CHAKA chilichose, mberere zinandi zakuzirwa zikuwezgekeramo mu mpingo Wachikhristu. Ghanaghanirani waka za ‘chimwemwe chikuru icho chikuŵa kuchanya’ para munthu yumoza waweleramo. (Luka 15:7, 10) Para muli kuwezgekeramo mu mpingo, gomezgani kuti Yesu, ŵangelo, na Yehova, ŵakukondwa chomene kuti sono muliso mu mpingo. Kweni apo mukuyezga kukhozgaso ubwezi winu na Yehova, mukumanenge na masuzgo. Kasi ghanyake mwa masuzgo agha ni nga, ndipo ntchivichi chingamovwirani?

Ŵabali na ŵadumbu ŵanandi ŵakuŵa kuti ŵachali ŵakugongowa nanga ŵangaŵa kuti ŵawezgekeramo mu mpingo. Panyake mungapulikiska umo Themba Davide likajipulikiranga. Nanga mphamanyuma pakuti wagowokereka zakwananga zake iyo wakayowoya kuti: “Mphuvya zane zaninyekezga.” (Sal. 40:12; 65:3) Para munthu wawelera kwa Yehova, nyengo zinyake njuŵi yingalutilira kumusuzga panji wangaŵa na soni kwa vyaka vinandi. Isabelle, wakasezgeka kwa vyaka vyakujumpha 20. * Iyo wakati: “Chikaŵa chakusuzga kwa ine kugomezga kuti Yehova wanganigowokera nadi.” Para mukulutilira kugongowa, ubwezi winu na Yehova nawo uŵengeso wambura kukhora. (Zinth. 24:10) Ntheura mungazomerezganga yayi kuti ivi vimuchitikirani.

Ŵanyake ŵakufipa mtima kuti ŵangakwaniska yayi kuchita vyose ivyo vikukhumbikwa kuti ŵaŵeso paubwezi wakukhora na Yehova. Antoine wati wawezgekeramo, wakayowoya kuti: “Nkhaluwa vinthu vinandi ivyo nkhasambira kweniso ivyo nkhachita apo nkhaŵa Kaboni.” Chifukwa cha maghanoghano agha, ŵanyake ŵakutondeka kuchita vyose ivyo ŵangafiska pakuteŵetera Yehova.

Mwachiyelezgero, munthu uyo nyumba yake yanangika chomene na chimphepo chikuru, wangagongowa chomene para wangaghanaghanira unandi wa nyengo na ntchito iyo yiŵengepo kuti wanozgeso nyumba iyi. Mwakuyana waka, para ubwezi winu na Yehova ukanangika chifukwa chakuti mukachita zakwananga zikuru, mungawona kuti paŵenge ntchito  yikuru kuti muwezgerepo ubwezi winu na Yehova. Kweni kufipa mtima yayi chifukwa wovwiri ulipo.

Yehova wakutichema kuti: “Zaninge sono, tiyeni tidumbiskane na kunyoloska vinthu.” (Yes. 1:18) Mwachita kale vinandi chomene kuti ‘munyoleske vinthu.’ Yehova wakumutemwani chifukwa cha kuchita nthena. Wonani fundo iyi: Pakuti mwawelera kwa Yehova, iyo wasangirengepo mwaŵi wakulongora kuti Dyabulosi ni mutesi.​—Zinth. 27:11.

Pakuti mwawelera kwa Yehova, apa ndikuti mwasendelera kale kwa iyo, ndipo nayo wakulayizga kuti wasendelerenge kwa imwe. (Yak. 4:8) Ndipouli, pali vinandi ivyo mukweneraso kuchita padera pakuti ŵanji ŵamuwonani waka kuti mwaweleraso mu mpingo. Mukwenera kulutilira kukhozga chitemwa chinu pa Dada winu na mubwezi winu, Yehova. Kasi mungachita wuli nthena?

Jiŵikirani vilato ivyo mungakwaniska. Mukwenera kuti muchali kukumbuka visambizgo vyakwambilira ivyo mukasambira vyakukhwaskana na Yehova kweniso layizgo lake la Paradiso. Kweni sono mukwenera kuŵaso na ndondomeko yiwemi, mwachiyelezgero, mukwenera kupharazga nyengo zose, kuluta ku maungano na kuchezga na ŵabali na ŵadumbu. Wonani vilato vyakulondezgapo ivi, ivyo mungajiŵikira.

Muyowoyeskanenge na Yehova pafupipafupi. Dada winu wakumanya kuti para mukulutilira kujiyimba mulandu chifukwa cha ivyo mukanangiska, vingapangiska kuti chiŵe chakusuzga kuti mulombenge kwa iyo. (Rom. 8:26) Ndipouli, imwe “koserani kulomba,” na kumuphalira Yehova khumbo linu lakuti muŵeso nayo paubwezi. (Rom. 12:12) Andrej wakukumbuka kuti: “Nkhajiyimbanga mulandu chomene kweniso soni zikanikoranga. Kweni para nalomba waka nkhajipulikanga makora. Nkhaŵanga na mtende wa mu mtima.” Usange mukumanya yayi icho mungalomba, wonani malurombo agho likalomba Themba Davide ghakulongora kuti likapera, agho ghali pa Salimo 51 na 65.

Musambirenge Baibolo nyengo zose. Kuchita nthena kumovwiraninge kuti muŵe na chipulikano chakukhora ndipo kumovwiraninge kuti mukuzge chitemwa chinu pa Yehova. (Sal. 19:7-11) Felipe wakayowoya kuti: “Chifukwa chakuti nkhaŵavya ndondomeko ya kuŵerenga na kusambira Baibolo panekha, nkhalopwa, ndipo nkhamukhuŵazga Yehova. Nkhakhumbanga yayi kumukhuŵazgaso Yehova, ntheura nkhawoneseskanga kuti nyengo zose nkhusambira panekha.” Namweso mungachita mwakuyana waka. Usange mukukhumba wovwiri pakusankha nkhani izo mungasambira pamwekha, fumbani mubwezi winu wakukhwima mwauzimu kuti wamovwirani.

Nozganiso ubwezi winu na ŵabali na ŵadumbu. Ŵanyake para ŵawezgekeramo mu mpingo ŵakufipa mtima kuti ŵanyake ŵaŵawonenge mwambura kwenelera. Larissa nayo wakazomerezga, ndipo wakati: “Soni zikanikoranga chomene. Nkhajipulikanga kuti nili kukhuŵazga ŵabali na ŵadumbu. Nkhasuzgika na maghanoghano agha kwa nyengo yitali.” Manyani kuti ŵalara mu mpingo na Ŵakhristu ŵanyake ŵakukhwima mwauzimu mbakukhumbisiska kumovwirani kuti munozgeso ubwezi winu na Yehova. (Wonani bokosi lakuti “ Ivyo Ŵalara Ŵangachita.”) Iwo mbakukondwa kuti mwawelera kwa Yehova, ndipo ŵakukhumba kuti namwe mukondwenge.​—Zinth. 17:17.

Kasi ntchivichi chingamovwirani kuti muŵe pafupi chomene na mpingo? Mulutenge ku maungano nyengo zose kweniso munjirenge mu upharazgi na ŵabali na ŵadumbu nyengo zose. Kasi kuchita nthena kumovwiraninge wuli? Felix wakayowoya kuti: “Ŵabali na ŵadumbu ŵakanilindiliranga kuti niweleremo mu mpingo. Nkhajipulika kuti nkhutemweka chomene. Wose ŵakanovwira kujipulika kuti nili yumoza wawo kweniso kuti Yehova wanigowokera, ndipo ningalutilira kumuteŵetera.”—Wonani bokosi lakuti “ Ivyo Mungachita.”

Satana walutilirenge kumutumirani masuzgo ghanandi kuti wamulopweskani apo mukunozga ubwezi winu na Yehova. (Luka 4:13) Ntheura muŵe ŵakunozgeka apo mukukhozga ubwezi winu na Yehova sono.

Yehova wakulayizga mberere zake kuti: “Nizamupenja yakuzgeŵa, nizamuwezga yakupuluka, yakupwetekeka nizamuyikaka na kasalu, ndipo yakulopwa nizamuyikhozga.” (Ezek. 34:16) Yehova wawovwira ŵanthu ŵanandi kuti ŵawezgerepo ubwezi wawo na iyo. Ntheura manyani kuti wakukhumba kumovwirani kuti muŵeso paubwezi wakukhora chomene na iyo.