GUIRÁʼ iza stale binni ribiguetaʼ ndaaniʼ xquidxi Jehová. Guxuíʼlunu pabiáʼ «guendanayecheʼ» riuu guibáʼ ora guibiguetaʼ ti dendxuhuiiniʼ ra nuu Jehová (Luc. 15:7, 10). Pa lii nga tobi de ca ni biguetaʼ ndaaniʼ congregación, gunna dxichi guizáʼ nayecheʼ nuu Jesús, ca ángel ne Jehová. Peru zándaca zadxaagaluluʼ guendanagana ra cayúniluʼ stipa gaca xhamíguluʼ Jehová sti biaje. ¿Gunáʼ nga caadxi de ca guendanagana ni zándaca guidxaagaluluʼ ne xi zanda gacané lii?

Stale hermanu ni biguetaʼ ndaaniʼ congregación riníʼ íquecaʼ cosa ni ribee gana laacaʼ. Pa nga nga ni cazaacaluʼ. Zándaca guiéneluʼ ximodo biʼniʼ sentir rey David. Neca maʼ biʼniʼ perdonar Dios laabe pur guiráʼ ca pecadu ni bíʼnibe, laabe guniʼbe guizáʼ bichiiñaʼ ca cosa malu ni bíʼnibe que laabe (Sal. 40:12; 65:3). Zándaca tuuxa ni maʼ xadxí de biguetaʼ ra nuu Jehová guni sentir náparuʼ donda o guituí lu pur ni biʼniʼ. Guzéʼtenu ni bizaaca Isabelle, * laa guyuu expulsada jma de 20 iza, laa guníʼ: «Guca nagana para naa guneʼ cré maʼ biʼniʼ perdonar Dios naa». Pa guireeluʼ gana, zándaca gusaana de gaca xhamíguluʼ Jehová sti biaje (Prov. 24:10). Biʼniʼ stipa cadi guizaacaluʼ nga.

Nuu xcaadxi riuucaʼ xizaa ora riníʼ íquecaʼ qué zanda gúnicaʼ guiráʼ ni caquiiñeʼ gaca para gaca xhamígucaʼ Jehová sti biaje. Sicaríʼ guníʼ Antoine despué de biguetaʼ ndaaniʼ xquidxi Jehová: «Biaandaʼ naa guiráʼ ni biziideʼ ne ni bineʼ dxi gucaʼ xpinni Cristu ne ante gacaʼ expulsar». Ne pur ni runi sentírcabe ca la? nuu de laacabe maʼ huaxiéʼ rúnicabe xhiiñaʼ Jehová.

 Guzéʼtenu ti ejemplu, pa gucaná ti yoo pur ti huracán, zándaca chuʼ xpixuaanaʼ ni xizaa ne guiníʼ ique zaquiiñeʼ stale tiempu ne stipa para guni chaahuiʼ ni. Zacaca nga rizaaca ora rixeleʼ tuuxa de Jehová pur ti pecadu malu ni biʼniʼ, zándaca naquiiñeʼ gúnibe stale stipa para guibiguétabe ra nuu Jehová. Peru nuu ni zanda gacané laabe.

Jehová cayabi laanu: «Latáʼ, guni chaahuinu ca guendanagana nápanu» (Is. 1:18). Nadxii Jehová lii purtiʼ maʼ bíʼniluʼ stipa chuʼluʼ gaxha de laa sti biaje. Guníʼ ique ndiʼ: Zanda iquiiñeʼ Jehová ejemplu stiluʼ para gusihuinni rusiguii Binidxabaʼ (Prov. 27:11).

Ra biguétaluʼ ra nuu Jehová, maʼ bidxíñaluʼ ra nuu ne laabe maʼ guniʼbe zadxíñabe lii (Sant. 4:8). Galán nga guʼyaʼ xcaadxi maʼ biguétaluʼ ndaaniʼ congregación, peru naquiiñeʼ gunirouʼ sti cosa. Naquiiñeʼ gúniluʼ stipa pur gannaxhiiluʼ jma Jehová purtiʼ laabe nga xhamíguluʼ ne Bixhózeluʼ. ¿Ximodo zanda gúniluʼ ni yaʼ?

Gudixhe ique meta ni zanda ugaandaluʼ. Zándaca caʼruʼ guiaandaʼ lii guiráʼ ni biziidiluʼ de Jehová ne de ca promesa stiʼ, casi xa ñaca nuuruʼ base stiʼ xa yoo ni gucaná que. Ne casi xa ñaca ñuni chaahuinu yoo ca ra guni predicarnu, chuunu reunión ne chuʼnu gaxha de ca hermanu stinu. Guzéʼtenu caadxi meta ni zanda quixhe íqueluʼ ugaandaluʼ.

Gatigá guniʼné Jehová. Nanna Jehová zándaca gaca nagana para lii guni orarluʼ laa purtiʼ cayuni sentirouʼ cadi jneza ngue ni bíʼniluʼ (Rom. 8:26). Neca zacá, cadi gusaana de guni orarluʼ ne gudxi Jehová guizáʼ racaláʼdxiluʼ gaca xhamíguluʼ laa (Rom. 12:12). Andrej guníʼ: «Bineʼ sentir napaʼ donda ne bituí luaʼ. Peru despué de guneʼ orar ratadxí ladxiduáʼ ne runeʼ sentir galán». Pa qué guidxélaluʼ xi guiniʼluʼ lu oración stiluʼ, guníʼ ique lu ca oración ni biʼniʼ rey David dxi nuu arrepentidu ni zeeda lu Salmo 51 ne 65.

Cadi gusaana de guni estudiarluʼ Biblia. Zacané ni iguidxi fe stiluʼ ne gannaxhiiluʼ Jehová (Sal. 19:7-11). Felipe guníʼ: «Cumu huaxiéʼ bineʼ estudiar ne qué ñuundaʼ Biblia la? huaxiéʼ naguidxi guyuu fe stinneʼ ne pur ngue bicheeniáʼ Jehová. Cumu qué racalaʼdxeʼ gucheeʼ sti biaje la? gudixheʼ iqueʼ gapaʼ ti programa para guneʼ estudiar Biblia stubeʼ». Laaca ngaca zanda gúniluʼ lii. Pa qué guidxeʼluʼ xi tema guni estudiarluʼ la? zanda gaʼbuʼ ti hermanu gacané lii.

Guca xhamigu ca hermanu sti biaje. Nuu hermanu ni ribiguetaʼ ndaaniʼ congregación riuucaʼ xizaa ximodo guʼyaʼ xcaadxi hermanu laacaʼ. Larissa guníʼ: «Dxi biguetaʼ ndaaniʼ congregación, guizáʼ bituí luaʼ. Bineʼ sentir bicheeniáʼ laacabe. Xadxí bineʼ sentir zacá». Cadi guiaandaʼ lii racalaʼdxiʼ ca ancianu ne xcaadxi hermanu gacanecaʼ lii gaca xhamíguluʼ Jehová sti biaje (biiyaʼ cuadru ni láʼ « Ni zanda guni ca ancianu»). Guizáʼ riéchecabe maʼ biguétaluʼ ne racaláʼdxicabe chuʼluʼ nayecheʼ (Prov. 17:17).

¿Xi zanda gúniluʼ para chuʼluʼ jma gaxha de ca hermanu de congregación? Cadi guiaadxaluʼ ca reunión ne gatigá biʼniʼ predicarné ca hermanu. ¿Xi zabeenduluʼ pa qué gusaanaluʼ de gúniluʼ ca cosa ni bizéʼtenu riʼ? Félix guníʼ: «Cabeza ca hermanu de congregación guibiguetaʼ. Bineʼ sentir nadxiicabe naa. Guirácabe gucanécabe naa guiníʼ iqueʼ risacaʼ ndaaniʼ congregación, maʼ biʼniʼ perdonar Jehová naa ne zándaruʼ guneʼ ni nabe» (biiyaʼ cuadru ni láʼ « Ni zanda gúniluʼ»).

Laga cayúniluʼ stipa gaca xhamíguluʼ Jehová sti biaje, zuyúbiruʼ Binidxabaʼ ximodo gusirá fe stiluʼ (Luc. 4:13). Pa racaláʼdxiluʼ uquídxiluʼ fe stiluʼ, de ca yanna biyubi chuʼluʼ gaxha de Jehová.

Sicaríʼ guníʼ Jehová ora guníʼ de ca dendxuhuiiniʼ stiʼ: «Zuyubeʼ ca ni maʼ biniti, ne zedaniaʼ ca ni maʼ bireechú, zuchendaʼ venda ca ni gucaná ne zudieeʼ stipa ca ni qué gapa» (Ezeq. 34:16). Maʼ gucané Jehová stale hermanu guibiguetaʼ gaca xhamígucaʼ laa sti biaje. Nga runi cadi guiaandaʼ lii, laaca racaláʼdxibe gacanebe lii chuʼluʼ jma gaxha de laabe.