1. მუ რე ჩქინ ხიოლიშ მიზეზ, ნამუთ დიდ პატი რე?

მუშმადიდა ხიოლიშ მიზეზ დო პატი რე, იეჰოვაშ მოწმეეფ ვორეთინ! ჩქი იეჰოვაშ ხალხ ვორეთ დო ქადაგებათ დო მოწაფეეფიშ მომზადებათ ვამოწმენთ თიშ სახელიშ გურშენ. მოხიოლნა, თიცალ პიროვნებეფიშ მოხვარა, „მიდგაშ გურ მარადიულ სიცოცხლეშ მიოღებელო“ რე განწყობილ (საქ. 13:48). ჩქი იესოცალო ბგინაფლენთ დუდის, ნამდგაქ „მანგარ ხიოლ იგინ წმინდა შურით“, მუჟამსით თიშ მოწაფეეფქ ქეჩის, ნამდა მსახურებას ჯგირ შემთხვევეფ უღდეს (ლუკ. 10:1, 17, 21).

2. მუჭო შემლებნა ვოძირათ, ნამდა სერიოზულო ვუჯინეთ მსახურებას?

² ჩქი მსახურებას სერიოზულო ვუჯინეთ. მოციქულ პავლექ ტიმოთეს ელუჩ: „ირიათო ქიდეკვირ მუჭოთ სქან დუდის, თეშ თის, მუს დო მუჭო ოგურუანქ“. უკულ თიქ გეუძინ: „ირო თაშ მიქცი დო სქან დუდის ხოლო ირსხენქ დო მარჩქილეეფს ხოლო“ (1 ტიმ. 4:16). თაშ ნამდა, ჩქინ მსახურება სასიცოცხლოთ მნიშვნელოვან რე. ღორონთიშ სამეფოშ მოქალაქეეფ ვორეთინ თიშენ, ირიათო დიდ ყურადღებას ვაქციენთ ჩქინ დუდის დო ირნერო ვოცადუთ, ჩქინ საქმეეფქ განადიდას იეჰოვა დო ქაძირუას, ნამდა ბწანა თიშ, მუდგას ფქადაგენთ (ფილ. 1:27). მსახურებაშ ულაშახ ჯგირ მომზადებათ დო იეჰოვაშა მოხვარაშ თხუალათ ვოძირანთ, ნამდა ყურადღებას ვაქციენთ, მუს დო მუჭო ვოგურუანთ.

3. არძა დეინტერესებუნო სახიოლო ამბეთ? ქიმიჸონით მაგალით.

³ თიმწკუმა ხოლო, მუჟამსით ირფელს ვორთუთ, ნამდა ქუქადაგათ ადამიანეფს, შილებე ჩქინ ტერიტორიას ბრელქ იშენით ვედეინტერესას სახიოლო ამბეთ. გუვარჩუათ ჯიმა გეორგ ლინდალიშ შემთხვევა, ნამუთ 1929—1947 წანეფს ხვალე მსახურენდჷ ისლანდიას. თიქ ვითანთასობით პუბლიკაცია გავრცელ, მარა მითინს ვემუღებ ჭეშმარიტება. ჯიმა ლინდალქ ჭარჷ: „თეშ იძირე, ნამდა ხალხშე ნამთინე ბიბლიურ ცნობაშ წინააღმდეგ მეურს, მარა უმენტაშის უბრალოთ  ვაინტერეს თინა“. თიშ უკულ ხოლო, მუთ გალაადიშ კურსდამთავრებულ მისიონერეფქ გენორთეს ისლანდიაშა, ჩხორო წანაქ დესაჭირ, ნამდა ნამთინექ დუდ მეუძღვინკო იეჰოვას დო დინათკო. *

4. მუჭო შილებე დუდ იბგინათ, მუჟამსით ხალხ სახიოლო ამბეშ ინტერესის ვეგმირჩქინანს?

⁴ ჩქი გურ მიტირხნა, მუჟამსით ხალხის ვაინტერეს სახიოლო ამბე. ათეშენ შილებე დუდ პავლეცალო იბგინათ, ნამუთ „დიდ ოწუხებელ დო უსქილად ჭუას“ გინაფლენდჷ, მუშენდა იუდეველეფიშ უმენტაშიქ ვემიღ იესო, მუჭოთ აღთქმულ მესია (რომ. 9:1—3). შილებე ბიბლიას ოგურუანდათ პიროვნებას, ირფელს ორთუდათ, ნამდა ჯგირ მასწავლებერ ქორდათ დო ბრელს ლოცულენდათ თქვან ბიბლიაშ მაგურაფალიშ გურშენ, მარა თინა ვერინუანდას ნაგურეფუს, მუდგაშ გურშენ საჭიროქ იჸუას გურაფაშ მეტებაქ. ვარდა შილებე ართ პიროვნებაქ ხოლო ვემგაჸონინეს ნათუაშახ. დუდ დამნაშავეთ ოკო იგინათო დო იფიქრათო, ნამდა იეჰოვაქ ვაკურთხჷ თქვან მსახურება? თე სტატიას ჩქი პასუხის ქიმეფჩანთ ჟირ კითხვას: 1) მუს ნიშნენს წარმატებულ მსახურება? 2) მუს ოკო ველდათ ქადაგებაშ დროს?

5. მუშენ შილებე იეჰოვაშ მსახურებას ირფელქ ირო თეშ ვეთუას, მუჭოთ ველუდით?

⁵ თი პიროვნებაშ გურშენ, მით იეჰოვაშ ნებას ასრულენს, ბიბლია იჩიებ: „ირფელს, მუდგას ორთუნ, ხეგომორძგვილ იჸუაფ“ (ფსალმ. 1:3). მარა თენა თის ვა ნიშნენს, ნამდა ირფელ მუდგას იეჰოვაშო ვორთუთ, მოკონან თეშ გეკეთებ. ჩქინ დო შხვეფიშ არასრულყოფილებაშ გურშენ ადამიანიშ ცხოვრება „ირო გაჭირებას რე“ (იობ. 14:1). თეს გეძინელ, მოწინააღმდეგეეფქ შილებე დროებით შეაჩერან ჩქინ მსახურება (1 კორ. 16:9; 1 თეს. 2:18). თაშ ქორენ-და, მუ რე იეჰოვაშ თოლს ჩქინ წარმატება? გუვარჩუათ ნამთინე ბიბლიურ პრინციპ, ნამუთ თე კითხვას არზენს პასუხის.

6. მუ რე იეჰოვაშ თოლს ჩქინ წარმატება?

⁶იეჰოვა ოკვირ ჩქინ მონდომას და მოთვინებას. იეჰოვაშ თოლს ჩქინ მსახურება წარმატებულ რე, მუჟამსით თის ვორთუთ მთელ გურით დო ჸოროფათ, თიშ უმკუჯინუო, მუნერ რეაქცია აღვენუნა შხვეფს. პავლექ ჭარჷ: „ღორონთ უსამართლო ვა რე, ნამდა გიჭყოლიდუას თქვან ხანდა დო ჸოროფა, ნამუთ თიშ სახელიშ გურშენ გიმირჩქინით, მუშენდა ომსახურუდით დო ასე ხოლო ომსახურუთ წმინდეფს“ (ებრ. 6:10). იეჰოვას ჩქინ მონდომა დო ჸოროფა, თიმწკუმა ხოლო ვაჭყორდუ, მუჟამსით თის ჯგირ შედეგ ვა მოჸუნს. თქვა შეილებნა თქვან დუდშა მიღათ კორინთელეფშა ნარაგად პავლეშ სიტყვეფ: „ტყურათ ვა ხანდენთ თიშო“, თიშ უმკუჯინუო, თე ხანდაქ მიღჷ დო ვარ თქვა გოკოდესინ ფერ შედეგ (1 კორ. 15:58).

7. მუ შემლებნა დიბგურუათ თევრეშე, მუთ მოციქულ პავლექ მუშ მსახურებაშ გურშენ თქუ?

⁷ მოციქულ პავლე ჯგირ მისიონერ რდჷ დო ბრელ ქალაქის ახალ კრებეფ ჩამოაყალიბ.  მარა, მუჟამსით ნამთინე თის აკრიტიკენდჷ დო იჩიებუდ, ნამდა ვა რდჷ ჯგირ მასწავლებერ, პავლეს ვა უთქუალ, მუსხის მეხვარ ქრისტიანო გინორთას. თეშ მანგიორო, თინეფს თეცალ პასუხ მეჩჷ: „უმოს მეტ ხოლო მიხანდებ“ (2 კორ. 11:23). პავლეცალო რშუდან, ნამდა იეჰოვა ირფელიშ უმოსო თქვან მონდომას დო მოთვინებას აფასენს.

8. მუ ოკო ფშუდან ჩქინ მსახურებაშ გურშენ?

⁸იეჰოვა ჩქინ მსახურებას იწონუანს. იესოქ 70 მოწაფე მიდაშქვჷ სამეფოშ ცნობაშ ოქადაგებშა დო 70-ხოლო მოწაფექ „გახარებულო დირთჷ“. მუ რდჷ თე ხიოლიშ მიზეზ? თინეფქ თქუეს: „სქან სახელიშ მოშინაფაშ დროს დემონეფ ხოლო მომორჩილნა“. მარა იესოქ თინეფს შეუსწორ აზროვნება: „თინა ნუმ გოხიოლნა, უბადო შურეფ გომორჩილნან, თინა გოხიოლდან, ნამდა თქვან სახელეფქ ზეცას ქინიჭარჷ“ (ლუკ. 10:17—20). იესოს უჩქუდ, ნამდა თინეფს მსახურებას ირო ვაღვენუდეს თეცალ ჯგირ შემთხვევეფ. სინამდვილეს ჩქი ვა მიჩქუნა, მოწაფეეფს დუდშე ურჩქილუნ თინეფშე, მუზმაქ ირწმუნ. მოწაფეეფს ხიოლ ხვალე მუნეფიშ მიღწევეფქ ვარინ, თიშ რჩქინაქ ოკო მოუღკო, ნამდა იეჰოვა იწონუანდჷ თინეფიშ მონდომას.

9. მუჭოთ გალატელეფიშ 6:7—9-ს ჭარჷ, მუ შედეგის მომღანა, მუჟამსით მსახურებას მოთვინებათ გუვაგრძელენთ?

⁹მსახურებაშ დროს მოთვინებაშ გიმორჩქინათ მარადიულ სიცოცხლეს მიბღენთ. მუჟამსით ირფელს ვორთუთ, ნამდა ქიფქადაგათ დო ქუვოგურუათ სახიოლო ამბეშ გურშენ, „ფთასუნთ შურშო“. თეშნერო საშვალებას ვარზენთ ღორონთიშ წმინდა შურს, ჩქინ ცხოვრებაშა ქიმოქმედას. ჯგირიშ კეთებას „ვემვოტენთ“ დო „ვა ფშურდუთ-და“ იეჰოვა მარზენა პირობას, ნამდა მარადიულ სიცოცხლეს მიბღენთ, თიშ უმკუჯინუო, მივეხვარით დო ვარ მითინს იეჰოვაშა დუდიშ მეძღვინუას (წეკითხით გალატელეფიშ 6:7—9).

10. მუშა რე დამოკიდებულ, მიღენა დო ვარ ადამიანეფ ჭეშმარიტებას?

¹⁰მიღენა დო ვარ ადამიანეფ ჭეშმარიტებას, უმენტაშო დამოკიდებულ რე თინეფიშ გურიშ მდგომარეობაშა. იესოქ თენა მათასალიშ მაგალითით ქაძირუ. თიქ თას შხვადოშხვანერ ადგილს გიოჸოთ, ნამდგაშე ხვალე ართიქ მიკიღ ნაყოფ (ლუკ. 8:5—8). იესოქ თქუ, ნამდა იგავს მოშინაფილ შხვადოშხვანერ დიხა ნიშნენს თი ადამიანეფიშ გურიშ მდგომარეობას, ნამდგაქ შხვადოშხვანერო მიღჷ „ღორონთიშ სიტყვა“ (ლუკ. 8:11—15). მათასალცალო, ჩქინ მსახურებას მუ შედეგ მაჸუნუნ, ჩქინდა ვარინ, მარჩქილეეფიშ გურიშ მდგომარეობაშა რე დამოკიდებულ. ჩქინ პასუხიშმგებლობა რე, გუვაგრძელათ სამეფოშ თასიშ თასუა. მუჭოთ პავლე მოციქულქ თქუ: „თითოულ მუშ ნახანდით მიღენს საფასურს“ დო ვართ ხოლო შედეგით (1 კორ. 3:8).

11. მუშენ რდჷ ნოე წარმატებულ „სიმართლეშ მაქადაგებელ“? (ქოძირით სურათ გალენ გვერდის)

¹¹ იეჰოვაშ მსახურეფ ჯვეშო ხოლო ხვადუდეს თიცალ ხალხის, მიდგას ვაინტერესუდ ჭეშმარიტება. მაგალთო, ნოე ვითობით წანას „სიმართლეშ მაქადაგებელ“ რდჷ (2 პეტ. 2:5). მუშო ოკო რაგად, თის იმენდ აღვენუდ, ნამდა შხვეფ მირჩქილუანდეს ღორონთიშ ცნობას, მარა იეჰოვას ნოეშა თეშ პირობა ვემუჩამ. თეშ მანგიორო, კიდობანიშ შენებაშ გურშენ მითითებეფიშ მეჩამაშ დროს, ღორონთიქ უწუ: „მინილ კიდობანშა სქან ქომოლსქუალეფწკუმა, სქან ოსურწკუმა დო სქან ნოსალეფწკუმა ართო“ (დაბ. 6:18). კიდობანიშ ზომეფ დო ტევადობაშე დეფიფქრებუთ-და, ნოე ალბათ ქიმეხვადუდ, ნამდა ბრელ ვა მურჩქილუანდჷ თიშ ქადაგებას (დაბ. 6:15). მუჭოთ მიჩქნან, ძალადობათ ეფშა მსოფლიოს მითინქ ვემიღ ნოეშ ცნობა (დაბ. 7:7). თეშ გურშენ წარუმატებელ მსახურო მიორჩქუდუო იეჰოვას თინა? მუშო ოკო რაგად, ვარ! ღორონთიშ თოლს ნოე წარმატებულ  მაქადაგებელ რდჷ, მუშენდა თინა ართგურო ასრულენდჷ ირფელს, მუთ იეჰოვაქ დავალ (დაბ. 6:22).

12. მუქ მეხვარ იერემიას, ქიგინკო ხიოლ მსახურებას, თიშ უმკუჯინუო, ნამდა ხალხის ვაინტერესუდ თიშ ცნობა დო ოწინააღმდეგუდ თის?

¹² წინასწარმეტყველ იერემია ვითობით წანას ქადაგენდჷ ხალხწკუმა, მიდგას ვაინტერესუდ თიშ ცნობა დო ოწინააღმდეგუდ. თინა თიცალ გურგოტახილ რდჷ მოწინააღმდეგეეფიშ მხარეშე შეურაცხყოფა დო გოძიცაშ გურშენ, ნამდა იფიქრჷ, მეუტებუდკო მუშ დანიშნულება (იერ. 20:8, 9). მარა იერემიას თაშ ვა მუქციებ. მუქ მეხვარ თის, გიორჯგინკო უარყოფით ფიქრეფს დო ქიგინკო ხიოლ მუშ მსახურებას? იერემიას ყურადღება გინოღალირ აფუდ ჟირ მნიშვნელოვან ფაქტშა. პირველ, ცნობა, ნამდგას თინა ქადაგენდჷ, ხალხის „მომავალიშ იმენდის“ არზენდჷ (იერ. 29:11). დო მაჟია, იეჰოვაქ იერემია მუშ სახელშო გიშეგორ (იერ. 15:16). იერემიაცალო, ჩქი ხოლო იმენდიშ გურშენ ვაცხადენთ თე უიმენდო ქვეყნიერებას დო იეჰოვაშ სახელ გებძუნა, მუშენდა თიშ მოწმეეფ ვორეთ. მუჟამსით მთავარ ყურადღებას თე ჟირ მნიშვნელოვან ფაქტშა გეგნიბღანთ, შემალებენა მიღდან ხიოლ, თიშ უმკუჯინუო, მუ რეაქცია უღჷ ხალხის ღორონთიშ ცნობაშ მიმართ.

13. მუს ბგურაფლენთ იესოშ მოჸუნაფილ მაგალითშე, ნამუთ მარკოზიშ 4:26—29-ს ჭარჷ?

¹³სულიერ რდუალა ჭიჭე-ჭიჭეთ ხვადუ. იესოქ თენა მათასალიშ მაგალითით ენწყჷ, ნამდგაქ სერით ქიდირულუ (წეკითხით მარკოზიშ 4:26—29). მათასალიშ მონდომაშა ვა რდჷ დამოკიდებულ თასიშ რდუალა. თქვა ხოლო შილებე ბრელ ხანქ გაჸუან ოჯინექ, სოიშახ ბიბლიაშ მაგურაფალ ცხოვრებას გიმირინუანდას ნაგურეფუს. მუჭოთ მათასალს ვეშულებ დაჩქარას თასიშ რდუალა, თეშ ჩქი ხოლო ვადმაჩქარებენა ჩქინ ბიბლიაშ მაგურაფალიშ სულიერო წიმი ულა. თაშ ნამდა, თინეფიშ სულიერო წიმი ულას ფიქრენდითინ თიშე უმოს დროქ დესაჭირ-და, გურქ ვა გოიტირხან დო ვემიოტუათ საქმეშ კეთება. მუჭოთ დიხაშ დუმამუშებელს ოსაჭირ მოთვინება, თეშ მოწაფეეფიშ მომზადება ხოლო მოთვინებას ითხინს (იაკ. 5:7, 8).

14. ნამ მაგალითშე იძირე, ნამდა მსახურებაშ შედეგეფქ შილებე ჭიჭე-ჭიჭეთ გამკორჩქინდას?

¹⁴ ნამთინე ქიანას ჩქინ მსახურებაშ შედეგეფ წანეფიშ დინახალე ვეძირე. გუვარჩუათ ხორციელ დალეფიშ, გლედის დო რუბი ალენეფიშ შემთხვევა. * თინეფქ 1959 წანას დენიშნეს სრულ დროთ პიონერეფო კანადას, კვებეკიშ პროვინციაშ ართ-ართ ჭიჭე ქალაქის. კათოლიკურ ეკლესიაშ გავლენათ ხალხის ვაკოდ სახიოლო ამბეშ მორჩქილაფა. გლედისი იშინანს: „ჟირ წანაშ დინახალე დღაშე 8 საათის ფქადაგენდით კარდოკარ დო მითინს ვაკოდ ჩქინწკუმა ჩიება. თინეფ უბრალოთ კარშა მიშეს დო მუჟამსით ჩქი ქობძირუნდეს, უკახლე ირთუდეს. მარა გურ ვებლაფნა“. დროშ მიკულაწკუმა ართო ხალხიშ დამოკიდებულებაქ დითირ დო თე ტერიტორიაქ უმოს შედეგიანქ ქიჸუ. ასე თე ქალაქის სუმ კრება იტარებ (ეს. 60:22).

15. მუს მოგურუანა 1 კორინთელეფიშ 3:6, 7 მოწაფეეფიშ მომზადებაშ გურშენ?

¹⁵მოწაფეეფიშ მომზადებაშ საქმეს ბრელ ადამიანიშ მონდომა ოსაჭირ. მთელ კრებას შეულებ პიროვნებაშ მოხვარა, ნამდა თიქ დინათას (წეკითხით 1 კორინთელეფიშ 3:6, 7). მაგალთო, წერმიდგინით, მაუწყებელქ ქუდუტუ ბუკლეტ ვარდა ჟურნალ დაინტერესებულ პიროვნებას. მარა ვეშულებ თიშო მოხუჯურ დროს კინ ქიმიაკითხუას, ათეშენ თეშ კეთებას შხვა მაუწყებელს თხინს. თე მაუწყებელ იჭყანს ბიბლიაშ გურაფას, ნამდგაშა შხვადოშხვა და დო ჯიმა გილაჸუნს. თინეფშე თითოულ შხვადოშხვანერო ოხვარ  ბიბლიაშ მაგურაფალს დო ირ თეცალ შეხვალამათ თე და დო ჯიმალეფ „წყარნა ჭეშმარიტებაშ თასის“. თეშნერო, მუჭოთ იესოქ თქუ, მათასალს დო ემაჭოფალს შეულებნა ართო გეხარან სულიერ მოსავალით (იოან. 4:35—38).

16. მუშენ შეილებნა გიღდან ხიოლ თიმ დროს ხოლო, მუჟამსით გლახა ჯამრთელობაშ გურშენ ბრელ ვა გაკეთებენა?

¹⁶ შილებე ქადაგება დო გურაფაშ საქმეს გლახა ჯამრთელობაშ გურშენ ულირზმა ვა გაკეთებედან, მარა იშენით შეილებნა ხიოლ ძირათ მოსავალიშ ეჭოფუაშ საქმეს. გუვარჩუათ მეფე დავითი დო თიშ ხალხიშ შემთხვევა, მიდგაქ მუნეფიშ ოჯახეფ ამალეკელეფიშ ხეშე დერსხეს. დავითიშ მებრძოლეფშე ამალეკელეფიშ გიოთხოზინშა ჟიროშ კოჩის ვალინ, მუშენდა მანგარ შულადირეფ რდეს, ათეშენ თინეფქ ჯარიშკოჩეფიშ ნივთეფწკუმა ქუდოსქიდეს. ამალეკელეფშა გერჯგინაშ უკულ დავითიქ ზოჯჷ, ნამდა არძას, თინეფ შქას დოსქილადირეფს, ართნერო გურთესკო ნტერეფშა მიდაღალირ ძვირფას ნივთეფ (1 სამ. 30:21—25). თაშ რე მოწაფეეფიშ მომზადებაშ მსოფლიო საქმეწკუმა დაკავშირებით ხოლო. შილებე გოკონან თისხი ვა გაკეთებენა ქადაგება დო გურაფაშ საქმეს, მარა მუთ შეილებნან ირფელს ქართუთ-და, დიდ ხიოლს მოიღანა თიშ ძირაფა, ნამდა კრებაშა ახალ მოულირეფ იეჰოვას იჩინებაფუანა დო ინათუნა.

17. მუშენ ოკო ვორდათ ღორონთიშ მარდულეფ?

¹⁷ მარდულეფ ვორეთ მოჸოროფე ღორონთიშ, ნამუთ თაშ აფასენს ჩქინ მსახურებას. თის არჩქილე, ნამდა ჩქინდა ვა რე დამოკიდებულ ხალხ მიღენს დო ვარ ჭეშმარიტებას, მარა ორწყე ჩქინ მონდომას, ჯგირ მოტივეფს დო კურთხევას ვა მარკენა. თეს გეძინელ, იეჰოვა მოგურუანა, მუჭო მიბღათ ხიოლ, მუჟამსით მუთ შემლებნან ირფელს ვორთუთ ქადაგებაშ საქმეს (იოან. 14:12). შემლებნა დარწმუნებულ ვორდათ, ნამდა თე საქმეს დუდის ვა დუვანებენთ-და, ღორონთიშ მოწონას მიბღენთ!