1. ¿Baʼax beetik u kiʼimaktal k-óol?

¿MÁASAʼ kiʼimak k-óol tumen u testigoʼon Jéeoba? Toʼoneʼ k-tsʼáaik kʼaj óoltbil u kʼaabaʼ Dios yéetel k-eʼesik u Testigoʼon le kéen kʼaʼaytajnakoʼon bey xan le kéen k-kaʼans uláakʼ máakoʼob. Kiʼimak k-óol k-áantik u meyajt Jéeoba «le máaxoʼob jach tu jaajil u [...] kʼáat u kʼamoʼob le kuxtal minaʼan u xuuloʼ» (Hech. 13:48). Toʼoneʼ k-uʼuyikba jeʼex tu yuʼubiluba Jesúseʼ. Letiʼeʼ jach kiʼimakchaj u yóol le ka tsikbaltaʼabtiʼ tumen u discípuloʼob bix úuchik u bintiʼob teʼ kʼaʼaytajoʼ (Luc. 10:1, 17, 21).

2. ¿Bix k-eʼesik kʼaʼanaʼan k-ilik le kʼaʼaytajoʼ?

² Toʼoneʼ jach kʼaʼanaʼan k-ilik le kʼaʼaytajoʼ. Úuchjeakileʼ apóstol Pabloeʼ tu yaʼalaj tiʼ Timoteo: «Maʼ u xuʼulul a kanáantkaba yéetel mantatsʼ jach kanáant baʼax ka kaʼansik. [...] Tumen beyoʼ yaan a salvarkaba bey xan le máaxoʼob chʼenxikintikechoʼ» (1 Tim. 4:16). Le tʼaanoʼobaʼ ku yeʼesiktoʼon baʼaxten jach kʼaʼanaʼan le kʼaʼaytajoʼ. Le oʼolal toʼoneʼ jach k-kanáantik bix k-kuxtal tumen taak k-eʼesik táan k-apoyartik u Reino Dios. K-kʼáat xaneʼ tuláakal baʼax k-beetkeʼ ka u beet u alabartaʼal Jéeoba yéetel ka u yeʼes jach tu jaajil k-creertik le baʼax k-kʼaʼaytikoʼ (Fili. 1:27). Ku tsʼoʼokoleʼ utiaʼal k-kaʼansaj maʼalobeʼ k-preparartikba tubeel utiaʼal k-jóokʼol kʼaʼaytaj yéetel k-kʼáatik u yáantaj Jéeoba.

3. ¿Yaan kʼiineʼ baʼax ku beetik le máakoʼob le kéen u yuʼuboʼob le baʼax k-kʼaʼaytikoʼ, yéetel baʼax eʼesik bey u beetkoʼoboʼ?

³ Chéen baʼaleʼ kex k-tsʼáaik k-óol teʼ kʼaʼaytajoʼ yaan kʼiineʼ le máakoʼoboʼ maʼatech u kʼamkoʼob. Koʼoneʼex ilik baʼax úuch tiʼ sukuʼun Georg Lindal, letiʼeʼ kʼaʼaytajnaj tu luʼumil Islandia desde 1929 tak 1947. Ku tsʼoʼokoleʼ tu pʼataj u milesil publicaciónoʼob tiʼ le máakoʼoboʼ, chéen baʼaleʼ mix juntúul tu beetuba u testigo Jéeobaiʼ. Letiʼeʼ tu tsʼíibtaj: «Yaan jujuntúul máakoʼob tsʼoʼok u tsʼáaikubaʼob tu contra u jaajil, chéen baʼaleʼ u maas yaʼabileʼ mix tu interesartiʼob». Le ka tsʼoʼokeʼ kʼuch misioneroʼob kʼaʼaytaj teʼeloʼ chéen baʼaleʼ le máakoʼoboʼ láayliʼ bey u  tuukuloʼoboʼ, pʼis máanik nueve añoseʼ jujuntúul máakoʼob túuneʼ tu kʼubaj u kuxtaloʼob tiʼ Jéeobaeʼ ka okjaʼanajoʼob. *

4. ¿Bix k-uʼuyikba wa le máakoʼob maʼ tu kʼamkoʼob le baʼax k-kʼaʼaytikoʼ?

⁴ Wa le máakoʼob maʼ tu kʼamkoʼob le baʼax k-kʼaʼaytikoʼ maʼ xaaneʼ jeʼel u lúubul k-óol jeʼex úuchik tiʼ apóstol Pabloeʼ. Letiʼeʼ tu yaʼaleʼ jach ‹triste yéetel mantatsʼ yaachajaʼan u yóol u puksiʼikʼal› kaʼachi, tumen le judíoʼoboʼ maʼ tu yóotaj u kʼamoʼob wa Jesúseʼ letiʼe Mesías aʼalaʼan kun taaloʼ (Rom. 9:1-3). ¿Máasaʼ bey k-uʼuyikba wa k-tsʼaamaj k-óol k-áant juntúul máak, k-orar tu yoʼolal, chéen baʼaleʼ tumen maʼ tu progresareʼ ku kʼaʼabéettal u xuʼulul k-tsʼáaik xook tiʼ? ¿Kux túun wa maʼ béeyak k-áantik juntúul máak utiaʼal ka okjaʼanakiʼ? ¿Unaj wa k-uʼuyik yaan baʼax maʼ maʼalob táan k-beetkiʼ wa k-tuklik maʼ táan u bendecirtaʼal le meyaj k-beetik tumen Jéeobaoʼ? Teʼ xookaʼ yaan u núukaʼal le kaʼapʼéel kʼáatchiʼobaʼ: ¿Bix jeʼel k-ojéeltik táan k-beetik junpʼéel maʼalob meyaj tu táan Jéeobaeʼ? ¿Baʼax maʼ unaj u tuʼubultoʼon kéen jóokʼkoʼon kʼaʼaytajiʼ?

5. Le táan k-meyajtik Jéeobaoʼ, ¿baʼaxten k-ojel maʼ kun jóokʼol tuláakal baʼal jeʼex k-kʼáateʼ?

⁵ Le Bibliaoʼ ku yaʼalikeʼ juntúul máak ku beetik baʼax uts tu tʼaan Dioseʼ ku jóokʼol maʼalobil tuláakal baʼax ku beetik (Sal. 1:3). ¿U kʼáat wa u yaʼal leloʼ tuláakal baʼax k-beetik yoʼolal Jéeobaeʼ yaan u jóokʼol jeʼex k-kʼáateʼ? Maʼatech, maʼ u tuʼubultoʼoneʼ tuláakloʼon kʼebanoʼon yéetel k-kuxtaleʼ «chuup yéetel problemas» (Job 14:1). Ku tsʼoʼokoleʼ le máaxoʼob pʼekmiloʼonoʼ jeʼel u prohibirkoʼob le kʼaʼaytaj k-beetkoʼ (1 Cor. 16:9; 1 Tes. 2:18). Le oʼolaleʼ, ¿baʼax ku chʼaʼik en cuenta Jéeoba utiaʼal u yilik wa táan k-beetik junpʼéel maʼalob meyaj? Koʼoneʼex ilik jujunpʼéel baʼax ku yaʼalik le Biblia utiaʼal k-núukik le kʼáatchiʼaʼ.

6. ¿Baʼax ku chʼaʼik en cuenta Jéeoba utiaʼal u yilik wa táan k-beetik junpʼéel maʼalob meyaj?

⁶ Jéeobaeʼ ku yilik bix u chúukpajal k-óol yéetel bix k-tsʼáaik k-óol teʼ kʼaʼaytajoʼ. Tu táan letiʼeʼ táan k-beetik junpʼéel maʼalob meyaj wa k-tsʼáaik k-óol kʼaʼaytaj yéetel k-beetik tumen k-yaabiltmaj. Pabloeʼ tu yaʼalaj: «Dioseʼ maʼ kʼasaʼan utiaʼal ka u tuʼubs le meyaj ta beeteʼexoʼ mix le yaabilaj ta weʼeseʼex tu yoʼolal u kʼaabaʼoʼ, tumen teʼexeʼ ta wáanteʼex le máaxoʼob santoʼoboʼ yéetel láayliʼ táan a wáantkeʼexoʼobeʼ» (Heb. 6:10). Jeʼex k-ilkoʼ Jéeobaeʼ mix bikʼin ken u tuʼubs bix k-tsʼáaik k-óol kʼaʼaytaj yéetel bix úuchik k-eʼesik yaabilaj yoʼolal u kʼaabaʼ, kex yaan kʼiin maʼ tu kʼamik le máakoʼob le baʼax k-kʼaʼaytikoʼ. Yéetel maʼ u tuʼubultoʼon le baʼax tu yaʼalaj le apóstol Pablo tiʼ le cristianoʼob yanoʼob Corintooʼ: «Maʼ chéen kunel le baʼaxoʼob ka beetkeʼex ikil a meyajtikeʼex Yuumtsiloʼ» (1 Cor. 15:58). Leloʼ ku yeʼesiktoʼoneʼ kex maʼ u jóokʼol le kʼaʼaytaj jeʼex k-páaʼtikoʼ maʼ chéen kunel le baʼax k-beetkoʼ.

7. ¿Baʼax k-kanik tiʼ Pablo?

 ⁷ Le apóstol Pablooʼ jach tu tsʼáaj u yóol u beet u misioneroil yéetel tu káajsaj yaʼab múuchʼuliloʼob. Kex beyoʼ le ka joʼopʼ u yaʼalaʼal maʼ maʼalob u kaʼansajeʼ letiʼeʼ maʼ tu chʼaʼchiʼitaj u kʼaabaʼ le máaxoʼob tu yáantaj utiaʼal ka okjaʼanakoʼoboʼ, baʼaxeʼ chéen tu yaʼalaj: «Maas yaʼab baʼaloʼob tsʼoʼok in beetik» (2 Cor. 11:23). Toʼon xaneʼ unaj k-beetik jeʼex le apóstol Pablooʼ, yéetel maʼ u tuʼubultoʼoneʼ le baʼax maas kʼaʼanaʼan tu táan Jéeobaoʼ letiʼe u chúukpajal k-óoloʼ yéetel k-tsʼáaik k-óol teʼ kʼaʼaytajoʼ.

8. ¿Baʼax unaj k-kʼaʼajsik le táan k-kʼaʼaytajoʼ?

⁸ Le kʼaʼaytaj k-beetkoʼ ku kiʼimakkúuntik u yóol Jéeoba. Juntéenjeakileʼ Jesúseʼ tu túuxtaj 70 discípuloʼob u kʼaʼaytoʼob le Reinooʼ. Le ka tsʼoʼokeʼ kiʼimak u yóoloʼob ka suunajoʼob. ¿Baʼaxten? Letiʼobeʼ tu yaʼaloʼob: «Tak le demonioʼob beetik baʼax k-aʼalik kéen meyajnaktoʼon a kʼaabaʼoʼ». Chéen baʼaleʼ aʼalaʼabtiʼob tumen Jesús: «Maʼ u kiʼimaktal a wóoleʼex ikil u beetaʼal baʼax ka waʼalikeʼex tumen le demonioʼoboʼ, baʼaxeʼ kiʼimakchajak a wóoleʼex tumen tsʼoʼok u tsʼíibtaʼal a kʼaabaʼex teʼ kaʼanoʼ» (Luc. 10:17-20). Jesúseʼ u yojel kaʼacheʼ maʼ mantatsʼ kun chʼenxikintbiloʼob tumen le máakoʼoboʼ, jeʼex teʼ kʼiin jeʼeloʼ u jaajileʼ maʼ k-ojel jaytúul máakoʼob tu beetubaʼob discípuloʼob tu yoʼolal le kʼaʼaytaj tu beetoʼoboʼ. Le oʼolal u discípuloʼob Jesúseʼ maas unaj kaʼach u kiʼimaktal u yóoloʼob tumen táan u beetkoʼob baʼax uts tu tʼaan Jéeoba maʼ tumen chʼenxikintaʼaboʼob tumen le máakoʼoboʼ.

9. Jeʼex u yaʼalik Gálatas 6:7-9, ¿baʼax kun úuchul wa maʼ tu xuʼulul k-kʼaʼaytaj?

⁹ Le kéen k-tsʼáa k-óol kʼaʼaytaj yéetel kaʼansajeʼ táan k-chaʼik u nuʼuktikoʼon u espíritu santo Dios. «Wa maʼ t-kaʼanleʼ» Jéeobaeʼ yaan u tsʼáaiktoʼon kuxtal minaʼan u xuul kex maʼ u béeytal k-áantik juntúul máak utiaʼal ka okjaʼanak (xok Gálatas 6:7-9).

10. ¿Baʼaxten yaan máaxoʼob kʼamik le kʼaʼaytaj k-beetkoʼ yéetel yaan máaxoʼob maʼatech?

¹⁰ Según baʼax yaan tu puksiʼikʼal le máakoʼoboʼ ku kʼamkoʼob le kʼaʼaytajoʼ wa maʼ. Jesúseʼ bey úuchik u yeʼesik yoʼolal junpʼéel baʼax tu tsikbaltoʼ. Letiʼeʼ tu yaʼaleʼ juntúul máakeʼ tu pakʼaj semillaʼob tiʼ jejeláas luʼumoʼob, chéen baʼaleʼ chéen tu tsʼáaj u yich le semillaʼob lúuboʼob tiʼ maʼalob luʼumoʼ (Luc. 8:5-8). Jesúseʼ tu yaʼaleʼ le jejeláas luʼumoʼoboʼ ku chíikbesik u puksiʼikʼal le máakoʼoboʼ. Letiʼob xaneʼ jejeláas baʼax ku beetkoʼob kéen tsikbaltaʼaktiʼob «u tʼaan Dios» (Luc. 8:11-15). Jeʼex le máax ku paakʼaloʼ toʼon xaneʼ maʼ tu páajtal k-beetik u nojochtal le semilla t-pakʼaj tu puksiʼikʼal le máakoʼoboʼ, chéen baʼax ku páajtal k-beetkeʼ u seguer k-pakʼik u semillail le Reinooʼ. Jeʼex tu yaʼalil le apóstol Pablooʼ «cada juntúuleʼ yaan u kʼamik u boʼolil yoʼolal le meyaj tu beetoʼ», maʼ yoʼolal u yich le meyaj ku beetkoʼ (1 Cor. 3:8).

11. ¿Baʼaxten jeʼel u páajtal k-aʼalikeʼ Noéeʼ tu beetaj maʼalob le baʼax kʼubéentaʼabtiʼoʼ? (Ilawil le dibujo yaan tu yáax páginail le revistaaʼ).

¹¹ Desde úuchjeakileʼ le máaxoʼob meyajtik Jéeobaoʼ tsʼoʼok u kʼaʼaytajoʼob tiʼ máakoʼob maʼ taak u yuʼubikoʼob le baʼax ku tsikbaltikoʼoboʼ. Jeʼex Noéeʼ yaʼab años táan kaʼach u kʼaʼaytik «unaj u bisik máak junpʼéel toj kuxtal» (2 Ped. 2:5). Letiʼeʼ u kʼáat wal kaʼach ka chʼenxikintaʼak le baʼax ku yaʼalikoʼ, chéen baʼaleʼ Jéeobaeʼ mix juntéen tu yaʼalaj wa bey kun úuchloʼ, baʼaxeʼ le ka tu beetaj le arcaoʼ hasta tu yaʼalajtiʼ: «Teech túuneʼ kʼaʼabéet a wokol ichil le arcaoʼ bey xan a hijoʼob, a watan yéetel a wiliboʼob» (Gén. 6:18). Tsʼoʼoleʼ le ka aʼalaʼabtiʼ bukaʼaj nojchil ken  u beetil le arcaoʼ maʼ xaaneʼ Noéeʼ tu tsʼáaj cuenta chéen junpʼíit máakoʼob kun chʼenxikintik (Gén. 6:15). Jach bey úuchik xanoʼ tumen mix juntúul tiʼ le kʼasaʼan máakoʼob tu chʼenxikintoʼob le baʼax tu yaʼalaj Noéoʼ (Gén. 7:7). ¿Tu tuklaj wa Jéeoba maʼ maʼalob le bix úuchik u kʼaʼaytaj Noéoʼ? Maʼatech, tu táan Jéeobaeʼ, Noéeʼ tu beetaj junpʼéel maʼalob meyaj tumen chúukpaj u yóol u beet tuláakal baʼax aʼalaʼabtiʼ (Gén. 6:22).

12. ¿Baʼax áant Jeremías utiaʼal u kiʼimaktal u yóol kʼaʼaytaj kex maʼ uts tu tʼaan le máakoʼoboʼ?

¹² Profeta Jeremías xaneʼ máan años táan u kʼaʼaytaj tiʼ máakoʼob maʼ uts tu tʼaanoʼob le baʼax ku kʼaʼaytikoʼ. Letiʼeʼ lúub u yóol úuchik u yaʼalaʼal baʼal tiʼeʼ ka tu tuklaj tak u xuʼulul u beetik le baʼax kʼubéentaʼabtiʼ tumen Diosoʼ (Jer. 20:8, 9). ¿Baʼax áant utiaʼal u líikʼil u yóol yéetel utiaʼal u kiʼimaktal u yóol le táan u kʼaʼaytajoʼ? Kaʼapʼéel baʼal. Yáaxeʼ, u kʼaʼajsikeʼ le baʼax ku tsikbaltikoʼ jeʼel u tsʼáaik esperanza tiʼ le máakoʼoboʼ (Jer. 29:11). U kaʼapʼéeleʼ, Jéeoba yéeymil utiaʼal u tʼaan tu yoʼolal (Jer. 15:16). Teʼ kʼiinoʼob xanaʼ le baʼax k-kʼaʼaytikoʼ jeʼel u tsʼáaik esperanza tiʼ le máakoʼoboʼ, yéetel maʼ u tuʼubultoʼoneʼ táan k-bisik u kʼaabaʼ Jéeoba. Wa k-tuukul tiʼ le kaʼapʼéel baʼaloʼobaʼ yaan u kiʼimaktal k-óol k-kʼaʼaytaj kex maʼ uts tu tʼaan le máakoʼoboʼ.

13. ¿Baʼax ku kaʼansiktoʼon le kettʼaan tu yaʼalaj Jesús tsʼíibtaʼan teʼ Marcos 4:26-29?

¹³ Ku bisik tiempo u muʼukʼaʼantal u fe máak. Lelaʼ bey úuchik u kaʼansik Jesús yéetel junpʼéel kettʼaan tu tsikbaltaj (xok Marcos 4:26-29). Letiʼeʼ tu yaʼaleʼ juntúul máakeʼ paakʼalnajeʼ ku tsʼoʼokoleʼ ka bin wenel. Le máak paakʼalnajoʼ jujunpʼíitil úuchik u yilik u yich le meyaj tu beetoʼ, maʼ páajchaj u beetik mix baʼal utiaʼal u jáan nojochtal le baʼax u pakʼmoʼ. Bey túun xanoʼ juntúul máax ku xook t-éeteleʼ maʼ xaaneʼ jeʼel u máan tiempo utiaʼal u tsʼáaik ichil u kuxtal le baʼax ku kanikoʼ. Jeʼex juntúul máak maʼ tu páajtal u beetik u jáan nojochtal le baʼax ku pakʼikoʼ toʼon xaneʼ maʼ tu páajtal k-beetik u progresar le j-xoknáaloʼob jeʼex k-kʼáatoʼ. Le oʼolaleʼ maʼ unaj u lúubul k-óol wa k-ilik táan u bisik tiempo u progresaroʼobiʼ (Sant. 5:7, 8).

14. ¿Baʼax ejemplo eʼesik jeʼel u máan tiempo kéen káajak u kʼamik le máakoʼob le kʼaʼaytaj k-beetkoʼ?

¹⁴ Yaan tuʼuxoʼobeʼ ku máan años mix máak kʼamik le baʼax k-kʼaʼaytikoʼ. Koʼoneʼex ilik baʼax úuch tiʼ Gladys yéetel Ruby Allen, kaʼatúul kiktsiloʼob kʼaʼaytajnajoʼob Canadá. Letiʼobeʼ precursoraʼob kaʼachi yéetel tu añoil 1959, túuxtaʼaboʼob tiʼ junpʼéel kaaj yaan tu provinciail Quebec. * Le máakoʼob teʼeloʼ saajkoʼob kaʼach tiʼ le sacerdoteʼoboʼ bey xan tiʼ le baʼax jeʼel u yaʼalik uláakʼ máakoʼoboʼ. Le oʼolal maʼatech u chʼenxikintikoʼob le baʼax ku kʼaʼaytik le kiikoʼoboʼ. Gladyseʼ ku yaʼalik: «Dos años táan k-kʼaʼaytaj ocho horas sáamsamal kaʼachi, chéen baʼaleʼ mix máak chʼenxikintoʼon. Le máakoʼoboʼ chéen ku paktikoʼonoʼob kaʼach desde tu ventanail u yotochoʼob ku tsʼoʼokoleʼ ku jáan kʼalkoʼob, kex beyoʼ toʼoneʼ seguernaj k-kʼaʼaytaj». Le ka máan tiempoeʼ le máakoʼoboʼ tu chan kʼexaj bix u tuukuloʼob, le oʼolal bejlaʼeʼ yaan óoxpʼéel múuchʼulil teʼ tuʼux kʼaʼaytajnaj le kiikoʼoboʼ (Isa. 60:22).

15. Jeʼex u yeʼesik 1 Corintios 3:6, 7, ¿baʼax kʼaʼabéet utiaʼal u yáantaʼal juntúul máak u beetuba u discípulo Jesús?

¹⁵ Utiaʼal u yáantaʼal juntúul máak u beetuba u discípulo Jesúseʼ kʼaʼabéet u múul meyaj tuláakal le múuchʼuliloʼ (xok 1 Corintios 3:6, 7). Koʼox aʼalikeʼ juntúul publicadoreʼ ku pʼatik junpʼéel tratado wa junpʼéel revista tiʼ juntúul máak taak u kaanbal, chéen baʼaleʼ le kéen tsʼoʼokkeʼ ku tsʼáaik cuenta maʼ tun páajtal u  suut u xíimbalt le máakoʼ. Le oʼolal ku kʼáatik áantaj tiʼ uláakʼ publicador, le publicador túunoʼ ku bin u xíimbalt le máakoʼ yéetel ku káajsik junpʼéel xook tu yéetel, ku tsʼoʼokoleʼ ku invitartik uláakʼ sukuʼunoʼob láakʼintik, letiʼob túuneʼ ku yáantkoʼob xan le j-xoknáaloʼ. Ku tsʼoʼokoleʼ cada publicador ku kʼaj óoltaʼal tumen le j-xoknáaloʼ ku yáantaj xan utiaʼal u jóoyabtik le chan semillaoʼ. Bey túunoʼ jeʼex úuchik u yaʼalik Jesúseʼ le máax ku paakʼal yéetel le máax ku jóoyaboʼ ku múul kiʼimaktal u yóoloʼob (Juan 4:35-38).

16. Kex kʼojaʼanech wa tsʼoʼok u pʼáatal minaʼan a muukʼeʼ, ¿baʼaxten unaj u kiʼimaktal a wóol yéetel le bukaʼaj ku páajtal a beetik utiaʼal a meyajtik Jéeobaoʼ?

¹⁶ ¿Kux túun wa kʼojaʼanech yéetel maʼ jach yaan a muukʼ le oʼolal maʼ tu páajtal a kʼaʼaytaj yéetel a kaʼansaj jeʼex a beetik kaʼacheʼ? Kex beyoʼ unaj u kiʼimaktal a wóol yéetel le baʼax ku páajtal a beetkoʼ. Koʼoneʼex ilik baʼax úuch tiʼ rey David yéetel u soldadoʼob le ka bin u tokoʼob tiʼ le amalekitaʼob le baʼax chʼaʼabtiʼoboʼ. Letiʼobeʼ tu ganartoʼob le amalekitaʼoboʼ, tu salvartaj u familiaʼob yéetel tu tokoʼob le baʼax chʼaʼabtiʼob kaʼachoʼ. Teʼ kʼiin jeʼeloʼ 200 soldadoʼobeʼ jach kaʼanaʼanoʼob, le oʼolal maʼ páajchaj u binoʼob teʼ baʼateloʼ baʼaxeʼ pʼáat u kanáantoʼob u nuʼukul le u maasil soldadoʼoboʼ. Kex beyoʼ le ka tsʼoʼok le baʼateloʼ Davideʼ tu yaʼaleʼ igual kun tʼoxbil ichil le soldadoʼob le baʼax tu chʼaʼajoʼoboʼ (1 Sam. 30:21-25). Teʼ kʼiinoʼobaʼ bey xan u yúuchul yéetel le meyaj k-beetkoʼ. Desde k-tsʼaamaj k-óol k-meyajt Jéeobaeʼ unaj u kiʼimaktal k-óol le kéen áantaʼak juntúul máak utiaʼal ka káajak u bin tu bejil le kuxtaloʼ.

17. ¿Baʼaxten unaj k-tsʼáaik gracias tiʼ Jéeoba?

¹⁷ K-tsʼáaik gracias tiʼ Jéeoba tumen letiʼeʼ ku chʼaʼik en cuenta tuláakal le meyaj k-beetik tu yoʼolaloʼ. Letiʼeʼ u yojel maʼ tu páajtal k-obligartik le máakoʼoboʼ, le oʼolal maases ku chʼaʼik en cuenta bix k-tsʼáaik k-óol k-beet le meyajoʼ bey xan le yaabilaj k-eʼesik tiʼ letiʼoʼ. Letiʼeʼ tsʼoʼok u yeʼesiktoʼoneʼ unaj u kiʼimaktal k-óol yéetel le baʼax ku páajtal k-beetik utiaʼal k-táakpajal tiʼ le meyaj u kʼubéentmajtoʼonoʼ (Juan 14:12). Jeʼex túun k-ilkoʼ wa maʼ tu xuʼulul k-tsʼáaik k-óol teʼ meyajoʼ Jéeobaeʼ yaan u kiʼimaktal u yóol yéetel le baʼax k-beetkoʼ.