KADA jabʼil, jitsan kristyano wa xkumxiye ja bʼa kongregasyon. La jpensaraʼuktik janekʼto «gustoʼil» wa x-ajyi ja bʼa satkʼinali yajni kada yal chej bʼa jel chaʼanyabʼal, wa xkumxiye (Luc. 15:7, 10). Ta ja weʼn kumxiyata, ojni bʼobʼa ajyan seguro ke ja Jesús, ja anjelik sok ja Jyoba jelni gustoʼaye yuja kumxiyata ja bʼa kongregasyoni. Pe yajni wana stojbʼesel och ja jastal waxa wilabʼaj soka Jyoba, bʼobʼta ojni tʼaspuk och tuktukil wokol. ¿Jastik wokol sok jasa oj xbʼobʼ skoltaya?

Yajni kumxiyeta ja bʼa kongregasyon, jitsan hermanoʼik wa skʼulane luchar soka pensarik bʼa mi xmakuni. Ta jach wa x-ekʼabʼaj, bʼobʼta ojni awabʼ stojol ja jastal yabʼ sbʼaj ja rey David. Ama ajita perdon ja smuliki, ja yeʼn yala: «Jelni xya wokolanukon ja jmuliki» (Sal. 40:12; 65:3). Yajni june maʼ wa xkumxi soka Jyoba bʼobʼta wantoni xyabʼ mulal ay ma kʼixwelxta oj ajyuk jitsan jabʼil. Jun sjejel ja Isabelle, bʼa ajyi expulsada mas ja 20 jabʼil, * wa xyala: «Jelni wokol kabʼ skʼuʼajel ta oj yaʼon perdon ja Jyoba». Ta ja weʼn wa x-ela gana, ojni cha bʼobʼ yopijuk ja jastal waxa wilabʼaj soka Jyoba (Prov. 24:10). Leʼa modo bʼa mi oj ekʼuk abʼaj ja jaw.

Jel xcham skʼujole ja tuk yajni wa spensarane bʼa spetsanil ja jas oj skʼuluke bʼa stojbʼesel ja jastal wa xyila sbʼaje soka Jyoba. Yajni kumxi ja Antoine, ja yeʼn wa xyala: «Chʼaytani jkʼujol spetsanil ja jastik wa xkʼulan ajyi bʼa ti chʼikan ja bʼa jastal wa xkaʼteltay ja Dyos». Yuja pensarik jastal jaw, bʼobʼta jujuntik mixani jel skʼulane ja yaʼtele bʼa Dyos jastal ajyi.

La katik jun sjejel. Ta jun naʼits jel jomkan yuj smul jun tsatsal ikʼ jaʼ, bʼobʼta ja swinkil jelni oj cham skʼujol kechanta spensarajel ja janekʼ tyempo oj spil sok oj skʼujoluk bʼa stojbʼesel ja bʼa jomeli.  Bʼa juntikxta, ta wan jomel ja jastal waxa wilabʼaj sok ja Jyoba yuj smul jun chaʼan mulal, bʼobʼta tʼilani oja kʼujoluk bʼa stojbʼesel. Pe ayni maʼ oj skoltaya.

Ja Jyoba wa xyawi ja lokjelal it: «Anto, laʼik, sok la jtojbʼestik bʼa keʼntik ja jastik junuki» (Is. 1:18). Ja weʼn wa kʼujolan bʼa stojbʼesel ja jastik junuk soka Jyoba, ja yuj jel syajtaya. Pensaraʼan: Ja Jyoba ojni bʼobʼ ya makunuk ja sjejel waxa waʼa bʼa oj sjeʼ ke ja Satanás jun leʼa abʼal (Prov. 27:11).

Yajni la kumxisok ja Jyoba, ojni mojxansok cha jachni oj skʼuluk ja yeʼn (Sant. 4:8). Jelni lek oj yile ja tuk yuja kumxiyata ja bʼa kongregasyoni, pe tʼilan ay jas mas oja kʼuluk. Pe tʼilani oj wa tsatsbʼuk ja yajtanel awiʼoj sbʼaja wa Tati sok wa wamigo, ja Jyoba. Pe ¿jastal oja kʼuluk?

Leʼa modo bʼa ajyelawuj kʼelsatik bʼa oj lajxukawuj. Bʼobʼta ja yipalil ja bʼa jastal aya soka Dyos mito koʼeluk luʼum, wa xkʼan kaltik ja jas wanxa xa naʼa bʼa Jyoba sok ja bʼa skʼapjeliki. Pe tʼilani oja chap ja bʼa jastal oja kʼuluki, wa xkʼan kaltik jun lekil programa ja bʼa sakʼaniltik sok ja Dyosi bʼa ti chʼikan ja elel xcholjeli, wajel ja bʼa reunionik sok yajel ekʼ tyempo soka hermanoʼiki. La kiltik jujuntik kʼelsat ke oj bʼobʼ ajyukujtik.

Loʼilanan tikʼan soka Jyoba. Jawa Tati wani xyabʼya stojol ke ay ekʼele wokol oja wabʼ yajelyi orasyon yuja mulalto aya xa wabʼ yuja wa muli (Rom. 8:26). Ama jachuk, moka wakan yajelyi orasyon sok alayabʼ ja Jyoba jel xa kʼana oja wamigoʼuk (Rom. 12:12). Ja Andrej wa xjul skʼujol: «Wa xkabʼ jelto mulal ayon sok jel la kʼixwiyon. Pe yajni wa xchʼak kayi ja korasyoni wa xkabʼ lamanil sok xlikiki xkabʼi». Ta ja weʼn mixa naʼa jastal oja wayi jawa worasyoni, pensaraʼan ja bʼa yorasyonik skʼulan ja rey David yajni sutxi skʼujoli sok ti wa xtax bʼa Salmos 51 sok 65.

Paklay tikʼan ja Biblia. Ja it oj skoltaya bʼa yajel tsatsbʼuk ja skʼuʼajel awiʼoj soka jastal waxa yajtay ja Jyoba (Sal. 19:7-11). Ja Felipe yala «Ja jas ya yopijuk sok yaʼakan bʼa oj jkʼul payar soka Jyoba jani yuja mi ajyikuj lekil kostumbre bʼa spaklajel sok skʼumajel ja Biblia. Yuja mi xkʼana oj cha jkʼul pilan ekʼele ja jas mi lek jkʼulanta, jtsaʼa stalnajel jbʼaj ajyelkuj jun lekil spaklajel jach jtuchʼil». Ja weʼn ojni cha bʼobʼa kʼul jachuk. Ta mixa naʼa jas yolomajel oja tsaʼ ja bʼa spaklajel atuchʼil, ojni bʼobʼa kʼanyi ja skoltanel juna wamigo bʼa takʼanxa ja bʼa jastal wa xyila sbʼaj soka Dyosi.

Cha amigoʼan ja hermanoʼiki. Jujuntik ja matik wa xkumxiye ja bʼa kongregasyon wani xcham skʼujole ja bʼa jastal oj iljuke yuja tuki. Ja Larissa wa xjul skʼujol: «Jelni la kʼixwiyon. Wani xkabʼ jchʼay kʼujolan ja kongregasyon. Jachni ajyiyon jitsan tyempo». Ojni bʼobʼ ajyan seguro ke ja ansyanoʼik soka tuk yaʼtijumik ja Dyos bʼa takʼanexa wani skʼanawe oj skoltaya bʼa stojbʼesel ja jastal waxa wilabʼaj soka Jyoba (kʼela ja rekwagro « Ja jas wa xbʼobʼ skʼuluke ja ansyanoʼik»). Jelni xgustoʼaxiye juntiro yuja kumxiyata sok wani skʼanawe ke ja weʼn cha gusto oj ajyan (Prov. 17:17).

¿Jas oj bʼobʼa kʼuluk bʼa mas mojan oj ajyan ja bʼa kongregasyoni? Ochan tikʼan ja bʼa reunioniki sok cholo tikʼan sok ja hermanoʼiki. ¿Jastal oj skoltaya bʼa oj aʼtijanan ja bʼa aʼtelik it? Ja Félix yala: «Ja kongregasyoni waneni smajlajel oj kumxukon. Kabʼ jelni skʼanawone. Yibʼanale skoltayone bʼa oj kabʼ cha partexa ayon ja bʼa kongregasyoni, ke yaʼawonta perdon ja Jyoba sok ojni cha jkʼujoluk» (kʼela ja rekwagro « Ja jas oj bʼobʼa kʼuluki»).

Yajni wana stojbʼesel ja jastal waxa wilabʼaj soka Jyoba, ja Satanás oj yijanawi mas «tsatsal ikʼ jaʼ» bʼa slejel modo oj xchʼaka wip (Luc. 4:13). Ta waxa kʼana chapan oj ajyan, atsatsbʼuk ja bʼa jastal waxa wilabʼaj soka Dyosi.

Yaljel sbʼaja yal xchejik ja Jyoba, ja yeʼn wa skʼapa: «Ja matik chʼayeli oj jleʼe, jaxa maʼ spilunej sbʼaji oj ka kumxuk, ja maʼ yajbʼeli oj jpotsyi ja syajbʼeli jaxa maʼ kʼumbʼel ayi oj kayi yip» (Ezeq. 34:16). Ja Jyoba skoltunej jitsan lek yaʼtijumik bʼa stojbʼesel ja jastal wa xyila sbʼaje soka yeʼn. Ja yuj wani xbʼobʼ ajyan seguro ke ja yeʼn wa skʼana oj skoltaya bʼa mastoni tsats oj ajyuk ja jastal waxa wilabʼajsoki.