CADA huatami ashtaca expulsai tucushcacuna arripintirishpa cutin congregacionman tigramun. Bibliapica shuj juchayuj runa alita rurangapaj cutin tigrajpica, “jahua pachapi causajcunami, ninanda” cushijun nijunmi (Luc. 15:7, 10). Quiquin cutin congregacionman tigrashca cashpaca Jehová Diospash, Jesuspash, angelcunapash ninanda cushijushca cashcatami seguro caita ushapangui. Shinapash cutin Jehová Dioshuan ali amigo tucungapaca huaquin jarcaicunami ricurita ushan. ¿Ima jarcaicunata ricurita ushan? ¿Imashinata chai jarcaicunataca mishai ushapangui?

Ashtaca huauquipanicunaca congregacionman cutin tigrashca jipami paicunapa nali rurashcacunamanda nali sintirishpa catin. Quiquin shina sintirijushpaca, Rey Davidpa ejemplotami yarita ushapangui. Rey Davidca Jehová Dios paipa juchacunamanda perdonashca cajpipashmi, paillata nali sintirishpa ‘ñucapa nali rurashcacunamandami’ ninanda llaquirini nirca (Sal. 40:12; 65:3). Pipash congregacionman cutin tigrashpaca, paicuna nalita rurashcamanda, paicunapa pandarishcacunamandaca, ashtaca huatacunatami nali sintirishpa catita ushan. Por ejemplo Isabelle paniguca *, expulsai tucushcamanda 20 huatacuna jipami congregacionmanga tigrarca. Paica “congregacionman tigrashca cashpapash, Jehová Dios ñucata ciertopacha perdonashcataca na segurachu carcani” ninmi. Shinapash desanimarinaca Jehová Dioshuan cutin ali amigo tucuchunga na ayudangachu. Chaimi ama desanimaringapaj esforzarina capangui (Prov. 24:10).

Huaquingunaca cutin Jehová Dioshuan ali amigo tucungapaca, ashtaca cosascunapimi mejorana cani yashpallatami llaquilla sintirin. Congregacionman cutin tigrashca Antoine shuti huauquiguca: “Bibliapi yachajushcacunataca cungaitapachami cungashca carcani. Jehovata imashina sirvinatapashmi cungashca carcani” nin. Cashna pensamientocunata charishpami huaquin huauquipanicunaca llaquilla sintirin. Chaimandami villachinapi, o shuj shuj cosascunapi Jehová Diostaca ashtahuan sirvingapaca na ushan.

Chaita ashtahuan intindingapaca caipi pensaripashunchi.  Shuj huasi ushashca huairashpa tamiashcamanda dañarijpica, huasi dueñoca cutin huasiguta arreglangapaca ashtaca cosascunatami rurana cani yashpami llaquilla sintirita ushan. Shina cuendami cutin Jehová Dioshuan ali amigo tucungapaca ashtaca cosascunapimi mejorana cani yashpa llaquilla sintirita ushan.

Shinapash Bibliapica Jehová Dios ñucanchita ayudangapaj munashcatami ricuchin. Bibliapica “cangunapaj juchacuna puca telashna cajpipash, rasutashna yurajllagumanmi” tigrachishpa ayudasha nin (Is. 1:18). Congregacionman cutin tigrashpaca, Jehová Dioshuan cutin ali amigo tucungapaj munashcatami ricuchipashcangui. Chaimandami Jehová Diosca quiquindaca juyan. Y chaita rurashpaca, Satanás llullaj cashcata ricuchingapapashmi Jehová Diostaca ayudapashcangui (Prov. 27:11).

Congregacionman tigrashpami, Jehová Dioshuanga ali amigo tucungapaj munashcata ricuchipashcangui. Chaimandami paipash quiquinhuanga shuj ali amigo tucunga (Sant. 4:8). Congregacionman tigrashca cashpapash, Jehová Dioshuan ali amigo cashpa catingapaca esforzarinami minishtirin. Chaimandami Jehová Diosta tucui shunguhuan juyangapaj, shuj taitatashna ricungapaj esforzarina capangui. Chaitaca ¿imashinata rurai ushapangui?

Jehová Dios jipa punllacunapi ima cosascunatalla pactachisha nishcataca seguromi yachapangui. Shinapash Jehová Diospi shinlli feta charishpa catingapaca, villachingapaj llujshina, Bibliata liina, tandanajuicunaman rina, huauquipanicunahuan yalinami ashtahuan ayudanga. Chaimanda imacunatalla quiquin rurai ushashcata ricupashun.

Jehová Diosta siempre mañapai. Jehová Diosca juchata rurashcamanda quiquin nali sintirishpa catijtaca alimi intindin. Chaimandami paita mañangapaj quiquinba na fácil cashcatapash ali intindin (Rom. 8:26). Shina cashpapash Jehová Diostaca mañashpami catina capangui. Jehová Diostaca quiquinhuanga cutinmi ali amigo tucungapaj munani nishpami mañaita ushapangui (Rom. 12:12). Andrej huauquiguca ninmi: “Juchata rurashcamandaca nali, pingai tucushcami sintirin carcani. Shinapash Jehová Diosta mañashpami, jipamanga tranquilo, ali sintirin carcani” nin. Shinaca quiquin Jehová Diosta imashina mañanata na atinajushpaca, Salmos 51 y 65​pi rey David arripintirishca cashpa, imashina Jehová Diosta mañashcapimi pensarita ushapangui.

Bibliata cada punlla liipangui. Bibliata liinami Jehová Diosta juyangapaj, paipi shinlli feta charingapaj ayudanga (Sal. 19:7-11). Felipe huauquiguca: “Bibliata cada punlla na estudiaimandami pandarishpa, Jehová Diosmandaca caruyarcani nin. Chaimandami ama shina cutin chai pasahuachun, Bibliataca ñucallata aliguta yachajui callarircani” nin. Quiquinbash chaitallatami rurai ushapangui. Quiquin yachajungapaj ima temata na agllai ushajushpaca, shuj experienciata charij huauquigutami ayudata mañanalla capangui.

Huauquipanicunahuan cutin ali amigo tucungapaj esforzaripangui. Congregacionman tigrashca huaquin huauquipanicunaca shuj huauquipanicuna paicunata nali ricunga yashpami nali sintirin. Larissa paniguca: “Ñucataca ninandami pinganayarca, congregacionbi huauquipanicunata nalita rurashcashnami sintirircani. Ashtaca tiempotami shina sintirijurcani” nin. Shinapash anciano huauquicuna, shuj huauquipanicunapashmi Jehová Dioshuan quiquin ali amigo tucuchun ayudangapaca listo can. Huauquipanicunaca quiquin congregacionman tigrashcamandaca cushijushcami can (“ Anciano huauquicunaca ¿imatata rurai ushan?” nishca recuadrota ricupangui). Chaimandami quiquinbash cushijushca cachun munan (Prov. 17:17).

Congregacionmanda huauquipanicunahuan ashtahuan llevaringapaca ¿imatata rurai ushapangui? Chaipaca tandajuicunaman na faltashpa, villachinamanbash siempremi huauquipanicunahuan llujshina capangui. Caicunata ruranami quiquindaca ayudanga. Huauquigu Felixta imashina ayudashcata ricupashunchi. Paica: “Ñuca congregacionman tigrachunga huauquipanicunaca shuyanajushcami carca. Tucuicunami congregacionbica cushilla sintirichun ayudahuarca. Chaimandami ñucata juyashcata sintircani nin. Chaipimi Jehová Dios ñucata perdonashcata, Jehová Diosta sirvishpa cati ushashcatapash cuenta japiparcani” nin (“ Caita rurapangui” nishca recuadrota ricupangui).

Satanasca Jehová Dioshuan quiquin ali amigo tucuchunga na munanllu. Chaimandami paimanda caruyachingapaj imatapash ruranga (Luc. 4:13). Satanaspa trampacunapi ama urmangapami shinlli feta charingapaj esforzarina capangui.

Jehová Diosca paipa sirvijcunataca, “caita chaita rishpa chingashca purijtapash ñuca mascashpami corralman tigrachimusha. Chaqui faquitapash huatachishpami irquilla llamatapash shinllichisha” nishca (Ezeq. 34:16). Jehová Diosca ashtacacunatami paihuan cutin ali amigo tucuchunga ayudashca. Chaimi quiquinbash paillata ayudana cashcata seguro caita ushapangui.