SOUNPAR koaros, mie irail kan me tohto me piskenla ahpw re pwurehng pwurodo nan mwomwohdisohn Kristian. Medewehla uwen “nanleng eh perenkihda” laud ni emen irail ar pwurodo! (Luk 15:7, 10) Ma kowe emen irail, ke kak uhdahn kamehlele me Sises, tohnleng kan, oh Siohwa kin uhdahn ketin kupwurperenkihda omw pwurehng wiahla kisehn mwomwohdiso. Ahpw ni omw kin pwurehng kamwahwihala omw nanpwungmwahu rehn Siohwa, ele mie soangen kahpwal kei me ke pahn ahneki. Ia ekei kahpwal pwukat, oh dahme kak seweseiuk?

Riatail Kristian tohto kin mworuskihte dahme re wiahda pil mwurin arail pwurodo nan mwomwohdiso. Ele ke wehwehki ahn Nanmwarki Depit eh pepehm. Pil mwurin Siohwa eh ketin mahkohngehr ih, e koasoia: “Dipei kan salihiepenehr.” (Mel. 40:12; 65:3) Mwurin emen kin pwurodo rehn Siohwa, ele e ahnekihte pepehm en namenek de suwedkihte dahme e wiahdao erein sounpar tohto. Isabelle piskenla daulih sounpar 20. * E koasoia, “I apwalki en medewe me Siohwa kak ketin mahkohng ie.” Ma ke mworusala, omw nanpwungmwahu rehn Siohwa kakete pwurehng luwetala. (Lep. Pad. 24:10) Dehr mweidohng met en wiawihong uhk.

Ekei kin pwunodki me mwein re sohte kak wia soahng koaros me anahn pwehn pwurehng ahneki nanpwungmwahu keren rehn Siohwa. Mwurin eh pwurodo nan mwomwohdiso, Antoine koasoia, “I manokehla soahng tohto me I sukuhlki de wia ni ahnsou me I wia Sounkadehde men mahs.” Pwehki ekei irail ahneki soangen pepehm wet, irail sohte kin wia uwen arail kak ong Siohwa.

Karasepe, ni ihmw ehu eh ohkihla melimel, ele me imwaneki ihmwo pahn uhdahn pwunodki ia uwen laud en ahnsou oh doadoahk me e anahne wia pwehn pwurehng kamwahwihala ihmwo. Duwehte met, ma omw nanpwungmwahu rehn Siohwa ohla  pwehki ke wiahda dihp laud, ele ke pahn pehm me ke anahne doadoahk laud pwehn pwurehng kamwahwihala omw nanpwungmwahu reh. Ahpw ke sohte anahne kelehpwki kahpwal wet.

Siohwa ketin mahsanihong kitail: “Kumwail kohdo kitail kapwungala mahs ire pwukat.” (Ais. 1:18) Ke kin nantihong doadoahk laud pwehn ‘kapwungala mahs ire kan.’ Siohwa ketin poakohng uhk pwehki omw nantihong wia met. Pwehki omw pwurodo rehn Siohwa, e kak ketin doadoahngkin uhk nin duwen mehn kahlemeng ehu pwehn kadehdehda me Tepilo iei sounlikamw men!​—Lep. Pad. 27:11.

Pwehki omw pwurodo rehn Siohwa, ke karanihalahr Siohwa, oh e ketin inoukihda me e pahn ketin karanihiukala. (Seims 4:8) E mwahu ong meteikan en kilang me ke pwurehng wiahla kisehn mwomwohdiso. Ahpw ke anahne wia laudsang met. Ke anahne pousehlahte kakehlakahla omw limpoak ong Semomwo oh Kompoakepahmwo, Siohwa. Ia duwen omw kak wia met?

Song en wiahda mehn akadei kan me ke kak kapwaiada. Ele ke tamatamante soahng mengei kan me ke sukuhlki duwen Siohwa oh sapwellime inou kan me pid Paradais. Ahpw met, ke anahne pwurehng wiahda omw koasoandi mwahu, me duwehte, kaukaule iang kalohk, iang towehda mihting kan, oh wiahda ahnsou ken kin werekiong riomw Kristian kan. Tehk mehn akadei pwukat.

Kalapw kapakap ong Siohwa. Semomwo Siohwa ketin mwahngih me ma ke kin ahnekihte pepehm en suwedki sapwung me ke wiahdao, e pahn kak apwal ong uhk en kapakap ong ih. (Rom 8:26) Ahpw ken “poadidiong kapakap,” oh padahkihong Siohwa ia uwen omw men kompoakepahnki ih. (Rom 12:12) Andrej koasoia: “I uhdahn namenengki oh suwedki dahme I wiahdao. Ahpw mwurin ehuehu ahi kapakap, I kin nsenamwahula. Loalei kin meleileidi.” Ma ke sehse dahme ke pahn kapakapki, kilang kapakap kan en Nanmwarki Depit ni eh koluhla, me kileldi nan Melkahka 51 oh 65.

Kaukaule onopki Paipel. Met pahn sewese kakehlakahla omw pwoson oh sewese kalaudehla omw limpoak ong Siohwa. (Mel. 19:7-11) Felipe koasoia: “Pwehki sohte ahi koasoandi en kaukaule onopki oh wadek Paipel, I luwetala oh kansensuwedihada Siohwa. I sohte men pwurehng kansensuwedihada Siohwa, kahrehda I tehk mwahu me I kin kaukaule wia pein ahi onop.” Ke pil kak wia duwehte. Ma ke anahne sawas pwehn pilada oaralap kan me ke pahn pein onopki, ke kak peki rehn kompoakepahmw men me ahneki nanpwungmwahu kehlail rehn Siohwa pwehn sewese iuk.

Pwurehng kamwahwihala omw nanpwungmwahu rehn riomw Kristian kan. Ekei me pwurodo nan mwomwohdiso kin pwunodki me meteikan pahn lingeringer pahrail. Larissa koasoia: “I uhdahn namenek. I pehm me I kamedekihala riei Kristian kan. I ahneki soangen pepehm wet ahnsou werei.” Ke anahne kamehlele me elder kan oh meteikan men seweseiuk ken pwurehng kamwahwihala omw nanpwungmwahu rehn Siohwa. (Menlau kilang kisin koakono “ Dahme Elder kan Kak Wia?”) Irail uhdahn perenkihda omw pwurodo oh irail men ken peren!​—Lep. Pad. 17:17.

Dahme kak seweseiuk en karanihala mwomwohdiso? Iang riomw Kristian kan towehda mihting kan koaros oh kaukaule iang irail nan kalohk. Ia duwen met eh pahn seweseiuk? Felix koasoia: “Mwomwohdiso kin kasikasik ei pahn pwurodo. I pehm me irail uhdahn poakohng ie. Irail koaros sewese ie en pehm me I pwurehng wiahla kisehn mwomwohdiso, me Siohwa ketin mahkohng ie, oh me I kak pousehlahte papah Siohwa.”​—Menlau kilang kisin koakono “ Dahme Ke Kak Wia?”

Sehdan pahn pousehlahte kahrehda kahpwal tohto ong uhk pwehn song en kaluweteiukala ni omw nannanti en kamwahwihala omw nanpwungmwahu rehn Siohwa. (Luk 4:13) Kaunopada ong kahpwal pwukat sang ni omw kakehlakahla omw nanpwungmwahu rehn Siohwa.

Me pid sapwellime sihpw kan, Siohwa ketin inoukihda: “I pahn kin rapahki me salongalahr akan, kapwurehdo me kin kohkohseli mwahl akan, kidimpene ohlahn me lipwalipwada kan, kamwahwihala me soumwahu kan.” (Esek. 34:16) Siohwa kin ketin sewese me tohto teikan ren pwurehng kamwahwihala arail nanpwungmwahu reh. Ke anahne kamehlele me e kin ketin kupwurki seweseiuk en pousehlahte kamwahwihala omw nanpwungmwahu kehlail reh.