SAPA watam qarqusqa kaqkuna utaq Diosta qipanchaqkuna achka kutimunku. Kutimuptinkuqa hanaq pachapi kaqkunam anchata kusikunku (Luc. 15:7, 10). Diosta qipanchasqaykimanta kutiramuspaykiqa manapunim iskayrayawaqchu Jesuspas, angelkunapas chaynataq Jehova Diospas kusisqa kasqankumantaqa. Diosta kaqmanta tukuy sunquykiwan serviytaqa atiwaqmi, ichaqa pisi-pisimantam atinki. Chaywanpas, ¿ima sasachakuykunam kanman?

Qarqusqa kasqankumanta kutimuq achka iñiqmasinchikkunam hukmanyasqa tarikunku. Qampas chayna tarikuspaykiqa yaqapaschá entiendenki kamachiq David imayna tarikusqanta. Payqa huchankunamanta Dios pampachaykuptinpas kaynatam nirqa: ‘Ñawsayanaykamam mana allin ruwallasqay hapirullawan’, nispa (Sal. 40:12; 65:3). Qarqusqa kasqankumanta kutimuqkunaqa unay watam llakisqa utaq pinqakuywan kanmanku. Isabelmi * 20 wata masnin qarqusqa karqa. Paymi nin: “Jehova Diosqa manachá pampachawanqachu nirqanim”, nispa. Qampas chaynata nispaykiqa Diosmantam kaqmanta karunchakuruwaq (Prov. 24:10). Mana chayna kanaykipaqmi kallpanchakunayki.

Wakin iñiqmasinchikkunam hukmanyasqa tarikunku Diosta tukuy sunquwan kaqmanta servinankupaq imakunata ruwanankupi piensaspanku. Antoniom nin: “Karunchakurusqaymanta kutiramuspayqa manam wakin iñiqkuna hinachu karqani”, nispa. Chayraykum kutimuq wakin iñiqmasinchikkunaqa Diospaq imatapas ruwaypi sasachakunku.

Kaypi piensarisun: Nisyu wayra wasita aparuptinqa yaqapaschá dueñonqa llumpay llakisqa tarikunqa tukuy imata hayka tiempo allichananpi piensaspan. Chaynallataqmi ima huchata ruwaruspaykipas  kaqmanta Diosman sunqu kanaykipaq tukuy imata ruwaynikiqa sasa hina rikchakusunkiman. Ichaqa manam sapallaykichu kachkanki.

Kikin Jehova Diosmi niwanchik: ‘Ñuqamanyá hamuychik’, nispa (Is. 1:18). Qamqa mana allin ruwasqaykikunata saqispaykim kallpanchakurqanki Dios pampachasunaykipaq, chayraykum payqa anchata kuyasunki. Kallpanchakusqaykiwanmi Jehova Diosqa satanas llulla kasqanta qawachinqa (Prov. 27:11).

Huchaykimanta wanakuspaykim Jehova Diosmanqa asuykurqankiña, paypas nisunkitaqmi qanman asuykamusunaykipaq (Sant. 4:8). Allinpunim Diosman kutimusqaykiqa. Chaywanpas, ¿imakunaraqmi yanapasunkiman Diosman sunqu kanaykipaq?

Imaynam wayrapa apasqan wasipapas cimientonqa hinalla takyan, chaynataqmi Diosmanta yachasqaykikunapas hinalla sunquykipi kachkan. Chaywanpas, wasita hatarichichkaq hinam Diosmanta willakunayki, huñunakuykunaman rinayki hinaspa iñiqmasikikunawan kuska kanaykipaq tiempochakunayki. Chaymantayá qatiqninpi qawasun.

Diosta mañakuy sapa punchaw. Wakinpiqa hukmanyasqa tarikuspaykichá Diosman imayna asuykuytaqa mana atinkichu. Chaywanpas Jehova Diosqa yanapaykuytam munasunki (Rom. 8:26). Diosta sapa punchaw mañakuspaykim ninayki paypa amistadnin kay munasqaykita (Rom. 12:12). Andresmi yuyarispan kaynata nin: “Hukmanyasqa hinaspa pinqakuyllawanñam karqani. Sapa kuti Diosta mañakuruspaymi ichaqa hawka tarikuq kani”, nispa. Qampas Diosman imayna asuykuyta mana atispaykiqa, huchankunamanta wanakuruspan kamachiq Davidpa mañakusqankunapiyá yuyaymanay. Chaymi kachkan Salmos 51 hinaspa 65 capitulopi.

Bibliata allinta estudiay. Chayta ruwaspaykiqa aswan iñiyniyuqmi kanki, hinaspapas astawanmi Jehova Diosta kuyanki (Sal. 19:7-11). Felipem willakun: “Bibliata allinta mana estudiasqayraykum karunchakuyta qallaykuspay Diosta qipancharurqani. Kaqmanta chayna mana pasaruwananpaqmi kunanqa kallpanchakuniña bibliata allinta estudianaypaq”, nispa. Qampas Felipe hinam ruwawaq. Imamanta yachanaykipaq mana tantiayta atispaykiqa allin iñiyniyuq amistadnikitam tapukuwaq.

Kaqmanta iñiqkunapa amistadnin kay. Kutimuq wakin iñiqmasinchikkunam hukkunapa mana allin qawasqan kananta piensaspanku hukmanyasqallaña kanku. Larissa sutiyuq iñiqmasinchikmi nin: “Lliw iñiqmasiykunata qipancharusqayta piensaspaymi pinqakuyllawanña karqani, chaynam unay tiempo karqani”, nispa. Qampas chayna tarikuspaykiqa amayá iskayrayaychu punta apaqkunawan wakin iñiqkuna Diosman sunqu kanaykipaq yanapay munasusqaykitaqa (qaway “ ¿Imatam punta apaqkuna ruwanmanku?” niqta). Paykunaqa kutimusqaykimantam anchata kusikunku, hinaspapas kusisqa kanaykitam munanku (Prov. 17:17).

¿Imatam ruwawaq iñiqkunawan huk sunqulla kanaykipaq? Sapa semanam huñunakuykunaman rinayki hinaspapas iñiqkunawanmi sapa kuti willakunayki. ¿Imanasqataq ancha allin chaykunapaq kallpanchakuyniki? Felixmi nin: “Iñiqmasinchikkunaqa kutiramuptiymi kuyakuywan chaskiykuwarqa. Yanapawasqankuwanmi manaña hukmanyasqachu tarikurqani, hinaspapas Jehova Dios pampachaykuwasqanmantam manaña iskayrayarqanichu”, nispa (qaway “ ¿Imakunatam ruwawaq?” niqta).

Diosman sunqu kanaykipaq kallpanchakuptikiqa satanasqa tukuytam ruwanqa hukmanyachisunaykipaq (Luc. 4:13). Mana wichiykachisunaykipaqmi hinalla kallpanchakunayki Diospi hapipakunaykipaq.

Serviqninkunamantam Dios kaynata nin: ‘Chinkaruq ovejakunatapas maskaykusaqmi, chullaruq ovejakunatapas kutirichimuspaymi wataykusaqtaq chakin pakisqa ovejakunatapas, iquyaruq ovejakunatapas ñuqaqa yanapaykusaqmi’, nispa (Ezeq. 34:16). Achka karunchasqa kaqkunatam Jehova Diosqa kaqmanta payman sunqu kanankupaq yanaparqa. Amapuniyá iskayrayaychu qamtapas yanapasunaykimantaqa.