SAPA watanmi askha hermanonchiskuna Diospa llaqtanman kutimpushanku. Chayta rikuspaqa anchatan janaq pachapi kaqkunaqa kusikunku (Luc. 15:7, 10). Jehová Diospas, Jesuspas, angelkunapas anchatan kusikunku llaqtanman kutimpusqaykimantaqa. Kutimpusqaykiqa ancha allinpunin. Ichaqa kallpachakunaykin Jehová Dioswan jujmanta amigontin kanaykipaq, chaymi yanapasunki sasachakuykunata aguantanaykipaq.

Wakin hermanonchiskuna Diospa llaqtanman kutimpurankuña chaypas sinchitan juchachakushallanku. Chaymi pasaran rey Davidwanpas. Jehová Dios juchankunamanta perdonaranña chaypas juchachakushallaranmi (Sal. 40:12; 65:3). Diospa llaqtanman kutimpuq hermanonchiskunaqa sinchitan juchachakunku, p’enqasqa iman tarikunku. Chaymi pasaran Isabel hermananchiswanpas. * Payqa 20 watakuna masñan Diospa llaqtanmanta qarqosqa kapuran. Paymi nin: “‘Manapaschá Jehová Diosqa perdonawanraqchu’ niqmi kani”, nispa. Sichus pisikallpayanki chayqa pisipapuspan jujmanta Jehová Diosmanta karunchakapuwaq (Prov. 24:10).

Diospa llaqtanman kutimpuq hermanokunaqa jujmantan yachakunanku kanqa Diospa llaqtanpi imaymana ruwaykunaman. Chaymantapas kallpachakunankun kanqa Jehová Dioswan jujmanta amigontin kanankupaq. Chayqa yaqapaschá paykunapaqqa sasa kanman. Chaymi Antonio hermanonchiswan pasaran, payqa unaymantañas Diospa llaqtanman kutimpusqa. Paymi nin: “Unaymantañan Diospa llaqtanman kutimpurani. Chaymi kallpachakunay karan jujmanta juñunakuykunaman ama faltakuspa rinaypaq, predicaq lloqsinaypaq, sapa p’unchay Bibliata leenaypaqpas”, nispa. Antonio hermanonchis jinan wakin hermanonchiskunaqa sasata yachakunku chay ruwaykunaman, chaymi pisillata chay ruwaykunapi yanapakunku.

Sichus wasiykita wayra waqtaruspa kumparapunman chayqa yaqapaschá wasiykita jujmanta jatarichiyta sasapaq qhawariwaq, yaqapaschá pisikallpayawaqpas. Chhaynallataqmi kanman sichus juchallikusqaykirayku Jehová Diosmanta t’aqakapuranki  chayqa. Jehová Dioswan jujmanta amigontin kanaykipaqqa kallpachakunaykin kanqa, sasaña kanqa chaypas Jehová Diosmi yanapasunki.

Diosmi llaqtanmanta karunchakapuqkunata nin: “Jamuychis, parlasunchis”, nispa (Isa. 1:18). Chayta kasukuspan qanqa Diospa llaqtanman kutimpuranki. Chay ruwasqaykimantan Jehová Diosqa mayta munakusunki. Chaymantapas kutimpusqaykiwanmi Jehová Diospa sonqonta kusichishanki, Saqra llulla kasqantataq rikuchishanki (Prov. 27:11).

Diospa llaqtanman kutimpuspaqa jujmantan Diosman achhuykushanki, chaymi paypas achhuykamullasunkitaq (Sant. 4:8). Hermanokunaqa kusisqan kashanku kutimpusqaykimanta. Ichaqa kallpachakunaykin kanqa astawan Jehová Diosta munakunaykipaq paywan amigontin kanaykipaqpas.

Diospa llaqtanmantaña lloqsipuranki chaypas manachá jayk’aqpas qonqarankichu Jehová Diospa sutintapas promesankunatapas. Chaykunaqa wasi cimiento jinan kaqlla kashan. Sichus kallpachakunki allin iñiyniyoq kanaykipaq chayqa, wasiykiq perqankunatapas jujmanta jatarichishawaq jinan kanqa. Chaypaqmi astawan kallpachakunayki kanqa Diosmanta willaq rinaykipaq, juñunakuykunaman rinaykipaq, hermanokunawanpas kuska kanaykipaq. Ichaqa, ¿iman chaypaq yanapasunkiman?

Jehová Diosmantan mañakunayki. Juchapi urmasqaykimanta juchachakushankiraq chayqa sasapaschá qanpaq kashan Jehová Diosmanta mañakuy. Ichaqa Jehová Diosqa yachanmi imayna kashasqaykita (Rom. 8:26). Chhaynaqa Jehová Diosmanta astawanraq mañakuy, chaymantapas willakuy jujmanta paywan amigontin kay munasqaykita (Rom. 12:12). Hermanonchis Andresmi nin: “Jucha ruwasqaykunamantan nishuta juchachakuq kani, mana valeqpaqtaqmi qhawarikuqpas kani. Ichaqa Jehová Diosmanta mañakuspan thaj kapuq kani”, nispa. Sichus mana ima nispapas mañakuyta atishankichu chayqa, Salmos 51, 65 capitulokunatan leewaq, chaypin kashan juchankunamanta pesapakuspa Davidpa mañakusqan.

Sapa p’unchaymi Bibliata estudianayki. Bibliata estudiaymi yanapasunki allin iñiyniyoq kanaykipaq Jehová Diostapas astawan munakunaykipaq (Sal. 19:7-11). Felipe hermanonchismi nin: “Noqaqa manan allintapunichu Bibliataqa estudiaq kani, nitaqmi sapa p’unchaychu leeq kani. Chaymi pisi-pisimanta iñiyniypi chiriyapurani jinaspa jatun juchapi urmapurani. Chaymi kutimpuspaqa tukuy atisqayta ruwarani aswan allinta Bibliata estudianaypaq”, nispa. Chaytan qanpas ruwawaq. Sichus mana atishankichu imaynata Biblia estudiayta chayqa allin iñiyniyoq hermanokunata niy yanapanasuykipaq.

Hermanokunawanmi allin amigontin kanayki. Chayllaraq Diospa llaqtanman kutimpuqkunaqa manchakunkun jujmanta hermanokunawan tupayta. Larisa hermananchismi nin: “Nishutan manchakusharani hermanokunawan tupaytaqa, ‘imanasaqtaq kunanri, p’enqaypimá paykunatapas qhawarichirani’ nispan niq kani. Unay tiempon chhayna kasharani”, nispa. Chhaynapaschá qanpas tarikushanki, ichaqa ama manchakuychu. Hermanokunapas umalliqkunapas munakusunkikun, Jehová Dioswan amigontin kanaykitataqmi munanku (qhaway “ ¿Imaynatan umalliqkuna kutimpuqkunata yanapankuman?” nisqata). Jinaspapas Diospa llaqtanpi kusisqa kanaykitan munanku (Prov. 17:17).

Kallpachakushallay juñunakuykunaman ama faltakuspa rinaykipaq hermanokunawanpas kuska Diosmanta willaq rinaykipaq. Félix hermanonchismi nin: “Hermanokunaqa maytan munashasqaku Diospa llaqtanman kutimpunayta. Chaypin repararani Jehová Diosqa mayta munakuwasqanta perdonawasqantapas”, nispa (qhaway “ ¿Imatan ruwanayki allin iñiyniyoq kanaykipaq?” nisqata).

Kallpachakushankiña Dioswan amigontin kanaykipaq chaypas, Saqraqa imaymanatan ruwanqa iñiyniykipi pisipanaykipaq (Luc. 4:13). Chaymi sapa p’unchay kallpachakushanallayki.

Jehová Diosmi nin: “Chinkasqa ovejakunatapas maskhampusaqmi, k’itakuqtapas kutichikampusaqmi, chakin p’akisqatapas chaqllaykusaqmi, onqosqatapas jampiykusaqmi”, nispa (Ezeq. 34:16). Jehová Diosqa askha hermanonchiskunatan yanaparan llaqtanman kutimpunankupaq chhaynapi paywan jujmanta amigontin kapunankupaq. Chhaynatan qantapas Jehová Diosqa yanapasunki. Payqa maytan munakusunki, munantaqmi amigon kanaykitapas.