KADA tuig, daghang bililhong karnero ang mapasig-uli sa Kristohanong kongregasyon. Imadyina ang dakong “kalipay sa langit” dihang mobalik ang matag usa kanila! (Luc. 15:7, 10) Kon napasig-uli ka, makaseguro ka nga si Jesus, ang mga anghel, ug si Jehova nalipay kaayo nga mibarog ka pag-usab dapig sa kamatuoran. Pero, samtang ipasig-uli nimo ang imong maayong relasyon kang Jehova, makaatubang tingali kag mga kalisdanan. Unsa ang pipila niana, ug unsay makatabang nimo?

Daghan ang duna gihapoy negatibong mga pagbati bisag nakabalik na sila sa kongregasyon. Masabtan tingali nimo ang gibati ni Haring David. Bisag napasaylo na siya sa iyang mga sala, siya miingon: “Nalumsan ko sa akong mga kasaypanan.” (Sal. 40:12; 65:3) Busa, bisag ang usa mibalik na kang Jehova, tingali siya makonsensiya gihapon o mobatig kaulaw sulod sa daghang tuig. Si Isabelle na-disfellow sulod sa kapig 20 ka tuig. * Siya miingon, “Nalisdan ko sa pagtuo nga gipasaylo na ko ni Jehova.” Kon maluya ka, posibleng mohuyang pag-usab ang imong relasyon kang Jehova. (Prov. 24:10) Ayawg tugoti nga mahitabo nâ kanimo.

Ang uban mabalaka nga basig dili nila kayang himoon ang tanang gikinahanglan aron masuod pag-usab kang Jehova. Human mapasig-uli, si Antoine miingon, “Mora bag nalimot na ko sa tanan nakong nakat-onan ug ginahimo kaniadto ingong Kristohanon.” Tungod niana nga mga pagbati, ang pipila tingali dili kaayo makigbahin sa espirituwal nga mga kalihokan.

Sa pag-ilustrar, kon ang imong balay naguba pag-ayo tungod sa bagyo, mobati tingali ka nga dili nimo ni kayang tukoron pag-usab tungod sa panahon ug kusog nga gikinahanglan sa paghimo niini. Sa susama, kon ang imong maayong relasyon kang  Jehova nadaot tungod sa seryosong sala, mobati tingali ka nga dako kaayong paningkamot ang gikinahanglan aron mapasig-uli kini. Pero dunay makatabang nimo.

Si Jehova nagdapit kanato: “Ari mo karon, ug husayon nato ang mga butang tali kanato.” (Isa. 1:18) Naningkamot na ka nga ‘mahusay ang mga butang,’ ug gimahal ka ni Jehova kay imo nang gihimo. Hunahunaa ra: Kay mibalik ka kang Jehova, puwede ka niyang gamiton aron matubag ang mga akusasyon ni Satanas!—Prov. 27:11.

Pinaagi sa pagbalik kang Jehova, nakigsuod na ka kaniya, ug siya nagsaad nga makigsuod sab siya kanimo. (Sant. 4:8) Pero dili pa igo nga nakabalik na ka sa kongregasyon. Kinahanglan nga padayon nimong palig-onon ang imong gugma sa imong Amahan ug Higala, si Jehova. Unsaon nâ nimo paghimo?

Sulayi ang pagtakdag mga tumong nga makab-ot nimo. Hinumdomi nga ang imong espirituwal nga pundasyon—ang imong nahibaloan bahin kang Jehova ug sa iyang mga saad sa umaabot—tingali nagpabilin ra gihapon. Pero kinahanglan nimong iestablisar pag-usab ang maayong rutina sa espirituwal nga mga kalihokan sama sa regular nga pagsangyaw, pagtambong sa mga tigom, ug pagpakig-uban sa mga igsoon. Konsideraha ang mosunod nga mga tumong.

Pakig-estorya kanunay kang Jehova. Ang imong Amahan nakasabot nga kon pirme kang makonsensiya tungod sa imong nahimong sayop, malisdan ka sa pag-ampo kaniya. (Roma 8:26) Bisan pa niana, “ayawg hunong sa pag-ampo” ug isulti kang Jehova nga gusto gyod nimong masuod kaniya pag-usab. (Roma 12:12) Si Andrej nahinumdom: “Makonsensiya ug maulaw kaayo ko. Pero kada human nakog ampo, moarang-arang ang akong gibati. Mas malinawon na ang akong hunahuna.” Kon wala ka kabalo kon unsay iampo, konsideraha ang mga pag-ampo sa mahinulsolong si Haring David nga narekord diha sa Salmo 51 ug 65.

Tun-i nga regular ang Bibliya. Kini makapalig-on sa imong pagtuo ug makapalawom sa imong gugma kang Jehova. (Sal. 19:7-11) “Kay wala koy rutina kaniadto sa pagbasa ug pagtuon sa Bibliya, naluya ko ug napasakitan nako si Jehova,” miingon si Felipe. “Dili nako gustong otrohon ang akong nahimong sayop, busa giseguro nako nga regular na kong magtuon.” Mahimo pod nâ nimo. Kon nagkinahanglan kag giya sa pagpangitag haom nga mga topiko para sa imong personal nga pagtuon, puwede kang mangayog tabang sa usa ka hamtong nga higala.

Pakigsuod pag-usab sa mga igsoon. Ang pipila nga mibalik sa kongregasyon nabalaka nga basig lahi ang panglantaw sa mga igsoon kanila. Si Larissa miingon: “Naulaw kaayo ko. Gibati nako nga akong napasakitan ang mga igsoon. Taudtaod pod nga ingon adto ang akong gibati.” Makasalig ka nga ang mga ansiyano ug ang ubang hamtong nga mga igsoon andam motabang nimo samtang maningkamot ka sa pagpasig-uli sa imong maayong relasyon kang Jehova. (Tan-awa ang kahong “ Unsay Mahimo sa mga Ansiyano?”) Nalipay sila nga mibalik ka, ug gusto nila nga magmalipayon ka!—Prov. 17:17.

Unsay imong mahimo aron masuod ka pag-usab sa kongregasyon? Pakig-uban pirme sa mga igsoon pinaagi sa pagtambong sa mga tigom ug regular nga pagsangyaw. Nganong makatabang ni? Si Felix miingon: “Ang kongregasyon naghinamhinam sa akong pagbalik. Gibati nako nga gipabilhan ko. Gitabangan ko nilang tanan nga mobating bahin na sab ko sa kongregasyon, nga gipasaylo na ko, ug nga makapadayon ko sa pag-alagad kang Jehova.”—Tan-awa ang kahong “ Unsay Imong Mahimo?”

Si Satanas padayong magpatunghag samag bagyo nga mga problema aron maluya ka sa imong mga paningkamot sa pagpasig-uli sa imong maayong relasyon kang Jehova. (Luc. 4:13) Pangandam daan pinaagi sa pagpalig-on sa imong relasyon kang Jehova karon.

Bahin sa iyang mga karnero, si Jehova nagsaad: “Pangitaon nako ang nawala, dad-on nakog balik ang nahisalaag, bendahean nako ang naangol, ug palig-onon nako ang naluya.” (Ezeq. 34:16) Daghan nag natabangan si Jehova sa pagpasig-uli sa ilang maayong relasyon kaniya. Magmasaligon nga gusto ka niyang tabangan nga padayong mapasig-uli ang imong maayong relasyon kaniya ug mas mapalig-on pa kini.