OMBURA aihe ovakarere va Jehova ovengi, ve kotorwa kombongo. Ripura ‘nenyando ndi kara meyuru’ indu tji va kotoka. (Luk. 15:7, 10) Indu tji wa kotorwa kombongo, mo yenene okukara nongamburiro kutja Jesus, ovaengeli na Jehova ve nondjoroka kutja oove orupa rwombongo rukwao. Posi yokutja, otja tji mo tungu oupanga woye ku na Jehova mape ya o munu omauzeu. Omauzeu ngo oo yeṋe, nu ovikwaye mbi mavi yenene okukuvatera?

Ovengi ve wa momuinyo kombunda ya indu tji va kotoka kombongo. Mape ya o zuu nawa ongaro Ombara David maari. Nandarire kombunda yokuisirwa omauvi we, eye wa tja: ‘Omauvi wandje ye ndji vaza.’ (Eps. 40:12; 65:3) Kombunda ya indu omundu tja kotoka ku Jehova, eye mape ya e rimunu ondjo oure wozombura ozengi. Omukazendu omukambure wena Isabelle, ngwa konderwe kombongo oure wozombura ape 20, * wa tja: “Ya ri ouzeu ku ami okuyakura kutja Jehova ma yenene okundjiisira.” Indu tji wa u momuinyo mape ya oupanga woye ku na Jehova au ngundipara rukwao. (Omiano 24:10) Kondja kutja otjiṋa ho atji ha tjitwa kove.

Varwe ve rikenda kutja kamaave yenene okutjita avihe mbi vi heperwa po okukara noupanga wopopezu ku na Jehova rukwao. Tjaa za nokukotorwa kombongo Antoine wa tja: “Ami mba zemba oviṋa ovingi mbi mbe rihonga, poo mbye tjiti indu tji mba ri Omuhongonone.” Mena rokukara noumune mbwo, tjiva kave yenene okuungurira Jehova otja pu mave yenene.

Otjotjihorera, indu ondjuwo yomundu tja haverwa i yotjivepo otjinamasa, eye mape ya au momuinyo indu tji me ripura ohunga noruveze noviṋa mbi ma hepa okutungurura ondjuwo. Momuano otjingewo, indu oupanga woye ku na Jehova tji wa ngundiparisiwa i youvi ounene, mape ya o munu kutja mape heperwa po oviungura ovingi okuṱuna oupanga mbwo. Posi yokutja ombatero opu i ri.

 Jehova u tja: “Indjeye tu tye otjiposa tjetu!” (Jes. 1:18) Ove wa ungura oukukutu ‘okutya otjiposa.’ Jehova we ku suvera mena rozongondjero nḓu tjita. Mena rokutja ove wa kotoka ku Jehova, Eye ma yenene okuraisa kutja Satan omunavizeze.—Omiano 27:11.

Mokukotoka ku Jehova ove wa tumbuka popezu na ye, neye wina ma tumbuka popezu na ove. (Jak. 4:8) O nawa varwe tji mave munu kutja wa kotoka kombongo, posi yokutja pe noviṋa varwe mbi mo sokutjita. Mo hepa okukayenda komurungu okupamisa orusuvero rwoye ku Jehova. Omomuano uṋe mu mo yenene okutjita nao?

Kondja okutwa po ozondando ozombwa. Ove mape ya u zemburuka oviṋa mbi we rihonga ohunga na Jehova nomakwizikiro we wOparadisa. Posi yokutja nai ove mo hepa okuuta okuzuvarisa rukwao, okuyenda kozombongarero zombongo nokukara pu novakambure ovakweṋu. Tara kozondando nḓu maze kongorere mba.

Kumba aruhe. Tate woye womeyuru u tjiwa nawa kutja okurimuna ondjo maku yenene okutjita kutja i rire ouzeu kove okukumba ku ye. (Rom. 8:26) Nandarire nao, ‘panḓera pokukumba’ mokumuraera omuano ove mu mo vanga okurira epanga re. (Rom. 12:12) Andrej wa tja: “Ami ee rimunu ondjo tjinene nu ee ṱohoṋi. Posi yokutja aruhe tji mba zu nokukumba, hee kara nomeripura ngo rukwao nee kara nohange momuinyo.” Tji u hi nakutjiwa kutja ngo kumbe ohunga na i ye, tara kozongumbiro zOmbara David nḓa tjangwa mEpsalme 51 no 65.

Konḓonona Ombeibela aruhe. Okutjita nao maku ku vatere okukara nongamburiro yomasa nokukurisa orusuvero rwoye ku Mukuru. (Eps. 19:7-11) Omurumendu omukambure wena Felipe wa tja: “Mena rokutja hee lese Ombeibela yandje aruhe nokuikonḓonona, mba ngundiparere mongamburiro nu mba hihamisa Jehova. Ami hee vanga okutjita ondataiziro ndjo rukwao, ku nao ee tjiti omakonḓononeno wandje wOmbeibela aruhe.” Ove mo yenene okutjita nao wina. Indu tji mo hepa ombatero, mo yenene okuningira omundu ngu noupanga ouwa ku na Jehova okukuvatera okutoorora omapu ngu mo yenene okuungura momakonḓononeno woye.

Tunga oupanga woye ku na ovakambure ovakweṋu. Tjiva mbe kotoka kombongo ve rikenda kutja varwe mave kara noumune ouvi ohunga na wo. Larissa wa tja: “Ami ee ṱohoṋi nee munu kutja mba hihamisa ovakambure ovakwetu mombongo. Mba ri noumune mbwo oure woruveze orure.” Kara nongamburiro kutja ovanene vombongo na varwe ve vanga okukuvatera okutunga oupanga woye ku na Jehova. (Lesa okawongo nga, “ Ovikwaye ovanene vombongo mbi mave yenene okutjita?”) Owo ve tjaterwa kutja wa kotoka kombongo nu ve vanga kutja u kare nondjoroka.—Omiano 17:17.

Ovikwaye mbi mavi tjiti kutja u tumbuke popezu nombongo? Okuyenda kozombongarero zombongo aruhe ku na ovakambure ovakweṋu nokupita pu na wo aruhe motjiungura tjokuzuvarisa. Okutjita nao maku ku vatere vi? Felix wa tja: “Indu tji mba kotoka, ombongo ye ndji yakura nawa nee munu kutja mba suverwa. Owo avehe ve ndji vatera okumuna kutja owami orupa rwombongo rukwao, kutja Jehova we ndji isira nokutja me yenene okukayenda komurungu okumukarera.”—Lesa okawongo nga, “ Ove mo yenene okutjita vi?”

Satan ma kayenda komurungu okukuhindira “ovivepo ovinamasa” poo omauzeu okukungundiparisa otja tji mo tungu oupanga woye ku na Jehova. (Luk. 4:13) Rirongera okupamisa oupanga woye ku na Jehova nai.

Jehova wa kwizikira ovakarere ve omambo nga: “Ami me kapaha ozonḓu inḓa nḓa pandjara, e kakotora inḓa nḓa pizuka, e panga inḓa oviṱeṱu nu e verukisa inḓa nḓa vera.” (Esek. 34:16) Jehova wa vatera varwe ovengi okuṱuna oupanga wawo ku na ye. Kara nongamburiro kutja eye u vanga okukuvatera okukayenda komurungu okutunga oupanga oupame ku na ye.