—San. 5:7, 8.

14. Ano nga ehemplo an nagpapakita nga an mga resulta han aton ministeryo bangin diri naton dayon makita?

¹⁴ Ha pipira nga teritoryo, an mga resulta han aton ministeryo bangin diri makita ha sulod hin mga tuig. Tagda an eksperyensya han magbugto nga hira Gladys ngan Ruby Allen, nga igintoka sugad nga regular payunir han 1959 ha usa nga bungto han probinsya han Quebec ha Canada. * Tungod han presyur han mga kahimungto ngan han impluwensya han Katoliko nga singbahan, an mga tawo diri namamati han mensahe han Ginhadian. Hi Gladys nagsiring: “Nagsinangyaw kami ha balay-balay hin walo ka oras kada adlaw ha sulod hin duha ka tuig, ngan waray man la bisan usa nga namati ha amon! Ginkikita la kami han mga tawo ha ira purtahan, ngan nabaya dayon. Pero waray kami umundang.” Ha urhi, nagin makisangkayon an mga tawo didto ngan nagin makinarawaton na han mensahe. Yana, tulo na an kongregasyon hito nga bungto.—Isa. 60:22.

15. Ano an igintututdo ha aton han 1 Corinto 3:6, 7 mahitungod ha panhimo hin disipulo nga buruhaton?

¹⁵ An panhimo hin disipulo nagkikinahanglan hin burublig nga pangalimbasog. An tagsa ha kongregasyon makakabulig ha usa nga interesado nga mag-uswag ngadto ha pagpabawtismo. (Basaha an 1 Corinto 3:6, 7.) Pananglitan, sidngon ta nga may brother nga naghatag hin tract o magasin  ha usa nga interesado. Pero tungod kay diri igintutugot han iya eskedyol nga makabalik ha interesado basi kultibaron an interes, naghangyo hiya hin iba nga magwarali nga hiya an bumalik. Natikangan hito nga magwarali an pag-aram ha Biblia. Katapos, nag-uupod hiya hin kabugtoan ha iya pag-Bible study, ngan an tagsa ha ira nagdadasig ha estudyante ha iba-iba nga paagi. An tagsa nga bugto nga nakakaistorya han estudyante makakabulig nga magtubo an binhi han kamatuoran. Hito nga paagi, sugad han ginsiring ni Jesus, an parasabwag ngan an mag-arani malilipay ha espirituwal nga pag-ani.—Juan 4:35-38.

16. Kay ano nga mahimo ka malipay ha imo ministeryo bisan kon nalilimitahan ka tungod kay may sakit ka o maluya na?

¹⁶ Ano man kon nalilimitahan an imo pakigbahin ha pagsangyaw ngan pagtutdo han maopay nga sumat tungod kay may sakit ka o maluya na? Puydi ka la gihapon malipay ha imo mga nahihimo ha pag-ani nga buruhaton. Tagda an eksperyensya ni Hadi David ngan han iya mga tawo han gintalwas nira an ira mga pamilya ngan ginbawi an ira mga panag-iya tikang ha mga Amalekita. Tungod kay an 200 nga kalalakin-an kapoy na gud ha pakig-away, nagpabilin hira basi bantayan an ira mga bagahe. Han nagdaog hira David ha away, nagsugo hi David nga pantay-pantay nga pagbarahinan nira ngatanan an mga dinag-an. (1 Sam. 30:21-25) Pariho ito ha aton bug-os-kalibotan nga panhimo hin disipulo nga buruhaton. Bangin diri na sugad kadamu an imo nahihimo ha ministeryo, pero kon bubuhaton mo an imo pinakamaopay, malilipay ka la gihapon ha kada panahon nga may nabubuligan nga indibiduwal nga makilala hi Jehova ngan magpabawtismo.

17. Ano an angay naton igpasalamat kan Jehova?

¹⁷ Mapasalamaton kita kan Jehova kay ginhuhunahuna niya an aton pag-alagad ha iya ha mahigugmaon nga paagi. Maaram hiya nga diri naton kontrolado an magigin resulta han aton mga pangalimbasog. Bisan pa hito, nakikita niya an aton pagkamaduruto ngan an maopay nga mga motibo, ngan ginbabalosan kita niya. Gintututdoan liwat kita niya nga malipay ha bisan ano nga aton nahihimo ha pagsangyaw nga buruhaton. (Juan 14:12) Makakasarig kita nga makakarawat naton an pag-uyon han Dios basta diri kita umundang!