JEHOVA ka sagadenw koo ka gwɛlɛ a ma. Minw tun gwɛnna ka bɔ kafo kɔnɔ, saan o saan u caaman be kɔsegi Jehova ma. U kelen mana kɔsegi Jehova ma, miiri k’a filɛ “nisɔndiya” min be kɛ sankolo la! (Luka 15:7, 10). N’a sɔrɔ i kɛra Jehova Seere dɔ ye kokura. N’o lo, i be se ka la a la ko Yezu, mɛlɛkɛw ani Jehova fana ninsɔn ka di kosɔbɛ k’a ye ko i kɛra kafoden dɔ ye tugun. Nka, komi i be jɛnɲɔgɔnya kura sigira ni Jehova ye, i be se ka gwɛlɛyaw sɔrɔ. O gwɛlɛya dɔw ye jumanw ye ani mun ni mun lo be se k’i dɛmɛ?

Balima caaman kɔseginin kɔ kafo kɔnɔ, u bele be to ka bondori kɛ ni miiriya juguw ye. N’a sɔrɔ i be masacɛ Dawuda dusukunnakow faamu. Hali k’a sɔrɔ Ala yafara a ma, a ko: “Ne ka filiko kunko be ne kan.” (Zab. 40:13; 65:4). Mɔgɔ dɔw kɔseginin kɔ Jehova ma, u bele be to ka u yɛrɛ jalaki wala ka maloya saan caaman kɔnɔ. Isabelle tun gwɛnna ka bɔ kafo kɔnɔ ani a ye saan 20 ni kɔ kɛ ka sɔrɔ ka kɔsegi Jehova ma. * A ko: “A tun ka gwɛlɛ n’ ma kosɔbɛ ka sɔn a ma ko Jehova be se ka yafa n’ ma.” N’i fari fagara, i barika be se ka dɔgɔya tugun Alako ta fan fɛ (Talenw 24:10). Banba, kana a to o k’i sɔrɔ.

Mɔgɔ ka ɲi ka koo minw kɛ walisa ka jɛnɲɔgɔnya ɲuman kɛ ni Jehova ye kokura, dɔw be siran ko u tɛna se k’o bɛɛ kɛ. Antoine kɛra Jehova Seere ye kokura. A ko: “Tuma min na n’ tun ye Jehova Seere ye, n’ tun ye koo minw kalan ani n’ tun ye koo minw kɛ, n’ ɲinɛna u caaman kɔ.” O miiriyaw b’a to dɔw be sigasiga k’u seen don bɛrɛbɛrɛ Jehova ka baara la.

Misali la, fɔɲɔba be se ka dɔ ka boon halaki. N’o tigi miirila wagati min ka ɲi ka ta ani baaraba min ka ɲi ka kɛ walisa k’o boon  lalaga, a fari be se ka faga. O cogo kelen na, jurumuba be se ka ele ni Jehova ka jɛnɲɔgɔnya nagasi. N’o kɛra, i be se k’a miiri ko i ka ɲi ka jijaliba lo kɛ walisa ka segi ka teriya kɛ ni Jehova ye kokura. Nka, i be se ka dɛmɛ sɔrɔ.

Jehova be welekan nin lase an ma ko: “Aw ye na, an ka sigikafɔ kɛ.” (Ezayi 1:18). I ye jijalibaw kɛ ka “sigikafɔ kɛ” ni Jehova ye ka ban. O kama, a b’i kanu. Miiri nin na: I kɔsegira Jehova ma minkɛ, i ye sababu di a ma a ka se k’a dɔgɔyabaga Sutana jaabi koɲuman!—Talenw 27:11.

I kɛtɔ k’o kɛ, i ye i magwɛrɛ Jehova la ka ban. A ye layidu ta ko ale fana bena a magwɛrɛ i la (Zaki 4:8). Kafoden tɔɔw ninsɔn ka di k’a ye ko i kɔsegira Jehova ma. Nka, i ka ɲi ka koo wɛrɛ kɛ. I ka ɲi ka to ka i ka kanuya barika bonya i Faa ani i Teri Jehova koo la. I be se k’o kɛ cogo di do?

I jija ka laɲinitaw latigɛ i be se ka minw dafa. I ye koo jɔnjɔn minw kalan ka ɲɛsin Jehova n’a ka layiduw ma alijɛnɛ koo la, n’a sɔrɔ i hakili bele b’u la. Nka sisan, i ka ɲi ka kɛ ni delinanko ɲumanw ye tugun Alako ta fan fɛ. Misali la, i ka ɲi ka to ka waajuli kɛ, ka taga lajɛnw na tuma o tuma ani ka to ka wagati kɛ n’i balimaw ye. An ka laɲinita dɔw lajɛ.

To ka delili kɛ tuma o tuma. I Faa Jehova b’a faamu ko n’i be to k’i yɛrɛ jalaki i ka koo jugu tɛmɛninw kosɔn, a be se ka gwɛlɛya i ma k’ale deli (Ɔrɔm. 8:26). Nka, to k’i “jija ka Ala daali.” A fɔ Jehova ye ko i b’a fɛ sɔbɛ la ka teriya kɛ n’a ye (Ɔrɔm. 12:12). Andre ko: “N’ tun be n’ yɛrɛ jalaki kojugu ani maloya tun be n’ na yɛrɛ le. Nka delili kelen kelen bɛɛ kɔ, n’ hakili tun be sigi. N’ tun b’a ye ko n’ dusukun lafiyanin lo kosɔbɛ.” N’a sɔrɔ i t’a lɔn i bena min fɔ i ka deliliw la. N’o lo, masacɛ Dawuda ye delili minw kɛ k’a yira ko a nimisanin lo, i be se k’olu lajɛ Zaburuw 51 ani 65nan kɔnɔ.

To ka Bibulu sɛgɛsɛgɛ tuma o tuma. O bena i dɛmɛ ka kɛ ni limaniya barikaman ye ani i ka kanuya barika bena bonya Jehova koo la (Zab. 19:8-12). Filipe ko: “N’ tun tɛ to ka Bibulu kalan ani k’a sɛgɛsɛgɛ tuma o tuma. O lo y’a to n’ ka limaniya barika dɔgɔyara ani n’ ye Jehova hakɛ ta. N’ tun t’a fɛ o ɲɔgɔn ka n’ sɔrɔ tugun. O kama, n’ y’a latigɛ ka to ka kelenna kalan kɛ tuma o tuma.” Ele fana be se k’o ɲɔgɔn kɛ. N’a sɔrɔ i mako be dɛmɛ na walisa ka barokunw sugandi i ka kelenna kalan kama. N’o lo, dɛmɛ ɲini i teri dɔ fɛ min be jɛnɲɔgɔnya ɲuman kɛra ni Jehova ye.

Teriya kɛ kokura n’i balimaw ye. Minw kɔsegira kafo kɔnɔ, u dɔw b’a miiri ko kafoden tɔɔw diminin lo u kɔrɔ. Larissa ko: “Maloya tun be n’ na kojugu. A tun be n’ ɲɛɛ na ko n’ ye kafodenw janfa. N’ tora k’o miiri wagatijan kɔnɔ.” La a la ko diinan mɔgɔkɔrɔw ani kafoden tɔɔw b’a fɛ k’i dɛmɛ i ka teriya kɛ ni Jehova ye kokura. (Koorilen nin lajɛ: “ Diinan mɔgɔkɔrɔw be se ka min kɛ.”) U ninsɔn ka di sabu i kɔsegira Jehova ma ani u b’a fɛ i ka ninsɔndiya sɔrɔ!—Talenw 17:17.

Mun lo be se k’i dɛmɛ i k’i magwɛrɛ kosɔbɛ i balimaw na? To ka lajɛnw kɛ n’i balimaw ye ani waajuli kɛ n’u ye tuma o tuma. O bena i dɛmɛ cogo di? Felix ko: “Kafomɔgɔw bɛɛ tun kɔrɔtɔnin lo n’ ka kɔsegi Jehova ma. O y’a to n’ y’a ye ko u be n’ kanu. U bɛɛ ye n’ dɛmɛ n’ y’a ye ko n’ kɛra kafoden dɔ ye tugun, ko Jehova yafara n’ ma ani ko n’ be se ka to k’a sago kɛ.”—Koorilen nin lajɛ: “ I be se ka min kɛ.”

I b’a fɛ ka teriya kɛ ni Jehova ye kokura minkɛ, Sutana bena to ka gwɛlɛyaw lase i ma. A bena o kɛ walisa k’a ɲini k’o teriya nagasi (Luka 4:13). I be teriya min kɛra ni Jehova ye, to k’o sabati kabi sisan. O la, i labɛnnin bena to.

Jehova ye layidu ta a ka sagadenw koo la ko: “Min tununa, ne bena o yaala, min tagara yɔrɔ wɛrɛ, ne bena o gwɛn ka na. Ne bena saga mandimininw joliw furakɛ, ka saga barikatanw dɛmɛ.” (Ezek. 34:16). Minw tun y’u yɔrɔ janya Jehova la, a y’u caamanba dɛmɛ u kɔsegira a ma. La a la ko Jehova b’a fɛ k’i dɛmɛ i ka to ka jɛnɲɔgɔnya barikaman kɛ n’ale ye.