POAGAZA ẽbẽra mejãchaʉta Jeowa odebadara jẽda zebʉ kongregasionʼena. Krĩchadadrʉ kʼãrẽaba sobiapanʉta ʉ̃tʉ bajãnera ẽbẽra jẽda Jeowa oeda zepanʉ kʼarea (Luc. 15:7, 10). Bʉta jarasidabʉrʉ jẽda Jeowa ʉ̃rʉ Kʼawuabibarita, kʼawuabara ʉ̃tʉ Jeowara, Jesura akʉza angelerãra sobiapanʉta bʉta jẽda kongregasionʼena zesi baera. Bʉa jẽda Jeowaʉ̃me neũdukʼawua bʼaita jʉrʉbʉde ũduseabʉ bedʼea zromata, ¿saʉ̃ maʉ̃ra akʉza kʼãrẽba kʼarebaseabʉ?

Mebẽrã majãchaʉta jẽda kongregasionʼena zebʉrʉdera, mejãcha zarea opanʉ ãyi krĩcha kayirua kʼarea. Bʉta mawũãbʉbʉrʉ bʉa biʼia kʼawuabʉkĩrã nokʼo Davidʼra sãwũã sentidata. Jeowaba iyi nekayirua kĩrãduada tẽã iya jarasi: «Mʉ̃ra mejãcha krĩcha obibʉ mʉ̃a nekayirua odaba» (Sal. 40:12; 65:3). Berabariseabʉ ʉ̃kʉrʉ mebẽrã jẽda Jeowama zedara sopʉa senti bʼaita poaga biobayeda. Bari jaraita Isabelleʼra, * 20 poaga ʉ̃ta wua Jeowa ʉ̃rʉ Kʼawuabibari ẽ basi, iya jarasi: «Mʉ̃itara zarebasi ĩjãita Jeowaba kĩrãduasita mʉ̃ nemitiara». Bʉta paera jẽda bia wã ẽ bayi Jeowaʉ̃me neũdukʼawuadebʉde (Prov. 24:10). Zarea ora mawũã berabari ẽ baita.

Ʉ̃kʉrʉitara zare ãya krĩchapanʉne nekʼãrẽ mejãcha oita Jeowa neũdukʼawua bʼaita jẽda. Jẽda Jeowa ʉ̃rʉ Kʼawuabibaribada tẽã, Antoineba jarasi: «Mʉ̃a jõma kĩrãduasi mʉ̃a nãã obadara mʉ̃ Jeowa odebaside». Maʉ̃ krĩcha kʼarea ʉ̃kʉrʉba mejãcha nekʼãrẽ oẽ Jeowa organizasionera.

Bari jaraita. Nãgʉ zromaba de ãrĩbʉrʉdera, yibaribara maʉ̃ de ũdubʉrʉde krĩchaseabʉ kʼãrẽaba mejãcha zarea bʼaita iyi de jẽda ara  oira. Maʉ̃ kĩrãkʼa bʉa krĩchaseabʉ bʉa nekayirua oda kʼarea mejãcha zarea bʼaita jẽda jʉrʉita Jeowaʉ̃me neũdukʼawua bʼaita, mamina kʼarebara bʉ.

Jeowaba naʉ̃ bedʼeata jarabʉ: «Zera dayi bedʼea ara odaita» (Is. 1:18). Bʉra zarea osi jẽda Jeowaʉ̃me neũdukʼawua bʼaita, maʉ̃ kʼarea kãga iya bʉra. Krĩchara: Jeowabara bʉ yiza biata zokʼaseabʉ ũdubita Diarura sewa nebʉrʉ omiata (Prov. 27:11).

Bʉara Jeowara jẽda orrasi baera iyara jarabʉ iyabida orraita bʉra (Sant. 4:8). Bika wuabemaraba ũdudaira bʉra jẽda zesita, mamina wabida nekʼãrẽ oibara. Bʉara zarea oibara audre kãga wãita bʉ Zeze akʉza neũdukʼawua Jeowara. ¿Sãwũã oseabʉ?

Krĩchara bʉa kʼãrẽta oseabʉta. Bari jaraita nãgʉ zroma zebʉrʉdera kapũrĩa dera jõma ãrĩbʉ yi ʉ̃rʉbemara, mamina yi kuda edrenʉmʉra egorodeda, maʉ̃ra ãrĩ ẽ. Nãgʉba de kuda awa amaebari kĩrãkʼa, bʉara wabida ĩjãbʉ Jeowa ʉ̃rʉra akʉza iya dayirãita erbʉsida. De ʉ̃rʉbema ara oi kĩrãkʼa, bʉara jẽda nekʼãrẽ oibara Jeowaʉ̃me bia wãita, maʉ̃bara jarakĩrãbʉ jaradia wãibarata, ãba yi jʉreibarata akʉza mebẽrãbawara ewari berabaribarata. Akʉdayi bʉa kʼãrẽta oseabʉta.

Ewariza bedʼeara Jeowaʉ̃me. Bʉ Zeze Jeowabara biʼia kʼawuabʉ bʉitara zareata iyiʉ̃me bedʼeaira bʉa nekayirua obada krĩchadeba (Rom. 8:26). Mawũãsidu badua jarada Jeowaʼa akʉza jarada bʉra iyiʉ̃me neũdukʼawua bakĩrãbʉta (Rom. 12:12). Andrejbara kĩrãbebʉ: «Mʉ̃ra mejãcha krĩcha obasi mʉ̃a nekayirua oda kʼarea. Mamina Jeowaʼa yiwidʼibʉrʉza mʉ̃ krĩchara aduʼabasi». Bʉa kʼawua ẽ bʉrʉ bʉ kʼãrẽ ʉ̃rʉ yiwidʼita, krĩchara David sãwũã yiwidʼidata iya jẽda krĩchanʉmaside nekayirua oda kʼarea, maʉ̃ra ũduseabʉ Salmos 51ne akʉza 65de.

Ewariza Daizeze Bedʼea kʼawuara. Maʉ̃ba kʼarebayi audre soiduba ĩjãita Jeowa ʉ̃rʉ akʉza iyi audre kãgaita (Sal. 19:7-11). Mebẽã Felipeba jarasi: «Mʉ̃ra Jeowa odebara ãĩ wãsi Daizeze Bedʼea ewariza kʼawua ba ẽ basi baera, mawũã jẽda berabari ẽ bamarẽã mʉ̃a audre kʼẽrẽpa estudiabʉ Daizeze Bedʼeara». Bʉabida abarika mawũã oseabʉ, bʉa biʼia kʼawua ẽ bʉrʉ bʉyidobaʉba kʼãrẽ ʉ̃rʉ estudiaita kʼareba widiseabʉ mebẽã Jeowa ode kʼẽrẽpabʉa.

Jẽda mebẽrã neũdukʼawuabara. Ʉ̃kʉrʉ yi organizasionʼena zebʉbara krĩcha zroma opanʉ wuabemaraba bia akʉda ẽ kĩrãkʼa krĩchabʉ baera. Larissaba jarabʉ: «Mʉ̃ra mejãcha perasi, mebẽrãra sewakʉasi kĩrãkʼabasi baera. Ewari biobayeda mawũã sentibasi mʉ̃ra». Bʉara biʼia kʼawuabara zõrãrãbara kʼarebakĩrãpanʉta jẽda Jeowaʉ̃me neũdukʼawua bamarẽã akʉza wuabemara mebẽrã kʼẽrẽpapanʉrabida kʼarebakĩrãpanʉta (akʉra rekuadro « Kʼãreta oseabʉta zõrãrã kongregasionebemaraba»). Adewara ãyira mejãcha sobiapanʉ bʉra jẽda zesi baera kongregasionʼena akʉza kãgapanʉ bʉra sobia bamarẽã (Prov. 17:17).

¿Kʼãrẽta oseabʉ audre kongregasion kʼawa bʼaita? Ãba yi jʉrebarieda wãbʉra idubʉrãra akʉza badua jaradiaeda wãbara mebẽrãbawara. ¿Jõma oiba sãwũã kʼarebai bʉra? Félixba jarasi: «Mʉ̃ara sentibasi mʉ̃ra mebẽrãba kãgapanʉta. Ãyara jʉ̃ãpanasi baera mʉ̃ jẽda zeita kongregasionʼena. Ãya kʼarebasi mʉ̃ra kongregasione bia sentimarẽã, akʉmarẽã Jeowaba mʉ̃ nemitiara kĩrãduasita akʉza pae ẽ bamarẽã» (akʉra rekuadro « Bʉa kʼãrẽta oseabʉta»).

Bʉ jẽda Jeowaʉ̃me neũdukʼawua bʼaita zarea obʉde, Diarubara wabida bedʼea zroma ũdubiyi bʉara, iyara ãrĩkĩrãbʉ baera bʉa maʉ̃ jʉrʉbʉta (Luc. 4:13). Zarea ora jẽda Jeowaʉ̃me neũdukʼawua bʼaita.

Jeowa iyi obejara ʉ̃rʉ bedʼeabʉrʉta naʉ̃ bedʼeata jarasi: «Mʉ̃a jʉrʉ wãñi yi aduakʉadarata, yi o aña wãkʉadara jẽda zekʉayi, yi pokʉadara wuaba bʉraya akʉza yi zarea neẽãra zarea babiyi» (Ezeq. 34:16). Jeowaba mejãcha kʼareba zebʉrʉ iyi ode panʉrãra iyiʉ̃me jẽda neũdukʼawua bamarẽã. Bia kʼawuabara Jeowaba kʼarebakĩrãbʉta bʉra iyiʉ̃me jẽda neũdukʼawua bia bamarẽã.