BURI mwaka, abantu abari nk’entaama z’omuhendo nibagarurwa omu kibiina Ekikristaayo. Teebereza “okushemererwa” kwingi okurikubaho omu iguru ku barikugaruka! (Luk. 15:7, 10) Ku oraabe ogarukire omu kibiina, noobaasa kuhamya ngu Yesu, baamaraika, na Yehova nibashemererwa kukureeba noogaruka omu mazima. Kwonka, omu kwombeka busya omukago gwawe na Yehova noobaasa kutooroberwa. Noobaasa kutunga mirabanamu ki emwe, kandi niki ekirikubaasa kukuhwera?

Abamwe nibaba nibateganisibwa okwehurira kubi baagaruka omu kibiina. Shana obundi hati nooyetegyereza oku Omugabe Daudi yaabaire naayehurira. Na bwanyima y’okusaasirwa ebibi bye akagira ngu “eby’okutahikiirira byangye bimpikireho” nari bindeengire. (Zab. 40:12; 65:3) Bwanyima y’omuntu kugarukira Yehova, naabaasa kumara emyaka arikweshinja nari arikuhemuka. Isabelle * owaamazire emyaka erengire 20 abingirwe, naagira ati: “Kikangumira munonga kwikiriza ngu Yehova naabaasa kunsaasira.” Waayehwa amatsiko, noobaasa kugaruka ohwemu amaani omu by’omwoyo. (Enf. 24:10) Teeraho kureeba ngu ekyo tikyakuhikaho.

Abamwe nibeerarikirira aha birikutwarirwa omu kugaruraho omukago gwabo na Yehova. Bwanyima ya Antoine kugarurwa omu kibiina akagira ati: “Nkaba nindeeba ngu nyebirwe buri kimwe ekirikukwata aha buheereza bw’Ekikristaayo.” Ahabw’enyehurira nk’ezo, abamwe nibabaasa kweziringa kwejumbira kimwe omu by’omwoyo.

Nk’eky’okureeberaho, omuntu yaaba naakunda munonga enju reero ekashiishwa eihunga, naabaasa kwerarikirira yaateekateeka aha birikwetengyesa kugaruka kugyombeka. Nikyo kimwe, waaba  waakozire ekibi ky’amaani kikaita omukago gwawe na Yehova, noobaasa kureeba ngu nikyetengyesa amaani maingi kugaruka kweyombeka omu by’omwoyo. Kwonka hariho obuhwezi.

Yehova naatweta ati: “Mbwenu nu nimwije tuhanuure hamwe.” (Isa. 1:18) Waakozire n’amaani ‘kuhanuura,’ nari kutereeza enshonga. Yehova naakukunda ahabw’okuteeraho kwawe. Teekateeka ahari eki: Waahaire Yehova ah’okwihirira kugarukamu Sitaane kumworeka ngu n’omubeihi!—Enf. 27:11.

Ahabw’okugarukira Yehova, hati ori haihi nawe, kandi nawe naaraganisa ngu naija kukwirira haihi. (Yak. 4:8) Kwonka, nihatwariramu bingi abandi kubaasa kugaruka kukwakiira kandi bakakwikiriza nk’omwe aha b’ekibiina. Oine kugumizamu nooyongyera kukunda Sho kandi Munywani waawe, Yehova. Eki noobaasa kukikora ota?

Teeraho kutaho ebigyendererwa ebiringaniire. Ijuka ngu enyegyesa ezirikutandikirwaho, nk’okumanya Yehova n’ebi arikuraganisa aha biro by’omumaisho tizikahindukire. Kwonka oine kugaruka aha ntwaza y’Ekikristaayo, orikubuurira amakuru marungi, kandi orikuteeranira hamwe n’ab’eishe-mwe na banyaanyako. Teekateeka aha bigyendererwa ebi.

Gamba na Yehova obutoosha. Sho naakimanya ngu enyehurira z’okweshinja nizibaasa kukureetera kugumirwa kumushaba. (Rom. 8:26) Kwonka, ‘gumizamu nooshaba ohamire,’ orikugambira Yehova ku orikwendera kimwe kugaruraho omukago gwawe nawe. (Rom. 12:12) Andrej naijuka ati: “Nkaba ninyeshinja munonga kandi nyine n’okuhemuka kwingi. Kwonka bwanyima ya buri kushaba, enyehurira ezo zikaba zituuba. Nkaba ngira obusingye bw’omu mutima.” Waaba otarikumanya eki oine kushaba, yetegyereze okushaba kw’Omugabe Daudi owaayeteisize okuri omuri Zaaburi 51 na 65.

Yega Baibuli obutoosha. Eki nikiija kukuhamya omu by’omwoyo, kandi kihamye rukundo ei oyiniire Yehova. (Zab. 19:7-11) “Okutagira entebeekanisa y’eby’omwoyo nikyo kyagabire kindeeteire kuhwamu amaani n’okureebya Yehova,” Felipe nikwo arikugira. “Nkaba ntarikwenda kukora enshobe niyo emwe emirundi ebiri, n’ahabw’ekyo nkacwamu kuhindura okweyegyesa eky’okwerindisa kyangye.” Niiwe noobaasa kukora nikyo kimwe. Waaba nooyenda obuhabuzi kumanya enshonga ezi orikubaasa kwegaho, noobaasa kushaba omunywani okuzire omu by’omwoyo kukuhwera?

Yombeka busya omukago gwawe n’ab’eishe-emwe na banyaanyako. Abamwe abarikugaruka omu kibiina nibaba nibeerarikirira ngu abandi nibaija kuba nibabareeba kubi. Larissa naagira ati: “Nkaba nimpurira ndikuhemuka munonga. Nkaba nindeeba ngu nkareebya ekibiina. Nkaguma nyine enyehurira ezi kumara obwire bwingi.” Gira obuhame ngu abareeberezi n’abandi abakuzire omu by’omwoyo baine ekihika ky’okukuhwera kwombeka busya omukago gwawe na Yehova. (Reeba akabokusi “ Abareeberezi Nibabaasa Kukora Ki?”) Bashemereirwe ahabw’okugaruka kwawe, naiwe nikwo oine kwehurira otyo!—Enf. 17:17.

Niki ekirikubaasa kukuhwera kwirira haihi n’ekibiina? Yejumbire kimwe omu bi ab’eishe-emwe na banyaanyako barikukora, nk’okuza omu nteerane, n’okubuurira butoosha. Ebi nibiija kuhwera bita? Felix naagira ati: “Ekibiina kikaba kiniire ekihika okugaruka kwangye. Nkaba nindeeba ngu nibanfaho. Boona bakampwera kugaruka kwijura omu kibiina, kuhurira ngu nsaasiirwe, n’okugumizamu nimpeereza.”—Reeba akabokusi “ Noobaasa Kukora Ki?”

Sitaane naija kugumizamu naakureetera oburemeezi bwingi kuteeraho kukumaramu amaani waaba nooyombeka busya omukago gwawe na Yehova. (Luk. 4:13) Ba oyeteekateekire kuhamya enju yaawe ey’eby’omwoyo hati.

Yehova naaraganisa entaama ze ati: ‘Ninyija kusherura ezibuzire, ngarure ezirazire, mbungye ezihendekire, ezitaine maani, nzigagaruremu.’ (Ezk. 34:16) Yehova ahweraire abandi nyamwingi abaabaire bagarukire enyima omu by’omwoyo. Gira obuhame ngu naayenda kukuhwera kugumizamu nooyombeka omukago gwawe nawe gukahamira kimwe.