KADA tuig, damu nga presyoso nga karnero an nakakabalik ha Kristiano nga kongregasyon. Imadyina an daku nga “kalipay ha langit” kon an usa nabalik! (Luc. 15:7, 10) Kon usa ka hito nga mga nakabalik, makakasiguro ka nga hi Jesus, an mga anghel, ngan hi Jehova mismo nalilipay nga makita ka nga bahin ka na utro han kongregasyon. Pero samtang ginpaparig-on mo utro an imo pakigsangkay kan Jehova, bangin umatubang ka hin mga problema. Ano an pipira hito, ngan ano an makakabulig ha imo?

Damu han mga nakabalik ha kongregasyon an naabat la gihapon hin panluya. Bangin naiintindihan mo an inabat ni Hadi David. Bisan kon ginpasaylo na an iya mga sala, nagsiring hiya: “Nadaog ako han akon mga sayop.” (Sal. 40:12; 65:3) Bisan kon an usa nakabalik na kan Jehova, bangin umabat la gihapon hiya hin kakonsensya o kaawod ha sulod hin katuigan. Hi Isabelle na-disfellow hin sobra 20 ka tuig. * Hiya nagsiring, “Nakurian gud ako pagtuod nga mapapasaylo ako ni Jehova.” Kon manluluya ka, an imo pakigsangkay kan Jehova mahimo utro magin diri marig-on. (Prob. 24:10) Pangalimbasugi nga diri ito mahitabo ha imo.

An iba nababaraka nga bangin diri nira mahimo an ngatanan nga ginkikinahanglan basi maibalik an ira maopay nga relasyon kan Jehova. Katapos makabalik, hi Antoine nagsiring, “Nakalimtan ko na an ngatanan parte ha akon kinabuhi hadto sugad nga Kristiano.” Tungod kay sugad liwat hito an inaabat han iba, nag-aalang hira nga bug-os nga makigbahin ha espirituwal nga mga buruhaton.

Ha pag-ilustrar, kon an balay han usa naruba han bagyo, bangin mabaraka gud hiya kon ginhuhunahuna niya an panahon ngan an pangalimbasog nga ginkikinahanglan basi matukod ito utro. Sugad man, kon an imo pakigsangkay kan Jehova nadaot han seryoso nga  sala, bangin abaton mo nga daku nga pangalimbasog an ginkikinahanglan basi maibalik an imo maopay nga espirituwalidad. Pero may makakabulig ha imo.

Gin-iimbitar kita ni Jehova: “Kadi kamo yana, ngan tadungon naton an mga butang ha butnga naton.” (Isa. 1:18) Nangalimbasog ka na basi ‘tadungon an mga butang.’ Tungod hito, hinigugma ka ni Jehova. Hunahunaa la: Tungod kay binalik ka kan Jehova, magagamit niya an imo ehemplo basi pamatud-an nga buwaon hi Satanas!—Prob. 27:11.

Tungod han imo pagbalik, nagin mas duok ka na kan Jehova, ngan nagsasaad hiya nga magigin duok liwat hiya ha imo. (San. 4:8) Nalilipay an iba nga makita ka nga bahin ka na utro han kongregasyon. Pero labaw pa hito an kinahanglan mo buhaton. Kinahanglan padayon nga parig-unon mo an imo gugma ha imo Amay ngan Sangkay, hi Jehova. Paonan-o mo ini mabubuhat?

Pangalimbasog nga magkaada mga tumong nga kaya mo kab-uton. Hinumdumi nga an imo espirituwal nga pundasyon—an imo kahibaro mahitungod kan Jehova ngan han iya mga saad ha tiarabot—posible nga aada pa ha imo hunahuna. Pero kinahanglan parig-unon mo utro an istraktura han imo Kristiano nga pagkinabuhi, siring pa, ngan nag-uupod ini han pagsangyaw han maopay nga sumat ngan pakig-upod pirme ha imo kabugtoan. Tagda an masunod nga mga tumong.

Pakiistorya pirme kan Jehova. Naiintindihan han imo Amay nga an padayon nga pag-abat hin kakonsensya makakapakuri ha imo ha pag-ampo ha iya. (Roma 8:26) Bisan pa hito, “magpadayon ha pag-ampo,” ngan isumat kan Jehova nga karuyag mo gud makigsangkay ha iya. (Roma 12:12) Nahinunumdoman pa ni Andrej: “Inabat ko an sobra nga kakonsensya ngan kaawod. Pero kada katatapos ko pag-ampo, naiibanan ito. Nagigin mas murayaw an akon hunahuna.” Kon diri ka maaram kon ano an imo ig-aampo, tagda an mga pag-ampo han mabinasulon nga hi Hadi David nga nakarekord ha Salmo 51 ngan 65.

Admi hin regular an Biblia. Mabulig ini nga maparig-on an imo pagtoo ngan mapahilarom an imo gugma kan Jehova. (Sal. 19:7-11) “Tungod kay diri regular hadto an akon personal nga pag-aram ngan pagbasa han Biblia, nagluya an akon espirituwalidad ngan napasubo ko hi Jehova,” siring ni Felipe. “Diri ko karuyag nga mautro ko ito nga sayop, salit ginsiguro ko nga magin regular an akon personal nga pag-aram kay proteksyon ito ha akon.” Mahimo mo liwat ito buhaton. Kon kinahanglan mo hin bulig basi makapili hin mga topiko para ha imo personal nga pag-aram, mahimo ka magpabulig ha usa nga sangkay nga may marig-on nga relasyon kan Jehova.

Parig-ona utro an imo pakigsangkay ha kabugtoan. An iba nga nabalik ha kongregasyon nababaraka nga magin negatibo an panhunahuna ha ira han iba. Hi Larissa nagsiring: “Naawod gud ako. Inabat ko nga gintraydor ko an kongregasyon. Nag-iha gud ito nga akon inaabat.” Sarig nga karuyag ka gud buligan han mga tigurang ngan han iba pa nga hamtong nga kabugtoan samtang ginpaparig-on mo utro an imo espirituwalidad. (Kitaa an kahon nga “ Ano an Mahimo Buhaton han mga Tigurang?”) Nalilipay hira nga binalik ka, ngan karuyag nira nga magin malipayon ka!—Prob. 17:17.

Paonan-o ka magigin mas duok ha kongregasyon? Bug-os nga makigbahin ha mga ginbubuhat han kabugtoan—pag-atender ha mga katirok ngan regular nga pakigbahin ha ministeryo. Paonan-o ito makakabulig? Hi Felix nagsiring: “Ginpamulat gud han kongregasyon an akon pagbalik. Inabat ko nga hinigugma nira ako. Ginbuligan nira ako nga abaton ko nga bahin utro ako han kongregasyon, ginpasaylo na ako, ngan mahimo ako padayon nga mag-alagad kan Jehova.”—Kitaa an kahon nga “ Ano an Mahimo Mo Buhaton?”

Hi Satanas padayon nga magpapahinabo ha imo hin sugad bagyo nga mga problema basi paluyahon ka samtang ginpaparig-on mo utro an imo pakigsangkay kan Jehova. (Luc. 4:13) Magin andam pinaagi ha pagparig-on yana han imo espirituwal nga balay, nga amo an imo pakigsangkay kan Jehova.

May kalabotan ha iya mga karnero, hi Jehova nagsasaad: “An nawawara bibilngon ko, an nagpapatlaag ibabalik ko, an nasamad bibendahan ko, ngan an maluya pakukusgon ko.” (Ezek. 34:16) Damu na gud an nabuligan ni Jehova nga iba pa nga maibalik an ira maopay nga relasyon ha iya. Sarig nga karuyag ka niya buligan nga padayon nga mas maparig-on pa an imo relasyon ha iya.