IHAYI doodu, é gē hi alɛwa ku ala nōo cɛgbá nɛhi higwu wa ipu ujɔ cigbihi. Gbɛla lɛyikwu ɛdɔ ‘eeye nɛhi nōo géē yɔ ɔkpanco’ eko duuma nɛ eyeeye ku uwa le cigbihi a! (Ulúk. 15:7, 10) Ɔdaŋ ka é lɛ uwɔ higwu wa ipu ujɔ cigbihi, le jé kpɔcii ka Ujisɔsi, aalelekwu otɛhɔ mla Ujehofa gē gweeye nɛhi ku a wɛ ipu ujɔ a kpɔ. Amáŋ, abɔ a yɔ i ya ku ɛma ku uwɔ mla Ujehofa kóō lɔfu kpɔ a, a lɔfu má unwalu. Ɔdi wɛ unwalu a, ɔdi kē gáā lɔfu ta uwɔ abɔ a?

Ɔtu gē gbenyi lɛ ɛyinɛhi ku ayinɛ alɔ kpɔ, igbihi néē le cigbihi wa ipu ujɔ a. A jé ŋ, a jé ɛgɛ nɛ ɔtu ya Udefidi nōo wɛ ɔcɛ́ a. Naana nɛ Ujehofa kwu íne obiya ku nu i ya ɔ ɛhi a, ó kahinii: “Íne nɛ̄ n bīya ā le um kwú.” (Aíjē 40:12; 65:3) Igbihi nɛ ɔcɛ le cigbihi gā ɛgiyi Ujehofa, ɔtu lɔfu ŋmo ɔ ɛpɔbi amāŋ uweyi lɔfu ya ɔ ihayi alɛwa. Isabelle wɛ ɔcɛ néē le taajɛ ŋma ipu ujɔ fiyɛ ihayi ɔfu (20). * Ó kahinii: “Ó lɔnɔ tu um ō miyɛ cɛ ku Ujehofa géē je íne obiya ku um ya um ɛhi.” Ɔdaŋ ku ɔtu le gbenyi gā uwɔ, ɛma ku uwɔ mla Ujehofa i gáā lɔfu ŋ. (Aíit. 24:10) Ceyitikwu ku a hii cɛ lɛ ɔɔma ya ŋ.

Ācɛ ɔhá gē lɛ ɔtooplico ku uwa i gáā lɔfu ya ɛjɛɛji ɔdā nōo cɛgbá, kéē lɛ ɛma olɔhi mla Ujehofa gla gɛ ŋ. Igbihi néē lɛ Antoine higwu wa ipu ujɔ cigbihi a, ó kahinii: “N kwu ɛyinɛhi ku aɔdā nɛ um nwu amāŋ ya eko nɛ um wɛ éyi ku Ācɛ Ocijali a i kpo mlanyi ɛ.” Ohigbu ku ɔtu gē ya ācɛ ōhī lɛ a, é gē ya ɔdā néē ya gla lɛ Ujehofa ŋ.

Ocabɔ mafu, ɔdaŋ ku owu nɛhi éyi nōo ta a kwu ɔlɛ ɔcɛ u cataajɛ, ɔtu lɔfu biya lɛ ɔcɛ ɔɔma nɛɛnɛhi eko duuma nɛ ó gbɛla lɛyikwu eko, mla uklɔ nōo géē cɛgbá kē bi le gwo ɔlɛ ɔɔma kpɔ a. Ɔwɛ ekponu ɔɔma, ɔdaŋ ku íne nɛ a biya bɔbi bɔbi a kwu ɛma  ku uwɔ mla Ujehofa u biya, ɔtu lɔfu ya uwɔ ka ó géē cɛgbá oceyitikwu nɛhi, o lɛ ɛma ku uwɔ mla Ujehofa glaya kpɔ. Amáŋ a gáā cɛgbá ō ya ɛnyā foofu uwɔ ŋ.

Ujehofa yɔ i hi alɔ higwu kahinii: ‘Aá wā kú alɔ gbo ojuju.’ (Ayis. 1:18) A humayi ceyitikwu lɔfu lɔfu cɛɛ ku a “gbo ojuju” mla Ujehofa ɛ. Ujehofa yihɔtu uwɔ abɔ a ya ɔɔma a. Gbɛla tu ɛlā nyā ɛ: Ohigbu ku a le cigbihi gā ɛgiyi Ujehofa a, ó lɔfu bi uwɔ le ya ocabɔ, ō mafu ka Ebilii wɛ ɔcɛ ō kɛmgbɛ!​—Aíit. 27:11.

Ohigbu ku a le cigbihi gā ɛgiyi Ujehofa a, ó cokonu ku anuɔ géē tubla uwɔ ajaajɛ. (Ujɛ́m. 4:8) Ó wɛ ɔdā olɔhi nɛhi abɔ ācɛ ɔhá yɔ i má uwɔ ku a le cigbihi wa ipu ujɔ kpɔ a. Amáŋ ó lɛ ɔda ɔhá nɛ a klla cika ō ya kpɔ. A cika ō gɔbu yɔ i ya ku ihɔtu nɛ a lɛ lɛ Ujehofa nōo wɛ adā mla ɔya ku uwɔ a kóō lɔfu tōōtɔ̄ɔ̄. Ɛgɛnyá nɛ a lɔfu ya ɛnyā a?

Bi ijeeyi le ya ōmiya nɛ a jé ku a géē ya jila. A jé ŋ, a blakwu aɔdā okpɔcii nɛ a nwu lɛyikwu Ujehofa, mla okonu ō ce ku nu ō je ɛcɛ nyā piya uparadais a kpɔ ɛ. Amáŋ babanya, a cika ō lɛ ɛnɛɛnɛ ōmiya kpɔ. Ocabɔ mafu, ō tɔɔna eko doodu, ō gā ōjila ku ujɔ, mla ō lɛ eko taajɛ ō yɔ tɔha mla ayinɛ uwɔ nōo yɔ ipu ujɔ a. Leyi má aōmiya nōo ba nyā ɛ.

Kɛla lɛ Ujehofa eko doodu. Ujehofa nōo wɛ adā a uwɔ jé, ka ɔdaŋ ku ɔtu gē ŋmo uwɔ ɛpɔbi ohigbu ɔdā nɛ a ya bɔbi a, ó géē ya kóō lɔnɔ tu uwɔ ō gbɔɔkɔ lɛ ɔ. (Uróm 8:26) Amáŋ, ‘a híī hɛ́ bené ŋmá ɔkɔ nɛ̄ a ī gbā ā ŋ́.’ Bēē da Ujehofa ɛgɛ nɛ a cɛgbá kóō wɛ ɔya ku uwɔ a. (Uróm 12:12) Andrej kahinii: “Ɔtu gē ŋmo um ɛpɔbi nɛɛnɛhi, klla gē cɛ lɛ uweyi kwu um. Amáŋ igbihi nɛ um lɛ ɔkɔ gba, ɔtu i gē ya um lɛ a gɛ ŋ. N gē lɛ ɛbɔ ku ɔtu fiyɛ otɛtɛ.” Ɔdaŋ ku á jé ɔdā ō gbɔɔkɔ lɛyikwu ɔ ŋ, gbɛla lɛyikwu ɔkɔ ō gba ku Udefidi ɔcɛ́ eko nɛ ó lɛ opiyabɔ ya, nōo yɔ ipu ɔkpá ku Aíjē Kú Ɛ̄gbā 51 mla 65 a.

Ya oklɔcɛ ku Ubáyíbu ɛ̄cī doodu. Ɛnyā géē ta uwɔ abɔ ku a lɛ ɔtu okpoce olɔfu, klla géē tabɔ ya ku ihɔtu nɛ a lɛ lɛ Ujehofa a kóō lɔfu tōōtɔ̄ɔ̄. (Aíjē 19:7-11) Felipe kahinii: “Ohigbu ku ń lɛ ōmiya ku Ubáyíbu ō jé mla oklɔcɛ ku abɔyi um ɛ̄cī doodu ŋ ma, ya ɛɛ nɛ ɔtu okpoce ku um i lɔfu ŋ, nɛ um klla lɛ Ujehofa abɔ gaajɛ a. Ń dɔka ō biya Ujehofa ɔtu gɛ ŋ, ohigbu ɔɔma, n lɛ ɔ ya ōmiya ku um ō ya oklɔcɛ ku abɔyi um ɛ̄cī doodu.” A ya ɔdā ekponu ɔɔma gla. Ɔdaŋ ku a cɛgbá otabɔ ō fu ikpɛyi ɛlā nɛ a géē bi le ya oklɔcɛ ku abɔyi uwɔ, a lɔfu da ɔya ku uwɔ nōo lɛ ɛma olɔfu mla Ujehofa ɔka kóō ta uwɔ abɔ.

Lɛ ɛma ku uwɔ mla ayinɛ uwɔ nōo yɔ ipu ujɔ a glaya. Ācɛ ōhī nōo le cigbihi wa ipu ujɔ a gē lɛ ɔtooplico ku ācɛ ɔhá géē cɔnu mla uwa. Larissa kahinii: “Uweyi kwu um nɛhi. Ɔtu ya um bɛɛka n kwu ayinɛ um nōo yɔ ipu ujɔ a abɔ u gaajɛ a.” Amáŋ le jé kpɔcii ku anyakwɔcɛ ku ujɔ mla ācɛ ɔhá dɔka ō ta uwɔ abɔ, o ya ɛɛ ku a lɛ ɛma ku uwɔ mla Ujehofa glaya. (Má ikpati nōo kahinii: “ Ɔdi Nɛ Anyakwɔcɛ Ku Ujɔ Lɔfu Ya A?”) É gweeye nɛhi ku a le cigbihi wa ipu ujɔ, é kē dɔka ku a lɛ eeye duu!​—Aíit. 17:17.

Ɔdi lɔfu pi uwɔ bla ujɔ ajaajɛ a? Gā ɛjɛɛji ōjila mla ayinɛ uwɔ nōo yɔ ipu ujɔ a, ku a klla bēē gɛɛcɛ ku uklɔ ku ɔna ō ta mla uwa eko doodu. Ɛgɛnyá nɛ ɛnyā lɔfu tabɔ a? Felix kahinii: “Ujɔ a yɔ i leyice eko nɛ um géē cigbihi a. Ɛnyā mafu gā um kē yihɔtu um nɛhi. É ta um abɔ ku um jé ku um wɛ ipu ujɔ a kpɔ, ku Ujehofa kwu inyileyi ku um i ya um ɛhi ɛ, ku um klla lɔfu gɔbu yɔ i gba Ujehofa ɛ̄gbā kpɔ.”​—Má ikpati nōo kahinii: “ Ɔdi Nɛ A Lɔfu Ya A?”

Ebilii géē gɔbu yɔ i bi unwalu alɛwa gē lɛ uwɔ, o ya ɛɛ kóō cɛ lɛ ɛ̄jɛ̄ jɛ uwɔ abɔ a yɔ i ya ku ɛma ku uwɔ mla Ujehofa kóō lɔfu kpɔ a. (Ulúk. 4:13) Lɛ otutu ya ŋma lɛ ō ya ku ɛma ku uwɔ mla Ujehofa kóō lɔfu tōōtɔ̄ɔ̄ babanya.

Lɛyikwu ala ku nu, Ujehofa kahinii: “N géē tíne aálá nēe gebí ā, í kpó aɛ́nɛ̄ e yɔ̄ ī bī ā kwúcē wā ɔlɛ́, í tá ágbe kú aɛ́nɛ̄ e lɛ ágbe ā, klla í nya aɛ́nɛ̄ e gē doōcē ā tá.” (Isík. 34:16) Ujehofa lɛ otabɔ je lɛ ācɛ alɛwa, o ya ɛɛ kéē lɛ ɛma ku uwa mla ɔ glaya ɛ. Le jé kpɔcii ka ó dɔka ō ta uwɔ abɔ, o ya ɛɛ ku ɛma nɛ a lɛ mla ɔ a ka ó yɔ i lɔfu tōōtɔ̄ɔ̄.