ALATIKE AKO 43
Tou Faʼa Kataki
“ ʼAua naʼa tou tuku te fai ʼo te meʼa ʼae ʼe lelei.”—KAL. 6:9.
KATIKO 68 Tou To Te Pulapula ’o Te Pule’aga
TE ʼU MANATU FAKANOUNOU *
1. He koʼe ʼe tou fiafia ʼi te ui ko tatou ko he kau Fakamoʼoni ʼa Sehova?
ʼE TOU fiafia ʼaupito ʼi te ui ko tatou ko te kau Fakamoʼoni ʼa Sehova. Kotea tona tupuʼaga? He ʼe tou fua te huafa ʼo te ʼAtua pea ʼe tou fakaha ko tatou ko ʼana fakamoʼoni ʼo tou faifakamafola mo fai ni tisipulo. ʼE feala ke tou tokoni ki he tahi ʼe ‘lelei tona loto ke ina maʼu te maʼuli heʼe gata.’ Pea ʼe tou fiafia ʼi te tokoni ki ai ke tui ki te Tohi-Tapu. (Gaue 13:48) ʼE tou hage ko Sesu ʼae ‘neʼe fiafia ʼaupito ʼo fonu ʼi te laumalie maʼoniʼoni.’ Neʼe hoko te aluʼaga ʼaia ʼi te toe liliu fiafia mai ʼo ʼana tisipulo mai tanatou faifakamafola.—Luka 10:1, 17, 21.
2. ʼE tou fakaha feafeaʼi ʼe maʼuhiga tatatou faifakamafola?
2 ʼE maʼuhiga ʼaupito kia tatou tatatou faifakamafola. Neʼe fakalotomalohiʼi fenei e Paulo ia Timoteo: “Ke ke tokaga fakalelei kia koe mo tau faiakonaki.” Neʼe ina toe hoko atu fenei: “ ʼI tau fai te faʼahi ʼaia, ʼe ke haofaki anai ia koe totonu pea mo natou ʼae ʼe fagono atu.” (1 Tim. 4:16) Koia, ʼe tou haofaki ni maʼuli moka tou faifakamafola. ʼE tou tokaga tuʼumaʼu ki ʼatatou aga he ʼe ko tatou ko ni hahaʼi fakalogo ʼo te Puleʼaga ʼo te ʼAtua. Pea ʼe tou fia fai ia meʼa fuli moʼo fakakololiaʼi te ʼAtua pea ke alu tahi mo te logo lelei ʼae ʼe tou tala. (Flp. 1:27) Koia, tou fakaha ʼe tou tokaga fakalelei ki tatatou faiakonaki. ʼO feafeaʼi? ʼO tou teuteuʼi lelei tatatou faifakamafola pea mo faikole kia Sehova ʼi muʼa ʼo tatatou olo ʼo faifakamafola.
3. ʼE tali koa e te hahaʼi fuli ia te logo ʼo te Puleʼaga? Tuku mai he faʼifaʼitaki.
3 ʼE tou fai ia meʼa fuli ke tou faifakamafola ki te hahaʼi. Kae tokolahi ʼi totatou telituale ʼe mole natou fia logo ki te logo lelei ʼo te Puleʼaga. Ohage la, neʼe faifakamafola tokotahi te tehina ko Georg Lindal ʼi Islande, ʼi te 1929 ki 1947. Neʼe ina tuku tohi ʼe lauʼi hogofulu afe kae neʼe mole pe la he tahi neʼe ina tali te moʼoni. Neʼe ina tohi fenei: “Neʼe fakafeagai ʼihi ki te moʼoni, kae neʼe kaugā malie natou neʼe mole *
natou fia logo ki te logo lelei.” Neʼe ʼomai he kau misionea neʼe kau ʼi te ako ʼo Kileate ʼo faifakamafola ʼi te fenua. Kae neʼe mole he meʼa neʼe fetogi. Neʼe hoki ʼosi taʼu ʼe 9 pea neʼe foaki e ʼihi hahaʼi ʼo te fenua ʼaia tonatou maʼuli kia Sehova pea mo papitema.4. Kotea ʼe tou logoʼi moka ʼe mole tali e te hahaʼi te logo lelei?
4 ʼE tou lotomamahi moka ʼe mole tali e te hahaʼi te logo lelei. ʼE lagi tou logoʼi te meʼa ʼae neʼe logoʼi e Paulo. Neʼe “lotomamahi ʼaupito pea mo lotohoha” he neʼe lahi te kau Sutea neʼe mole natou tui ko Sesu neʼe ko te Mesia. (Loma 9:1-3) Logo la ʼau faiga mo hufakiʼi tau ako, kae kotea ʼe feala ke ke fai moka ʼe mole tuputupu pea ʼe ina fakatuʼu tana ako? Pe ʼe feafeaʼi mo kapau neʼe heʼeki ke fai he ako ʼa he tahi ʼo kaku ki te papitema? ʼE tonu koa ke ke tukugakoviʼi koe mo manatu neʼe mole tapuakiʼi e Sehova tau faifakamafola? ʼI te alatike ʼaeni, ʼe tou tali anai kia fehuʼi ʼe lua: (1) Kotea ʼe ha ai neʼe fua lelei tatatou faifakamafola? (2) Kotea ʼe feala ke hoko moka tou faifakamafola ki te hahaʼi?
KOTEA ʼE HA AI NEʼE FUA LELEI TATATOU FAIFAKAMAFOLA?
5. Ka tou gaue maʼa Sehova, he koʼe ʼe mole hoko tuʼumaʼu te meʼa ʼae ʼe tou fakaʼamu ki ai?
5 ʼE ui fenei ʼi te Tohi-Tapu ʼo ʼuhiga mo ia ʼae ʼe ina fai te finegalo ʼo te ʼAtua: “Ko mea fuli ae e ina fai e manuia kia ia.” (Pes. 1:3) Kae ʼe mole fakaʼuhiga leva ko te ʼu meʼa fuli ʼe tou fai maʼa Sehova ʼe hoko anai ohage ko te meʼa ʼe tou loto ki ai. Tou manatuʼi ‘ ʼe fonu te maʼuli ʼo te tagata ʼi te mamahi’ he ʼe tou agahala fuli. (Sopo 14:1) Pea ʼe feala ʼi ʼihi temi kia natou ʼae ʼe fakafeagai mai ke natou taʼofi tatatou faifakamafola. (1 Ko. 16:9; 1 Tes. 2:18) Kae kia Sehova ʼe hoki fua lelei koa tatatou faifakamafola moka tali e te hahaʼi? Tou vakaʼi ʼihi pelesepeto ʼi te Tohi-Tapu.
ʼE maʼuhiga kia Sehova ʼatatou faiga, tatau aipe pe tou faifakamafola ki he tahi ʼi te faitohi peʼe ʼi te telefoni (Vaka’i te palakalafe 6)
6. Logo la neʼe mole fua lelei tatatou faifakamafola, kae kotea te manatu ʼa Sehova?
6 ʼE sio Sehova ki ʼatatou faiga mo tatatou faʼa kataki. ʼE fiafia ia Sehova moka tou faifakamafola ʼaki he faʼafai he ʼe tou ʼofa ia te ia, logo la ʼe mole fia logo te hahaʼi. Neʼe tohi fenei e Paulo: “ ʼE mole heʼe faitotonu te ʼAtua ke ina galoʼi takotou gaue mo te ʼofa ʼae neʼe kotou fakaha ki tona huafa ʼi takotou tokoni ki te kau maʼoniʼoni ʼi muʼa atu pea mo takotou haga fai ʼi te temi nei.” (Hep. 6:10) ʼE manatuʼi e Sehova ʼatatou faiga mo totatou ʼofa, logo la ʼe mole tou maʼu hatatou ako kua papitema. Koia, ʼe feala ke ke fakaʼuhiga kia koe te ʼu palalau ʼaeni ʼa Paulo ki te kau Kolonito: ‘ ʼE mole vaʼiganoa ʼau gaue kinakina ʼi te ʼAliki,’ logo la neʼe mole fua lelei tau gaue ohage ko tau fakaʼamu ki ai.—1 Ko. 15:58.
7. Kotea neʼe ui e Paulo ʼo ʼuhiga mo tana minisitelio?
2 Ko. 11:23) Ohage ko Paulo, ke ke manatuʼi ʼe maʼuhiga age kia Sehova ʼau faiga mo tau faʼa kataki.
7 Ko te apositolo ko Paulo neʼe ko he misionea faʼafai. Neʼe lahi te ʼu kolo neʼe ina fakatuʼu ai he ʼu kokelekasio. Kae neʼe valoki e ʼihi ia ia mo ui neʼe mole ko he tagata faiako lelei. Logo la te ʼu aluʼaga ʼaia, kae neʼe mole talanoa ia Paulo ki te hahaʼi fuli ʼae neʼe tokoni kia natou ke liliu ko ni kau Kilisitiano. Kailoa ia, kae neʼe ina tohi fenei: “Neʼe lahi age ʼaku gaue.” (8. Kotea ʼe tonu ke tou manatuʼi ʼo ʼuhiga mo tatatou faifakamafola?
8 ʼE fiafia ia Sehova ʼo ʼuhiga mo tatatou faifakamafola. Neʼe fekauʼi e Sesu ni tisipulo ʼe toko 70 ke natou tala te logo ʼo te Puleʼaga. Pea ʼi tanatou ʼosi faifakamafola, neʼe natou “liliu fiafia mai.” He koʼe neʼe natou fiafia? Neʼe natou ui fenei: “Maʼia pe la mo te kau temonio ʼe natou fakalogo mai ʼi tamatou fakaʼaogaʼi tou huafa.” Kae neʼe fakatonutonuʼi e Sesu tanatou faʼahiga manatu ʼo ina ui fenei age: “Tuku takotou fakafiafia ʼi te fakalogo atu ʼa te ʼu laumalie kovi, kaʼe kotou fakafiafia he ʼe kua tohi ʼokotou higoa ʼi selo.” (Luka 10:17-20) Neʼe iloʼi e Sesu ʼe mole hoko tuʼumaʼu anai he ʼu aluʼaga fakafiafia feia kia natou ʼi te faifakamafola. Pea ʼe mole tou iloʼi pe neʼe ko te toko fia neʼe liliu ko he kau Kilisitiano ʼi te ʼaho ʼaia. Koia, neʼe tonu ke mahino te ʼu tisipulo ʼe mole maʼu pe te fiafia ʼuhi he ʼe fagono age te hahaʼi. Kae ʼe natou toe maʼu te fiafia moka natou iloʼi ʼe fiafia ia Sehova ʼi tana sio ʼae ʼe natou gaue kinakina kia te ia.
9. Ka tou lau ia Kalate 6:7-9, he koʼe ʼe tonu ke tou faʼa kataki ʼi te faifakamafola?
9 Ka tou faʼa kataki ʼi te faifakamafola, ʼe tou maʼu anai te maʼuli heʼe gata. Ka tou fai ia meʼa fuli ke tou faifakamafola mo akoʼi te logo lelei, ʼe tou toe “to ʼo manatu ki te laumalie ʼo te ʼAtua.” ʼE tou tuku ke gaue te laumalie maʼoniʼoni ʼo te ʼAtua ʼi totatou maʼuli. Koia, kapau ʼe mole tou lotovaivai peʼe mole tou fiu, ʼe fakapapau mai e Sehova ʼe tou maʼu anai te maʼuli heʼe gata. ʼEi, ʼe tou maʼu anai tatau aipe pe neʼe mole tou tokoni ki he tahi ʼo kaku ki te papitema.—Lau ia Kalate 6:7-9.
KOTEA ʼE FEALA KE HOKO MOKA TOU FAIFAKAMAFOLA?
10. He koʼe ʼe tali e ʼihi te logo lelei kae ʼe mole tali e ʼihi?
10 ʼE fakalogo tafito ki te loto ʼo he tahi pe ʼe ina tali te logo peʼe kailoa. Neʼe fakamahino e Sesu te faʼahi ʼaia ʼi tana lea fakata ʼo ʼuhiga mo te tagata gaue kele. Neʼe ina nunusi tana pulapula ʼi te ʼu kele kehekehe, kae ko te pulapula pe ʼe tahi neʼe maʼuli. (Luka 8:5-8) Neʼe ui e Sesu ʼe fakata e te ʼu kele kehekehe ʼaia ia te hahaʼi ʼae ʼe mole tatau tanatou faʼahiga tali “te folafola ʼa te ʼAtua.” (Luka 8:11-15) Ohage ko te tagata gaue kele, ʼe mole feala ke tou puleʼi te fua ʼo tatatou gaue he ʼe fakalogo ki te loto ʼo te hahaʼi. ʼE tonu ke tou nunusi tuʼumaʼu te pulapula ʼo te logo ʼo te Puleʼaga. Neʼe ui e Paulo ‘ ʼe tou tahi maʼu pe anai tona fakapale ʼo mulimuli ki tana gaue’ kae ʼe mole ʼo mulimuli ki te ʼu fua ʼo tana gaue.—1 Ko. 3:8.
Logo la neʼe faifakamafola ia Noe ʼi ni lauʼi taʼu, kae neʼe ko ia pe mo tona ʼohoana, mo ʼona foha, pea mo te ʼu ʼohoana ʼo ʼona foha ʼae neʼe hu ki te aleka. Neʼe fakalogo ia Noe kia Sehova pea mo fakahoko te gaue ʼae neʼe tuku age e te ʼAtua. (Vakaʼi te palakalafe 11)
11. He koʼe neʼe fiafia ia Sehova ʼi te faifakamafola ʼa Noe? (Vakaʼi te pāki ʼo te takafi.)
11 Talu mai fualoa neʼe faifakamafola te ʼu kaugana ʼa Sehova ki ni hahaʼi neʼe mole natou tali te moʼoni. Ohage la, ko Noe neʼe ko te “tagata faifakamafola ʼo te faitotonu” lolotoga ni lauʼi taʼu. (2 Pet. 2:5) ʼE mahino ia, neʼe fakaʼamu ia Noe ke tali e ʼihi tana faifakamafola. Kae neʼe mole ui age e Sehova ʼe hoko anai te faʼahi ʼaia. Neʼe ina fakatotonu kia Noe ke ina faʼu te aleka pea mo ui fenei age: “E ke ulu anai ki te aleka, ia koe mo ou foha, mo tou ohoana pea mo te u ohoana o ou foha.” (Sen. 6:18) Neʼe fakaha age e Sehova te agaaga ʼo te aleka ʼae ka ina faʼu. Pea neʼe lagi mahino ai ia Noe ʼe mole tali anai e te hahaʼi fuli tana faifakamafola. (Sen. 6:15) ʼE tou iloʼi neʼe mole pe la he tahi neʼe fakalogo kia Noe. (Sen. 7:7) Neʼe manatu koa ia Sehova neʼe mole fua lelei te faifakamafola ʼa Noe? Kailoa ia. Neʼe fiafia ia Sehova ʼo ʼuhiga mo Noe he neʼe ina fai te meʼa ʼae neʼe ina kole age.—Sen. 6:22.
12. He koʼe neʼe fiafia ia te polofeta ko Selemia ʼi tana faifakamafola?
12 Neʼe toe faifakamafola ia te polofeta ko Selemia ʼi ni lauʼi taʼu. Neʼe mole tali e te hahaʼi te logo pea neʼe natou fakafeagai ki ai. Neʼe lotovaivai ʼuhi ko ni ‘laukovi mo ni nukinuki’ ʼa te kau fakafeagai. Pea neʼe ina fia tuku ai tana gaue. (Sel. 20:8, 9) Kae neʼe mole ina tuku ke hoko te aluʼaga ʼaia. Kotea neʼe tokoni ki ai ke ina tauʼi ʼana manatu fakalotovaivai pea ke fiafia ʼi tana faifakamafola? Neʼe tokaga tafito kia aluʼaga maʼuhiga ʼe lua. ʼUluaki, neʼe fakaha e Selemia ki te hahaʼi te logo ʼa te ʼAtua, ʼae ʼe natou maʼu ai “he apogipogi mo he amanaki lelei.” (Sel. 29:11) Lua, neʼe filifili e Sehova ia Selemia ko tana tagata ʼave logo pea ke ina fakaha tana logo ki te hahaʼi. (Sel. 15:16) ʼO toe feia pe mo tatou ia ʼaho nei. ʼE tou fakaha he ʼamanaki ki te hahaʼi pea ʼe tou fua te huafa ʼo Sehova. Ko tatou ko ʼana fakamoʼoni. Koia, ka tou tokaga tafito ki te ʼu aluʼaga maʼuhiga ʼaia ʼe lua, ʼe tou fiafia anai tatau aipe pe ʼe tali e te hahaʼi peʼe kailoa.
13. Kotea ʼe tou ako mai te lea fakata ʼa Sesu ia Maleko 4:26-29?
13 ʼE ʼaoga he temi ke fakatuputupu e he tahi tana tui. Neʼe ko te aluʼaga ʼaia neʼe fakamahino e Sesu ʼi tana lea fakata ʼo ʼuhiga mo te tagata nunusi pulapula ʼae ʼe moe. (Lau ia Maleko 4:26-29.) Ka ʼosi nunusi tana pulapula, ʼe homo mamalie pea ʼe mole feala ke ina fai he meʼa ke homo fakavilivili. ʼO toe feia pe, ʼe mole tou sisio atu pe ki te ʼu faiga ʼo ʼatatou ako he ʼe tuputupu mamalie pe. Ohage pe ko he tagata gaue kele, ʼe mole feala ke ina fakahomo fakavilvili ʼana fuʼu ʼakau ohage ko tana fakaʼamu ki ai. Koia, ʼe mole feala ke tou fakakinauʼi ʼatatou ako ke natou tuputupu fakavilivili. ʼAua naʼa ke lotovaivai mo kapau ʼe mole tuputupu vave kae ke ke faʼa kataki. ʼE hage pe tatatou fai ni tisipulo ko te tokaga ki he gaueʼaga, ʼe tonu ke tou faʼa kataki.—Sakp. 5:7, 8.
14. Kotea ʼae ʼe ha ai ʼe ʼaoga he temi ke fagono mai te hahaʼi?
14 ʼI ʼihi telituale, ʼe feala ke mole ʼi ai he fua ʼo tatatou faifakamafola lolotoga ni lauʼi taʼu. Tou vakaʼi te faʼifaʼitaki ʼa te tau tehina ʼaeni ko Gladys mo Ruby Allen. ʼI te 1959, neʼe hino naua ke nā pionie makehe ʼi he kiʼi kolo ʼo Québec, ʼi Kanata. * Neʼe mole fia tali e te hahaʼi te logo ʼo te Puleʼaga he neʼe natou tuʼania te tagata mo te ʼu patele. ʼE ui fenei e Gladys: “Neʼe ma faifakamafola ʼi te ʼu ʼapi hola ʼe valu ʼi te ʼaho, lolotoga taʼu ʼe lua. Kae neʼe mole tali pe la e he tahi te logo lelei. Neʼe ʼomai pe te hahaʼi ki ʼonatou matapa ʼo tohoʼi ʼonatou lito. Kae neʼe ma hoko atu pe tamā gaue.” ʼAki te temi, neʼe fetogi leva te hahaʼi pea neʼe natou fagono ki te logo. ʼI te temi nei, kua tuʼu leva kokelekasio ʼe tolu ʼi te kolo ʼaia.—Esa. 60:22.
15. Kotea ʼe ui ia 1 Kolonito 3:6, 7 ʼo ʼuhiga mo tatatou fai ni tisipulo?
15 ʼE tonu ke tou kau fuli ki te tokoni ki he tahi ke liliu ko he tisipulo. ʼE feala kia tatou takitotahi ke tou tokoni ki he tahi ke tuputupu ʼo kaku ki te papitema. (Lau ia 1 Kolonito 3:6, 7.) Ohage la, ʼe tuku e he tehina he pepa lotu peʼe ko he nusipepa ki he tahi ʼi te faifakamafola. Kae ʼe mole feala ke toe liliu te tehina ʼaia ʼo ʼaʼahi. ʼE ina kole leva ki he tahi tehina ke alu ʼo fai te ʼaʼahi pea ʼe ina kamata he ako. Pea ʼe ina fakaafe ni tehina mo tuagaʼane ke olo mo ia ʼo fai te ako pea ʼe natou tahi fakalotomalohiʼi te ako. ʼE hage pe ʼe fakapala e te ʼu tehina mo tuagaʼane ʼaia te pulapula ʼo te moʼoni. Koia, ohage ko tona ui e Sesu, ʼe fiafia fakatahi anai ia ia ʼae ʼe ina to te pulapula mo ia ʼae ʼe ina utu moka papitema he tahi.—Soa. 4:35-38.
16. He koʼe ʼe feala ke tou fiafia ʼi tatatou faifakamafola logo la ʼe tou mahahaki peʼe gaʼegagaʼe?
16 ʼE lagi ʼe mole kei ke faifakamafola ohage ko te temi muʼa ʼuhi he ʼe ke mahaki peʼe mole kei tatau leva tou malohi. Kae ʼe feala ke ke taupau maʼu tou fiafia ʼi te faifakamafola. Ta vakaʼi te faʼifaʼitaki ʼa te Hau ko Tavite. Neʼe ina haofaki mo ʼana tagata tau ʼonatou famili mai te kau Amaleke pea mo toe maʼu ʼonatou koloa. Neʼe mole kei lava olo ʼana tagata ʼe toko luageau ki te tau he neʼe kua natou gaʼegagaʼe ʼosi. Koia, neʼe natou nonofo ai ʼo leʼo ʼanatou meʼa. Hili tanatou malo, neʼe fakatotonu e Tavite ke vahe fakatatau te ʼu koloa ia natou fuli. (1 Sam. 30:21-25) Pea ʼe toe feia pe mo tatatou fai ni tisipulo. ʼE feala pe ke mole kei ke faifakamafola ohage ko te temi muʼa. Kae kapau ʼe ke fai te meʼa ʼae ʼe ke fealagia, ʼe ke fiafia anai moka ako e he tahi ke ina iloʼi ia Sehova pea mo papitema.
17. He koʼe ʼe tou fia fakamalo kia Sehova?
17 ʼE tou fakamalo kia Sehova he ʼe ina leleiʼia te gaue ʼae ʼe tou fai kia te ia. ʼE ina iloʼi ʼe mole feala ke tou fakakinauʼi te hahaʼi ke natou tali te logo pea mo tauhi kia te ia. Kae ʼe ina tokagaʼi tatatou faʼafai mo totatou ʼofa kia te ia, pea ʼe ina fakapale tatou. Pea ʼe ina toe akoʼi tatou pe feafeaʼi hatatou fiafia ʼi te faifakamafola. (Soa. 14:12) Koia, ʼe tou tui papau ʼe ʼofa te ʼAtua ia tatou mo kapau ʼe tou faʼa kataki.
KATIKO 67 “Fakamafola Te Folafola”
^ pal. 5 ʼE tou fiafia moka tali e te hahaʼi te logo lelei, kae ʼe tou lotomamahi moka mole natou tali. Kae ʼe feafeaʼi moka ke tokoni ki hau ako kae mole tuputupu? Pe neʼe mole heʼeki ke fai he ako ʼa he tahi ʼo kaku ki te papitema? ʼE ke manatu koa neʼe mole he fua ʼo tau gaue? ʼI te alatike ʼaeni, ʼe tou vakaʼi ai anai pe koʼe ʼe feala ke fua lelei tatatou faifakamafola. Pea ʼe tou toe vakaʼi pe feafeaʼi hatatou taupau maʼu totatou fiafia tatau aipe pe ʼe mole fagono mai he tahi.
^ pal. 14 Vakaʼi te hisitolia ʼo Gladys Allen ʼi Te Tule Leʼo ʼaho 1 ʼo Sepetepli 2002, ʼi te “ ʼE Mole ʼAu Fetogi Anai He Meʼa e Tahi!”