ITEITEN ier, chómmóng siip mi aúchea ra katolongsefál lón ewe mwichefel. Anchangei usun ewe “pwapwa lon läng” atun án emén me emén liwin! (Luk. 15:7, 10) Ika ka katolongsefál lón ewe mwichefel, ka tongeni lúkú pwe Jesus, ekkewe chónláng, me Jiowa, ra pwapwa ren óm chónisefál ewe mwichefel. Nge eli epwe wor weiresin óm poputá le ririéchsefál ngeni Jiowa. Ikkefa ekkóch ekkena weires, me met epwe tongeni álisuk?

Chómmóng pwiich kewe ra chúen letipengaw mwirin ar liwiniti ewe mwichefel. Eli ka weweiti usun meefien King Tafit. Inaamwo ika a musoló tipisin, nge a erá: “Ai kewe tipis ra rongeeila.” (Kölf. 40:12; 65:3) Mwirin án emén liwiniti Jiowa, eli epwe chék memmengiringir are sáw ren fite fite ier. Iei alon Isabelle, emén mi katowu ren lap seni 20 ier. * “A weires ai upwe lúkú pwe Jiowa a omusaeiló.” Ika ka letipengaw, óm chiechi ngeni Jiowa a tongeni apwangapwang sefál. (SalF. 24:10) Achocho ngeni an esap fis ngonuk ena.

Ekkóch ra lólilen ar resap tongeni féri meinisin met ekkewe mi lamot pwe repwe ririéchsefál ngeni Jiowa. Iei alon Antoine mwirin an katolongsefál lón ewe mwichefel, “Ua fen namanaaló chómmóng ekkewe mettóch ua káé me ekkewe mettóch ua féffériir atun ua emén Chón Pwáraatá me lóóm.” Iwe pokiten ekkena esin memmeef, ekkóch rese achocho úkúkún ar tufich fán iten Jiowa.

Áwewe chék, ika a tangaw imwen emén ren eú taifun, eli epwe fókkun aúrek atun a ekieki úkúkún ewe fansoun epwe áeá me úkúkún angangen fférsefálin imwan na. Pwal ina chék usun,  ika a ta óm riri ngeni Jiowa ren óm tipis watte, eli ka ekieki pwe a lamot óm kopwe fókkun angang weires le chiechisefál ngeni Jiowa. Nge a wor met a tongeni álisuk.

Jiowa a etiwakich: “Ou etto, ousipwe pwüngüpwüngfengen.” (Ais. 1:18) Ka fen angang weires le liwiniti Jiowa. Iwe a mmen tongeok pokiten óm achocho. Ekieki mwo, pokiten ka liwiniti Jiowa, iwe a tongeni eáánuk pisekin ánnet me ánnetatá pwe ewe Tefil a chofona.​—SalF. 27:11.

Atun ka liwiniti Jiowa, ka fen ririéch ngeni, me a pwonei pwe epwe pwal ririéch ngonuk. (Jas. 4:8) A mmen éch án ekkewe ekkóch kúna pwe ka liwiniti ewe mwichefel. Nge ese naf ena. A lamot óm kopwe akkalapaaló óm tongei Semom we me Chiechiom we, Jiowa. Ifa usun?

Isetiw met ekkewe kopwe achocho ngeniir nge ka tongeni tikeriir. Ese mwáál, ka chúen chemeni ekkewe mettóch mi lamot ka fen káé usun Jiowa me an pwon usun ewe Paratis. Nge iei, a lamot óm kopwe akkótasefáli óm kókkót lón pekin ngún, áwewe chék ren óm akkafalafal iteitan, fiffiti mwich, me chichchiechi ngeni chón ewe mwichefel. Ikkeei ekkóch mettóch ka tongeni achocho ngeniir.

Ikkiótek ngeni Jiowa iteitan. Semom na a weweiti pwe óm memmeefi mengiringir iteitan, a tongeni áweiresi óm kopwe iótek ngeni. (Rom 8:26) Iwe nge kopwe chék “iotek fansoun meinisin” me ereni Jiowa úkúkún óm mochen chiechi ngeni. (Rom 12:12) Iei met Andrej a chemeni: “Ua fókkun meefi mengiringir me sáw. Nge mwirin iteiten ai iótek, a kisikisiló ekkena memmeef. A lapóló kinamween letipei.” Ika kese silei met kopwe eáni iótek, ekiekifichi án Tafit kewe iótek atun a aier, ekkewe mi mak lón Kölfel 51 me 65.

Kákkáé ewe Paipel iteitan. Ena mettóch epwe apéchékkúla óm lúkú me alapaaló óm tongei Jiowa. (Kölf. 19:7-11) Iei alon Felipe: “Pokiten ese kan wor ai kókkótun pwisin álleani me káé ewe Paipel iteitan, iwe ua apwangapwangoló lón pekin ngún, me ua eletipechowu Jiowa. Use mochen férisefáli met ena ua mwáálliló wóón, ina popun ua nochchei an epwe wor ai kókkótun pwisin káé iteitan.” Ka pwal tongeni féri ena. Ika kese silei met sókkun pwóróus kopwe káé lón óm pwisin káé, ka tongeni tingorei emén chienom mi ásimaw an epwe álisuk.

Chiechiéchsefál ngeni chiechiom kewe Chón Kraist. Ekkóch chókkewe iir mi katolongsefál lón ewe mwichefel, ra lólilen ika ekkewe ekkóch repwe song rer. Iei alon Larissa: “Ua fókkun sáw. Ua meefi pwe ua fen elichippúngú chón ewe mwichefel. Ren langattam fansoun, ua eáni ekkena esin memmeef.” Kopwe lúkúlúk pwe ekkewe mwán mi ásimaw me pwal chókkewe mi ásimaw lón ewe mwichefel, ra mochen álisuk lón óm apéchékkúlasefáli óm riri ngeni Jiowa. (Ppii ewe pwóór “ Met Ekkewe Mwán mi Ásimaw Ra Tongeni Féri?”) Ra pwapwa ren óm liwinsefál, me ra mochen óm kopwe pwal pwapwa!​—SalF. 17:17.

Met a tongeni álisuk le ririéch ngeni chón ewe mwichefel? Kopwe kan fiffiti chiechiom kewe Chón Kraist lón meinisin ekkewe mwich me lón ewe angangen afalafal. Ifa usun óm féri ena epwe álisuk? Iei alon Felix: “Chón ewe mwichefel ra pwapwa ren ai liwinsefál. Ua meefi aúcheai. Iir meinisin ra álisiei le chónisefáli ewe familien lúkú, meefi musolóón ai tipis, me sópweló chék lón ai achocho.”​—Ppii ewe pwóór “ Met Ka Tongeni Féri?”

Satan epwe chék sóssópweló le aosukosukok me atai óm achocho le apéchékkúlasefáli óm riri ngeni Jiowa. (Luk. 4:13) Kopwe chék mómmólnetá ren óm kopwe apéchékkúlok lón pekin ngún.

Iei án Jiowa pwon ngeni néún kewe siip: “Üpwe kütta chokewe mi pöütüla o aliwini chokewe mi malechela, üpwe filiti kinasen chokewe mi kinas o apöchöküla chokewe mi apwangapwang.” (Is. 34:16) Jiowa a fen álisi chómmóng chókkewe iir mi piin apwangapwangoló pwe repwe ririéchsefál ngeni i. Kopwe lúkúlúk pwe a mochen álisuk le akkapéchékkúlaló óm riri ngeni.