EVRI yaa, lata preshos sheep geh riyinstaytid, soh dehn kwalifai fi bee paat a di kangrigayshan agen. Imajin how evribadi “eena hevn rijais” wen eech wan a dehn preshos sheep kohn bak tu Jehoava! (Look 15:7, 10) If yoo geh riyinstaytid, yu ku bee shoar dat Jeezas, di aynjelz, ahn Jehoava veri hapi dat yu da paat a di kangrigayshan agen. Bot stil, az yu di bil op bak yu frenship wid Jehoava, yu wahn fays sohn chalenjiz. Wat da som a dehn, ahn weh ku help yu?

Lata bradaz ahn sistaz stil feel diskorij eevn afta dehn kohn bak tu Jehoava. Yoo ku praabli andastan how King Dayvid mi feel. Eevn afta Jehoava mi fergiv ahn fi ih sin dehn, hihn mi seh: “Mi mistayk dehn da tu moch fi mi.” (Ps. 40:12; 65:3) Afta sohnbadi kohn bak tu Jehoava, ih mait stil feel gilti er shaym fi lata yaaz. Isabelle mi disfeloship fi oava 20 yaaz. * Shee mi seh, “Ih mi haad fi mek Ai bileev dat Jehoava ku fergiv mi.” If yoo geh diskorij, yu frenship wid Jehoava ku geh week agen. (Prov. 24:10) Chrai mek dat noh hapm tu yu.

Adaz wori dat dehn mait kyaahn du weh dehn need fi du fi ga wahn kloas frenship wid Jehoava agen. Dis da how Antoine mi feel afta ih mi geh riyinstaytid: “Ai mi feel laik if Ah mi ferget lata di tingz weh Ah mi laan er di tingz weh Ah mi du wen Ai da-mi wahn Witnis bifoa.” Bikaaz sohn peepl mait feel dis way, dehn noh du aal weh dehn kud fi Jehoava.

Fi egzampl, if wahn persn hows geh damij reeli bad bai wahn staam, ih mait feel laik ih need fi put een lata taim an enerji fi bil it bak. Sayhn way soh, if yu frenship wid Jehoava geh damij bikaaz a seeryos sin, yu mait  feel dat yu wahn need fi du lata haad werk fi bil op bak yu frenship wid Jehoava. Bot yu noh haftu deel wid dis pahn yu oan.

Jehoava invait wi: “Kohn, now, ahn mek wi set mataz schrayt bitween wi.” (Isa. 1:18) Yu don werk haad fi “set mataz schrayt” wid Jehoava. Jehoava lov yu kaaz yu du dat. Jos tink bowt dis: Bikaaz yu kohn bak tu Jehoava, hihn ku yooz yoo az wahn egzampl fi proov dat di Devl laiyad!—Prov. 27:11.

Bikaaz yu kohn bak tu Jehoava, yu jraa kloasa tu Jehoava, ahn hihn pramis dat hihn wahn jraa kloas tu yoo. (Jay. 4:8) Ih gud dat adaz si dat yu kohn bak tu di kangrigayshan. Bot yu need fi du sohnting els. Yu need fi kip di mek yu lov fi yu Faada ahn Fren, Jehoava, geh schranga. How yu ku du dis?

Chrai set goalz weh yu kud reech. Yu praabli stil memba di baysik tingz weh yu mi laan bowt Jehoava ahn fi hihn pramis bowt wahn paradais eena di fyoocha. Bot now yu need fi ga wahn gud skejul agen. Fi egzampl, yu need fi preech regyula, goh da di meetin dehn, ahn spen taim wid yu bradaz ahn sistaz. Kansida dehnya goalz:

Taak tu Jehoava regyula. Yu Faada andastan dat if yu kip di feel gilti bowt weh yu mi du rang, ih ku bee haada fi mek yu pray tu ahn. (Roam. 8:26) Eevn soh, “kip aan di pray aal di taim,” tel Jehoava dat yu reeli waahn bee ih fren agen. (Roam. 12:12) Andrej seh: “Ai mi feel soh gilti ahn shaym. Bot afta eech pryaa, Ah wuda feel moch beta. Ih mek Ah feel kaam.” If yu noh noa weh fi pray fa, kansida di pryaaz a King Dayvid weh deh eena Psalms 51 ahn 65.

Stodi di Baibl regyula. Dis wahn help yu fi ga schrang fayt an ih wahn mek yu lov fi Jehoava groa. (Ps. 19:7-11) Felipe seh: “Bikaaz Ah neva ga wahn regyula skejul a persnal Baibl reedin ahn stodi, Ah mi geh week an Ah mi en op di hert Jehoava. Ah neva waahn hert Jehoava agen, soh Ah mek shoar fi du mi persnal stodi regyula.” Yoo ku du di sayhn ting. If yu need help fi chooz tapiks fi yu persnal stodi, yu ku aks wahn fren weh ga wahn schrang frenship wid Jehoava fi help yu.

Bil op bak yu frenship wid yu bradaz ahn sistaz. Sohn peepl weh kwalifai fi bee paat a di kangrigayshan agen, wori dat adaz wahn deh beks wid dehn. Larissa mi admit: “Ai mi feel soh shaym dat Ai mi hert ahn disapoint mi bradaz ahn sistaz. Ai mi feel laik dis fi wahn veri lang taim.” Yoo ku bee shoar dat di eldaz an ada spirichwali machoar bradaz ahn sistaz waahn help yu fi bil op bak yu frenship wid Jehoava. (Si di baks “ Weh Eldaz Ku Du?”) Dehn moa dan hapi dat yu kohn bak tu Jehoava, ahn dehn waahn yu bee hapi!—Prov. 17:17.

Weh ku help yu fi jraa kloasa tu di kangrigayshan? Spen taim wid yu bradaz ahn sistaz; goh da aala di meetin dehn ahn tek paat eena di minischri wid dehn regyula. How dis wahn help yu? Felix mi seh: “Ai kuda mi tel dat di kangrigayshan mi-di luk faawod fi mek Ah kohn bak. Ai mi feel dehn lov. Evribadi eena di kangrigayshan mi mek Ah feel laik Ai da paat a di kangrigayshan agen. Dehn help mi fi si dat Jehoava fergiv mi ahn dat Ah ku kantinyu serv Jehoava.—Si di baks “ Weh Yoo Ku Du?”

Saytan wahn kantinyu fi put moa prablemz fronta yu fi chrai mek yu feel spirichwali week az yu di bil op bak yu frenship wid Jehoava. (Look 4:13) Bee redi fi dat ahn mek yu frenship wid Jehoava schranga now.

Dis da weh Jehoava seh bowt fi hihn sheep: “Ah wahn saach fi di wan weh laas, Ah wahn bring bak di wan weh schray, Ah wahn bandij di wan weh geh hert, an Ah wahn schrentn di wan weh week.” (Ezek. 34:16) Jehoava don help wahn lata peepl fi bil op bak dehn frenship wid hihn. Bee shoar dat hihn waahn help yoo fi kip di bil op bak yu frenship wid hihn; hihn waahn help yu fi mek it eevn schranga dan bifoa!