MIAKEJ oksepa kinseliaj ma yetokan iTlaixpantijkauan Jehová. Ijkuak ikaj oksepa kitekichiuilia, “iangelwah Dios pakmikih” (Luc. 15:7, 10). Tla tejuatsin oksepa tiiTlaixpantijka Jehová, kuali xikmato Jesús, ángeles uan Jehová sapanoua yolpakij. Pero xamo tikitas oui seki tlamantli. ¿Tlen uelis tikixnamikis uan tlen uelis tikchiuas?

Ijkuak sekimej oksepa kitekichiuiliaj Jehová, mokuayejyekouaj miak tlamantli. Tla ijkon mitspanotok, xamo tikajsikamati ken omomachiliaya ueyi tekiua David. Maski omoyolkopki uan toTajtsin Dios okitlapojpolui, okijto ok okiyolkokouaya tlen amo kuali okichi (Sal. 40:12; 65:3). Ikaj tlen oksepa kitekichiuilia Jehová xamo pinaua uan moyolkokoua. Ma tikitakan ken omomachiliaya se tokni tlen itoka Isabelle. * Ye yokipiaya 20 xiuitl ayakmo okatka iTlaixpantijka Jehová. Tokni okijto: “Amo onikneltokaya kox Jehová yonechtlapojpolui”. Tla tejuatsin ok mitsyolkokoua tlen omitspanok, oui tikitas kuali timouikas iuan Jehová (Prov. 24:10). Pero ximoyolchikaua para amo ijkon mitspanos.

Oksekimej mokuayejyekouaj amo uelis kichiuaskej tlen moneki para oksepa uelis mouikaskej iuan Jehová. Se tokni tlen itoka Antoine okijto: “Ayakmo onikilnamikiaya seki tlamantli tlen onikchiuaya achto ijkuak oniktekichiuiliaya Jehová”. Tla sekimej noijki ijkon momachiliaj, xamo amo okachi mochijchikauaj kitekichiuiliskej Jehová.

Ma tikitakan tleka ijkon tikijtouaj. Ma tikijtokan chikauak oejekakiauik uan oxixinki tokalijtik. Xamo timotekipachouaj ijkuak timokuayejyekouaj  nochi tlen moneki tikchiuaskej para tikyektlaliskej. Noijki ijkon, tla ayakmo kuali timouika iuan Jehová porque otitlajtlakolchi, xamo tikita oui oksepa iuan timouikas. Pero Jehová uelis mitspaleuis.

Jehová techiluia: “Xiualakan uan ma tikyektlalikan ouijkayotl tlen tikpiaj” (Is. 1:18). Tejuatsin yotimochijchika oksepa timouikas iuan Jehová, ik non, ye mitstlasojtla. Ijkon ye uelis kiluis Satanás san tlakajkayaua (Prov. 27:11).

Axkan yotikchi tlen omonekiaya para oksepa timouikas iuan Jehová uan ye noijki mouan mouikas (Sant. 4:8). Tokniuan kitaj tejuatsin oksepa tiktekichiuilia Jehová pero moneki ok itlaj tikchiuas. Moneki timochijchikauas okachi kuali iuan timouikas uan tiktlasojtlas porque ye moTajtsin. ¿Ken uelis tikchiuas?

Achto ximokuayejyeko tlen uelis tikchiuas. Xamo ok tikilnamiki tlen kichiuas Jehová. Pero xamo moneki oksepa tipeuas tikchiuas seki tlamantli ken titetlapouis, timonechikos uan noijki timouikas iuan tokniuan. Ma tikitakan tlen ok uelis tikchiuas

Nochipa ximotlapoui iuan Jehová. Ye moTajtsin uan kuali kimati tla oui tikita iuan timotlapouis porque mitsyolkokoua tlen otikchi (Rom. 8:26). Pero ximochijchikaua nochipa iuan ximotlapoui uan xikilui tikneki oksepa iuan timouikas (Rom. 12:12). Se tokni tlen itoka Andrej okijto: “San onimoyolkokouaya uan onipinauaya pero onimoyolseuiaya ijkuak onimotlatlaujtiaya”. Tla tejuatsin amo tikmati tlen tikiluis Jehová ijkuak timotlatlaujtis, xiktlajtolti Salmos 51 uan 65 kanin kijtoua tlen okijto David ijkuak omoyolkopki.

Nochipa ximomachti Biblia. Tla ijkon tikchiuas, okachi tikneltokas tlen Jehová kijtoua uan okachi tiktlasojtlas (Sal. 19:7-11). Se tokni tlen itoka Felipe okijto: “Amo onimomachtiaya nion oniktlajtoltiaya Biblia, ik non, ayakmo onitlaneltokaya uan onitlajtlakolchi. Pero satepan opejki nochipa nimomachtia porque amo oniknekiaya oksepa ijkon ma nechpano”. Tejuatsin uelis noijki ijkon tikchiuas uan tla amo tikmati tlen timomachtis, xikilui se tokni tlen kipia chikauak itlaneltokilis ma mitspaleui.

Oksepa ximouika iuan tokniuan. Sekimej tlen oksepa kinseliaj ma yetokan iTlaixpantijkauan Jehová motekipachouaj uan mokuayejyekouaj oksekimej tokniuan amo kuali kinseliskej. Se tokni tlen itoka Larissa okijto: “Sapanoua onipinauaya. Onikmachiliaya onikinkajkaya tokniuan. Ouejka ijkon onimomachiliaya”. Xikilnamikto tlayekankej uan oksekimej tokniuan kinekij mitspaleuiskej oksepa ximouika iuan Jehová (xikita recuadro tlen itoka “ ¿Tlen uelis kichiuaskej tlayekankej?”). Tokniuan yolpakij oksepa inmiuan tika uan kinekij noijki xiyolpaki (Prov. 17:17).

¿Tlen mitspaleuis okachi kuali ximouika iuan tokniuan? Nochipa ximonechiko uan inmiuan xitetlapoui. ¿Ken mitspaleuis tla ijkon tikchiuas? Se tokni tlen itoka Félix okijto: “Nochtin tokniuan okinekiayaj oksepa inmiuan ma nimonechiko. Onikitak sapanoua nechtlasojtlaj. Kuali onechselijkej uan onechpaleuijkej ma nikajsikamati Jehová onechtlapojpolui uan uelis oksepa niktekichiuiliskia” (xikita recuadro tlen itoka “ Seki tlamantli tlen uelis tikchiuas”).

Satanás okachi kinekis mitsyoltilanas ijkuak kitas tikneki oksepa timouikas iuan Jehová (Luc. 4:13). Para amo tikchiuas tlen ye kineki, moneki okachi titlaneltokas.

Itekipanojkauan Jehová yetoskiaj ken ichkamej, ye kinmiluia: “Akin politok niktemos uan akin omoxelo oksepa nikualikas, akin omokojko nikkemilos uan akin omokoko nikyolchikauas” (Ezeq. 34:16). Jehová yokinpaleui miakej itekipanojkauan oksepa iuan ma mouikakan. Ik non, kuali xikmato ye noijki kineki mitspaleuis okachi kuali iuan ximouika.