KUM fatin a sunglawi tukmi tuu pawl cu Khrihfabu ah an kir ṭhan. An kir ṭhan tikah “vancung khua ah lunglawmhnak” nganpi a ummi kha na mitthlam ah cuanter hmanh. (Luka 15:7, 10) Nangzong a kir ṭhanmi na si ahcun Khrihfabu chungmi na si ṭhanmi an hmuh tikah Jesuh, vancungmi le amah Jehovah theng an i lawm tuk ti kha na zumh khawh. Asinain Jehovah he i hawikomhnak na ser ṭhan tikah zuamcawhnak na tong men lai. Mah lakah cheukhat cu zei hna dah an si i zeinihdah aan bawmh khawh?

Unau tampi cu buchung i an kir ṭhan hnu hmanhah an lungre a thei rih. Siangpahrang David intuar ning kha na hngalhthiam men ko lai. A sualnak ngaihthiam a si hnu hmanhah hitin a ti: “Ka sualnak nih a ka phak cang.” (Salm 40:12; 65:3) Mi pakhat cu Jehovah sin i a kir ṭhan hnuah sualnak ka ngei timi ruahnak a ngei men lai asiloah kum tampi chung ningzak in a um men lai. Kum 20 leng buchung chuah a simi Isabelle * nih hitin a ti: “Jehovah nih a ka ngaihthiam khawh timi zumh kha kaa harh tuk.” Na lung a dongh ahcun Jehovah he nan i pehtlaihnak cu a der ṭhan kho. (Ptb. 24:10) Cutin a can nakhnga lo i zuam.

Mi cheukhat nih cun Jehovah he i pehtlaih ṭhan awkah tuah a herhmi thil vialte kan tuah kho lai lo ti an phang. Buchung a kir ṭhan hnuah Antoine nih hitin a ti: “A hmasa Jehovah Tehte ka si lio i ka rak tuahmi asiloah ka rak cawnmi vialte kha ka philh.” Mi cheukhat nih cu bantuk ruahnak an ngeih caah Jehovah rian tling tein ṭuan awkah an i cungcang men lai.

Tahchunhnak ah, mi pakhat cu thlichia ruangah fakpi in a inn a rawh ahcun sak ṭhan awkah a caan le rian zeitlukin dah a tam lai ti a ruah tikah a lung  a dong men lai. Cu bantukin sualnak ngan na tuah ruangah Jehovah he nan i pehtlaihnak a rawh ahcun Jehovah he nan i pehtlaihnak a ṭhat ṭhan nakhnga fakpi in i zuam a hau tiah na ruah khawh men. Asinain bawmhnak na hmu kho.

Jehovah nih hitin a kan sawm: “Atu cu hi bia hi ṭha tein ruatṭi tuah u sih.” (Isa. 1:18) ‘Ṭha tein i ruahṭi’ awkah fakpi in naa zuam cang. Cutin naa zuam caah Jehovah nih aan dawt. Mah hi ruathmanh: A sinah na kir ṭhan caah Jehovah nih Satan cu mi lihchim a si ti kha langhter awkah aan hman khawh.—Ptb. 27:11.

Cutin na tuahnak thawngin Jehovah kha na naihmi a si i amah zong nih kaan naih ve lai tiah bia aan kamh. (Jeim 4:8) Midang nih Khrihfabu ah na kir ṭhanmi an hmuhmi cu a ṭhami a si. Asinain tam deuh in na tuah a hau. Na Pa le na Hawi a simi Jehovah cungah a fekmi dawtnak na ngeih peng nakhnga naa zuam a hau. Cutin zeitindah na tuah khawh?

Na phanh khawhmi hmuitinh kha chiah awkah i zuam. Jehovah le Paradis biakam kong na hlathlaimi kha naa cinken rih men ko lai. Asinain thlaraulei ah na tuah tawnmi thil kha na tuah ṭhan a hau. Tahchunhnak ah, hmaan tein phungchimnak ah i telin i pumh le unau pawl he caan hmanṭi ti bantuk hna a hau. A tanglei hmuitinh hna hi ruathmanh.

Jehovah kha atu le atu bia ruah. Palhnak na tuahmi ruangah sualnak ka ngei timi ruahnak nih a sinah thlacam dingin a harter ti kha na Pa nih a hngalhthiam. (Rom 8:26) Jehovah he zeitlukin dah hawikom si na duh ti kha chim law “thlacam zungzal.” (Rom 12:12) Andrej nih hitin a ti: “Sualnak ka ngei timi ruahnak nih ka ning a ka zahter. Asinain thla ka cam hnuah ka lung a dai deuh.” Zeidah ka cam lai ti na hngalh lo ahcun Salm 51 le 65 ah ṭialmi, aa ngaichihmi Siangpahrang David thlacammi kong kha ruat.

Hmaan tein Baibal hlathlai. Mah nih a fekmi zumhnak ngeih awk le Jehovah dawt chin awkah aan bawmh lai. (Salm 19:7-11) Felipe nih hitin a ti: “Baibal relnak le hlathlainak program ka ngeih lo caah ka tha a hung der i Jehovah lung kha ka fahter. Jehovah lungfahter ṭhan kha ka duh ti lo caah hmaan tein pumpak hlathlainak ka tuah cang.” Nangzong cutin na tuah khawh. Pumpak hlathlainak tuah awkah a kong i thim dingin bawmhnak na herh ahcun Jehovah he a ṭhami pehtlaihnak a ngeimi na hawi pakhat sinah bawmhnak na hal khawh.

Unau pawl he hawikomhnak kha ser ṭhan. Khrihfabu ah a kir ṭhanmi cheukhat nih an cungah midang nih a ṭhalomi ruahnak an ngei lai ti an phang. Larissa nih hitin a ti: “Ka ning a zak tuk. Cun unau pawl an lung ka fahter hna timi ruahnak zong ka ngei. Caan saupi tiang mah ruahnak kha ka ngei.” Jehovah he pehtlaihnak ser ṭhan awkah Krhihfa upa pawl le midang nih bawmh an in duh ti kha zum. (“ Khrihfa Upa Pawl Nih Zeidah An Tuah Khawh?” timi rinli kulh ah zoh.) Na kir ṭhan caah an i lawm tuk i i nuam seh ti zong an in duh.—Ptb. 17:17.

Khrihfabu he zeinihdah aan naihter khawh? Pumhnak dihlak ah i pum law unau pawl he hmaan tein lohmun rianṭuannak ah i tel. Mah nih zeitindah aan bawmh lai? Felix nih hitin a ti: “Khrihfabu nih a kir ṭhan lai tiah an ka ruahchan caah a sunglawimi in kaa ruah. Chungkharmi pakhat si ṭhan awk, ngaihthiammi ka si ti ruah awk le hmailei kal peng awkah an ka bawmh.”—“ Zeidah Na Tuah Khawh?” timi rinli kulh ah zoh.

Jehovah he hawikomhnak ser ṭhan awk naa zuam lioah na tha a der nakhnga Satan nih “harnak” tampi an tonter ko lai. (Luka 4:13) Jehovah he nan i hawikomhnak na fehternak thawngin timhcia si.

A tuu pawl kha Jehovah nih hitin bia a kamh hna: “A tlaumi kha ka kawl hna lai, a pialmi kha ka kirpi ṭhan hna lai, hma a ingmi kha ka thlop hna lai, a zawmi kha thazaang ka pek hna lai.” (Ezek. 34:16) Jehovah nih mi tampi kha amah he a ṭhami pehtlaihnak an ngeih ṭhan nakhnga a bawmh hna. Jehovah nih amah he a fekmi pehtlaihnak ngeih peng awkah bawmh aan duh ti kha zum.