1. Mang fan nri gad ba felfelan’ ni gad boch e Pi Mich Rok Jehovah?

RI GAD ba felfelan’ ni gad boch e Pi Mich Rok Jehovah! Gad be fek fithingan Got ma gad be micheg ni gadad boch e pi mich rok, ni aram e gad be machibnag e girdi’ ma gad be fil murung’agen ngorad. Ba gel e felfelan’ ni gad ma tay u nap’an ni gad ra ayuweg be’ nib “munguy laniyan’ ma kub m’agan’ ngay ni nge fil e tin riyul’ nra yognag e yafos ndariy n’umngin nap’an ko girdi’” ni nge mang reb e tapigpig rok Got. (Acts 13:48, NW) Taareb rogon e lem rodad Jesus nri “felfelan’” u nap’an ni weliy pi gachalpen ngak angin e machib ni kar ted.​—Luke 10:1, 17, 21.

2. Uw rogon ni ngad daged nib ga’ fan fare maruwel ni machib u wan’dad?

² Rib ga’ fan fare maruwel ni machib u wan’dad. I pi’ apostal Paul e athamgil nga laniyan’ Timothy ni gaar: “Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’.” Ki ulul ngay ni gaar: “Faanra mu rin’ ma ga ra ayuwegem nge piin ni yad ma motoyil ngom.” (1 Tim. 4:16) Ere machib ni gad ma tay e ra ayuweg e yafos ko girdi’. Gad ma guy rogon ni nge puluw e ngongol rodad ya gad ba muun nga tan Gil’ilungun Got. Gubin ngiyal’ ni gad baadag ni ngad ngongolgad u reb e kanawo’ ni yira pining e sorok riy ngak Jehovah, mab puluw ko fare thin nib fel’ ni gad be machibnag. (Fil. 1:27) Ere faanra ud fal’eged rogodad nib fel’ rogon ni fan ko machib ma gad ning e ayuw ngak Jehovah u m’on ni nga darod ko machib, ma aram e gad be dag ni ‘gad be ayuweg rogon ni gad be weliy murung’agen e thin rok Got ngak e girdi’.’

3. Gur, urngin e girdi’ ni yad ra adag ni ngar motoyilgad ko fare thin nib fel’ ni murung’agen Gil’ilungun Got, fa? Mu weliy ban’en ni ke buch.

³ Yugu aram rogon ni gad ma athamgil u rogon nrayog rodad ni ngad machibnaged e girdi’, machane rayog ni boor e girdi’ ko gin gad ma machib riy ndubrad ni ngar motoyilgad ko fare thin nib fel’ ni murung’agen Gil’ilungun Got. Am lemnag e n’en ni buch rok Brother Georg Lindal ni i machib u Iceland ni yigoo ir  u nap’an e duw ni 1929 nge yan i mada’ ko 1947. Bokum biyu’ ken e babyor ni wereg ko girdi’, machane dariy bagayad ni mang reb e Pi Mich. I yoloy ni gaar: “Boch e girdi’ e ur togopuluwgad, ma boch e dubrad ni ngar motoyilgad.” Bay boch e walag ni kar mu’naged fare skul u Gilead nranod ngaram ni ngar pied e ayuw ko machib, machane boor e duw nra machibgad riy ma de yag ni ngar pirieged boor e girdi’ ni baadag e machib. Fin u tomuren mereb e duw, ma aram me ognag boch e girdi’ u Iceland yad ngak Jehovah ngar uned ko taufe. *

4. Faanra dabun e girdi’ ni ngar motoyilgad ko fare thin nib fel’, ma mang e rayog ni ngad lemnaged?

⁴ Faanra dabun e girdi’ ni ngar filed e Bible, ma ma kireban’dad. Rayog ni ngad lemgad ni bod Paul ‘nrib ga’ e kireban’ ni i tay, ma ri ba ga’ e amith’ ni i tay laniyan’ ni bochan e dabun e pi Jew ni nge mich u wan’rad ni Jesus e ir fare Messiah. (Rom. 9:1-3) Machane uw rogon ni faanra ri ga be athamgil ma ka ga be meybil ni fan ngak e en gimew be fil e Bible, machane der mon’og mab t’uf ni ngam talgow ko fol Bible? Fa reb e uw rogon ni faanra dariy be’ ni ke yag ni ngam ayuweg nge un ko taufe? Ere be yip’ fan nre n’ey e gur e kireb rom ma de m’agan’ Jehovah ko machib ni ga be tay, fa? Bay l’agruw e deer ni gad ra weliy e fulweg riy u lan e re article ney: (1) Mang e ra micheg ni bay angin e machib ni kad ted? (2) Mang e ba puluw ni ngad lemnaged u nap’an ni gad be machibnag e girdi’?

5. Mang fan ni gathi gubin ngiyal’ ni ma yan i aw urngin ban’en ni gad ma rin’ ni fan ngak Jehovah nga rogon ni kad lemnaged?

⁵ Be weliy e Bible murung’agen be’ ni ma rin’ e tin nib m’agan’ Got ngay ni be gaar: “Urngin e tin ni ma ngongliy e ma yan i aw nib fel’.” (Ps. 1:3) Machane re n’ey e gathi be yip’ fan ni urngin ban’en ni gad ra rin’ ni fan ngak Jehovah nra yan i aw nga rogon ni kad lemnaged. Yafos rodad e ba “sug ko oloboch” ni bochan e dawor da flontgad. (Job 14:1, BT) Maku reb e, piin yad ma togopuluw ngodad e bay yu ngiyal’ nrayog ni ngar taleged gadad ndab kud machibgad ni bod rogon ni gad ma rin’. (1 Kor. 16:9; 1 Thess. 2:18) Ere uw rogon ni ma dugliy Jehovah ni bay angin e machib ni kad ted? Am lemnag boch i kenggin e motochiyel nra ayuwegdad ni ngad nanged e fulweg ko re deer ney.

6. Uw rogon ni ma dugliy Jehovah rogon angin e maruwel ni gad ma rin’ ni fan ngak?

⁶ Jehovah e ma yaliy gelngin e maruwel nge athamgil ni gad ma tay. Mus ni faanra dabi motoyil e girdi’ ngodad, machane ba felfelan’ Jehovah ko machib ni gad be tay u fithik’ e pasig ni bochan e ba t’uf rodad. I yoloy Paul ni gaar: “Got e gathi ba laniyan’. Gathi bayi pag talin e maruwel ni kam ngongliyed, ara rogon nib t’uf romed ni kam daged ni bochan e ayuw ni kam pied ma ki gimed be pi’ ngak e piin ni gimed ni girdien Kristus.” (Heb. 6:10) Jehovah e dabi pagtalin e maruwel ni kad rin’ed nge t’ufeg ni kad daged ni yugu aram rogon ndariy be’ ni ke  yag ni ngad filed e Bible ngak ke un ko taufe. Ere demtrug ko ke yib angin e maruwel ni kam rin’ ni bod rogon nim lemnag fa danga’, machane bay rogon ngom fapi thin ni yog Paul ngak piyu Korinth ni faani gaar: “Maruwel romed ni fan ngak Somol . . . e gathi ra yan i aw nib m’ay fan.”​—1 Kor. 15:58.

7. Mang e rayog ni ngad filed ko n’en ni yog apostal Paul u murung’agen e machib ni i tay?

⁷ Apostal Paul e ir reb e tamachib nib salap ma boor e ulung ni i sunmiy u lan e pi binaw ni i yan riy. Machane nap’an nni gathibthibnag ni yibe yog ni gathi ir reb e tamachib nib manigil, ma de weliy murung’agen urngin e girdi’ ni ke ayuwegrad kar manged Kristiano, ya yoloy ni gaar: “Kab gel e maruwel ni kug tay ko maruwel ni kar tiyed.” (2 Kor. 11:23) Ere dab da paged talin ni Jehovah e ba ga’ fan u wan’ e maruwel nib gel nge athamgil ni gad ma tay ni bod ni rin’ Paul.

8. Mang e susun ndab da paged talin u murung’agen e machib ni gad ma tay?

⁸ Ma felfelan’ Jehovah ko machib ni gad ma tay. I l’og Jesus 70 i gachalpen ni nga ranod ra machibnaged murung’agen Gil’ilungun, ma nap’an nra sulod ma “kar felan’gad.” Mang fan? Rogned ni lungurad: “Mus ko pi moonyan’ ma ra folgad romad ni faani gogned ngorad u fithingam e tin ni ngar rin’ed!” Machane me yal’uweg Jesus rogon e lem rorad u nap’an ni yog ni gaar: “Dabi felan’med ni fan e be fol e pi moonyan’ romed; machane nge felan’med ni fan e kan yoloy fithingmed nga babyor u tharmiy.” (Luke 10:17-20) Manang Jesus ni gathi gubin ngiyal’ nra motoyil e girdi’ ngorad u nap’an e machib. Bin riyul’ riy e, dad nanged ko uw urngin e pi girdi’ nem nra motoyilgad e ra manged boch e Kristiano. Ere ba t’uf ni ngar nanged ni felfelan’ nra yib ngorad e gathi be yan u rogon e piin nra motoyil ngorad, ya yad ra felfelan’ ni faanra yad manang nib m’agan’ Jehovah ko maruwel nib gel ni yad be rin’.

9. Mang e ra yag ngodad ni faanra dab da talgad ko machib nrogon ni be yog e Galatia 6:7-9?

⁹ Faanra dab da talgad ko machib, ma ra yag e yafos ni manemus ngodad. Faan gad ra athamgil u rogon nrayog rodad ni ngad machibgad ma gad be fil fare thin nib fel’ ko girdi’, maku aram e gad be ‘yung ban’en’ ni fan nga gelngin Got nib thothup ni bochan e gad be pag ni nge maruwel u lan e yafos rodad. Ere faanra “dabi chalbadad” ko machib, ma ke micheg Jehovah nra yag e yafos ni manemus ngodad ni yugu aram rogon nde yag ni ngad ayuweged be’ ni nge un ko taufe.​—Mu beeg e Galatia 6:7-9.

10. Mang fan ni boch e girdi’ e yad ma motoyil ngodad u nap’an e machib ma boch e danga’?

¹⁰ N’en bay u gum’irchaen e girdi’ e aram e n’en nra dugliy ko yad ra motoyil fa danga’. I weliy Jesus e re n’ey ko fare fanathin rok ni murung’agen be’ ni wereg e awoch nga daken e but’ nib thilthil, ma yigoo tin baaram ni wer nga daken e but’ nib yong’ol e ir e tugul nge yib wom’engin. (Luke 8:5-8) I yog Jesus ni fapi but’ nib thilthil e be yip’ fan e girdi’ nib thilthil e n’en yad ra rin’ u nap’an yad ra rung’ag e “thin rok Got.” (Luke 8:11-15) Dabiyog ni ngad gagiyegnaged rogon ni be ilal e tin riyul’ u gum’irchaen e piin gad be machibnag ni bod faen ni yung e awoch. Kemus ni n’en nib milfan ngodad e ngad ululgad i wereg awochngin e tin riyul’. I yog apostal Paul nra be’ ma yira ‘pi’ puluwon ni be yan u rogon e maruwel ni tay,’ ma gathi rogon angin.​—1 Kor. 3:8.

11. Mang fan nib fel’ u wan’ Jehovah e machib ni tay Noah ni yugu aram rogon ndariy be’ ni motoyil ngak? (Mu guy e sasing ni bay u wuru’ e re ke babyor ney.)

¹¹ Kab kakrom i yib ni boor e tapigpig rok Jehovah ni ur machibnaged e girdi’ ndubrad ni ngar motoyilgad. Bod ni Noah e boor e duw “ni i machibnag e tin nib mat’aw” riy. (2 Pet. 2:5)  Dariy e maruwar riy ni i athapeg ni nge motoyil e girdi’ ngak, machane de yog Jehovah nra buch e re n’ey. Ya nap’an ni yog ngak ni nge ngongliy fare arke, ma aram me gaar: “Ngam man nga lan e re barkow nem ni gimew leengim, nge pi fakmew ni pumoon, nge pi leengirad.” (Gen. 6:18) Maku reb e nap’an ni yog Jehovah ga’ngin e re arke nem ni nge ngongliy, ma rayog ni nang ni gathi ri boor e girdi’ ni yad ra motoyil ni bochan e dab ra tawgad nga lan e re arke nem. (Gen. 6:15) Bin riyul’ riy e, dariy be’ ni motoyil ngak Noah. (Gen. 7:7) Ere gur, i lemnag Jehovah nde fel’ rogon e machib ni tay Noah? Danga’! Ri felfelan’ Jehovah ngak Noah ni bochan e rin’ urngin e tin ni yog ngak ni nge rin’ u fithik’ e yul’yul’.​—Gen. 6:22.

12. Uw rogon ni yag ni nge par Jeremiah ni profet nib felfelan’ ko machib ni be tay ni yugu aram rogon nder motoyil e girdi’ maku yad be togopuluw ngak?

¹² Mus ngak Jeremiah ni profet ni kub pag 40 e duw ni i machib ni yugu aram rogon nder motoyil e girdi’ maku yad be togopuluw ngak. Bochan ni un ‘minmin ngak ma yibe moningnag,’ ma aram me mulan’ me lemnag ni nge tal ko machib ni be tay. (Jer. 20:8, 9) Yugu aram rogon, ma de tal Jeremiah ko machib ni i tay! Ere mang e ayuweg ni nge ulul ko machib ni be tay u fithik’ e felfelan’? I tiyan’ nga l’agruw ban’en nib ga’ fan. Bin som’on e, thin rok Got ni i weliy ko girdi’ e bay rogon nga “ban’en nib manigil ni bay nga m’on nrayog ni ngan athapeg.” (Jer. 29:11, NW) Bin migid e, ke mel’eg Jehovah Jeremiah ni nge weliy e thin rok ko girdi’. (Jer. 15:16) Ku arrogodad ni gad be fek ba thin i yan ko girdi’ nra pi’ e athap ngorad, ma gad be weliy fithingan Jehovah ni gadad e Pi Mich rok. Faan gad ra tedan’dad ko gali n’ey, ma aram e rayog ni ngad pared ni gad ba felfelan’ ni yugu demtrug ko be motoyil e girdi’ ngodad fa danga’.

13. Mang e gad be fil ko fare fanathin rok Jesus ni bay ko Mark 4:26-29?

¹³ Ba n’uw nap’an mfini yag ni nge gel e michan’ rok be’. Ireray e n’en ni weliy Jesus u lan fare fanathin rok ni murung’agen be’ ni wereg e awoch me yan i mol. (Mu beeg e Mark 4:26-29.) Tomuren ni yung fapi awoch ma aram mi i ilal ni buchuuw ma buchuuw, ma dabiyog ni nge gagiyegnag payngin ni be ilal. Ere ku arrogom nrayog nib t’uf ni ngam son u lan ba ngiyal’ nib n’uw nap’an mfini yag ni ngam guy ni be fol e en gimew be fil e Bible ko tin be fil. Dabiyog ni nge gagiyegnag reb e tamilay’ payngin ni be ilal e woldug rok, ere ku arrogodad ndabiyog ni ngad gagiyegnaged ni nge gel e michan’ rok e en gad be fil e Bible ngak u payngin ni gad baadag. Ere faanra ke n’uw nap’an ma ga be guy nder mon’og, ma dabi mulan’um. Ba t’uf ni ngad gum’an’gad ngad sonnaged e en gad be fil e Bible ngak ni nge dugliy ni nge pigpig ngak Jehovah ni bod fare tamilay’.​—Jas. 5:7, 8. 

14. Mang ban’en ni ke buch ni be dag nrayog nib n’uw nap’an mfini tabab e girdi’ ni ngar motoyilgad ngodad?

¹⁴ Bay boch e binaw ni yima machib riy nib n’uw nap’an mfini un be’ ko taufe. Am lemnag e n’en ni buch rok Gladys nge Ruby Allen ni l’agruw i ppin ni yow walag nni pi’row nga Quebec u Canada ko duw ni 1959 ni ngar pigpiggow u rom ni yow l’agruw e regular pioneer. * Boor e girdi’ u rom nda ur motoyilgad ni bochan e yad be rus ko n’en nra rin’ ara yog e girdi’ ko binaw rorad nge pi padrey ni faan yad ra non ko Pi Mich. I yog Gladys ni gaar: “Ra reb e rran ma meruk e awa ni kug machibgow riy u mit e tabinaw, ma dariy be’ ni non ngomow u lan l’agruw e duw! Nap’an nra yib e girdi’ ko mab nra guyed ni gamow, mi yad pi’ keru’rad ngar sulod nga naun. Machane de mulan’mow.” Munmun me munguy lanin’rad, ma aram mar tababgad ni ngaur motoyilgad. Chiney e dalip e ulung rodad ni bay ko re binaw nem.​—Isa. 60:22.

15. Mang e be fil e 1 Korinth 3:6, 7 ngodad u murung’agen rogon ni yima ayuweg be’ ni nge mang reb i gachalpen Jesus?

 ¹⁵ Ba t’uf boor e girdi’ ni ngar ayuweged be’ ni nge mang reb i gachalpen Jesus. Gubin e girdi’ u lan e ulung nrayog ni ngar ayuweged be’ nge yag ni un ko taufe. (Mu beeg e 1 Korinth 3:6, 7.) Bod nrayog ni nge pi’ reb e walag reb e tract ara magazine ngak be’ ni baadag e machib. Machane dabiyog ni nge sul nge guy facha’ ko ngiyal’ ni ke yog, ma aram me yog ngak yugu reb e walag ni nge mang ir e sul nge guy. Tomuren ma aram me tabab fare walag i fil e Bible ngak. Bayi n’en ma ma pining boch e walag u lan e ulung ni ngar uned ngak ko ngiyal’ ni ngar filew facha’ e Bible, ma ra bagayad e pi walag ney mab thilthil rogon ni ke yag ni nge pi’ e athamgil nga laniyan’ facha’ ni be fil e Bible. Gubin e walag ni yad ra mada’ faen be fil e Bible nrayog ni ngar ayuweged ni nge gel e michan’ rok ngak Jehovah. Aram rogon nrayog ni nge felfelan’ urngin e piin kar maruwelgad u taabang ni ngar ayuweged be’ u nap’an nra un ko taufe.​—John 4:35-38.

16. Mang fan nrayog ni ngam felfelan’ ko machib ni ga be tay ni yugu aram rogon ni kam m’ar ara kam meewar?

¹⁶ Machane uw rogon ni faanra dabkiyog ni ngam machib ni bod kafram ni bochan e kam m’ar ara kam meewar? Ka rayog ni ngam felfelan’ ko tin be yag ni ngam rin’. Am lemnag e n’en ni rin’ David ni Pilung nge fapi pumoon ni yad be un ngak u nap’an nranod ra sulweged chon e tabinaw rorad nge chugum rorad ni ke iring e pi Amalekite. Immoy l’agruw miriay ko pi salthaw nem ndaki yag ni ngar uned ko cham ya ke aw parowrad. Ere nni tayrad ni ngar matanagiyed e chugum. Tomuren ni gel David nge tin baaram e salthaw rok ko mahl, ma aram me yog ni gubin e girdi’ ni ngan pi’ e f’oth rorad ni taareb rogon. (1 Sam. 30:21-25) Ere ku arrogon fare maruwel ni machib ni gad be rin’ u ga’ngin yang e fayleng. Urngin e piin yad be rin’ e tin rayog rorad ni fan ko re maruwel ney e rayog ni ngar uned ko felfelan’ ni yira tay u nap’an nra fil be’ murung’agen Jehovah me un ko taufe.

17. Mang e susun ni ngad pininged e magar riy ngak Jehovah?

¹⁷ Gad be pining e magar ngak Jehovah u rogon ni ma lemnag e pigpig ni gad ma tay ngak. Manang ndabiyog ni ngad towasariyed e girdi’ ni ngar motoyilgad ngodad ara ra liyorgad ngak. Yugu aram rogon ma ma guy gelngin e maruwel ni gad ma tay, nge gelngin nrib t’uf rodad, ma ma tow’athnagdad. Ku ma fil ngodad rogon ni ngad felfelan’gad ko tin be yag ni ngad rin’ed ni fan ko fare maruwel ni machib. (John 14:12) Rayog ni nge pagan’dad nra felfelan’ Got ngodad ni faanra dabi mulan’dad!