SHANING shagu manu dan ai sagu law law gaw, Hkristan nawku hpung de bai shang wa ma ai. Marai langai bai wa shagu, “sumsing lamu kata e grau nna kabu gara shara rai” nga na hpe shingran yu mai ai. (Luk 15:7, 10) Nang gaw nawku hpung de bai wa ai wa rai yang, nang tengman ai maga bai tsap ai majaw, Yehowa, Yesu, lamu kasa ni grai kabu nga na hpe kam u. Raitim, Yehowa hte hku hkau lam bai kaja hkra galaw ai shaloi, mayak mahkak ni hkrum chye ai. Mayak mahkak nkau gaw hpa ni kun? Hpa gaw karum ya lu ai kun?

Nawku hpung de bai wa ai ni gaw, tinang a n kaja ai myit jasat ni hpe ninghkap ra chye ai. Hkawhkam Dawi a hkamsha lam hpe nang chye na na re. Mara raw hkrum ai hpang hta pyi, “nye a yubak ngai hpe lep ni ai” ngu Dawi tsun ai. (Shk 40:12; 65:3) Marai langai gaw, Yehowa hpang bai wa ai hpang hta pyi, mara nga ai, kaya ai ngu ai hkamsha lam ni shaning law law matut nga chye ai. “Yehowa mara raw ya ai hpe hkap la na matu grai yak ai” ngu 20 ning jan shapraw hkrum ai Isabe tsun ai. * Nang myit htum nga yang, wenyi lam hta bai gawngkya mat chye ai. (Gsh 24:10) Dai zawn byin na ahkang hkum jaw.

Nkau gaw Yehowa hte hku hkau lam bai kaja hkra, ra ai lam yawng hpe n lu galaw ai ngu hkamsha ma ai. Nawku hpung de bai wa ai hpang, “moi galaw wa ai lam yawng malap kau sai zawn re” ngu Antoi tsun ai. Dai hkamsha lam ni a majaw, wenyi lam hta shang lawm na matu nkau mi htingnut chye ai.

Hariking nbung laru a majaw, tinang a nta grai htenza mat ai ngu saga. Bai gram na matu, aten hte n-gun atsam kade daram ma na hpe myit dat ai shaloi, myit tsang chye ai. Dai hte maren, mara  kaba galaw hkrup ai majaw, Yehowa hte hku hkau lam grai htenza mat ai nga yang, bai kaja hkra gawgap na matu grai shakut ra na ngu hkamsha chye ai. Raitim, karum shingtau lu mai ai.

“Sa ma rit, anhte a manghkang hpe hparan saga” ngu Yehowa saw shaga da ai. (Esa 1:18, NWT) “Manghkang hpe hparan” na matu nang shakut wa sai. Dai zawn shakut wa ai majaw, nang hpe Yehowa tsawra ai. Satan gaw masu ai wa re ai hpe bai htang lu sai.​—Gsh 27:11.

Yehowa hpang de bai wa ai hku nna, Karai Kasang hpang de nang sit sa wa sai. Karai Kasang mung, nang hpang de sit wa na ngu ga sadi jaw da ai. (Yak 4:8) Hpung shang masha byin sai ngu sawn la hkrum ai gaw kaja ai. Raitim, dai hta n-ga galaw ra ai lam ni naw nga ai. Kawa mung, Jinghku mung re ai Yehowa hpe tsawra ai myit law htam wa hkra galaw ra ai. Gara hku galaw na kun?

Dep lu ai bandung ni jahkrat u. Yehowa a lam, htawm hpang ga sadi ni a lam zawn re ai machye machyang ni hpe nang naw dum nga na re. Raitim, kabu gara shiga ayan hkaw tsun ai, zuphpawng lung ai, hpunau nauna ni hte kanawn ai zawn re ai Hkristan prat hkrum lam hpe bai galaw ra ai. Lawu na bandung ni hpe myit yu u.

Yehowa hte chyahkring hkring ga shaga u. Mara nga ai ngu hkamsha taw ai majaw, akyu hpyi na matu yak chye ai hpe Kawa Yehowa chye na ai. (Rom 8:26) Raitim, Yehowa hte kade daram hku hkau mayu ai lam tsun dan nna, “akyu hpyi ai hta htep lahti tut rai” nga u. (Rom 12:12) “Mara grai kaba ai ngu hkamsha ai. Kaya mung kaya ai. Raitim, akyu hpyi ngut shagu, dai hkamsha lam yawm mat ai. Grau nna myit simsa wa ai” ngu Andre tsun ai. Hpa hpyi ra na hpe n chye yang, Shakawn 51 hte 65 hta lawm ai, Hkawhkam Dawi a myit malai hte seng ai akyu hpyi ga ni hpe bai dinglik yu u.

Chyum Laika ayan hkaja u. Dai gaw makam masham ngangkang na matu, Yehowa hpe tsawra ai myit grau law htam wa na matu, karum ya na re. (Shk 19:7-11) “Ayan galaw ai wenyi lam ni hpe shawng n tawn ai majaw, makam masham gawngkya wa nna, Yehowa myit hkra machyi hkra galaw hkrup wa ai. Dai zawn, n kam shut sai. Dai majaw, ayan hkaja na matu dawdan da ai” ngu Hpilipi tsun ai. Nang mung dai zawn galaw lu ai. Hpa lam hkaja ra na hpe n chye yang, kunghpan ai manang langai kaw karum hpyi u.

Hpunau nauna ni hte bai hku hkau hkra shakut u. Nawku hpung de bai wa ai nkau gaw, tinang hpe kaga ni n kaja ai hku mu na hpe tsang ma ai. “Ngai grai kaya ai. Nawku hpung hpe sadi run ai wa ngu hkamsha ai. Aten grai na hkra dai zawn hkamsha ai” ngu Larisa tsun ai. Yehowa hte nang hku hkau lam bai kaja hkra myitsu salang ni hte kaga kunghpan ai ni karum ya mayu ai hpe kam u. (“ Myitsu Salang Ni Galaw Lu Ai Lam” ngu ai lawk hpe yu u.) Nang bai wa ai majaw shanhte kabu nga ai. Nang hpe mung kabu shangun mayu ai.​—Gsh 17:17.

Hpunau nauna ni hte hku hkau hkra hpa galaw lu ai kun? Zuphpawng, hkaw tsun bungli ni zawn re ai nawku hpung galaw ai lam ni hta ayan shang lawm u. Dai gaw gara hku karum ya lu ai kun? “Ngai bai wa na hpe nawku hpung myit mada nga ai. Manu shadan hkrum ai ngu hkamsha ai. Mara raw hkrum ai ngu hkamsha lu hkra, nta masha byin hkra, matut hkawm sa lu hkra, yawng jawm karum ya ai” ngu Hpilip tsun ai.​—“ Nang Galaw Lu Ai Lam” ngu ai lawk hpe yu u.

Yehowa hte hku hkau lam bai kaja hkra, shakut nga ai shaloi, nang gawngkya mat hkra, “manghkang ni” langai hpang langai Satan byin shangun chye ai. (Luk 4:13) Tinang a makam masham ngangkang hkra galaw da ai hku nna shajin da u.

Yehowa ndai hku ga sadi jaw da ai: “Dam mat ai sagu hpe hkan tam na nngai; masha ni gau mat wa ai sagu hpe, hkan mawai la na nngai: nra daw ai sagu hpe ahkyen kayawp na nngai: gawng kya ai sagu hpe n-gun shaja na nngai.” (Eze 34:16) Tinang hte hku hkau lam kaja hkra galaw ai ni hpe Yehowa karum ya wa ai. Nang hpe mung karum ya na ngu ai hpe kam u.