ƆNƆNYI l’ɔnɔnyi, ɛnkɔkɔ efula wɛ ntshó nkalɔka l’otshumano w’Akristo. Kokanela ‘osasa w’efula’ woyalaka l’olongo winá w’anto ankfumɔ wasɔ okalɔwɔ! (Luka 15:7, 10) Ntsha ombokalɔ l’otshumano, yashikikɛ ente Yeso, andjelo, la Yehova walekɔ l’osasa djɛ nkɛna ombokalɔ l’otshumano. Koko, winá wɔ ngotálɔngɔsɔla djokanelo djɛko nya Yehova, wɛ nkoka mpomana l’ekakasano. Ekakasano ɛmɔtshi wɛkɔnge, ko kɛkɔnge kekoka nkokotshɛ?

Wananyɔ l’ankaana efula nanaka la tokanyi tɔ nyɛtshi m’ɔkɔngɔ w’iwɔ nkalɔ l’otshumano. Mbala imɔtshi osipisoyɛ wopo wɔ Nkfumi Davidɛ ndoyawoke. Kaanga m’ɔkɔngɔ wɔ evunga wɛnde nyimeyama, nde atepelaka ante: ‘Evunga wɛmi wembonsambɛ balo.’ (Yee. 40:12; 65:3) M’ɔkɔngɔ w’onto nkalɔ te Yehova, nde nkoka ndawoka etengo alekɔ la lowo kana ndjala la nsɔnyi l’ilá k’ɛnɔnyi efula. Isabelle aposaka m’otshumano l’ilá k’ɛnɔnyi ndekana 20. * Nde ntepelaka ante: “Ndjalaka l’okakasano w’ekekete efula djɛ ndjawola ente Yehova ambonyimeyɛ.” Ntsha ɔmbɔlɛmba, okoka lonkina ndjala wɔdju lá nyuma. (Woo. 24:10) Nangha la wolo dj’ipa nkambo djɛsɔ nkokomela.

Ankina ndjalaka l’okiyano ambɔ wapalekɔ lonkina l’akoka wa nangha kenkfumɔ k’okokawɔ nangha djɛ ndjala la djokanelo djɛ ma ma la Yehova. M’ɔkɔngɔ wɔ nde nkalɔ l’otshumano, Antoine atepelaka ante: “Mvungɛka akambo efula wameke la w’imananghaka lá lowiko lɔmi l’Okristo.” Mande wangoyawokake nghɔsɔ, amɔtshi wangokakandake djɛ ndapɛyɛ tshɛ l’elemo welá nyuma.

Ndjɔmbɔmba, ntsha mvulu k’onto ɔmɔtshi kɛ wɔlɔ efula kembotshitana la lompopo l’ekekete, nde nkoka ndɛmba winá wokanelande winá la welo wɛlɔmbama djɛ ndɔngɔsɔla mvulu kɛkɔ. Wopo wɔk’ɔmɔ  ndeke, ntsha djokanelo djɛko nya Yehova mbotshitanaká má ovunga ɔmɔtshi w’ekekete, okoka ndawoka ente kɛsɔ kɛngɔkɔlɔmba djɛ ndjila welo efula djɛ ndɔngɔsɔla nkfumbo djɛko djelá nyuma. Koko ewa ente ongowa okotshɔ.

Yehova ntetaka ante: ‘Nyoye winá wɔsɔ ndeke tile akambo l’ɔnɔnghɔ.’ (Iza. 1:18) Wɛ omboshiyɛka nangha la wolo djɛ ‘ndjila akambo l’ɔnɔnghɔ.’ Yehova nkɔkɔpaka m’ɔtɛ wɔ welo w’ilɛ wɛsɔ. Kɔtɔnɔla ndambo: Mande wɛ ombokalɔ te Yehova, ɔmbɔpɛyɛ mbamba kɛ nde mpɛyɛ mpɔndɔ kɛ wɔlɔ lá nyɔnyɔnyɔ yɛ Satana!​—Woo. 27:11.

Má nangha nghɔsɔ, wɛ omboshiyɛka ndasukanyɛ nya Yehova, edjinge nde nkolakaka ante angonangha wopo wɔk’ɔmɔ. (Dja. 4:8) Alekɔ wɔlɔ wɛ ndjewama me anto ankina djɛ ombokalɔ lonkina l’otshumano. Koko opakoke nkoma ngo lasɔ toko, wɛ ladjɛ nkindjɛ nkembɛ ngandji kɛko te Papa edjinge Ilongo yɛko, Yehova. Okokɛ nangha nkambo djɛsɔ ngetemo?

Nangha la wolo djɛ ndawilela ekoma w’okokɛ nkotshɛ. Vungɔ ente akambo wa nyuma wa djonyi w’ingeke lá nkambo djɛ Yehova edjinge lá nkambo dj’alaka wande wa l’etsho weyaye, wapatshikitana. Koko winá wɔsɔ wɛ ladjɛ ndjala la nonghanyi kɛ wɔlɔ kelendana la lowiko l’Okristo lonkina, ndjɔmbɔmba, mpoposanyɛka losango lɔ wɔlɔ mbala la mbala, ndjingelaka lá nsanghanyɛ la ndɔsaka winá wɔ nsawolaka nya wananyɔ l’ankaana yɛko. Kolenda ekoma wɛ wɔlama wɛnɛ w’okokɛ ndawilela.

Sawolaka nya Yehova mbala la mbala. Papa kɛko nsipisoyɛka ante mande okindjɛ ndawɛmbɛ lowo m’ɔtɛ wɔ evunga w’ingananghe, ongoyala l’okakasano djɛ ndɔlɔmba. (Ɔrɔ. 8:26) Koko, ‘kindjɛ ndɔmba,’ shimelaka Yehova ente wɛ nkɔpaka ilongo yɛko nyande efula. (Ɔrɔ. 12:12) Andrej avungɔ ante: “Ndawokaki etengo ndekɔ la lowo edjinge la nsɔnyi efula. Koko m’ɔkɔngɔ wɔ lɔlɔmbɔ lonkfumɔ, tokanyi tɔ pɔlɔ tɔsɔ takitakitaki. Lawaki vu efula lá wɔɔngɔ.” Ntsha opewe kɛnɛ k’okokɛ ndɔmba lá nkambo djɛsɔ, lenda ndɔmbɔ yɛ ndapɛla yɛ Nkfumi Davidɛ yelekɔ lá Yeembo 51 edjinge 65.

Ekaka Bible mbala la mbala. Kɛsɔ kengokokotshɛ djɛ wɛ ndjala la lonyuma lɔ wolo la djɛ ngandji kɛko te Yehova mfula. (Yee. 19:7-11) Felipe atepela ante: “Mande ntayalaki la nonghanyi kɛ mbalaka la ndjekaka Bible mbala la mbala,” “lonyuma lɔmi lokomaka wɔdju edjinge ndjɛkɔka Yehova. Mpakɔpɛ nangha ovunga wɔsɔ mbala k’ape, djɛkondeke ndɔsaka nkano djɛ ndjila wekelo wɔmi wɔ onto nyɔmɛlɛ l’edjena kɛ ntondo.” Okoka nangha wopo wɔk’ɔmɔ. Ntsha olekɔ la djonyi dj’onto nkɔlɔndjɛ djɛ nsɔna wamba w’okokɛ ndjeka nghɔmɛlɛ, lamo ngopalɔmbɛ ilongo yɛko imɔtshi yembotshunda lá nyuma okotshɔ?

Lɔngɔsɔla djokanelo djɛko nya wananyɔ l’ankana. Anto amɔtshi wakalɔ l’otshumano ndjalaka la wɔma ambɔ wapangawɔsa lonkina la ntshina. Larissa ndjawolaka ante: “Ndjalaká la nsɔnyi efula. Ndjokaka ente naghaka nyɛtshi edjinge nkiyanyɛka otshumano. Ndjalaka la tokanyi tɔsɔ ilá efula.” Yashikikɛ ente tokokolo la anto ankina wambotshunda lá nyuma walekɔ entshupa djɛ nkokotshɛ winá wɔ ngotalɔngɔsɔla lonyuma lɔko. (Lenda ipapango “ Kɛkɔnge kɛ tokokolo okokawɔ nangha?”) Iwɔ walekɔ l’osasa lá wopo wɔ ngombokalɔ, edjinge iwɔ nkɔpaka wɛ ndjala l’osasa!​—Woo. 17:17.

Kɛkɔnge kekoka nkokotshɛ djɛ wɛ ndeka ndjala ma ma nya ase otshumano? Yapɛyɛ tshɛ lá kɛnɛ kɛ wananyɔ l’ankaana yɛko onanghawɔ, ntepela ente ndjingelaka lá nsanghanyɛ la mpoposanyɛka mbala la mbala. Nkambo djɛsɔ yongokokotshɛ wopo wɔkɔnge? Felix ntepelaka ante: “Ase otshumano wakongelaki l’eleko lukuluku djɛ lemi nkalɔ l’otshumano. Ndawokaka ente ndekɔ la ntshina. Iyankfumɔ wankotshɛka djɛ lemi ndawoka etengo ose nkfumbo kɛwɔ lonkina, ente wambonyimeyɛ, la djɛ nkindjɛ nkambela Yehova.”​—Lenda ipapango “ Kɛkɔnge k’okokɛ nangha?”

Satana angokindjɛ nkotomela lompopo lɔ wolo djɛ ‘nkɔlɛmbɛ’ winá wɔ ngotalɔngɔsɔla djokanelo djɛko nya Yehova. (Luka 4:13) Yalɔngɔsɔla má winá wɔsɔ djɛ nkembɛ lonyuma lɔko.

Lá nkambo dj’ɛnkɔkɔ wɛnde, Yehova alakaka ante: ‘Lemi langohona wɔnɛ wombotshɔ, lemi langohona wɔnɛ wombovunga, lemi langɔwɔmba ampota yɛ wɔnɛ wombohotala, la lemi langokembɛ wɔnɛ wɔmbɔlɛmba.’ (Ezk. 34:16) Yehova akotshɛka anto ankina efula djɛ ndɔngɔsɔla djokanelo djɛwɔ lande. Yashikikɛ ente nde nkɔpaka nkokotshɛ edjinge wɛ djɛ nkindjɛ ndjala la djokanelo djɛ wolo nyande.