MUVW woos oow, bahiihingij mikook yivul ya buseeb mu cisumbw cya biin Krist. Lang bwa musangal muvul udy mu diiwul hady muut aakaabumw “uhing kudy Mawej!” (Luuk 15:7, 10) Hadyobw bakuhingij mu cisumbw, iikal mutwiishiibw neey: Yeez, banjel, ni Yehow bady ni musangal iimwiin weeh bwa muwubahing cikwaabw mu Bulongolody bwa Yehow. Nook, bu muwukaakaam kuhingij cikwaabw bulund bwiibuh ni Yehow, udy mwa kutwiilangan ni makab makwaabw. I makab kaay?, Ni i biny bidy mwa kukwambulwiish?

Haanyim aabab baman kuhing mu cisumbw, biin-kweet bavul baakadyobw biihat, badyaakal biital bakooyel mu mabok. Misang yikwaabw udy mwa kumvw mwaakady Mukaleng Davih mumvw. Ning haakadyobw bamufwiil lus bwa mpekaat yilongeley, uleeleeb neey: “Namoomon mal bwa myand yaam yibiih.” (Mis. 40:12; 65:3, NWT) Hady muut uhingomw kudy Yehow, udy mwa kwiikal wiilumbulwiish eecy mwiikal ni bumvw mukacy mwa mivw yivul. Isabelle, wiihacilobw mu cisumbw mukacy mwa mivw yihit ha 20 *, uleeleeb neey: “Natadil neey byaakady biikasakeen menmen bwa mim kutal neey: Yehow i muufwiil lus.” Uw mukooyel mu mabok bwa lutat, wiiyiiy kukooyel mu diitabij. (Tus. 24:10) Kwiitaboh bend bwaal bwa nook bukufikil.

Bakwaabw balaalang neey: bulund bwaababw ni Yehow ka bwa kulengeloh bend. Haanyim aabab baman kumuhingij mu cisumbw, Antoine uleeleeb neey: “Natadil neey naakady muvulamin myand yoos yinaakady nalong mu shikacil a mim bu mwiin Krist.” Bwa kulang kwa nook, bakwaabw bady mwa kwiikal beelakan bwa kwiidit mu midimw ya bwiin Krist.

Twangat cileejel, muut udy ciheeh cikasakan cinyang nzubw indiy udy mwa kumvw bimutond bikasakan bwa hadyey utal diib ni bukash budyey mwa kulong bwa kwiibakulul nzubw oow. Bya mushind aakaabumw, bulund bwiibuh ni Yehow bub mwa kwiiy kunyanguk bwa mpekaat mutam uwudy mulong, udy mwa kumvw bikulomb bwiibuh kwiikashishomw  bwa kuhingij cikwaabw bulund bwiibuh ni Yehow. Ki kudy dyambulwiish.

Yehow wiitubibikan uleeb neey: “Yaakaay kaabaak, tulongololaay myand hakacy iitut neen.” (Ye. 1:18, NWT) Nukaady bakal mudimw mukasakan bwa ‘kulongolol myand.’ Yehow i mwiinukat bwa munudy biikashishomw bwa kulong naak. Lang ket neey: Wiiyiiy kwiikal cileejel ciikal Yehow ukal naacy mudimw bwa kwaalabul Sataan neey: i mwiin makos.​—Tus. 27:11.

Hawuhiihingomw mu cisumbw wiiyiiy kwiikal habwiih ni Yehow, ni ukulaalay neey: wiiyiiy kwiikal habwiih neeb. (Jak 4:8) Bitwaatwaal musangal hady bakwaabw bakutal cikwaabw uhingomw mu cisumbw. Ki bikaam ulong bwaal bukwaabw. Bikaam utungunuk ni kukashish lukat lwiibuh bwa Taat iibuh ni mulund neeb Yehow. I mushind kaay uwudy mwa kulong nook?

Teet bwa kwiifundil biihacil bya meej. Vuluk neey: diitabij diibuh i dishimacil​—ha diimany diwudy naady bwa Yehow ni bwa milay yindiy yiikal mwa kukumban mu mafuk miiyiiy kuuhal​—ki bikaam ukashish biikadil biibuh, ni mu biikadil oomw, mudy mudimw a kudiil baat musah mulengel, kutweel mu bisangil ni kuhitij diib haakaabumw ni biin-kweet baan-balum ni baan-bakaj ba mu cisumbw. Tal biihacil biloolond eeby biwudy mwa kwiikal naaby.

Iikal wiisamb ni Yehow. Taat iibuh umvumvw muwudy wiilumbulwiish bwa myand yibiih yiwulongel, yidy mwa kulong bwa bikasakan bwiibuh kumusambil. (Rom 8:26) Nook, “suminyinaay ni kulomb Mawej,” ambil Yehow bwa muwudy mukat kudy bulund nend. (Rom 12:12) Andrej uvuuvuluk neey: “Naakady niilumbulwiish bikasakan ni numvw bumvw. Ki haanyim a mim muman kusambil, naakady mumvw bilengel. Nahetel diitalal dya mu mucim.” Uw mukaakal cya kuleeb mu diisambil, bal masambil malongel Mukaleng Davih waalabwiil mucim indiy, matusaasangan mu mukand a Misambw 51 ni 65.

Iikal ni ciibidil cya kubal Bibl. Kulong nook, kwiiyiiy kukwambulwiish bwiibuh kwiikal ni diitabij dikasakan ni lukat lwiibuh bwa Yehow lwiiyiiy kukasakan. (Mus. 19:7-11) “Kulek kwiikal ni ciibidil cya kubal ni kwiilongel Bibl, i cicy cyaakady cilong bwa nakooyel ni nalek Yehow,” ki mudy Felipe muleeb. “Nook, nady mwangat dihangadik dya kulek kulongel cikwaabw Yehow bibiih ni nady mwangat dihangadik dya kulam bulund bwaam ni Yehow ha kwiilongel Bibl.” Udy mwa kulong bwaal bwaakaabumw oobw. Uw ukaam dyambulwiish bwa kumanyik biin bwaal bidy mwa kukwambulwiish mu kwiilongel kwa Bibl, bwabiny kwiin mwa kulombok mwiin-kweet udy mukuluuh mu diitabij bwa kukwambulwiishok ang?

Long bwa kukashish cikwaabw bulund bwiibuh ni baan been ba mu cisumbw. Baan-beet bakwaabw bahihing mu cisumbw, baciiciin ni balang neey: bakwaabw biiyiiy kwiibafulwiil mund. Larissa wiitaatab bwaal oobw ni uleeb neey: “Nakaady mumvw bumvw bwa menmen. Nalangil neey: naakady mulongel biin cisumbw bibiih menmen. Nashaadil nalang nook mukacy mwa mivw yivul.” Iikal mutwiishiibw neey: bakul ni biin-kweet bakwaabw bakuluuh mu diitabij i bakat mwa kukwambulwiish bwa ukashish cikwaabw bulund bwiibuh ni Yehow. (Tal kazubw ka neey: “ I Biny Bidy Bakul mwa Kulong?”) Bady ni musangal hadyobw bakutal uhingom, ni i bakat bwa utungunuk ni kulong myand yilengel!​—Tus. 17:17.

I biny biwudy mwa kulong bwa kwiikal habwiih ni cisumbw? Iikal ni ciibidil cya kutweel mu bisangil byoos aakaabumw ni baan-been​—cikwaabw wiikal uy naab mu mudimw a bukajaady. Kulong nook, kwiiyiiy kukwambulwiish mushind kaay? Felix uleebel neey: “Biin mu cisumbw baakady teng batekemen neey: niiyiiy kuhingomw. Natadil neey: baakady baakat. Babw boos baakady baayambulwiish bwa mim kuhingomw cikwaabw mu cisumbw, niiyil kutal neey: Yehow waakady muufwiil lus, ni nady mwa kutungunuk ni kumukadil mudimw.”​—Tal kazubw ka neey: “ I Biny Biwudy mwa Kulong?”

Sataan utuutungunuk teng ni ku “kweelek” bwa ulek kukashish bulund bwiibuh ni Yehow. (Luuk 4:13) Iikal habwiih bwa kukashish bulund bwiibuh ni Yehow teng kaabaak.

Bwa mikook yindiy, Yehow ulaalay neey: “Niiyiiy nay nakakaam mukook waakady mujimban, nakacingul waakady muhamban, naswiik waakady mutahik bwang ha cit ni udy mubeel, namuhingajil makand.” (Ezek. 34:16) Yehow i mwambulwiish baat bakwaabw bavul bwa kuhingijobw bulund bwaabab nend. Iikal mujaadik neey: i mukat kukwambulwiish bwa utungunuk bwa kukashish bulund bwiibuh nend.