RAJLAL chihabʼ, naabʼalebʼ nekeʼok wiʼ chik joʼ aj testiiw re li Jehobʼa. Peʼyaal naq kʼajoʼ «li sahil chʼoolejil» wank saʼ choxa naq jun rehebʼ li karneer aʼin nasutqʼiik wiʼ chik saʼ li chʼuut? (Luc. 15:7, 10). Wi laaʼat xat-ok wiʼ chik joʼ aj testiiw re li Jehobʼa, kʼojkʼooq aachʼool naq li Jesús, ebʼ li ánjel ut li Jehobʼa kʼajoʼ nekeʼsahoʼk saʼ xchʼool naq xatsutqʼiik wiʼ chik saʼ li chʼuut. Abʼanan, naq yooqat xyalbʼal aaqʼe chi wank wiʼ chik saʼ amiiwil rikʼin li Jehobʼa, maare taakʼul jalan jalanq chi chʼaʼajkilal. Bʼar wank rehebʼ li chʼaʼajkilal aʼin ut kʼaru ttenqʼanq aawe?

Naq ak xeʼsutqʼiik wiʼ chik saʼ li chʼuut, naabʼalebʼ li hermaan wank sut toj nachʼinaak xchʼoolebʼ. Wi joʼkan nakaakʼul, nakaawekʼa tana li kirekʼa li awabʼej David. Usta ak kikuyeʼk xmaak xbʼaan li kixbʼaanu, kixye: «Xnumtaak li maak saʼ inbʼeen» (Sal. 40:13; 65:4). Li nasutqʼiik wiʼ chik rikʼin li Jehobʼa naru naq chiru naabʼal chihabʼ trahoʼq saʼ xchʼool malaj txutaanaq xbʼaan li kixbʼaanu. Jun eetalil, li xʼIsabelle * li kixkanabʼ wank joʼ aj testiiw re li Jehobʼa numenaq 20 chihabʼ, kixye: «Xinkʼoxla naq li Jehobʼa maajunwa tixkuy tixsach linmaak». Wi nachʼinaak laachʼool, naru taakanabʼ wiʼ chik wank saʼ amiiwil rikʼin li Jehobʼa (Prov. 24:10). Yal aaqʼe re naq maajunwa taakʼul aʼin.

Jalanebʼ chik qʼaxal nekeʼok xkʼaʼuxl xkʼoxlankil chixjunil li tento teʼxbʼaanu re wank wiʼ chik saʼ amiiwil rikʼin li Jehobʼa. Joʼkaʼin kixye laj Antoine naq kiʼok wiʼ chik joʼ aj testiiw re li Jehobʼa: «Kisach saʼ inchʼool chixjunil li xinbʼaanu chaq junxil joʼ aj paabʼanel». Saʼ xkʼabʼaʼ aʼin, maare wankebʼ inkʼaʼ mas nekeʼraj xbʼaanunkil li xkʼanjel li Yos.

Kʼaru tkʼulmanq wi najukʼeʼk junaq li ochoch naq nanumeʼk junaq li kaqsut-iqʼ? Maare laj echal re qʼaxal t-oq xkʼaʼuxl xkʼoxlankil chixjunil li hoonal ut  li metzʼew li t-ajmanq chiru re xyiibʼankil wiʼ chik. Kamaʼin ajwiʼ nakʼulmank wi xaakanabʼ wank saʼ amiiwil rikʼin li Jehobʼa saʼ xkʼabʼaʼ naq xattʼaneʼk saʼ jun li nimla maak, maare taakʼoxla naq naabʼal tento taabʼaanu re naq tatwanq wiʼ chik saʼ amiiwil rikʼin. Abʼan moko aajunes ta wankat.

Li Jehobʼa naxye qe aʼin: «Kimqex ut aatinanqo» (Is. 1:18). Ak xaayal aaqʼe chi wank joʼ naraj li Jehobʼa, joʼkan naq aʼan qʼaxal nakatxra. Kʼoxla aʼin: Saʼ xkʼabʼaʼ naq xatsutqʼiik wiʼ chik rikʼin li Jehobʼa, aʼan naru tatroksi re xkʼutbʼesinkil naq laj Tza aj tikʼtiʼ (Prov. 27:11).

Naq xatsutqʼiik rikʼin li Jehobʼa, xatjilok chixkʼatq, ut aʼan naxye naq joʼkan ajwiʼ tixbʼaanu aawikʼin (Sant. 4:8). Jwal us naq ebʼ li junchʼol teʼxkʼe reetal naq xatsutqʼiik wiʼ chik saʼ li chʼuut, abʼan toj wank kʼaru tento taabʼaanu. Tento naq wulaj wulaj qʼaxal taara li Jehobʼa, Laayuwaʼ ut Laawamiiw. Chanru tatruuq xbʼaanunkil aʼin?

Yal aaqʼe chi xsikʼbʼal li tatruuq xbʼaanunkil. Toj jultik tana aawe li xaatzol chaq chirix li Jehobʼa ut li Chʼinaʼusil Naʼajej li naxyeechiʼi qe. Abʼan tento taayal aaqʼe re naq taabʼaanu wiʼ chik li xkʼanjel li Yos joʼ xkʼebʼal chi naweʼk li chaabʼil esilal, ebʼ li chʼutam ut wank saʼ komonil rikʼinebʼ laawechpaabʼanel. Qilaq wiibʼ oxibʼ li naʼlebʼ li naru taabʼaanu.

Maakanabʼ aatinak rikʼin li Jehobʼa. Laayuwaʼ naxtaw ru naq maare tchʼaʼajkoʼq chaawu li tijok xbʼaan naq toj narahoʼk saʼ laachʼool xbʼaan li maak li xaabʼaanu (Rom. 8:26). Usta joʼkan, maakanabʼ tijok ut ye re, naq nakaawaj wank wiʼ chik choʼq ramiiw (Rom. 12:12). Laj Andrej naxjultika: «Kʼajoʼ naq ninxutaanak ut narahoʼk chaq saʼ inchʼool. Abʼan naq nintijok, natuqlaak ru linchʼool ut sa chik nawekʼa wibʼ». Wi inkʼaʼ nakaanaw kʼaru taaye naq tattijoq, naʼlebʼa rix li tij li kixbʼaanu li awabʼej David naq qʼaxal nayotʼeʼk chaq li raanm, aʼ li natawmank saʼebʼ li Salmo 51 ut 65.

Maakanabʼ xtzolbʼal li Santil Hu. Aʼin tixkawubʼresi laapaabʼal ut qʼaxal taara li Jehobʼa (Sal. 19:8-12). Laj Felipe kixye: «Saʼ xkʼabʼaʼ naq moko rajlal ta nintzolok ut inkʼaʼ nawil xsaʼ li Santil Hu, kikehoʼk linpaabʼal ut xintʼaneʼk saʼ jun li nimla maak. Joʼkan naq rajlal xinʼok xtzolbʼal li Santil Hu re naq inkʼaʼ tintʼaneʼq wiʼ chik saʼ li maak». Laaʼat naru ajwiʼ taabʼaanu aʼin. Wi inkʼaʼ nakaanaw kʼaru li naʼlebʼ taatzʼil rix naq taatzol aawibʼ aajunes, naru nakaapatzʼ aatenqʼ re junaq laawamiiw li kaw xpaabʼal.

Chatwanq wiʼ chik saʼ amiiwil rikʼinebʼ li hermaan. Wiibʼ oxibʼ li hermaan li nekeʼsutqʼiik wiʼ chik saʼ li chʼuut nekeʼxkʼoxla naq inkʼaʼ sa teʼileʼq xbʼaanebʼ li junchʼol. Li xLarissa naxye: «Kʼajoʼ naq ninxutaanak chaq. Xwekʼa naq xinrahobʼtesi ut xinchʼina xchʼoolebʼ li hermaan. Chiru naabʼal chihabʼ xwekʼa wibʼ chi joʼkaʼin». Chʼolchʼooq chaawu naq ebʼ li cheekel winq ut jalanebʼ chik li hermaan li kawebʼ xpaabʼal nekeʼraj aatenqʼankil re naq tatwanq wiʼ chik saʼ amiiwil rikʼin li Jehobʼa (chaawil li kaaxukuut « Li naru teʼxbʼaanu ebʼ li cheekel winq»). Qʼaxal nekeʼsahoʼk saʼ xchʼool naq xatsutqʼiik wiʼ chik saʼ li chʼuut ut nekeʼraj naq laaʼat sahaq ajwiʼ saʼ laachʼool (Prov. 17:17).

Kʼaru naru taabʼaanu re naq qʼaxal tatjiloq chixkʼatq ebʼ laawechpaabʼanel? Maakol junaq li chʼutam ut rajlal chatpuktesinq rochbʼenebʼ li hermaan. Chanru tatxtenqʼa wi nakaayal aaqʼe chi xbʼaanunkil aʼin? Laj Félix kixye: «Ebʼ li hermaan nekeʼxyoʼoni li kutan naq xinsutqʼiik wiʼ chik saʼ li chʼuut. Xwekʼa naq qʼaxal nikineʼxra. Chixjunilebʼ xineʼxtenqʼa chi rekʼankil naq oxloqʼin saʼ li chʼuut, naq li Jehobʼa kixkuy kixsach linmaak ut naq tinruuq wiʼ chik kʼanjelak chiru» (chaawil li kaaxukuut « Li naru taabʼaanu laaʼat»).

Laj Tza inkʼaʼ tixkanabʼ xkʼambʼal chaq li chʼaʼajkilal saʼ aabʼeen re naq tchʼinaaq laachʼool naq laaʼat yooqat xyalbʼal aaqʼe chi wank wiʼ chik saʼ amiiwil rikʼin li Jehobʼa (Luc. 4:13). Yal aaqʼe chi wank saʼ tzʼaqal amiiwil rikʼin li Jehobʼa wi nakaawaj naq kawresinbʼilaqat chi xkuybʼal ebʼ li chʼaʼajkilal aʼin.

Joʼkaʼin naxye li Jehobʼa chirixebʼ li xkarneer: «Tinsikʼ chaq li karneer sachenaq, tinsutqʼisi chaq li xchaʼchaʼiik, tinbʼan li xtiqʼ ribʼ, tinkʼirtasi li yaj» (Ezeq. 34:16). Li Jehobʼa ak xtenqʼa naabʼalebʼ laj kʼanjel chiru re naq teʼwanq wiʼ chik saʼ amiiwil rikʼin. Joʼkan naq, chʼolchʼooq chaawu naq li Jehobʼa naraj ajwiʼ aatenqʼankil re naq rajlal kutan tatwanq saʼ tzʼaqal amiiwil rikʼin.