SEJSE xiuitl miakej sampa tlakuepiliaj ipan tlanechikoli. Uan kema kiampa kichiuaj, ipan iluikak “onka más pakilistli” (Luc. 15:7, 10). Tlaj ta sampa titlakuepilik, ximotemachi Jehová, Jesús uan iluikaeuanij nelia tlauel yolpakij pampa kiampa timosentlalik tijchiuas. Maske kiampa tijchijki, kemantika tikixnamikis se keski tlaouijkayotl tlen uelis kichiuas ouij ximouampojchiua ika Jehová. Ma tikitakaj tlake uelis tikixnamikis uan tlake mitspaleuis.

Miakej toikniuaj kema tlakuepiliaj, kemantika nojua tlauel moyolkokouaj ika tlen kichijkej. Tlaj ta nojkia kiampa mitspano, uelis mitspaleuis tijmatis kenijkatsa kiyolmatki David. Maske Jehová ya kitlapojpoljuijtoya, kiijtok: “Notlajtlakoljuaj nechtlantok” (Sal. 40:12; 65:3). Se katli sampa tlakuepilia uelis amo kuali kiyolmati pampa nojua motlajtlakoltia ika tlen kichijki o tlauel pinaua, uan uelis kiampa kiyolmatis miak xiuitl. Kej tosiuaikni Isabelle, * katli kipano 20 xiuitl amo tlakuepilijtoya. Ya kiijtok: “Nijmatiyaya ouij nijneltokas Jehová ya nechtlapojpoljuijtoya”. Tlaj ta nojkia tlauel timoyolkokoua, uelis kichiuas sampa ayokmo kuali ximouampojchiua ika Jehová (Prov. 24:10). Yeka, xijchiua kampeka amo kiampa timoiljuis.

Sekij toikniuaj kimatij ouij sampa kichiuasej tlen kinpaleuis ma mouampojchiuakaj ika Jehová. Toikni Antoine, katli sampa tlakuepilik, kiijtok: “Ayokmo nikilnamikiyaya nochi tlen achtouia nijchiuayaya ipan tlanechikoli”. Yeka, sekij kimatij ouij mosentlalisej tlaueyichiuasej.

Ma tikitakaj se neskayotl. Kema pano se chikauak ajakatl, se akajya uelis tlauel motekipachoua  pampa moiljuia moneki tlauel miak tomij uan tonali sampa kikualchijchiuas ichaj. Kiampa pano kema se toikni katli kichijki se ueyi tlajtlakoli sampa tlakuepilia pampa uelis moiljuia moneki kichiuas se ueyi kampeka sampa mouampojchiuas ika Jehová. Tlaj ta kiampa tijyolmati, amo tiitstok moselti.

Jehová kiijtoua: “Xiualakaj nimantsi uan ma tijsenkauakaj tocuentas” (Is. 1:18). Xikilnamiki, ya tlauel mitsiknelia pampa tijchijki kampeka sampa titlakuepilis. Ximoiljui: Jehová uelis kitekiuis nopa kuali tlamantli tlen tijchijtok uan kiampa kinextis Satanás san istlakati (Prov. 27:11).

Kema titlakuepilik tijnextik tijnechkauijtok Jehová, uan ya nojkia kiampa kichiua (Sant. 4:8). Maske tlauel kuali pampa sekinok kiitaj titlakuepilik, nojua moneki tijchiuas se keski tlamantli. Xijchiua kampeka timouampojchijtos ika Jehová, katli eli moUampo uan moTata. ¿Tlake uelis mitspaleuis?

Ximosentlali tijchiuas se keski tlamantli tlen kena uelis tijchiuas. Maske uelis nojua tikilnamiki tlake nelnelia tlamachtia Biblia tlen Jehová uan tlen mosentlalijtok kichiuas teipa, moneki nojua tijchiuas tlen mitspaleuis kuali titlaneltokas, kej titlajtolmoyauas, tias tlanechikoli uan tiitstos ininuaya toikniuaj. Ma tikitakaj tlake uelis timosentlalis tijchiuas.

Nochipa xijnojnotsa Jehová. Ya kikuamachilia kemantika tijmati ouij timomaijtos pampa nojua timotlajtlakoltia ika tlen tijchijki (Rom. 8:26). Maske kiampa tijyolmati, xijchiua kampeka nochipa timomaijtos uan xikiljui Jehová sampa tijneki timouampojchiuas iuaya (Rom. 12:12). Andrej kiijtoua: “Maske tlauel nimotlajtlakoltiyaya uan nipinauayaya ika tlen nijchijtoya, kema nimomaijtouayaya nechpaleuiyaya kuali ma nijyolmati uan ma nijpia tlaseuilistli”. Tlaj ta amo tijmati tlake tikiljuis Jehová, ximoyoliljui ipan nopa tlamaijtoli tlen David kichijki kema moyolkuepki, tlen eltok ipan Salmos 51 uan 65.

Nochipa ximomachti Biblia. Nopa mitspaleuis nojua kuali titlaneltokas uan nojua tlauel tikiknelis Jehová (Sal. 19:7-11). Felipe kiijtok: “Ayokmo kuali nitlaneltokak uan nikixpanok Jehová pampa ayokmo nijchijki kampeka nijpouas Biblia yon nimomachtik noselti. Amo nijnekiyaya sampa kiampa ma nechpano, yeka nijchijki kampeka nochipa kuali nimomachtis noselti”. Ni tlamantli nojkia uelis mitspaleuis. Tlaj amo tijmati tlake timomachtis, uelis tikiljuis se toikni katli kuali tlaneltoka ma mitspaleui.

Sampa ximouampojchiua ininuaya toikniuaj. Se keskij katli tlakuepiliaj motekipachouaj pampa moiljuiaj sekij toikniuaj amo kuali kinitasej. Larissa kiijtok: “Tlauel nipinauayaya uan nijmatiyaya nikinixpanotoya toikniuaj. Kiampa nijyolmatki miak tonali”. Xikilnamiki, ueuejtlakamej uan sekinok toikniuaj katli kuali tlaneltokaj, kinekij mitspaleuisej sampa ximouampojchiua ika Jehová (xikita recuadro “ Tlen ueuejtlakamej uelis kichiuasej”). Inijuantij tlauel yolpakij pampa sampa titlakuepilik uan kinekij nojkia xiyolpaki (Prov. 17:17).

¿Tlake uelis tijchiuas uan kiampa tiitstos ininuaya toikniuaj? Nochipa xia tlanechikoli uan xitlajtolmoyaua ininuaya. ¿Kenijkatsa mitspaleuis? Félix kiijtok: “Nikitak toikniuaj kinekiyayaj ma nitlakuepili. Nijmatki tlauel nechikneliaj. Nechpaleuijkej kuali ma nijyolmati ipan tlanechikoli, ma nikita Jehová ya nechtlapojpoljuijtoya uan sampa ueliskia kuali nitlatekipanos” (xikita recuadro “ Tlen uelis tijchiuas”).

Xikilnamiki, Satanás nojua kinekis xikixpano Jehová uan ayokmo ximouampojchiua iuaya (Luc. 4:13). Yeka, xijchijto kampeka nojua kuali titlaneltokatos.

Jehová kiniljuia itekipanojkauaj: “Nikintemos noborregojuaj tlen mokuapolojtokej uan sampa nikinualikas. [...] Uan nijuijkomas imets tlen postektok uan nikinpaleuis tlen kokoxketsitsij” (Ezeq. 34:16). Jehová kinpaleuijtok miakej sampa ma mouampojchiuakaj iuaya. Yeka, ximotemachi ya nojkia mitspaleuis sampa kuali timouampojchiuas iuaya.