MAKORE ese mavhuta akawanda anosisira anohwirijwa mu ungano yo Cikristu. Rangariranyi ‘mudakaro unova kudenga’ vhuta rimwe nga rimwe parinohwirira. (Ruka 15:7, 10) Kudari imwimwi mahwirijwa wari mu ungano, ivanyi no cokwadi co kuti Jesu, ngirozi pamwepo na Jehovha vakadakara maningi ngo kuhwirira kwenyu mu cokwadi. Asi pamunovangisira kuti muvangise ushamwari hwenyu na Jehovha, pangatobudavo zvineso. Ngozvapi zvineso zvondhozvo? Zvicinyi zvingamubesera kuti mukwanise kuzvinyisa?

Vazinji pavanohwirira kuna Jehovha, vanohwisana no mazwiro akashata. Kangaije mungatojizwa inga ndi Mambo Dhavhidhi. Pikija wainga wapera kuregerehwa, iyena wakati: ‘Kuposa kwangu kwandipeja simba.’ (Nduyo 40:13; 65:3, Shanduro yeNyika Itsva) Vamweni vangatohwisana no mazwiro awo ko mukuvo wakareba. Izabheri, imwe hambzaji yakapeja makumaviri o makore yakajingwa, * yakati: “Kwandiri zvaindinesera maningi kutenda kuti Jehovha angandiregerera.” Kudari mukagara makasuruvara, ushamwari hwenyu na Jehovha ungatogumazve pa kuremba. (Mazwi Akangwara 24:10) Mucadotendera kuti izvi zvimuitikire.

Vamweni vanorangarira kuti azvikwanisiki kuita zvese zvinodiwa kuti vavangisezve ushamwari hwavo na Jehovha. Pakupera kuhwirijwa mu ungano, hama Antoniyo vakananga kudari: “Ndainga ndakanganwa zvese zvandakajija kana zvondaiita pondainga Capupu.” Ngo ndava yo mazwiro akadari inga aya, vamweni avavangisiri maningi pa kuita zviro zvo umwari.

Inga muezaniso, rangariranyi kuti mbhepo huru yaphwanya-phwanya nyumba yenyu. Mune wo muzi paanovona mugariro wakaita nyumba yake, angatosuruvara ngo kurangarira nguva no basa raanoda kuva naro pakuinasirira. Ndizvona zvinoitikavo pamunoita  cishaishi cikuru cinoita kuti ushamwari hwenyu na Jehovha ukhuvazike. Imwimwi mungatoneseka ngo basa ramungava naro kuti muvezve no ushamwari hwakavanga na Jehovha. Asi aripo mundhu angamubesera pa kuhwisana na izvi.

Jehovha anotikoka, eciti: “Eya, vianyi, ngatibuye.” (Isaia 1:18) Imwimwi makavangisira maningi kuti ‘mubhuye’ na Jehovha. Iyena ari kudakara maningi ngo kuvangisira kwamuri kuitaro. Amborangariranyi basi: Jehovha angatoshandisa muezaniso wenyu kuti akwanise kutatija kuti Sathana munyepi.—Mazwi Akangwara 27:11.

Ngo kuhwirira kwenyu kuna Jehovha, imwimwi makakhwedera kwaari. Iyena anogondesa kukhwederavo kwamuri. (Jakobo 4:8) Zvinodakajisa maningi, vamweni povanomuvona muciviyazve muungano. Asi mucadakara basi ngokuti vamweni vamuvona mecihwirijwa mu ungano. Munodikana kuvangisa rudo hwenyu kuna Baba wenyu no Shamwari yenyu, Jehovha. Waro mungazviitisa kudini?

Ejanyi kugaja zvido zvamungakwanirisa. Kangaije imwimwi muciri kuceukija zviro zvomakajija ngo pamusoro pa Jehovha no cigondiso co paradhiso. Asi maponero enyu inga Mukristu anoda kamare kunasirihwa nga papsa. Izvi zvinobatanija kucumaera nguva jese, kwenda kumusongano no kupeja nguva pamwepo no hama no hambzaji jenyu. Vonanyi zviro zvinganani zvamungaita.

Bhuyanyi na Jehovha mukuvo wese. Baba wenyu vanozviziva kuti mazwiro o kujipa ndava angamuita kuti imwimwi mukonehwe kuita mukumbiro. (Varoma 8:26) Asi “itanyi mukumbiro mukuvo wese,” mecivhunja Jehovha kuti imwimwi munoda maningi kuva shamwari yake. (Varoma 12:12) Hama Andereya vanoceukija kuti: “Inini ndaijizwa ndino ndava, ndaigara maningi no nyowa. Asi vhaza jese jondaiita mukumbiro, mazwiro awo aipunguka. Ndaijizwa ndakagajana kamare.” Kudari mucikazvizivi zvokukumbira pamunova no mazwiro akadari, jijanyi Nduyo 51 na 65. Zvipauko izvi zvinovonesa mukumbiro jakaita Dhavhidhi paainga akhauya.

Jijanyi Bhaibheri mukuvo wese. Izvo zvinozovangisa rutendo hwenyu no kuengejera rudo hwenyu kuna Jehovha. (Nduyo 19:7-11) Hama imweni inodanwa Firipi yakati: “Zvecivoneka kuti andicainasa kujija Bhaibheri, ndakatanga kurembejeka ndogumira pa kushaishaira Jehovha. Andicaida kuitazve zviro zvakafanana. Ngo kudaro, ndakatema civaringo co kuita kuti jijo yangu yo mundhu ega ishande inga jiviriro.” Mungaitavo zviro zvakafanana. Kudari mukatama kuziva zvokudira pa urongwa hwenyu hwo kujija, mungakumbira besero ro shamwari yamunothemba.

Vangisanyizve ushamwari no hama no hambzaji jenyu. Vamweni vanohwirira mu ungano, vanothya kuti hama jimweni jingatorangarira zviro zvakashata ngo pamusoro pavo. Hambzaji Rarisa vakati: “Ndaijizwa maningi no nyowa. Ndaijivona inga kuti ndakacengeja hama jese. Ndakava no mazwiro aya ko mukuvo wakareba kamare.” Ivanyi no cokwadi co kuti vakuru no hama jimweni jakaivha ku divi ro umwari, vanoda kumubesera kuti muvezve no ushamwari hwakavanga na Jehovha. (Vonanyi bhokiso rinoti: “ Vakuru Vangaitenyi?”) Ivona vakadakara maningi ngo kuhwirira kwenyu kuna Jehovha, vanoda kuti mudakarevo.—Mazwi Akangwara 17:17.

Zvicinyi zvamungaita kuti muve makabatana no ungano? Kwenda ku musongano jese no kucumaera nguva jese no hama no hambzaji jenyu. Izvi zvingamubeseresa kudini? Hama Ferikisi vakati: “Ungano yainga yecivetera kuhwirijwa kwangu. Ndakavona kuti hama jaindida kamare. Vese vakandibesera kuti ndijizwe kuti ndaiitazve divi ro mbhuri ya Jehovha, ndainga ndaregerehwa no kukwanisazve kwenderera mberi ndecishandira Jehovha.”—Vonanyi bhokiso rinoti: “ Zvicinyi Zvamungaita?”

Pamunonga mecivangisira kuti muvangisezve ushamwari hwenyu na Jehovha, ivanyi no cokwadi co kuti Sathana anozoenderera mberi ecimuviisira zvineso kuti murembejeke. (Ruka 4:13) Ngo kudaro, ivanyi makanasiririka ngo kuvangisa ushamwari hwenyu na Jehovha.

Ecibhuya ngo pamusoro po mavhuta ake, Jehovha wakagondesa kudari: “Ndinozopsaka bvuta rakapsejeka, ndozoviisa rakabuda mu gwanja, ndozorapa rakakhuvazwa, ndozovangisa rakaremba.” (Ezekieli 34:16) Jehovha wakabesera vashandiri vake vazinji kuti vavezve no ushamwari naye. Mungava no cokwadi co kuti iyena anoda kumubesera kuti muve no ushamwari hwakavanga maningi naye.