TO WHEMẸWHEMẸ, lẹngbọ vivẹ́ susu wẹ nọ yin gigọyí do agun mẹ. Yí nukun homẹ tọn do pọ́n lehe ‘ayajẹ nọ sù’ to olọn mẹ do to whenue dopodopo yetọn lẹkọ! (Luku 15:7, 10) Eyin a ko yin gigọyí, a gán deji dọ homẹ Jesu, angẹli lẹ po Jehovah lọsu po tọn nọ hùn nado mọdọ a lẹkọwa nugbo lọ mẹ whladopo dogọ. Amọ́, a gán pehẹ avùnnukundiọsọmẹnu lẹ dile a to haṣinṣan towe hẹ Jehovah hẹn lodo. Etẹwẹ yin delẹ to yé mẹ, podọ etẹwẹ gán gọalọna we?

Mẹsusu nọ diahi hẹ numọtolanmẹ agọ̀ to whenue yé ko lẹkọwa agun mẹ godo. Vlavo a gán mọnukunnujẹ numọtolanmẹ Ahọlu Davidi tọn lẹ mẹ. Etlẹ yin to whenue ylando etọn lẹ ko yin jijona ẹn, e dọmọ: ‘Nuṣiwa ṣie lẹ húagbọ́ mi.’ (Salm. 40:12; 65:3) To whenue mẹde ko lẹkọwa Jehovah dè godo, e gán gbẹ́ diahi hẹ numọtolanmẹ whẹhuhu kavi winyan tọn na owhe susu. Isabelle yin didesẹ sọn agun mẹ na owhe 20 linlán. * E dọmọ: “E vẹawuna mi taun nado kẹalọyi linlẹn lọ dọ Jehovah gán jona mi.” Eyin a gbọjọ, haṣinṣan towe hẹ Jehovah gán vọ́ gble whladopo dogọ. (Howh. 24:10) A dike enẹ ni jọ do gowe blo.

Na mẹdevo lẹ, azọ́n he e nọ biọ nado vọ́ haṣinṣan yetọn hẹ Jehovah jlado nọ gbàhundona yé. To whenue Antoine ko yin gigọyí godo, e dọ dọ, “N’do numọtolanmẹ lọ dọ n’ko wọn nulẹpo gando gbẹzan Klistiani tọn he n’ko zan wayi go.” Numọtolanmẹ mọnkọ lẹ gán zọ́n bọ mẹdelẹ na whleawu nado do mahẹ gigọ́ to nuwiwa gbigbọmẹ tọn lẹ mẹ.

Di apajlẹ, eyin mẹhe jẹhọn-ahizi hẹn owhé dagbedagbe etọn gble de lẹnnupọndo whenu gọna vivẹnudido he e na biọ nado vọ́ ẹ gbá ji, ehe gán húagbọ́ ẹ. Mọdopolọ, eyin ylando sinsinyẹn de ko  hẹn haṣinṣan towe hẹ Jehovah gble, a gán mọdọ e na biọ vivẹnudido susu nado gọ̀ jẹgangan to gbigbọ-liho. Amọ́, a ma to dewe ṣo.

Jehovah basi oylọna mí dọmọ: “Todin, mì wá na mí ni dọwhẹgbọ to míde ṣẹnṣẹn.” (Isa. 1:18) A ko dovivẹnu susu nado “dọwhẹgbọ” hẹ Jiwheyẹwhe. Jehovah yiwanna vivẹnu enẹlẹ he a do. Pọ́n bo: A ko na dodonu de Jehovah nado na gblọndo he họnwun taun de Satani gando whẹsadokọnamẹ etọn lẹ go!—Howh. 27:11.

Gbọnmọ dali, a ko dọnsẹpọ Jehovah dogọ, podọ e dopà nado dọnsẹpọ hiẹ lọsu. (Jak. 4:8) Amọ́, e ma ko pé nado yin yinyọnẹn taidi mẹhe lẹkọwa agun mẹ de poun. A dona to owanyi he a do na Otọ́ towe po Họntọn towe Jehovah po hẹn lodo zọnmii. Nawẹ a gán wà ehe gbọn?

Nọ dovivẹnu nado ze yanwle he sọgbe hẹ lẹnpọn dagbe lẹ dai. Nọ flindọ dodonu gbigbọmẹ tọn towe—enẹ wẹ oyọnẹn he a tindo gando Jehovah po opagbe etọn lẹ na sọgodo po go—gán gbẹ́ pò to finẹ. Amọ́, e na biọ dọ a ni vọ́ aliho gbẹninọ tọn Klistiani tọn towe jlado, podọ ehe bẹ yẹwheho wẹndagbe lọ tọn didọ gọna gbẹdido whẹwhẹ hẹ mẹmẹsunnu po mẹmẹyọnnu towe lẹ po hẹn. Lẹnnupọndo yanwle he bọdego ehelẹ ji.

Nọ dọhona Jehovah whẹwhẹ. Otọ́ towe mọnukunnujẹemẹ dọ numọtolanmẹ whẹhuhu tọn dido mapote gán hẹn ẹn vẹawuna we nado hodẹ̀ hlan emi. (Lom. 8:26) Etomọṣo, “nọ sinyẹnlin to odẹ̀ mẹ,” bo nọ dọna Jehovah obá he mẹ a jlo na vẹ́ po ewọ po jẹ. (Lom. 12:12) Andrej flin dọmọ: “N’nọ do numọtolanmẹ whẹhuhu tọn zẹjlẹgo bọ winyan sọ nọ hù mi. Amọ́, whenue n’hodẹ̀ godo, numọtolanmẹ mọnkọ lẹ nọ depò. N’nọ vò sọn ayiha mẹ dogọ.” Eyin a ma yọ́n nuhe a na dọ to odẹ̀ towe lẹ mẹ, bo lẹnnupọndo odẹ̀ lẹnvọjọ tọn Ahọlu Davidi tọn lẹ ji, ehe yin kinkandai to Salmu lẹ 51tọ po 65tọ po mẹ.

Nọ plọn Biblu to gbesisọ mẹ. Mọwiwà na hẹn we lodo to gbigbọ-liho bo nasọ gọalọna we nado hẹn owanyi towe na Jehovah jideji. (Salm. 19:7-11) Felipe dọmọ: “Aṣa gbigbọmẹ tọn lẹ he n’dovọ́na wẹ zọ́n bọ n’gbọjọ bo jo Jehovah do. N’ma jlo na vọ́ jai jẹ nuṣiwa dopolọ mẹ, enẹwutu, n’de nado ylọ oplọn mẹdetiti tọn dọ nujọnu.” Hiẹ lọsu gán wà nudopolọ. Eyin a do hudo anademẹ tọn nado mọ hosọ he yọ́n na oplọn mẹdetiti tọn towe lẹ, naegbọn a ma na biọ alọgọ họntọn he whèwhín de tọn?

Vọ́ jihọntọn hẹ mẹmẹsunnu po mẹmẹyọnnu towe lẹ po. Mẹhe lẹkọwa agun mẹ delẹ nọ hanú dọ mẹdevo lẹ na yí nukun agọ̀ do pọ́n emi. Larissa yigbe dọmọ: “Winyan nọ hù mi taun. E nọ ṣí na mi dọ n’blu agun lọ wẹ nkọ. Numọtolanmẹ ehelẹ dotukla mi na ojlẹ dindẹn.” Deji dọ mẹho lẹ po Klistiani he whèwhín lẹ po to jejeji nado gọalọna we dile a to gbigbọnọ-yinyin towe hẹn lodo whladopo dogọ. (Pọ́n apotin lọ “ Etẹwẹ Mẹho lẹ Gán Wà?”) Homẹ yetọn hùn dọ a ko lẹkọwa, podọ ojlo yetọn wẹ yindọ e ni pà we!—Howh. 17:17.

Etẹwẹ gán gọalọna we nado dọnsẹpọ agun lọ dogọ? Nọ tindo mahẹ gigọ́ to nuhe mẹmẹsunnu po mẹmẹyọnnu lẹ po to wiwà mẹ—enẹ wẹ opli lẹ yìyì gọna alọdido whẹwhẹ to lizọnyizọn lọ mẹ. Nawẹ ehe gán gọalọ gbọn? Felix dọmọ: “Agun lọ to nukundo dọ ma lẹkọ. N’mọdọ n’họakuẹ na yé. Yemẹpo wẹ gọalọna mi nado gọ̀ biọ whẹndo lọ mẹ whladopo dogọ, nado do numọtolanmẹ lọ dọ yè ko jona mi, podọ nado to nukọnyi zọnmii.”—Pọ́n apotin lọ “ Etẹwẹ A Gán Wà?”

Satani na zindonukọn nado to nuhe taidi jẹhọn-ahizi devo lẹ yizan nado hẹn we gbọjọ dile a to haṣinṣan towe hẹ Jehovah hẹn lodo whladopo dogọ. (Luku 4:13) A na wleawudai, eyin a hẹn gbigbọnọ-yinyin towe lodo todin.

Jehovah dopà ehe gando lẹngbọ etọn lẹ go dọmọ: “Yẹn na nọ dín dehe bu lẹ mọ bo na nọ gọ̀ dehe danbú lẹ wá apó lọ mẹ, yẹn na nọ blá apà na dehe gbleawu lẹ bo na nọ hẹn madogánnọ lẹ lodo.” (Ezek. 34:16) Jehovah ko gọalọna mẹsusu devo lẹ nado gọ̀ jẹgangan to gbigbọ-liho. Kudeji dọ e jlo na gọalọna hiẹ lọsu nado to haṣinṣan towe hẹ ewọ hẹn lodo zọnmii.