1. Nan̈ino ma atsika ten̈a ravoravo?

MIREHAREHA atsika fotony Vavolombelon̈o Jehovah. Ravoravo atsika mitondra an̈aran̈a io, ke an̈aboahantsika zen̈y lera atsika mitory ndreky mampianatra raha momba Jehovah. Ravoravo atsika izikoa fa misy olo manjary mino izy ke von̈ono hatao batisa. (Asa. 13:48) Mitovy amy raha tsapany Jesosy raha tsapantsika. ‘Ravoravo mare’ Jesosy, pianatranany aby io koa fa nitantara taminany raha tsara hitandro tamy fitorian̈a tan̈y.​—Lioka 10:1, 17, 21.

2. Akory an̈aboahantsika fa ten̈a raha maventy amintsika fanompoan̈antsika?

² Asa fitorian̈a io ten̈a raha maventy amintsika. Apostoly Paoly nampirisiky Timoty karaha ty: ‘Tandrema tsarabe fo ain̈inao ndreky fampiaran̈anao, fotony anao koa man̈ano zen̈y, ho voavonjinao ain̈inao ndreky olo jiaby mitandren̈y anao.’ (1 Tim. 4:16) Man̈avotro ain̈y asa fitorian̈a ataontsika io. Mitandrin̈y fo atsika aminy ain̈intsika, fotony atsika vahoakany Fanjakan̈any Zan̈ahary. Tiantsika han̈amia voninahitry Jehovah fo raha ataontsika. Tokony hifan̈araka aminy hafatra toriantsika baka fomba fiain̈anantsika. (Fil. 1:27) Akory ndraiky an̈aboahantsika fa ‘mitandrin̈y fampianaran̈antsika’ atsika? Man̈ano zen̈y atsika izikoa fa man̈oman̈a tsarabe avio mangataka fan̈ampiany Jehovah, alohany hanompo.

3. Mety han̈ano akory fihetsikinolo izikoa fa maharen̈y hafatra momba Fanjakan̈any Zan̈ahary? Man̈ameza ohatra.

³ Ndray efa man̈ano erakany farany tsara vitantsika atsika itorian̈a aminolo, mety mbala ho maro fo olo amy faritanintsika tsy han̈ahoa vaovao tsara momba Fanjakan̈a toriantsika io. Karaha zen̈y raha navoa Rahalahy Georg Lindal. Taminy 1929 firaka 1947, izy zaraiky fo nitory erany Islandy. Mandeha 10 000 isakany boky ndreky gazety napetrany, kanefa tsisy olo nandray nata araiky! Ty raha nisoratiny: “Olo sasany baka nanohitry fahamarin̈ana foeky, fa ny ankamarozany ndraiky tsy lian̈a.” Nisy misionera vo nahazo diplaominy Gileada koa navy  ta Islandy, nanompo tan̈y. Fa ndray zen̈y, efa sivy taon̈o tafara vo zay nisy olo nanokanten̈a tamy Jehovah ndreky natao batisa, ta Islandy. *

4. Mety ho ino raha tsapantsika, izikoa fa tsy jirenolo vaovao tsara toriantsika?

⁴ Dekorazy atsika izikoa fa tsy tihianatra Baiboly olo itoriantsika. Mety hitovy amy raha tsapany Paoly raha tsapantsika. ‘Nalahelo mare’ izy sady ‘niôry fo’, fotony tsy nikendro Jiosy aby io fa Jesosy ankitin̈y Mesia nampan̈antinain̈y. (Rom. 9:1-3) Akory ndraiky izikoa efa niezaka mare anao nan̈ampy pianatranao sady nivavaka momba izy, kanefa izy tsy nandroso foeky ke voatery najanon̈onao fianaran̈anany? Na akory izikoa anao tsiary nahavita nan̈ampy olo handroso firaka amy batisa? Tokony han̈ameloten̈a ma anao, ke hieritreritry fa tsy tahiany Jehovah foeky fanompoan̈anao? Ho hitantsika ato valiny fan̈ontanian̈a aroe aby ty: 1) Akory ahaizan̈a fa mahômby fanompoan̈anolo araiky? 2) Ino raha mila alaintsika onon̈o koa fa manompo?

5. Ino mahavy vokatra hitantsika amy fanompoan̈a mety tsy ho arakarakany antin̈aintsika?

⁵ Koran̈iny Baiboly fa olo araiky koa fa man̈ano sitrapôny Zan̈ahary, “raha jiaby ataony hahômby aby.” (Sal. 1:3) Kanefa, zen̈y tsy mivolan̈a fa zay raha ataontsika amy fanompoan̈a handeha ho azy aminy itiavantsika izy fo. Nan̈ino ma? ‘Maro raha manahiran̈a’ amy fiain̈ana, fotony samby tsy lavorary na atsika na olo itoriantsika. (Joba 14:1) Mety hisy olo koa ndraikindraiky han̈enjiky atsika na hisakana asa fitorian̈a ataontsika. (1 Kor. 16:9; 1 Tes. 2:18) Akory ahaizan̈a fa mahômby fahitany Jehovah fanompoan̈antsika? Handiniky toro lalan̈a sasany amy Baiboly ao atsika misy ahaizantsika valiny fan̈ontanian̈a zen̈y.

6. Akory ahaizan̈a fa mahômby fahitany Jehovah fanompoan̈antsika?

⁶ Hitany Jehovah ezakantsika ndreky fiaretan̈antsika. Ravoravo Jehovah mahita atsika mazoto mitory, na mandray olo na tsy mandray. Hainy baka fa, nohony fitiavantsika izy mahavy atsika man̈ano zen̈y. Karaha ty ho Paoly: “Zan̈ahary tsy mety han̈ano raha tsy marin̈y ke han̈adin̈a raha nataonaro ndreky fitiavan̈a naboakanaro taminy an̈aranany, tamy nikarakaranaro ndreky mbala ikarakaranaro iro olo masin̈y aby io.” (Heb. 6:10) Jehovah tsy mety han̈adin̈a ezakanao ndreky fitiavanao izy, ndray tsy nandroso firaka amy batisa olo nampianao. Ho tanteraka aminao raha nivolan̈iny Paoly tamy Kristianin̈y ta Korinto ty: ‘Tsy ho very bôriny foeky asa mare ataonaro amy Tompo.’​—1 Kor. 15:58.

7. Ino raha ianarantsika baka tamy raha nivolan̈iny apostoly Paoly?

⁷ An̈isany misionera niavaka mare apostoly Paoly. Nahavita namôron̈o fiangonan̈a  vaovao maro tamy tanàna isankarazany izy. Izikoa fa nisy olo nankaratsy izy sady nivolan̈a tsy nahay nampianatra izy, izy tsy nandany lera nijijy tamindro azovy aby olo nampiany hanjary kristianin̈y. Ty fo raha nambarany: ‘Zaho ny ten̈a nahavita be.’ (2 Kor. 11:23) Karaha Paoly, tsaraova fa ezakantsika ny raha ten̈a valera amy Jehovah.

8. Ino raha tsy mila adin̈antsika, atsika koa fa manompo?

⁸ Ravoravo Jehovah mahita atsika manompo izy. Jesosy nan̈iraka pianatranany 70 nitory mikasiky Fanjakan̈any Zan̈ahary. ‘Ravoravo’ iro koa fa tafimpody. Ty raha nivolan̈indro: ‘Zahay koa fa nampiasa an̈aran̈anao, nan̈eky zahay aby firaka amy demony.’ Nahitsiny Jesosy toetsain̈indro, ke ho izy: ‘Anaro aza ravoravo izikoa man̈eky anaro iro fan̈ahy ratsy aby io. Fa miravoravoa fotony avoasoratra andan̈itry an̈y an̈aran̈anaro.’ (Lioka 10:17-20) Hainy Jesosy fa tsy voatery han̈eky iro karaha zen̈y fo olo itoriandro. Ndray izy aby, tsy haintsika firy taminolo nitoriandro nanjary kristianin̈y ke! Nila nazava tamindro tsarabe fa tsy tokony hiankiny aminy amaraozanolo mitandren̈y iro haravoan̈andro. Tokony ho ravoravo iro, fotony mamparavoravo Jehovah ezakandro.

9. Izikoa dinihin̈y Galatianina 6:7-9, ino hatsaran̈a ho azontsika izikoa atsika tsy kivy fa mitory fo?

⁹ Izikoa atsika miaritry fo amy fanompoan̈a, atsika hahazo fiain̈ana mandrakizay. Atsika koa man̈ano erakany farany tsara vitantsika lera mitory vaovao tsara ndreky mampianatra, atsika namandraha ‘mamafy amy fan̈ahy.’ Karakory ma zen̈y? Mamafy amy fan̈ahy atsika, izikoa ambelantsika hiasa tsara amy fiain̈anantsika fan̈ahy masin̈iny Zan̈ahary. Izikoa atsika tsy ‘kajo’ na tsy ‘kivy’, Jehovah mampan̈anten̈a fa hamezany fiain̈ana mandrakizay atsika, ndray atsika tsy nahavita nan̈ampy olo firaka amy batisa.​—Vakia Galatianina 6:7-9.

10. Ino mahavy olo sasany mitandren̈y hafatra toriantsika, kanefa sasany tsy mijery?

¹⁰ Miankiny amy fônolo itoriantsika hahavy iro han̈eky na tsy han̈eky fahamarin̈ana. Nampiasa fan̈oharan̈a momba voandraha nafafy i Jesosy han̈azavan̈a zen̈y. Natsabo tamy tany isankarazany voandraha io, fa tamy tany tsara zaraiky fo nazahoan̈a vokatra. (Lioka 8:5-8) Nivolan̈a Jesosy fa karazan̈a tany aby io ivolan̈ana fônolo. Samby isany fihetsikinolo izikoa fa maharen̈y ‘volan̈a Zan̈ahary.’ (Lioka 8:11-15) Karaha ataony pambôly tsy afaka miforse voandraha io haniry malakilaky, atsika koa tsy afaka miforse olo han̈eky hafatra toriantsika. Anjarantsika manohy mambôly na mitory hafatra momba Fanjakan̈a io. Salakady apostoly Paoly lastio efa nivolan̈a fa ‘kila olo hahazo valisoanany, arakarakany raha nataony’, fa tsy arakarakany vokatrany asanany.​—1 Kor. 3:8.

11. Nan̈ino ma Jehovah ravoravo nahita Noa nazoto nitory, kanefa tsisy olo nitandren̈y izy nata araiky? (Zahava sary amy fon̈ony gazety ty.)

¹¹ Maro panompony Jehovah taloha tan̈y nitory fo, ndray olo nitoriandro tsy tihitandren̈y iro. Ohatra araiky amy zen̈y i Noa, ‘pitory fahamarin̈ana.’ Nitory fo izy tan̈atiny 40 na 50 taon̈o. (2 Pet. 2:5) Mety nan̈anten̈a hely izy oe hisy olo fo hitandren̈y hafatra nitoriany. Kanefa tsy zen̈y raha ho hisy ho Jehovah taminany. Karaha ty ho izy, Noa koa fa hiasa sambofiara: ‘Midira an̈atiny sambofiara ao anao, ndreky iry zanakanao, ndreky vadinao, avio iro vadiny zanakanao aby io.’ (Gen. 6:18) Jehovah koa fa nan̈ambara tamy Noa habezan̈any sambofiara io, mety efa haihainy Noa  fo fa tsy ho maro olo hitandren̈y hafatra toriany, fotony tsy tandry olo maro baka sambofiara io. (Gen. 6:15) Haintsika fa tsisy olo nitandren̈y hafatra nindesiny Noa. (Gen. 7:7) Ke fahitany Jehovah izy ma tsy nahômby fanompoan̈any Noa? Tsy zen̈y foeky! Ravoravo Jehovah nahita Noa nazoto nitory ndreky tsy nivadiky sady nan̈ano zay raha nampan̈anôviny izy.​—Gen. 6:22.

12. Ino raha nan̈ampy paminan̈y Jeremia ho ravoravo fo, ndray tsy nahoanolo hafatra nindesiny?

¹² Nitory tan̈atiny 40 taon̈o mandilatra paminan̈y Jeremia, kanefa olo aby io tsy nitandren̈y hafatra nindesiny. Sasany nanohitry foeky. ‘Tsy nasianolo fotiny ndreky nadroadroenolo’ izy ke nalemy trôko mare salakady efa tseky vôly nitory. (Jer. 20:8, 9) Ndray zen̈y, niezaka fo izy nanohy fanompoan̈anany. Ino raha nan̈ampy izy ho ravoravo fo? Misy raha aroe maventy tsy nadosony tamy jerinany. Voanalohany, hafatrany Zan̈ahary nindesiny io man̈ampy olo hanan̈a “hoavy tsara ndreky fan̈antinan̈a.” (Jer. 29:11) Faharoe, Jehovah lastio nifidy izy hitondra hafatranany tamy vahoaka. (Jer. 15:16) Mitondra hafatra feno fan̈antinan̈a aminolo amy donia ty koa atsika. Mitondra an̈aran̈any Jehovah koa atsika, fotony atsika Vavolombelon̈onany. Ho ravoravo fo atsika izikoa tsy adosontsika amy jerintsika raha aroe maventy io, na mitandren̈y olo na tsy mitandren̈y.

13. Ino raha ianarantsika baka amy fan̈oharan̈a nataony Jesosy amy Marka 4:26-29?

¹³ Mandeha tsihelihely fandrosoan̈a arapan̈ahy ataonolo. Mankamarin̈y zen̈y fan̈oharan̈a nataony Jesosy momba lelahy araiky namafy baka io nandry koa fa alin̈y. (Vakia Marka 4:26-29.) Nitombo tsihelihely voandraha nafafiny io. Pamafy io tsy afaka niforse raha io haniry malakilaky. Karaha zen̈y koa, mety ho elaela koa olo ampianarinao vo hampihatra raha nianarany. Atsika tsy afaka miforse olo ampianarintsika handroso malakilaky erakany itiavantsika izy. Ke aza rivan̈a izikoa elaela, tsy arakany iritriretanao izy, vo mandroso olo ampianao. Karaha ataony pambôly, mila maharidraha anao izikoa fa mampianatra olo.​—Jak. 5:7, 8.

14. Ino ohatra mety ahitan̈a fa mety hiambin̈y elaela atsika vo hahita olo hitandren̈y hafatra indesintsika?

¹⁴ Amy faritry sasany, antaon̈ony maro anao vo hahita olo handroso amy batisa zen̈y. Karaha zen̈y iziô Gladys ndreky Ruby Allen mirahavavy. Voatendry pisava lalan̈a maharitry tamy faritaniny Quebec a Kanada iro, tamy taon̈o 1959. * Maro taminolo tan̈y tsy von̈ono hitandren̈y hafatra momba Fanjakan̈a, fotony iro navozo fiarahamonin̈y ndreky pitondra fivavahan̈a. Karaha ty ho Gladys: “Nitory isaka tran̈o tan̈atiny valo lera isanandra zahay, fa tsisy olo nitandren̈y. Iro man̈aton̈o amy varavaran̈andro, fa iro koa fa mahita zahay, iro efa mimpody edy. Fa zahay tsy rivan̈a.” Niova tsihelihely fihetsikinolo, izikoa fa nandeha fotoan̈a. Sasany nanomboko nitandren̈y hafatra nitoriandro. Efa misy fiangonan̈a telo aby an̈y izioty!​—Isaia 60:22.

15. Ino raha ianarantsika baka amy 1 Korintianina 3:6, 7?

¹⁵ Asa fampianaran̈a io tsy vitanolo araiky. Olo tsiaraikiaraiky an̈ivony fiangonan̈a afaka man̈ampy pianatra Baiboly ho vita batisa. (Vakia 1 Korintianina 3:6, 7.) Ohatra, misy pitory araiky man̈apetraka trakty na gazety aminolo araiky lian̈a. Kanefa maletry mare programonany, ke nafindrany tamy pitory hafa fitsidihan̈anazy io. Pitory io baka tio nampianatra olo lian̈a in̈y. Mitondra naman̈a isankarazany izy koa fa mandeha mampianatra olo io. Samby afaka nankahery  pianatra io tamy fomba isankarazany na izy na iro naman̈a nindesiny nampianatra. Afaka man̈ampy pianatra io hanan̈a finoan̈a matanjaka aby rahalahy ndreky ranabavy tsiaraikiaraiky. Izikoa fa mandroso pianatra io ke hatao batisa, samby ravoravo aby pitory jiaby!​—Jaona 4:35-38.

16. Akory mety hahitanao haravoan̈a fo amy fanompoan̈a, ndray voafetra raha mety ho vitanao?

¹⁶ Izikoa anao tsy salama na efa mahaitsisy angovo, mety efa tsy hahavita be karaha taloha eky anao amy fanompoan̈a. Fa ndray zen̈y, mbala mety ho ravoravo fo anao amy zay raha vitanao aminy asa fijinjan̈a io. Aleva onon̈o baka raha niain̈any Davida ndreky olonany. Vady amanjanakandro ndreky rahandro jiaby niravainy Amalekita. Efa tsy nahavita niady eky iro 200 lahy tamy maramilany Davida, fotony iro lonja mare. Ke iro nirahiny Davida nidôko, niambin̈y entan̈andro. Davida ndreky olonany sasany ndraiky nandeha nan̈ian̈a iro Amalekita aby io. Resindro iro Amalekita aby io, sady maro raha valera nazondro baka tan̈y. Nirahiny Davida nirasain̈a miran̈a fo raha jiaby. Na iro nandeha lagera, na iro niambin̈y entan̈a samby nahazo anjara mitovy fo. (1 Sam. 30:21-25) Tsisy nihafa amy zen̈y koa raha misy, atsika koa fa mampianatra Baiboly. Mety efa tsy mahavita be eky anao koa fa mitory ndreky mampianatra. Anao koa mifen̈y mare man̈ano ny farany tsara vitanao, ho ravoravo anao isaka misy olo vaovao manjary mahay Jehovah ndreky hatao batisa.

17. Ino aby antony mety han̈anaovantsika mersy i Jehovah?

¹⁷ Mankasitraka Jehovah atsika fotony izy ten̈a tia atsika. Izy tsy mangataka raha tsy ho vitantsika. Hainy atsika tsy ho afaka hiforse olo hitandren̈y hafatra toriantsika. Ndray zen̈y, hamezany hatsaran̈a atsika fotony hitany ezakantsika ndreky fitiavantsika izy. Tiany ho ravoravo atsika amy zay raha vitantsika aminy asa fitorian̈a. (Jaona 14:12) Izikoa atsika tsy man̈eky ho resiny hakivian̈a, mahazo matoky atsika fa hahazo sitraka amy Jehovah fo atsika.