RONOJEL taq junabʼ, e kʼi winaq ketzalij chi lo jumul pa ri utinamit ri Jehová. Chojchoman chrij ri «kikotemal» kkinaʼ ri e kʼo pa ri kaj are chiʼ ktzalij lo jun chke ri e qachalal (Luc. 15:7, 10). We at jun chke ri kʼateʼ xeʼux chi jumul testigo rech Jehová, qas chawetaʼmaj che ri Jesús, ri ángeles y ri Jehová sibʼalaj kekikotik rumal che xattzalij loq. Are kʼu, pa taq ri qʼij che kakoj achuqʼabʼ che usukʼumaxik ri awachilanik rukʼ ri Jehová, weneʼ kʼo jujun taq kʼax kariqo. ¿Jas taq riʼ ri e kʼax y jas kyaʼow tobʼanik chawe?

E kʼi chke ri kʼateʼ xetzalij lo pa ri utinamit ri Jehová, rajawaxik kkikoj kichuqʼabʼ chuwach ri kichomanik y ri kkinaʼo che kubʼan kʼax chke. We je tajin kaqʼaxej at, kachʼobʼ riʼ ri xunaʼ ri David. Paneʼ kuyum chi ri umak rumal ri Jehová, xubʼij ri e tzij riʼ: «In kiqajbʼem ri wetzelal» (Sal. 40:12; 65:3). We jun winaq kʼateʼ xtzalij lo pa ri utinamit ri Jehová kʼo jujun taq mul riʼ kunaʼo che ajmak o weneʼ kunaʼ kʼixbʼal pa kʼi taq junabʼ. Jun kʼutbʼal, ri qachalal Isabelle, * che xel bʼi más che 20 junabʼ pa ri congregación kubʼij: «Kinkoj taj che ri Jehová xukuy numak». We kubʼan kebʼ akʼuʼx, kqaj chi jumul riʼ ri uchuqʼabʼ ri awachilanik rukʼ ri Jehová (Prov. 24:10). Chakojoʼ achuqʼabʼ rech kakʼulmaj ta wariʼ.

E nikʼaj chik kkinaʼo che kʼo ta kichuqʼabʼ rumal che kechoman chrij ronojel ri rajawaxik kkibʼan na rech kkisukʼumaj ri kachilanik rukʼ ri Jehová. Are chiʼ kʼateʼ xux chi jumul testigo rech Jehová, ri qachalal Antoine xubʼij: «Kʼax tajin kinriq che unaqʼatisaxik chi jumul wibʼ che ubʼanik ri jastaq che rajawaxik kubʼan jun cristiano». Rumal wariʼ, weneʼ kʼo jujun kkibʼan ta ri jastaq che kʼo ubʼanik rukʼ ri kikojonik.

Chqakojompeʼ jun kʼutbʼal. We jun ja kuriq kʼax rumal jun nimalaj jabʼ, weneʼ ri ajchaqʼe kubʼan kebʼ ukʼuʼx rumal che kuchomaj che nim  tiempo y chuqʼabʼ kukʼam bʼik rech kusukʼumaj chi jumul. Junam rukʼ wariʼ, we ri awachilanik rukʼ ri Jehová uriqom kʼax rumal che xabʼan jun nimalaj mak, weneʼ kachomaj che kajwataj nimalaj chuqʼabʼ rech kasukʼumaj chi jumul. Are kʼu kʼo kattowik.

Ri Jehová kubʼij wariʼ chqe: «Tisaj qachomaj  we jasach riʼ» (Is. 1:18). At akojom chi achuqʼabʼ che uchomaxik o usukʼumaxik ri jastaq rukʼ ri Jehová y sibʼalaj katraj rumal ri abʼanom. Chachomaj wariʼ: Ri Jehová kkunik katukojo rech kuqʼalajisaj che ri Satanás xa jun molol tzij (Prov. 27:11).

Rumal che akojom achuqʼabʼ rech xattzalij chi lo jumul pa ri utinamit ri Jehová, akʼutum che kawaj katqebʼ rukʼ y ri areʼ kubʼij chawe che xuqujeʼ kraj je kubʼan awukʼ (Sant. 4:8). Sibʼalaj utz che konojel ri e kʼo pa ri congregación kkilo che xattzalij loq, are kʼu kʼo jun jastaq che rajawaxik xuqujeʼ kabʼano. Rajawaxik kanimarisaj ri aloqʼoqʼebʼal che ri aTat y ri awAchiʼl, ri Jehová. ¿Jas kabʼan che ubʼanik wariʼ?

Are chawilaʼ ri jastaq che katkunik kabʼan chanim. Weneʼ e sachinaq ta pa ajolom ronojel ri awetaʼm chrij ri Jehová y ri utzujum che kubʼan na. Are kʼu rajawaxik kakowirisaj chi na jumul ri akojonik, wariʼ kraj kubʼij che katzijoj ri utzij ri Dios, katkʼojiʼ pa ri e riqbʼal ibʼ y keʼawachilaj ri e qachalal. Chqilampeʼ jujun jastaq che katkunik kamaj ubʼanik.

Amaqʼel chabʼanaʼ achʼawem che ri Jehová. Weneʼ kanaʼo che kariq ta ri kabʼij rech katchʼaw rukʼ ri aTat kʼo pa ri kaj, are kʼu ri areʼ qas kuchʼobʼ ri kanaʼo (Rom. 8:26). Mayaʼ kan ubʼanik achʼawem y chabʼij che ri Jehová che sibʼalaj kawaj katux rachiʼl (Rom. 12:12). Ri qachalal Andrej kubʼij: «Sibʼalaj kinkʼixik y kinnaʼo che in ajmak. Are kʼu, are chiʼ kbʼantaj nuchʼawem kinnaʼ jamaril pa wanimaʼ». We awetaʼm taj jas kabʼij pa ri achʼawem, chatchoman chrij ri e chʼawem xubʼan ri qʼatal tzij David che kriqitaj pa Salmos 51 y 65.

Ronojel qʼij chanikʼoj ri Biblia. Wariʼ katutoʼ che ukowirisaxik ri akojonik y unimarisaxik ri aloqʼoqʼebʼal che ri Jehová (Sal. 19:7-11). Ri a Felipe xubʼij: «Ri xbʼanowik che xqaj uchuqʼabʼ ri nukojonik y che xinmakun chuwach ri Jehová, are che nukʼamansam ta wibʼ che unikʼoxik uwach ri Biblia. Rumal che kwaj taj kinriq chi jumul ri kʼax xinriqo, xinchomaj che kinkʼamansaj wibʼ che unikʼoxik uwach ri Biblia». At xuqujeʼ katkunik kabʼan wariʼ. We awetaʼm ta jas kʼutunem kanikʼoj uwach, chataʼ tobʼanik che jun awachiʼl che ko pa ri ukojonik.

Cheʼawachilaj chi jumul ri e qachalal. E jujun chke ri ketzalij lo pa ri congregación kkinaʼo che weneʼ kchomax jastaq chkij kumal ri e nikʼaj chik. Ri al Larissa kubʼij: «Sibʼalaj kinkʼixik. Pa nim tiempo xinnaʼo che xinbʼan kʼax chke konojel ri e qachalal». Qas chnaʼtaj chawe che ri e kʼamal bʼe y e nikʼaj chi qachalal che ko ri kikojonik kkaj katkitoʼo rech kasukʼumaj ri awachilanik rukʼ ri Jehová (chawilaʼ ri recuadro « Ri kekunik kkibʼan ri e kʼamal bʼe»). Sibʼalaj kekikotik che xattzalij lo pa ri utinamit ri Jehová y kkaj che katkikotik (Prov. 17:17).

¿Jas katkunik kabʼano rech katkʼojiʼ chkinaqaj ri e qachalal? Chatkʼol pa ronojel ri e riqbʼal ibʼ y amaqʼel chatzijoj ri utzij ri Dios kukʼ ri e qachalal. ¿Jas tobʼanik kuya wariʼ chawe we amaqʼel kabʼano? Ri a Félix xubʼij: «Konojel ri e qachalal in keyem. Xinnaʼo che sibʼalaj kinkaj. Konojel xinkitoʼo rech kinnaʼo che in jun pa ri utinamit ri Jehová, che ri Jehová ukuyum chi numak y che kinkunik kinel ta chi kanoq» (chawilaʼ ri recuadro « Ri katkunik kabʼano»).

Ri tiempo che kasukʼumaj ri awachilanik rukʼ ri Jehová, ri Satanás kukoj na nimaʼq taq kʼax che uqasaxik achuqʼabʼ (Luc. 4:13). We kawaj ko kattakʼiʼk, amaqʼel chakowirisaj ri akojonik.

Ri Jehová kubʼij chke ri e upataninel che e tzaqinaq kanoq: «Keʼentzukuj taq na ri nuchij ri e sachinaq, keʼenkʼam na uloq ri kijalom taq kibʼe, keʼenbotzʼ taq na ri jujun kaqan ri e qʼajinaq, keʼentoʼ na ri tuqaribʼ» (Ezeq. 34:16). Ri Jehová e utoʼm e kʼi chke ri upataninel rech kkisukʼumaj ri kachilanik rukʼ. Rumal laʼ qas chawetaʼmaj che at xuqujeʼ katkunik kakowirisaj ri awachilanik rukʼ ri areʼ.