KADA ragun, aru i karneru nga metoli ta kongregasion. “Dakal i pagayaya ta langi” kada mesimmu yatun! (Luc. 15:7, 10) Nu tadday ka ta netoli, makasiguradu ka nga magayayya si Jesus, i anghel ira, anna si Jehova megafu ta parte ka ngana uli na kongregasion. Ngem durante nga pakappiammu i pakikkofummu kani Jehova, awayya na tu meparubakka ta kapurueba ira. Anni danatun nga kapurueba anna anni i makoffun ta nikaw?

Aru nga wawwaragi tam i makatageno tu pakkafi na nono maski nu netoli ngana ira ta kongregasion. Nu tadday ka ta nira, siguradu nga malippawa mu i natageno ni Patul David. Maski nu napakoma ngana yayya ta liwi-liwa na, kinagi na: “Natavvanan ngà ta katagaruliak-ku ira.” (Sal. 40:12; 65:3) Maski nu nanoli ngana i tadday kani Jehova, awayya na nga makokkonsensia lagapa yayya onu mappasiran maski mappasa i piga nga ragun. Kinagi ni Isabelle * nga nadisfellowship ta maturu tu 20 ragun: “Ari ngà kumbinsidu nga napakoma ngà ngana ni Jehova.” Nu makkafi i nono mu, awayya na nga makkafi mangana i espiritualidad mu. (Prov. 24:10) Ariammu nakuan ipamavulun yatun.

Mavurung i karuan ta baka ariadda makua i kawagan tapenu pakappian i relasiodda kani Jehova. Tagga ta netoli si Antoine, kinagi na: “Gitta na nakattamakku ngana nu kunnasi i mabbalin tu Saksi.” Kunnatun i matageno na karuan yatutta magalangan ira nga makiparte ta ngamin nga espiritual nga aktibidad.

Nonopammu yaw: Nu nadaral i balem megafu ta masikan nga bagiu, baka matageno mu nga aru nga tiempo i mawag anna aru i makua tapenu pakappian anna mepataddag yatun uli. Kunnatun  gapa nu nadaral i pakikkofummu kani Jehova megafu ta madammo nga liwa. Awayya na nga matageno mu nga napakaru i mawag nga makua tapenu metoli anna pakappian yatun. Ngem ari ka nga magitetadday ta pangngua tatun.

Imbitan ittam ni Jehova: “Umay kamu ngana taw, itunuttam i ganna-gannug ta nallatanattam.” (Isa. 1:18) Nikagumammu ngana nga ‘itunung i ganna-gannug’ yayya nga iddeddu naka ni Jehova. Daddammammu yaw: Megafu ta nanoli ka ngana kani Jehova, mapakurug na nga laddug si Satanas!—Prov. 27:11.

Megafu tatun nga kiningnguam, mas nga minaranni ka kani Jehova anna nipromesa na nga umaranni gapa yayya ta nikaw. (Sant. 4:8) Makasta gapa nu masingan na karuan nga netoli ka ngana ta kongregasion. Ngem ari tu makalanno yatun. Mawag gapa nga paladdammu i pangaya mu ta Yamam anna Kofummu nga si Jehova. Kunnasim nga makua yatun?

Siguradu nga ari nga nadaral i espiritual nga fundasiommu. Ammammum lagapa si Jehova. Ammum gapa i promesa na ira ta mappange. Ngem egga laman i mawag tu pakappiammu ta espiritual nga rutinam gitta na pallayyagayya anna pakikavulu ta wawwaragi. Puruebammu yaw ira nga goal.

Kanayun nga makibbida kani Jehova. Malippawa na Yamam nu marigatakka nga makimallo megafu ta makokkonsensia ka. (Roma 8:26) Ngem ‘maddasal ka ta maski anni nga tiempo,’ anna kagiammu kani Jehova nga kakayà mu itoli i pakikkofummu ta nisa. (Roma 12:12) Nanono ni Andrej: “Sobra i pakkakonsensià anna pasirakku. Ngem kada makimallo ngà, mawawan yatun nga panageno ku anna mas nga memammo i appana-panono ku.” Nu ariammu ammu nu anni i ipakimallo mu, makoffun nu pannonopammu i pakimallo ira ni Patul David nga netura ta Salmo 51 anna 65 nga mangipasingan ta pabbabawi na.

Kanayun nga gigiammuan i Biblia. Moffunan naka natun tapenu malladda i pangurug anna pangaya mu kani Jehova. (Sal. 19:7-11) “Nakkafi ngà ta espiritual anna natakitakku si Jehova megafu ta awan tu regular nga pabbibbig ku tu Biblia anna personal study,” kunni Felipe. “Manaki ku nga matakitan uli si Jehova yari tu siniguradù nga egga ngana i regular nga personal studỳ.” Makuam gapa yatun. Nu marigatakka nga mannono nu anni i ipersonal studym, awayyam i mappoffun ta tadday nga manakam ta espiritual.

Itolim i pakikkofummu ta wawwaragi. Mavurung i karuan nga netoli ta kongregasion megafu ta abbo da nga mataki i nono na wawwaragi ta nira. Kinagi ni Larissa: “Sobra i pasirakku. Nononopakku nga nadismayà i wawwaragi. Mabayag nga kunnatun i natageno ku.” Ngem ta kakurugan na, kakayà naka nga uffunan na elder ira anna na wawwaragi tapenu mapakappian i espiritualidad mu. (Innan i kahon nga “ Anni i Meyuffun na Elder Ira?”) Magayayya ira megafu ta nanoli ka anna kayà da gapa nga magayayya ka!—Prov. 17:17.

Anni gafu i kuammu tapenu mas maddukko ka ta wawwaragi? Kanayukka nakuan nga makistudy anna makiparte ta ministerio. Anni i meyuffun natun? Kinagi ni Felix: “Iinnaggan na kongregasion i panolì. Talaga iddeddu dà. Nipatageno da ta nio nga parte ngà ngana uli na kongregasion, napakoma nà ngana ni Jehova, anna awayyà mangana i masserbi ta nisa.”​—Innan i kahon nga “ Anni i Makuam?”

Ari nga magimmang si Satanas nga iddakka tu gitta na bagiu ira nga problema tapenu makkafi ka durante nga pakappiammu i pakikkofummu kani Jehova. (Luc. 4:13) Siguraduammu gafu nga mas maladda ngana sangawe i pakikkofummu kani Jehova.

Kunnaw i kagian ni Jehova nga kuan na ta karneru na: “Alegakku i nawawwan, itolì i neyarayyu, babbaddakku i nabigaran, anna pasikannakku i makafi.” (Eze. 34:16) Aru ngana i noffunan ni Jehova tapenu pakappian i relasiodda ta nisa. Magga kakayà naka gapa nga uffunan tapenu mas malladda i relasiommu ta nisa.