ສ້າງສາຍສຳພັນກັບພະເຢໂຫວາໃໝ່
ໃນແຕ່ລະປີ ມີຫຼາຍຄົນກັບມາຫາພະເຢໂຫວາ. ລອງນຶກພາບເບິ່ງວ່າ ເມື່ອມີຄົນໜຶ່ງກັບມາ ສະຫວັນຈະ “ມີຄວາມສຸກ” ຫຼາຍສ່ຳໃດ! (ລກ. 15:7, 10) ຖ້າເຈົ້າເປັນຄົນໜຶ່ງທີ່ກັບມາ ຂໍໃຫ້ໝັ້ນໃຈວ່າພະເຢໂຫວາ ພະເຢຊູ ແລະທູດສະຫວັນຈະມີຄວາມສຸກຫຼາຍແທ້ໆ! ແຕ່ຕອນທີ່ເຈົ້າກຳລັງສ້າງສາຍສຳພັນກັບພະເຢໂຫວາ ອາດຈະມີບັນຫາບາງຢ່າງທີ່ຂັດຂວາງເຈົ້າ. ບັນຫາເຫຼົ່ານັ້ນມີຫຍັງແດ່? ແລ້ວສິ່ງໃດຈະຊ່ວຍເຈົ້າໃຫ້ຜ່ານບັນຫາເຫຼົ່ານັ້ນໄດ້?
ມີບັນຫາຫຍັງແດ່?
ພີ່ນ້ອງຫຼາຍຄົນອາດຍັງຮູ້ສຶກຜິດຢູ່ເຖິງວ່າຈະກັບເຂົ້າມາໃນປະຊາຄົມແລ້ວ. ເຂົາເຈົ້າອາດຮູ້ສຶກຜິດຄືກັບກະສັດດາວິດທີ່ບອກວ່າ: “ຄວາມຜິດຂອງຂ້ອຍຖ້ວມທົ້ນ.” (ເພງ. 40:12, ລ.ມ.; 65:3) ບາງຄົນທີ່ກັບມາຫາພະເຢໂຫວາແລ້ວ ອາດຈະຍັງຮູ້ສຶກຜິດຫຼືຮູ້ສຶກອາຍເປັນເວລາດົນເຕີບ. ອິດຊາເບວ * ທີ່ຖືກຕັດສຳພັນຫຼາຍກວ່າ 20 ປີບອກວ່າ: “ຂ້ອຍຮູ້ສຶກວ່າຍາກທີ່ຈະເຊື່ອວ່າພະເຢໂຫວາໃຫ້ອະໄພຂ້ອຍແລ້ວ.” ຖ້າເຮົາຮູ້ສຶກຜິດຫຼາຍເກີນໄປ ຄວາມເຊື່ອຂອງເຮົາກໍຈະອ່ອນລົງ. (ສຸພາ. 24:10) ດັ່ງນັ້ນ ຂໍໃຫ້ເຮົາຢ່າຮູ້ສຶກຜິດຫຼາຍເກີນໄປ.
ພີ່ນ້ອງບາງຄົນອາດຮູ້ສຶກວ່າເຖິງຈະພະຍາຍາມຫຼາຍສ່ຳໃດກໍບໍ່ສາມາດທີ່ຈະກັບມາມີສາຍສຳພັນທີ່ດີກັບພະເຢໂຫວາໄດ້ອີກ. ອັນໂຕນເປັນຄົນໜຶ່ງທີ່ຖືກຮັບກັບມາໄດ້ບອກວ່າ: “ຂ້ອຍລືມໄປເລີຍວ່າຄລິດສະຕຽນມີຊີວິດແບບໃດແລະເຮັດຫຍັງແດ່.” ຍ້ອນບາງຄົນຮູ້ສຶກແບບນີ້ ເຂົາເຈົ້າຈຶ່ງບໍ່ກ້າເຮັດສິ່ງທີ່ເສີມຄວາມເຊື່ອໄດ້ຢ່າງເຕັມທີ.
ເພື່ອຈະເຂົ້າໃຈຫຼາຍຂຶ້ນ ໃຫ້ເຮົາມາເບິ່ງຕົວຢ່າງນີ້. ສົມມຸດວ່າພາຍຸເຮີຣິເຄນໄດ້ທຳລາຍເຮືອນຂອງຜູ້ໃດຜູ້ໜຶ່ງ. ລາວອາດຈະຮູ້ສຶກທໍ້ໃຈ ເພາະວ່າມັນຕ້ອງໄດ້ໃຊ້ຄວາມພະຍາຍາມແລະໃຊ້ເວລາຫຼາຍເພື່ອຈະປຸກເຮືອນຂຶ້ນມາອີກ. ຄ້າຍຄືກັນ ຖ້າເຈົ້າເຄີຍເຮັດຜິດຮ້າຍແຮງເຈົ້າກໍອາດຮູ້ສຶກວ່າຍາກທີ່ຈະກັບມາມີສາຍສຳພັນທີ່ດີກັບພະເຢໂຫວາ
ໄດ້ອີກ ເພາະມັນຕ້ອງໃຊ້ເວລາແລະຄວາມພະຍາຍາມຫຼາຍແທ້ໆ. ແຕ່ເຈົ້າບໍ່ຕ້ອງທໍ້ໃຈ ເພາະມີຜູ້ທີ່ຈະຊ່ວຍເຈົ້າ.ພະເຢໂຫວາຮັກເຈົ້າຍ້ອນເຈົ້າໄດ້ພະຍາຍາມກັບມາຫາເພິ່ນຕາມທີ່ເພິ່ນໄດ້ເຊີນເຮົາວ່າ: “ໃຫ້ເຮົາມາລົມກັນ ເຮົາຈະໄດ້ຊ່ວຍພວກເຈົ້າໃຫ້ກັບມາຄືນດີກັບເຮົາ.” (ເອຊາ. 1:18, ລ.ມ.) ນອກຈາກນັ້ນ ການທີ່ເຈົ້າພະຍາຍາມກັບມາຫາພະເຢໂຫວາກໍພິສູດໃຫ້ເຫັນວ່າ ຊາຕານເປັນຜູ້ເວົ້າຕົວະ!—ສຸພາ. 27:11
ການທີ່ເຈົ້າກັບມາຄືນດີກັບພະເຢໂຫວາກໍສະແດງວ່າເຈົ້າພະຍາຍາມຈະໃກ້ຊິດກັບເພິ່ນຫຼາຍຂຶ້ນ ແລະພະເຢໂຫວາກໍສັນຍາວ່າຈະໃກ້ຊິດກັບເຈົ້າ. (ຢກບ. 4:8) ແຕ່ການທີ່ເຈົ້າກັບມາເປັນສ່ວນໜຶ່ງໃນປະຊາຄົມຍັງບໍ່ພໍເທື່ອ. ເຈົ້າຕ້ອງມີຄວາມຮັກແລະມີຄວາມເຊື່ອເຂັ້ມແຂງໃນພະເຢໂຫວາຫຼາຍຂຶ້ນ. ແລ້ວເຈົ້າຈະເຮັດແບບນັ້ນໄດ້ແນວໃດ?
ຕັ້ງເປົ້າໝາຍທີ່ສາມາດເຮັດໄດ້
ໃຫ້ພະຍາຍາມຕັ້ງເປົ້າໝາຍທີ່ເຈົ້າສາມາດເຮັດໄດ້. ທີ່ຈິງ ຜູ້ທີ່ກັບມາຫາພະເຢໂຫວາຈະມີຄວາມຮູ້ກ່ຽວກັບພະເຢໂຫວາແລະຄຳສັນຍາຂອງເພິ່ນຢູ່ແລ້ວ. ແຕ່ສິ່ງທີ່ເຂົາເຈົ້າຕ້ອງເຮັດຕື່ມກໍຄື ໄປປະກາດແລະຄົບຫາກັບພີ່ນ້ອງ. ໃຫ້ເຮົາມາເບິ່ງເປົ້າໝາຍເຫຼົ່ານີ້ນຳກັນ.
ອະທິດຖານຫາພະເຢໂຫວາເລື້ອຍໆ. ພະເຢໂຫວາຮູ້ວ່າເປັນເລື່ອງຍາກຫຼາຍທີ່ຈະອະທິດຖານຫາເພິ່ນຕອນທີ່ເຮົາຍັງຮູ້ສຶກຜິດຢູ່. (ຣມ. 8:26) ແຕ່ພະເຢໂຫວາກໍບອກເຮົາໃຫ້ “ອະທິດຖານເລື້ອຍໆ” ແລະບອກໃຫ້ເພິ່ນຮູ້ວ່າເຮົາຢາກເປັນໝູ່ກັບເພິ່ນ. (ຣມ. 12:12) ອັນເດບອກວ່າ: “ຂ້ອຍຮູ້ສຶກຜິດແລະຮູ້ສຶກອາຍຫຼາຍແທ້ໆ. ແຕ່ເມື່ອຂ້ອຍອະທິດຖານເຖິງພະເຢໂຫວາ ຂ້ອຍກໍຮູ້ສຶກສະຫງົບໃຈແລະສະບາຍໃຈຫຼາຍຂຶ້ນ.” ແຕ່ຖ້າເຈົ້າບໍ່ຮູ້ວ່າຈະອະທິດຖານແນວໃດເດ? ໃຫ້ເບິ່ງຄຳອະທິດຖານຂອງກະສັດດາວິດເຊິ່ງບັນທຶກຢູ່ໃນຄຳເພງບົດ 51 ແລະ 65.
ສຶກສາຄຳພີໄບເບິນເປັນປະຈຳ. ການເຮັດແບບນີ້ຈະຊ່ວຍເຈົ້າໃຫ້ມີຄວາມເຊື່ອທີ່ເຂັ້ມແຂງແລະຮັກພະເຢໂຫວາຫຼາຍຂຶ້ນ. (ເພງ. 19:7-11) ຟີລິບບອກວ່າ: “ການທີ່ຂ້ອຍບໍ່ໄດ້ອ່ານແລະສຶກສາຄຳພີໄບເບິນເປັນປະຈຳເຮັດໃຫ້ຄວາມເຊື່ອຂອງຂ້ອຍອ່ອນລົງ ແລະໃນທີ່ສຸດກໍເຮັດໃຫ້ພະເຢໂຫວາເສຍໃຈ. ແຕ່ຂ້ອຍບໍ່ຢາກກັບໄປເຮັດຜິດຊ້ຳອີກ ດັ່ງນັ້ນ ຂ້ອຍຈຶ່ງເອົາໃຈໃສ່ສຶກສາສ່ວນຕົວເພື່ອປົກປ້ອງຄວາມເຊື່ອຂອງຂ້ອຍ.” ເຈົ້າກໍສາມາດເຮັດແບບນັ້ນໄດ້ຄືກັນ. ແຕ່ຖ້າເຈົ້າບໍ່ຮູ້ວ່າຈະສຶກສາສ່ວນຕົວເລື່ອງຫຍັງ ກໍໃຫ້ຖາມຜູ້ທີ່ມີຄວາມເຊື່ອເຂັ້ມແຂງເພາະເຂົາເຈົ້າອາດຈະຊ່ວຍເຈົ້າໄດ້.
ສ້າງສາຍສຳພັນທີ່ດີກັບພີ່ນ້ອງອີກ. ບາງຄົນທີ່ກັບເຂົ້າມາໃນປະຊາຄົມອາດຈະຮູ້ສຶກຢ້ານພີ່ນ້ອງເບິ່ງວ່າລາວເປັນຄົນບໍ່ດີ. ລາຣິຊາບອກວ່າ: “ຂ້ອຍຮູ້ສຶກອາຍຫຼາຍແທ້ໆຕອນທີ່ເຂົ້າຮ່ວມປະຊຸມເພາະຂ້ອຍຮູ້ສຶກວ່າໄດ້ຫັກຫຼັງພີ່ນ້ອງ ແລະຄວາມຮູ້ສຶກແບບນີ້ກໍລົບກວນໃຈຂ້ອຍດົນເຕີບ.” ຜູ້ດູແລແລະພີ່ນ້ອງຮູ້ສຶກດີໃຈຫຼາຍທີ່ເຈົ້າກັບມາ ແລະເຂົາເຈົ້າຢາກຊ່ວຍເຈົ້າໃຫ້ມີສາຍສຳພັນທີ່ດີກັບພະເຢໂຫວາອີກ.—ສຸພາ. 17:17 (ເບິ່ງຂອບ “ ຜູ້ດູແລຈະຊ່ວຍຫຍັງໄດ້ແດ່?”)
ສິ່ງທີ່ຈະຊ່ວຍເຮົາໃຫ້ໃກ້ຊິດກັບພີ່ນ້ອງຫຼາຍຂຶ້ນກໍຄື ການເຂົ້າຮ່ວມປະຊຸມ ແລະການໄປປະກາດເປັນປະຈຳ. ສິ່ງເຫຼົ່ານີ້ຈະຊ່ວຍເຮົາໄດ້ແນວໃດ? ເຟລິກບອກວ່າ: “ເມື່ອຂ້ອຍກັບມາ ພີ່ນ້ອງກໍໄດ້ຕ້ອນຮັບຂ້ອຍຢ່າງອົບອຸ່ນ ເຮັດໃຫ້ຂ້ອຍຮູ້ສຶກວ່າໄດ້ກັບມາເປັນສ່ວນໜຶ່ງໃນຄອບຄົວຂອງພີ່ນ້ອງອີກ ແລະຮູ້ສຶກວ່າພະເຢໂຫວາໃຫ້ອະໄພຂ້ອຍ ນີ້ຊ່ວຍຂ້ອຍໃຫ້ຮັບໃຊ້ເພິ່ນຕໍ່ໄປໄດ້.”—ເບິ່ງຂອບ “ ເຈົ້າຈະເຮັດຫຍັງໄດ້ແດ່?”
ຢ່າຍອມແພ້
ຊາຕານຍັງຈະພະຍາຍາມສ້າງບັນຫາໃຫ້ເຮົາເພື່ອທຳລາຍສາຍສຳພັນຂອງເຮົາກັບພະເຢໂຫວາ. (ລກ. 4:13) ດັ່ງນັ້ນ ຂໍໃຫ້ເຮົາສ້າງສາຍສຳພັນທີ່ແໜ້ນແຟ້ນກັບພະເຢໂຫວາຕັ້ງແຕ່ຕອນນີ້.
ພະເຢໂຫວາຢາກຊ່ວຍເຮົາເພາະວ່າເຮົາເປັນແກະຂອງເພິ່ນ. ເພິ່ນສັນຍາວ່າ: “ເຮົາຈະຊອກຫາໂຕທີ່ຫາຍໄປ ຈະພາໂຕທີ່ຫຼົງທາງກັບມາ ຈະພັນບາດແຜໂຕທີ່ບາດເຈັບ ແລະຈະຊ່ວຍໂຕທີ່ອ່ອນແອໃຫ້ມີແຮງຂຶ້ນ.” (ເອເຊກ. 34:16, ລ.ມ.) ພະເຢໂຫວາເຄີຍຊ່ວຍຫຼາຍຄົນແລ້ວໃຫ້ກັບມາມີສາຍສຳພັນທີ່ດີກັບເພິ່ນອີກ. ດັ່ງນັ້ນ ຂໍໃຫ້ໝັ້ນໃຈວ່າເພິ່ນຈະຊ່ວຍເຈົ້າຄືກັນ.
^ ຂໍ້ 4 ຊື່ສົມມຸດ