1. Laanu ca testigu stiʼ Jehová, ¿xiñee riéchenu?

¡GUIZÁʼ riéchenu purtiʼ nácanu testigu stiʼ Jehová! Zinenu lá Dios ne rusihuínninu nácanu Testigu stibe ora runi predicarnu ne rusíʼdinu binni de laabe. Guizáʼ riuuláʼdxinu gacanenu «ca ni nachaʼhuiʼ ladxidóʼ ni maʼ nuu para guicaa guendanabani ni qué zaluxe» gácacaʼ xpinni Jehová (Hech. 13:48). Runi sentirnu cásica biʼniʼ sentir Jesús, purtiʼ «bidii Dios espíritu santu» stiʼ laa ne guizáʼ biecheʼ. Ora biguetaʼ ca discípulo stiʼ Jesús de yeguni predicar, gúdxicaʼ laabe ca cosa galán ni bizaacacaʼ (Luc. 10:1, 17, 21).

2. ¿Ximodo rusihuínninu risaca para laanu guni predicarnu?

² Nabé risaca para laanu guni predicarnu. Sicaríʼ gudxi apóstol Pablo Timoteo: «Guyuu cuidadu lii ne biiyaʼ chaahuiʼ ximodo cusiidiluʼ». Ne laaca guniʼbe: «Purtiʼ ra gúniluʼ ni zalaluʼ ne zulaluʼ ca ni gucaadiaga lii» (1 Tim. 4:16). Rusihuinni ca diidxaʼ riʼ nuu xquendanabani binni lu peligru. Rápanu cuidadu né guiráʼ ni rúninu purtiʼ maʼ gudixhe íquenu gúninu guiráʼ ni ná Reinu stiʼ Dios. Siempre riuuláʼdxinu guininu ne gúninu cosa ni gusisaca Jehová ne rusihuínninu runi crenu ca noticia galán ni runi predicarnu (Filip. 1:27). Riduʼya chaahuinu ximodo cusíʼdinu ora raca prepararnu ante chiguni predicarnu ne rinábanu Jehová gacané laanu ora guinínenu xcaadxi de laa.

3. ¿Xi zándaca guizaaca ora guni predicarnu mensaje stiʼ Reinu, ne xi ejemplu rusihuinni zacá ni?

³ Peru neca gúninu stipa guni predicarnu biaʼ gándatiʼ, zándaca huaxiéʼ o qué lica zucaadiaga binni mensaje stiʼ  Reinu. Guiníʼ íquenu ni bizaaca hermanu Georg Lindal, stubi biʼniʼ predicar guidubi guidxi Islandia dede iza 1929 hasta 1947. Bidiibe stale publicación binni peru nin tobi qué ñaca Testigu. Laabe bicaabe: «Nuu binni rucaalú ca ni runi crenu, peru jma stale de laacaʼ qué riuuláʼdxicaʼ gucaadiágacaʼ». Despué yendá caadxi misioneru de Galaad lugar que para guni predicarcaʼ peru laaca qué nucaadiágacabe laacaʼ. Despué de gaʼ iza, maʼ guyuu caadxi binni de guidxi que guca dedicarcaʼ ne guyuunísacaʼ. *

4. ¿Ximodo zándaca guni sentirnu ora qué gucaadiaga binni laanu?

⁴ Ora qué riná binni gucaadiaga mensaje ni zinenu, zándaca guireʼnu gana. Zándaca guizaacanu cásica bizaaca Pablo, laa guníʼ: «Nuaaʼ triste ne qué ganda guiree yuubaʼ nuu ndaaniʼ ladxiduáʼ» purtiʼ stale de ca judíu qué ñuni crecaʼ pa Jesús nga Mesías ni maca cá gueeda que (Rom. 9:1-3). Yanna, pa naquiiñeʼ gusaana de gudiʼnu estudiu tuuxa purtiʼ cadi cayuni progresar neca cayúninu stale stipa ne cayuni orarnu pur laa yaʼ. O pa qué huayacanenu tuuxa chúʼnisa, ¿ñee naquiiñeʼ guiníʼ íquenu nápanu donda o guiníʼ íquenu cadi caguu ndaayaʼ Jehová dxiiñaʼ stinu la? Lu artículo riʼ zacábinu chupa pregunta: ¿ximodo nánnanu risaca dxiiñaʼ ni rúninu ora runi predicarnu? ne ¿ximodo naquiiñeʼ guidúʼyanu dxiiñaʼ ni rúninu?

5. ¿Xiñee cadi guiráʼ ni gúninu pur Jehová zareeni modo racaláʼdxinu?

⁵ Ora riníʼ Biblia de binni ni runi ni ná Dios la? ruzeeteʼ ni «guiráʼ ni guni zaree ni laa galán» (Sal. 1:3). Peru qué riníʼ diʼ ni guirá ni gúninu para Jehová zaree ni laanu modo racaláʼdxinu. Purtiʼ nácanu binni ruchee ne nápanu stale guendanagana (Job 14:1). Laaca zándaca gucueeza ca enemigu stinu laanu de guni predicarnu ti tiempu (1 Cor. 16:9; 1 Tes. 2:18). Yanna, ¿ximodo ruuyaʼ Jehová predicación ni runi cada tobi de laanu yaʼ? Guidúʼyanu caadxi conseju ni zeeda lu Biblia ni zacané laanu guicábinu pregunta riʼ.

6. ¿Ximodo ruuyaʼ Jehová predicación ni runi cada tobi de laanu?

⁶ Ruuyaʼ Jehová stipa ni rúninu ne ora qué rireʼnu gana. Para Jehová la? galán dxiiñaʼ ni rúninu ora runi predicarnu né stale gana, ne rúninu ni purtiʼ nadxiinu laa ne nadxiinu binni neca qué gucaadiágacaʼ laanu. Pablo bicaa: «Purtiʼ nánnanu jneza runi Dios ne qué zusiaandaʼ guiráʼ ni maʼ bíʼnitu pur ca hermanu, ne dede yanna cayúnirutu ni purtiʼ rusihuínnitu nadxiitu nombre stibe» (Heb. 6:10). Qué rusiaandaʼ Jehová stipa ni rúninu ne pabiáʼ nadxiinu  laa neca cadi cabeendunu ni galán pur stipa ni cayúninu. Nga runi, zanda guni stinu ca diidxaʼ ni gudxi Pablo ca xpinni Cristu de Corinto: «Cadi pur gana si cayúnitu xhiiñaʼ Señor» (1 Cor. 15:58). Ne nánnanu zacá ni neca qué cueendunu ni galán lu dxiiñaʼ ni cayúninu.

7. ¿Xi rizíʼdinu de ni guníʼ apóstol Pablo de dxiiñaʼ ni biʼniʼ?

⁷ Guca apóstol Pablo ti misioneru ni biʼniʼ xhiiñaʼ Dios jneza ne gucanebe chuʼ congregación ndaaniʼ stale guidxi. Neca zaqué, guyuu caadxi xpinni Cristu ni guníʼ ique jma risácacaʼ que Pablo, biʼniʼ criticarcaʼ laabe ne guniʼcaʼ qué gánnabe gusiidibe, peru qué niníʼ diʼ Pablo panda binni gucané chúʼnisa. Lugar de nga, guniʼbe: «Huayuneʼ dxiiñaʼ jma qué laacabe» (2 Cor. 11:23). Chinándanu ejemplu stiʼ Pablo ne cadi guiaandaʼ laanu ni jma risaca para Jehová nga stipa ni rúninu ne cadi guireʼnu gana.

8. ¿Xi cadi naquiiñeʼ guiaandaʼ laanu lu dxiiñaʼ ni rúninu ora runi predicarnu?

⁸ Rusiéchenu Jehová ora runi predicarnu. Ti biaje biseendaʼ Jesús 70 discípulo stiʼ para chiguni predicarcaʼ mensaje stiʼ Reinu. Biblia ná: «Nabé nayecheʼ bibiguetaʼ 70 que». ¿Xiñee biéchecabe yaʼ? Laacabe guníʼcabe: «Dede ca demonio ruzuubacaʼ stiidxadu ora riquiiñedu laluʼ». Peru Jesús gudxi laacabe: «Cadi guiéchetu purtiʼ ruzuubaʼ ca espíritu ca stiidxatu, sínuque laguiecheʼ purtiʼ maʼ cá latu guibáʼ» (Luc. 10:17-20). Nanna Jesús cadi guiráʼ diʼ biaje zieni laacabe galán ora guni predicárcabe. Qué gánnadinu panda de ca binni ni biʼniʼ predicar ca discípulo que beeda gácacaʼ xpinni Cristu. Naquiiñeʼ chuʼ ca discípulo que nayecheʼ cadi purtiʼ rucaadiaga binni laacaʼ, sínuque purtiʼ riecheʼ Jehová pur stipa ni rúnicaʼ.

9. Casi ná Gálatas 6:7-9, ¿xi zabeendunu pa qué gusaana de guni predicarnu?

⁹ Pa qué gusaana de guni predicarnu, zacaanu guendanabani ni qué zaluxe. Ora rúninu stipa pur guni predicarnu, ne gusíʼdinu binni de ca noticia galán stiʼ Reinu laaca riníʼ íquenu guibáninu para gúninu ni ná espíritu, purtiʼ zacá rudiʼnu lugar gacané espíritu santu laanu lu xquendanabáninu. «Pa qué guidxáganu», maʼ guníʼ Jehová zudii laanu guendanabani ni qué zaluxe neca qué gacanenu nin ti binni chúʼnisa (biindaʼ Gálatas 6:7-9).

10. ¿Xiñee nuu binni rucaadiaga ora guni predicarnu ne nuu tu laa coʼ?

¹⁰ Ni nuu ndaaniʼ ladxidóʼ binni nga rucaa laa gucaadiaga mensaje stinu o coʼ. Zacá bisiene Jesús ni lu ejemplu stiʼ hombre ni zigusaba trigu. Lu historia riʼ, riete bisaba hombre riʼ trigu lu gadxé gadxé layú, peru lu layú galán si gundani caadxi de laacani (Luc. 8:5-8). Jesús guníʼ zeeda gaca ca layú que ladxidóʼ binni purtiʼ gadxé gadxé modo ricaacaʼ «stiidxaʼ Dios» (Luc. 8:11-15). Cásica bizaaca hombre ni bisaba trigu que, laanu laaca qué gánnanu pa zaniisi stiidxaʼ Reinu ndaaniʼ ladxidóʼ binni ni runi predicarnu purtiʼ gadxé gadxé ladxidoʼcaʼ. Dxiiñaʼ stinu nga cadi gusaana de guni predicarnu mensaje stiʼ Reinu. Apóstol Pablo guníʼ: «cada binni zacaa premiu stiʼ pur modo biʼniʼ dxiiñaʼ», ne cadi pur ca ni cueendú (1 Cor. 3:8).

11. ¿Xiñee zanda guininu jneza biʼniʼ predicar Noé? (Biiyaʼ imagen ni zeeda lu portada).

¹¹ Maʼ xadxí nga runi predicar ca xpinni Jehová ca binni ni qué riná gucaadiaga mensaje stiʼ Reinu. Guininu de Noé, laa  biʼniʼ predicar ni jneza zándaca stale iza (2 Ped. 2:5). Guleza Noé nucaadiaga binni laa peru Jehová qué ñabi laabe zazaaca ni. Ora gudxi Jehová laabe ximodo gúnibe arca que la? biʼniʼ mandar laabe: «Napa xidé chuʼluʼ ndaaniʼ arca ca, lii ne ca xiiñiluʼ, ne xheelaluʼ ne ca xuaalídxiluʼ» (Gén. 6:18). Ne ora gudxi Jehová Noé pabiáʼ guni arca que la? bidii cuenta huaxiéʼ binni zucaadiaga laa (Gén. 6:15). Ne zaqué gúcani. Nin ti binni qué nucaadiaga mensaje ni yenebe que (Gén. 7:7). ¿Ñee guníʼ ique Jehová cadi jneza modo biʼniʼ predicar Noé la? Coʼ, qué lica niníʼ ique Jehová zacá. Para Jehová la? jneza biʼniʼ Noé dxiiñaʼ ni bidiibe laa purtiʼ biʼniʼ casi peʼ biʼniʼ mandarbe laa guni (Gén. 6:22).

12. ¿Xi biʼniʼ Jeremías para chuʼ nayecheʼ ora biʼniʼ predicar neca qué niná binni nucaadiaga laa ne bicaalúcabe laa?

¹² Laaca xadxí biʼniʼ predicar profeta Jeremías neca qué niná binni nucaadiaga laa ne bicaalúcabe laa. Gudindené binni laabe ne biʼniʼ búrlacaʼ laabe ne ngue gulee ni gana profeta riʼ dede guníʼ ique maʼ qué zuni predicar (Jer. 20:8, 9). Peru qué nireebe gana. ¿Xi gucané laabe para cadi guiníʼ íquebe cosa ni cuee gana laabe ne chuʼbe nayecheʼ ora guni predicarbe yaʼ? Gucuá íquebe chupa cosa nabé risaca. Primé, mensaje ni zeeda de Dios ni zinebe ra nuu binni zanda gudiini laacaʼ «ti futuro ne ti esperanza» (Jer. 29:11). Ne guiropa, gulí Jehová laabe para chinebe nombre stiʼ ra nuu binni (Jer. 15:16). Laanu laaca zinenu ti mensaje galán ra nuu binni ni nuu lu gueelacahui ne zinenu nombre stiʼ Jehová purtiʼ nácanu Testigu stiʼ. Ora riníʼ íquenu guiropaʼ cosa nabé risaca riʼ, riuʼnu nayecheʼ ora runi predicarnu neca qué gucaadiaga binni laanu.

13. ¿Xi rusiidiʼ ejemplu ni guníʼ Jesús ni zeeda lu Marcos 4:26-29 laanu?

¹³ Riné tiempu para guiniisi tuuxa lu stiidxaʼ Dios. Zacá guníʼ Jesús ni lu ejemplu stiʼ hombre ni yegusaba trigu peru gusi (biindaʼ Marcos 4:26-29). Chaahuiʼ chaahuiʼ biiyaʼ hombre que biniisi biidxiʼ ni bidxiibaʼ que ne qué ñanda ñuni gastiʼ para niniisi ni jma nagueenda. Zaqueca nga laanu, laaca ziné tiempu para guni estudiante ca ni caziidiʼ purtiʼ chaahuiʼ chaahuiʼ nga zuni progresarbe. Cásica qué zanda guni ti binni xiixa para guiniisi ni bidxiibaʼ nagueenda, laanu laaca qué zanda gucaʼnu estudiante stinu guni progresar nagueenda modo racaláʼdxinu. Nga runi cadi guireʼnu gana pa cadúʼyanu chaahuiʼ chaahuiʼ cayuni progresar estudiante stinu. Naquiiñeʼ gápanu paciencia ora gudxíʼbanu ti biidxiʼ, zaqueca nga ora gacanenu ti binni gaca discípulo (Sant. 5:7, 8).

14. ¿Xi ejemplu rusihuinni zándaca zadiʼdiʼ tiempu para gucaadiaga binni laanu?

¹⁴ Nuu lugar ridiʼdiʼ iza ne nin ti binni qué raca Testigu. Guidúʼyanu ni bizaaca chupa hermana de Canadá ni lá Gladys ne Ruby Allen, benda guirópacaʼ. Lu iza 1959, guca asignárcabe de precursora regular ndaaniʼ ti guidxi ni nuu Quebec. * Cumu bidxibi binni ca cura stiʼ yuʼduʼ católico ne xi guiníʼ xcaadxi binni la? ngue runi qué nucaadiágacaʼ ca hermana riʼ. Gladys guníʼ: «Biʼniʼ predicardu de yoo pur yoo xhono hora ti dxi, chupa iza bínidu zacá peru nin ti binni qué nucaadiaga laadu. Ora guʼyaʼ binni laadu ra ventana, nagueendaca ruseegucaʼ ca persiana sticaʼ. Peru qué nireʼdu gana». Gudiʼdiʼ si tiempu  bichaa ca binni que ne guyuu stale tu bicaadiaga. Tiempu riʼ nuu chonna congregación lugar ca (Is. 60:22).

15. ¿Xi rusiidiʼ 1 Corintios 3:6, 7 laanu de dxiiñaʼ de gúninu discípulo?

¹⁵ Guiranu zanda gacanenu para gaca ti binni discípulo. Maca huazíʼdinu, guiráʼ hermanu ni nuu ndaaniʼ ti congregación zanda gacanecaʼ para chúʼnisa ti binni (biindaʼ 1 Corintios 3:6, 7). Guiníʼ íquenu ndiʼ, zanda gusaanané ti publicador ti tratadu o ti revista ti binni ni bicaadiaga. Zándaca guʼyaʼ hermanu riʼ qué zanda guibiguetaʼ chiganna binni ca, ngue runi rinábabe sti hermanu chiganna laa. Ruzulú rudii publicador riʼ estudiu binni ca ne rinebe gadxé gadxé hermanu ne hermana ra nuu. Riguu ca hermanu riʼ gana estudiante ca. Cada hermanu gunibiáʼ estudiante ca zacanecaʼ iguidxi fe stibe. Ne zacá, casi guníʼ Jesús, ziecheʼ hombre ni bidxiibaʼ ne ni gundisaʼ cosecha purtiʼ gucanecaʼ binni chúʼnisa (Juan 4:35-38).

16. Pa huaraluʼ o maʼ huaxiéʼ stipa nápaluʼ, ¿xiñee zanda chuʼluʼ nayecheʼ né biaʼ rúniluʼ lu xhiiñaʼ Dios?

¹⁶ Laga pa maʼ qué ganda guni predicarluʼ ne gusiidiluʼ casi bíʼniluʼ ni dxiqué purtiʼ maʼ huaraluʼ ne huaxiéʼ stipa nápaluʼ yaʼ. Neca zacá, zanda chuʼluʼ nayecheʼ pur ca cosa ni zanda gúniluʼ para gacaneluʼ binni gaca discípulo. Guidúʼyanu xi bizaaca despué de biʼniʼ ganar rey David ne ca xpinni caadxi amalequita ni ziné familia sticaʼ ne guiráʼ ni nápacaʼ. Maʼ bidxaga chupa gayuaa soldadu stiʼ David para checaʼ chitíndecaʼ ngue runi biaanacaʼ cayápacaʼ ca cosa stícabe. Despué de yetinde David ne ca soldadu stiʼ, guníʼ ziaaziʼ ni biʼniʼ ganarcaʼ lu guiracaʼ ne ca soldadu ni qué nitinde laaca gucuaacaʼ (1 Sam. 30:21-25). Zacaca nga rizaaca tiempu riʼ né dxiiñaʼ de gúninu discípulo. Guiranu riuuláʼdxinu gudiʼnu de ni jma galán Jehová, nga runi zanda chuʼnu nayecheʼ cada biaje chuʼ ti binni ndaaniʼ xquidxi Dios ne zacá saʼ lu neza ni ziné lu guendanabani ni qué zaluxe.

17. ¿Xiñee zanda gudiʼnu xquixe peʼ Jehová?

¹⁷ Rudiʼnu xquixe peʼ Jehová purtiʼ guizáʼ rusisaca guiráʼ dxiiñaʼ ni rúninu pur laa. Nánnabe cadi lu nanu nuu pa gucaadiaga binni laanu, peru ruuyabe stipa naroʼbaʼ ni rúninu purtiʼ nadxiinu laabe ne riguu ndaayabe laanu pur nga. Laaca rusiidibe laanu chuʼnu nayecheʼ né biaʼ ni rúninu para gacanenu binni gaca discípulo (Juan 14:12). Cadi guiaandaʼ ndiʼ laanu: zusiéchenu Dios pa qué guireʼnu gana.