KĨLA mwaka, aingĩ nĩmatũngawa kĩkundinĩ kya Kĩklĩsto na methĩawa me malondu ma vata mũno. Kwasũanĩa ũndũ kwĩthĩawa “ũtanu mwingĩ ĩtunĩ” yĩla ũmwe wasyoka! (Luka 15:7, 10) Ethĩwa wĩ ũmwe ũnatũngiwe, ĩkala ũte na nzika kana Yesũ, alaĩka, na Yeova mwene nĩmatanaa kwona ũnoosie ĩtambya ũlũmany’e na ũla w’o ĩngĩ. Ĩndĩ nũtonya kũkomana na mawetu mana yĩla ũendeee kũtũngĩĩa ngwatanĩo yaku na Yeova. Mawetu asu nĩ ta meva, na nĩ kyaũ kĩtonya ũkũtetheesya ũmasinde?

Aingĩ nĩmekalaa makw’ĩte ngoo o na ĩtina wa kũtũngwa kĩkundinĩ. Nũtonya kwĩthĩwa wĩw’aa o ta Mũsumbĩ Ndaviti. O na ĩtina wa kũekewa naĩ syake, aisye: “Naĩ syakwa ningwatĩte ũkethĩa o na nditonya kwona kĩndũ.” (Sav. 40:12, The Holy Bible in Current Kikamba Language; 65:3) Ĩtina wa mũndũ kũmũsyokea Yeova, nũtonya kwĩkala myaka mingĩ ayĩandũĩka kana ayĩw’a nthoni. Kwasũanĩa ĩũlũ wa Isabelle, ũla wekalile e mũtenge kwa myaka mbee wa 20. * Aisye, “Neew’aa ve vinya mũno kũĩkĩĩa kana Yeova no andekee.” Wakw’a ngoo, nĩ laisi mũno ngwatanĩo yaku na Yeova ĩkonza ĩngĩ. (Nth. 24:10) Kwoou mwa ndũketĩkĩle kĩu kĩkĩke.

Kĩngĩ kĩemeeaa angĩ nĩ kũsũanĩa kĩthito kĩla maĩlĩte kwĩkĩa mayĩsa kũtw’ĩka nĩmeethĩwa na ngwatanĩo nzeo na Yeova ĩngĩ. Mwana-a-asa wĩtawa Antoine atũngwa aisye, “Maũndũ onthe ala neemanyĩĩtye na neekaa nĩ Mũklĩsto nĩ ta maĩ moolile.” Kĩu no kĩtume amwe makĩa kwĩlikya maũndũnĩ ma kĩ-veva na ngoo yonthe.

Kwasũanĩa nyũmba yaanangwa mũno nĩ kĩuutani.  Mwene no akw’e ngoo mũno asũanĩa ĩvinda na kĩthito kĩla kĩkwendeka ayĩsa kũtw’ĩka nĩwamĩtũngĩĩa. O ta ũu, ethĩwa ngwatanĩo yaku na Yeova nĩyaanangiwe nĩ naĩ ngito, nũtonya kwĩw’a wĩ wĩa mwingĩ kũmĩtũngĩĩa. Ĩndĩ manya kana ndwĩtethya wĩa ũsu wĩ weka.

Yeova atwĩĩte atĩĩ: “Ũkai yu, tũsũanĩe vamwe.” (Isa. 1:18) Yu tũũneena, ‘nũsũanĩĩte vamwe’ na Yeova, kana kwa ndeto ingĩ, nĩwĩkĩĩte kĩthito ũkalũnga maũndũ vamwe nake. Yeova nũkwendete mũno nũndũ wa kĩthito kĩu. Kwasũanĩa ũndũ ũũ: Nũndũ wa ĩtambya yĩu wosete, Yeova e na kĩtumi kĩanu kya kũĩkĩĩthya kana Satani nĩ mũkengani!—Nth. 27:11.

Ĩtambya yĩu wosete nĩyĩtumĩte ũmũthengeea Yeova, nake nũkwathĩte kũũthengeea. (Yak. 4:8) Ĩndĩ o na kau ala angĩ nĩmeũtana kwona ũnatũngiwe, kĩu kĩitoetye. No nginya ũendeee kwĩkĩa kĩthito ũmwende mũnango Ĩthe waku na Mũnyanyau, Yeova. Nĩ kyaũ kĩtonya ũkũtetheesya?

Tata wĩvangĩĩe maũndũ ũtonya kwĩanĩsya. Nũtonya kwĩthĩwa ũtaaũlwa nĩ maũndũ ma mũsingi ala weemanyĩisye ĩũlũ wa Yeova na mawatho make ma ĩvinda yũkĩte. Ĩndĩ, nĩwaĩle kwĩkĩa kĩthito ũsyokee kĩmanyĩo kyaku kya kwĩka maũndũ ta kũtavany’a ũvoo mũseo, kũthi maũmbanonĩ, na kũtindany’a na ana-a-asa na eĩtu-a-asa. Kwasũanĩa maũndũ aa ũtonya kwĩvangĩĩa.

Mũvoyae Yeova kĩla ĩvinda. Ĩthe waku wa ĩtunĩ nĩwĩsĩ kana no ũemwe nĩ kũmũvoya nũndũ wa kwĩw’a ũiandũĩka mũno. (Alo. 8:26) Ĩndĩ ‘mũvoye na kĩthing’ĩĩsyo,’ na ũimũtavya ũndũ ũkwĩw’a ũyenda mũtume ndũũ ĩngĩ. (Alo. 12:12) Andrej aĩtye ũũ: “Naandũĩkaa mũno na neew’aa nthoni mbingĩ vyũ. Ĩndĩ kĩla ĩvinda navoya, natiawa nĩw’ĩte kavaa. Natiawa nĩ na mũuo mwingangĩ wa kĩlĩko.” Ethĩwa ndwĩsĩ wĩvoya wasye ata, no ũsisye mboya ila Mũsumbĩ Ndaviti wavoyie eelila, syĩ nthĩnĩ wa Savuli 51 na 65.

Ĩmanyĩasye Mbivilia ũteũtĩĩa. Kĩu kĩkalũlũmĩĩlya mũĩkĩĩo waku na kĩyĩũtetheesya ũmwende Yeova mũnango. (Sav. 19:7-11) Mwana-a-asa wĩtawa Felipe easya: “Kĩla kyatumie nonza kĩ-veva na nĩmũvĩtĩsya Yeova, nĩ kwĩthĩwa nde na mũvango mũseo wa kwĩmanyĩsya Mbivilia. Na nũndũ ndyendaa kũmũvĩtĩsya Yeova ya kelĩ, nĩnatwie kwĩthĩwa na mũvango mũseo wa kwĩmanyĩasya ndeũtĩĩa.” O naku no wĩke oou. Wĩona ata ũkakũlya mũnyanyau mũimu kĩ-veva aũtetheesye kũmanya nĩ maũndũ ta meva ũtonya kwĩmanyĩsya?

Ĩkĩa kĩthito ũtume ndũũ ĩngĩ na ana-a-asa na eĩtu-a-asa. Amwe masyoka methĩawa na wia mayona ala angĩ kĩkundinĩ ta meũmosa naĩ. Kwa ngelekany’o, Larissa aisye: “Neew’aa nthoni mbingĩ mũno. Noonaa navalũkilye kĩkundi. Na nekalile ĩvinda yĩasa ndyĩw’a ũu.” Mwa ĩkala ũte na nzika o na vanini kana atumĩa na Aklĩsto ala angĩ aimu kĩ-veva me na wendi wa kũũtetheesya ũtũngĩĩe ngwatanĩo yaku na Yeova. (Sisya ĩsandũkũ “ Atumĩa Matonya Kwĩka Ata?”) Nĩmeũtana kwona ũnasyokie, na meenda ũendeee nesa!—Nth. 17:17.

Nĩ kyaũ kĩtonya ũkũtetheesya wĩthĩwe na ngwatanĩo ndũmu na kĩkundi? Kwatĩanĩa vyũ na ana-a-asa na eĩtu-a-asa maũndũnĩ ala mekwĩka, ta kũthi maũmbanonĩ na kũtavanasya. Kwĩka ũu kũkaũtethya ata? Felix aĩtye: “Kĩkundi kyaĩ na mea maingĩ ma kwona ndisyoka. Kyatumie nĩmanya kana nĩ wa vata. Kĩla ũmwe nĩwatumie nĩw’a ta nĩ mũsyĩ, atuma nĩĩkĩĩa kana Yeova nũmbekeete, na kana no nĩendeee kũmũthũkũma.”—Sisya ĩsandũkũ “ Ũtonya Kwĩka Ata?”

Satani eendeea ũkũetee iuutani sya ngelekany’o nĩ kana akwonzye wĩthĩe ndũtonya kũtũngĩĩa ngwatanĩo yaku na Yeova. (Luka 4:13) Ĩyũmbanĩsye iuutani isu kwa kwĩyaka kĩ-veva oyu.

Yeova athanie ũũ ĩũlũ wa malondu make: “Ngamantha ũla waĩte, na ngatũnga ũla walũngilw’e, na ngooveea ũla watũlĩtwe, na ngeekĩa vinya ũla wawaie.” (Esek. 34:16) Yeova nũtetheetye aingĩ mũno makatũngĩĩa ngwatanĩo yoo nake. Ĩthĩwa na mũĩkĩĩo vyũ kana o naku nũkwenda kũũtetheesya ũendeee kũlũlũmĩĩlya ngwatanĩo yaku nake.